ថ្ងៃសៅរ៍ពិសិដ្ឋ រាត្រីបុណ្យចម្លង ឆ្នាំ«ក»
ព្រះយេស៊ូមានជ័យជម្នះលើសេចក្តីស្លាប់
ពណ៌ស

រាត្រីនេះ ជាពិធីបុណ្យកំពូលនៃពិធីបុណ្យទាំងឡាយក្នុងគ្រីស្តសាសនា គឺគ្រីស្តបរិស័ទទូទាំងសកលលោក នាំគ្នាលើកតម្កើងព្រះយេស៊ូដែលមានព្រះជន្មរស់ឡើងវិញ។ ព្រឹត្តិការណ៍នេះអស្ចារ្យពេកពិបាកស្រមៃ និងជឿផង។ គ្រីស្តបរិស័ទត្រូវនឹកសញ្ជឹងគិតអំពីព្រះយេស៊ូមានព្រះជន្មរស់ឡើងវិញនោះ។ កុំនឹកស្មានថា ព្រះសពព្រះអង្គគ្រាន់តែកម្រើករវើកសាជាថ្មី និងរស់ដូចពីមុន ឬព្រះអង្គចាប់ជាតិនោះឡើយ។ ពាក្យថា “ព្រះយេស៊ូមានព្រះជន្មរស់ឡើងវិញ” មានន័យថា៖

– សព្វថ្ងៃព្រះអង្គមានព្រះជន្មពិតមែន តាមរបៀបផ្សេងពីមុន។
– ព្រះជាម្ចាស់បានលើកព្រះយេស៊ូឡើងឱ្យគង់នៅជាមួយព្រះអង្គ។ ព្រះយេស៊ូពោរពេញដោយជីវិតថ្មី គឺពោរពេញដោយព្រះវិញ្ញាណ និងដោយសិរីរុងរឿងដែលជាព្រះជន្មផ្ទាល់របស់ព្រះជាម្ចាស់។
– ព្រះអង្គគង់នៅជាមួយអស់អ្នកដែលផ្ញើជីវិតទាំងស្រុងលើព្រះអង្គ ព្រះអង្គកែប្រែចិត្តគំនិតរបស់អ្នកជឿឱ្យមានចិត្តគំនិតដូចព្រះអង្គ ទ្រង់នាំគេឱ្យអត់ទោសដល់អ្នកដទៃ ឱ្យយកចិត្តទុកដាក់ដល់អ្នកតូចតាច ឱ្យមានចិត្តនឹងនក្នុងពេលកើតទុក្ខលំបាក ។ល។
– សព្វថ្ងៃ ព្រះអង្គសាងពិភពលោកថ្មី គឺតាំងព្រះរាជ្យព្រះជាម្ចាស់ដោយចាក់បង្ហូរព្រះវិញ្ញាណ។

ពិធីបុណ្យក្នុងរាត្រីនេះចែកជាបួនភាគៈ

១- មុនដំបូង គ្រីស្តបរិស័ទលើកតម្កើង ព្រះគ្រីស្តជាពន្លឺបំភ្លឺមនុស្សលោក។
២- បន្ទាប់មក គ្រីស្តបរិស័ទលើកតម្កើង ព្រះគ្រីស្តជាព្រះបន្ទូលនៃព្រះជាម្ចាស់។
៣- រួចគ្រីស្តបរិស័ទលើកតម្កើង ព្រះគ្រីស្តដែលប្រទានជីវិតថ្មីដល់អ្នកជឿ។
៤- ជាទីបញ្ចប់ គ្រីស្តបរិស័ទលើកតម្កើងព្រះគ្រីស្តដែលប្រទានព្រះកាយ និងព្រះលោហិតព្រះអង្គឱ្យអ្នកជឿទុកជាអាហារផ្តល់ជីវិត។

១- ពិធីគោរពព្រះគ្រីស្តជាពន្លឺបំភ្លឺមនុស្សលោក

លោកបូជាចារ្យសូមព្រះជាម្ចាស់ប្រទានពរដល់ភ្លើងថ្មី

បពិត្រព្រះអម្ចាស់ជាព្រះបិតា! ព្រះអង្គប្រោសព្រះយេស៊ូឱ្យមានព្រះជន្មរស់ឡើងវិញ និងបញ្ចេញរស្មីនៃសិរីរុងរឿងរបស់ព្រះអង្គក្នុងភាពងងឹតនៃពិភពលោក ដូចអណ្តាតភ្លើងដែលភ្លឺនៅកណ្តាលយប់អន្ធការ។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យស្គាល់ឋានៈរបស់ខ្លួនជាបុត្រធីតារបស់ព្រះអង្គ។ សូមប្រោសយើងខ្ញុំឱ្យយកចិត្តទុកដាក់ស្វែងរកព្រះគ្រីស្ត ដើម្បីឱ្យថ្ងៃណាមួយយើងខ្ញុំអាចទៅរួមជាមួយព្រះអង្គនៅស្ថានបរមសុខផង។

លោកបូជាចារ្យអុជទៀនជ័យ ហើយបន្លឺសម្លេងថា៖ ព្រះពន្លឺព្រះគ្រីស្ត

គ្រីស្តបរិស័ទឆ្លើយថា៖ សូមអរព្រះគុណព្រះជាម្ចាស់។ បូជាចារ្យបន្លឺសម្លេងបីដង គឺនៅពេលអុជទៀតម្តង នៅពេលចូលវិហារម្តង ម្ដងទៀតនៅពេលតម្កល់លើជើង។
គ្រីស្តបរិស័ទហែក្បួនចូលក្នុងព្រះវិហារតាមទៀននេះ ដែលជានិមិត្តរូបរបស់ព្រះគ្រីស្តមានព្រះជន្មរស់ឡើងវិញ។ ព្រះយេស៊ូដែលមានព្រះជន្មរស់ឡើងវិញ ប្រៀបបាននឹងពន្លឺមកបំភ្លឺចិត្តគំនិតមនុស្សលោក។ ព្រះគ្រីស្តផ្តល់ឱ្យមនុស្សលោកយល់ពីការរស់នៅតាមរបៀបថ្មី។ ព្រះគ្រីស្តនាំយើងឆ្លងកាត់ពីទីងងឹតទៅកាន់ទីភ្លឺ។ គ្រីស្តបរិស័ទច្រៀងបន្ទរ បូជាចារ្យតម្កល់ទៀនជ័យលើជើង។ គួរអុជធូប។
លោកបូជាចារ្យ ឬលោកឧបដ្ឋាក លើកតម្កើងសិរីរុងរឿងរបស់ព្រះគ្រីស្តដែលមានព្រះជន្មរស់ឡើងវិញ ដោយច្រៀងបទនេះឬបទដែលមានអត្ថន័យប្រហែលគ្នា។
សូមពពួកទេវទូតទាំងឡាយនៅស្ថានបរមសុខ ត្រេកអរសប្បាយរីករាយឡើង ចូរនាំគ្នាស្មូតសរសើរព្រះគ្រីស្តដែលមានព្រះជន្មរស់ឡើងវិញ! សូមពពួកទេវទូតទាំងឡាយ លើកតម្កើងព្រះអង្គជាព្រះមហាក្សត្រប្រកបដោយជ័យជម្នះដ៏មហាប្រសើរ! សូមផែនដីទាំងមូលសប្បាយរីករាយឡើង! ព្រោះពន្លឺដ៏ចិញ្ចែងចិញ្ចាចរបស់ព្រះគ្រីស្តបានបញ្ចាំងលើអ្នកហើយ! ពន្លឺរបស់ព្រះមហាក្សត្រដែលមានព្រះជន្មអស់កល្បជានិច្ច បានបំភ្លឺមកយើងហើយ! ព្រះពន្លឺបានកម្ចាត់កម្ចាយភាពងងឹតចេញពីពិភព លោកយើងនេះហើយ! សូមព្រះសហគមន៍ទាំងមូលរីករាយឡើង! សូមមនុស្សគ្រប់ជាតិសាសន៍អបអរសាទរព្រះគ្រីស្តឡើង!។
បពិត្រព្រះបិតាដ៏មានតេជានុភាពសព្វប្រការ ជាព្រះដែលមនុស្សលោកមើលពុំឃើញ! យើងខ្ញុំសូមលើកតម្កើងសិរីរុងរឿងព្រះអង្គ!។ នៅយប់នេះ យើងខ្ញុំក៏សូមលើកតម្កើងព្រះយេស៊ូគ្រីស្ត ជាព្រះបុត្រាតែមួយរបស់ព្រះអង្គ ហើយជាអម្ចាស់យើងខ្ញុំ!។ មានតែព្រះគ្រីស្តមួយព្រះអង្គទេដែលរំដោះយើងខ្ញុំឱ្យបានរួចពីបាប។ ព្រះអង្គបានបង្ហូរព្រះលោហិតដើម្បីលាងបាប និងលើកលែងទោសយើងខ្ញុំ
– នៅរាត្រីនេះព្រះអង្គបានកម្ចាត់កម្ចាយភាពងងឹតចេញពីមនុស្សបាប។
– នៅរាត្រីនេះ ព្រះអង្គរំដោះអស់អ្នកដែលជឿសង្ឃឹមលើព្រះអង្គក្នុងពិភពលោកទាំងមូលឱ្យរួចពីបាប។ ព្រះអង្គក៏ទទួលអស់អ្នកដែលជឿ ទុកជាបុត្រធីតាក្នុងគ្រួសារព្រះអង្គ។
– ក្នុងរាត្រីនេះ ព្រះគ្រីស្តមានព្រះជន្មរស់ឡើងវិញ ទ្រង់ឈ្នះមច្ចុរាជ។ បើកុំតែព្រះអង្គរំដោះយើងខ្ញុំ ជីវិតយើងខ្ញុំគ្មានតម្លៃថ្លៃថ្នូរអ្វីទេ។
– បពិត្រព្រះជាម្ចាស់ប្រកបដោយព្រះហប្ញទ័យមេត្តាករុណាយ៉ាងក្រៃលែង។ តើនរណាអាចយល់អំពីព្រះហប្ញទ័យដ៏សប្បុរសរបស់ព្រះអង្គសព្វគ្រប់បាន?
– ព្រះជាម្ចាស់មានព្រះហប្ញទ័យសប្បុរសរហូតដល់បញ្ជូនព្រះបុត្រារបស់ព្រះអង្គឱ្យយាងមករំដោះយើងខ្ញុំជាទាសាទាសី!។
– ក្នុងរាត្រីនេះ យើងខ្ញុំសប្បាយណាស់ត្បិតស្ថានបរមសុខ និងផែនដីរួបរួមគ្នា! យើងខ្ញុំអាចស្គាល់ព្រះភក្ត្រព្រះអង្គបាន។
– ក្នុងរាត្រីនេះ ព្រះអង្គប្រោសអ្នកបាបឱ្យបានបរិសុទ្ធ និងប្រោសអ្នកមានទុក្ខឱ្យមានអំណរសប្បាយវិញ។
បពិត្រព្រះបិតាដ៏វិសុទ្ធ! សូមទ្រង់ព្រះមេត្តាទទួលពាក្យសរសើររបស់យើងខ្ញុំក្នុងរាត្រីនេះ យើងខ្ញុំសូមយកទៀននេះថ្វាយព្រះអង្គ គឺទៀននេះនឹងភ្លឺឡើងដូចព្រះយេស៊ូជាពន្លឺបំភ្លឺដំណើរជីវិតរបស់យើងខ្ញុំ។ សូមឱ្យទៀនដែលយើងខ្ញុំសូមថ្វាយនៅរាត្រីនេះឆេះរហូតដល់ភ្លឺ ដូចព្រះគ្រីស្តមានព្រះជន្មរស់ឡើងវិញ ទ្រង់បំភ្លឺសត្វលោកជាដរាបរៀងទៅ។ យើងខ្ញុំសូមអង្វរព្រះគ្រីស្ត ដែលមានព្រះជន្មរស់ឡើងវិញ សូមទ្រង់ថែរក្សាយើងខ្ញុំទាំងអស់គ្នាឱ្យបានរស់នៅយ៉ាងសុខសាន្ត។ ព្រះយេស៊ូគ្រីស្តជាព្រះបុត្រារបស់ព្រះបិតា ព្រះអង្គក៏ជាព្រះអម្ចាស់យើងខ្ញុំ ទ្រង់មានព្រះជន្មគង់នៅ ទ្រង់សោយរាជ្យរួមជាមួយព្រះបិតា និងព្រះវិញ្ញាណអស់កល្បជាអង្វែងតរៀងទៅ។ អាម៉ែន។

២- ពិធីគោរពព្រះគ្រីស្តជាបន្ទូលនៃព្រះជាម្ចាស់

ក្នុងរាត្រីបុណ្យចម្លង គ្រីស្តបរិស័ទនឹករឭកអំពីធម៌មេត្តាករុណារបស់ព្រះជាម្ចាស់ ដែលបានប្រោសមនុស្សលោកតាំងពីដើមរៀងមក។
ក្នុងចំណោមជាតិសាសន៍ទាំងឡាយ ព្រះអង្គបានជ្រើសរើសជនជាតិអ៊ីស្រាអែលឱ្យធ្វើជាប្រជារាស្ត្រផ្ទាល់របស់ព្រះអង្គ។
ក្នុងចំណោមអត្ថបទទាំងប៉ុន្មានខាងក្រោមនេះ ត្រូវរើសតែពីរឬបី តាមសេចក្តីត្រូវការ។ ធម្មតាត្រូវតែអានអត្ថបទទី ៣ ដែលតំណាលពីបុណ្យចម្លងនៃប្រជាជនអ៊ីស្រាអែលពីដើម។

អត្ថបទទី ១

ព្រះជាម្ចាស់សព្វព្រះហប្ញទ័យប្រទានជីវិតដល់សត្វលោកទាំងឡាយ។ ព្រះអង្គតែងតាំងមនុស្សឱ្យត្រួតត្រាពិភពលោកក្នុងព្រះនាមព្រះអង្គ។ ព្រះគ្រីស្តប្រទានជីវិតថ្មីដល់អ្នកជឿសង្ឃឹមលើព្រះអង្គ។

សូមថ្លែងព្រះគម្ពីរកំណើត កណ ១,១-២,២(ឬយ៉ាងខ្លី ១,២៦-៣១)

ប្រសិនបើអានយ៉ាងខ្លីសូមរំលងវគ្គទាំងប៉ុន្មានខាងក្រោម
កាលពីដើមដំបូងបង្អស់ ព្រះជាម្ចាស់បានបង្កើតផ្ទៃមេឃ និងផែនដី។ នៅគ្រានោះ ផែនដីគ្មានរូបរាង ហើយនៅទទេ មានតែភាពងងឹតពីលើជម្រៅទឹក។ ព្រះវិញ្ញាណរបស់ ព្រះជាម្ចាស់នៅរេរាពីលើផ្ទៃទឹក។

ព្រះជាម្ចាស់មានព្រះបន្ទូលថា៖ «ចូរមានពន្លឺឡើង!» ពន្លឺក៏កើតមានឡើង។ ព្រះជាម្ចាស់ទតឃើញថា ពន្លឺនោះល្អប្រសើរហើយ។ ព្រះអង្គក៏ញែកពន្លឺចេញពីភាពងងឹត។ ព្រះជាម្ចាស់ហៅពន្លឺថា “ថ្ងៃ” និងហៅភាពងងឹតថា “យប់”។ ពេលនោះ មានល្ងាចមានព្រឹក គឺជាថ្ងៃទីមួយ។

ព្រះជាម្ចាស់មានព្រះបន្ទូលថា៖ «ចូរឱ្យមានលំហដ៏រឹងមាំនៅកណ្តាលទឹក ដើម្បីញែកទឹកចេញពីគ្នា»។ ព្រះជាម្ចាស់ក៏បង្កើតលំហដ៏រឹងមាំនោះ ហើយញែកទឹកដែលនៅខាងក្រោមចេញពីទឹកដែលនៅខាងលើ។ ការណ៍នេះក៏កើតមានឡើងដូច្នេះ។ ព្រះជាម្ចាស់ហៅលំហដ៏រឹងមាំនោះថា “មេឃ”។ ពេលនោះ មានល្ងាចមានព្រឹក គឺជាថ្ងៃទីពីរ។

ព្រះជាម្ចាស់មានព្រះបន្ទូលថា៖ «ចូរឱ្យទឹកដែលនៅពីក្រោមមេឃ ផ្តុំគ្នានៅកន្លែងតែមួយ និងឱ្យគោកលេចចេញមក។ ការណ៍នេះក៏កើតមានឡើងដូច្នេះ។ ព្រះជាម្ចាស់ ហៅគោកនោះថា “ដី” រីឯទឹកដែលផ្តុំគ្នាវិញទ្រង់ហៅថា “សមុទ្រ”។ ព្រះជាម្ចាស់ទតឃើញថា ដីនិងសមុទ្រល្អប្រសើរហើយ។ ព្រះជាម្ចាស់មានព្រះបន្ទូលថា៖ «ចូរឱ្យដីដុះតិណជាតិធញ្ញជាតិដែលមានគ្រាប់ពូជ និងរុក្ខជាតិដែលបង្កើតផ្លែលើផែនដីតាមពូជរបស់វា និងមានគ្រាប់បន្តពូជឡើង!»។ ការណ៍នេះក៏កើតឡើងដូច្នេះ។ ដីក៏ដុះតិណជាតិធញ្ញជាតិ ដែលមានគ្រាប់ពូជតាមពូជរបស់វា និងរុក្ខជាតិដែលបង្កើតផ្លែមានគ្រាប់ពូជតាមពូជរបស់វា។ ព្រះជាម្ចាស់ទតឃើញថា អ្វីៗទាំងនោះល្អប្រសើរហើយ។ ពេលនោះមានល្ងាចមានព្រឹក គឺជាថ្ងៃទីបី។

ព្រះជាម្ចាស់មានព្រះបន្ទូលថា៖ «ចូរឱ្យមានដុំពន្លឺនៅក្នុងលំហអាកាស ដើម្បីញែកថ្ងៃចេញពីយប់ ទុកជាសម្គាល់សម្រាប់កំណត់ពេលវេលា ថ្ងៃ និងឆ្នាំ ហើយជាដុំពន្លឺនៅលើមេឃ ដើម្បីបំភ្លឺផែនដី»។ ការណ៍នេះកើតមានឡើងដូច្នេះ។ ព្រះជាម្ចាស់បានបង្កើតដុំពន្លឺធំៗពីរ គឺដុំពន្លឺមួយដែលធំជាង ឱ្យគ្រប់គ្រង់នៅពេលថ្ងៃ ហើយដុំពន្លឺមួយដែលតូចជាង ឱ្យគ្រប់គ្រងនៅពេលយប់។ ព្រះអង្គក៏បានបង្កើតផ្កាយទាំងឡាយដែរ។ ព្រះជាម្ចាស់ដាក់ដុំពន្លឺទាំងនោះក្នុងលំហអាកាសដើម្បីបំភ្លឺផែនដី និងគ្រប់គ្រងនៅពេលថ្ងៃ និងនៅពេលយប់ ហើយដើម្បីញែកពន្លឺចេញពីភាពងងឹត។ ព្រះជាម្ចាស់ទតឃើញថា អ្វីៗទាំងនោះល្អប្រសើរហើយ។ ពេលនោះមានល្ងាចមានព្រឹក គឺជាថ្ងៃទីបួន។

ព្រះជាម្ចាស់មានព្រះបន្ទូលថា៖ «ចូរឱ្យមានសត្វរស់រវើកយ៉ាងច្រើនកុះករនៅក្នុងទឹក និងចូរឱ្យមានបក្សាបក្សីហើរពីលើដីនៅក្នុងលំហអាកាស»។ ព្រះជាម្ចាស់បានបង្កើត សត្វធំៗអស្ចារ្យក្នុងសមុទ្រ ព្រមទាំងសត្វទាំងប៉ុន្មានដែលហែលរវើករវ័ណ្ឌពាសពេញក្នុងទឹក តាមពូជរបស់វា។ ព្រះអង្គក៏បង្កើតបក្សាបក្សីតាមពូជរបស់វាដែរ។ ព្រះជាម្ចាស់ទតឃើញថា សត្វទាំងនោះល្អប្រសើរហើយ។ ព្រះជាម្ចាស់ប្រទានពរឱ្យសត្វទាំងនោះ ដោយមានព្រះបន្ទូលថា៖ «ចូរបង្កើតកូនចៅឱ្យកើនបានច្រើនឡើង ពាសពេញក្នុងទឹកសមុទ្រ ហើយឱ្យបក្សាបក្សីកើនបានច្រើនឡើងនៅលើផែនដីដែរ!»។ ពេលនោះ មានល្ងាចមានព្រឹក គឺជាថ្ងៃទីប្រាំ។

ព្រះជាម្ចាស់មានព្រះបន្ទូលថា៖ «ចូរឱ្យដីបង្កើតសត្វផ្សេងៗតាមពូជរបស់វា គឺមានសត្វស្រុក សត្វព្រៃ និងសត្វល្អិតៗតាមពូជរបស់វា»។ ការណ៍នេះក៏កើតមានឡើងដូច្នេះ។ ព្រះជាម្ចាស់បង្កើតសត្វព្រៃតាមពូជរបស់វា សត្វស្រុកតាមពូជរបស់វា និងសត្វល្អិតៗទាំងប៉ុន្មាននៅលើដីតាមពូជរបស់វាដែរ។ ព្រះជាម្ចាស់ទតឃើញថា សត្វទាំងនោះល្អប្រសើរហើយ។

ប្រសិនបើអានយ៉ាងខ្លី សូមអានពីនេះទៅ
ព្រះជាម្ចាស់មានព្រះបន្ទូលថា៖ «យើងបង្កើតមនុស្សជាតំណាងរបស់យើង គឺឱ្យមានលក្ខណៈដូចយើង ដើម្បីឱ្យគេមានអំណាចលើត្រីសមុទ្រ លើបក្សាបក្សីដែលហើរនៅលើមេឃ លើសត្វដែលនៅលើផែនដីទាំងមូល និងលើសត្វល្អិតៗទាំងប៉ុន្មានដែលលូនវារនៅលើដីផង»។

ព្រះជាម្ចាស់បង្កើតមនុស្សជាតំណាងរបស់ព្រះអង្គ ព្រះអង្គបានបង្កើតគេឱ្យមានលក្ខណៈដូចព្រះជាម្ចាស់ ព្រះអង្គបង្កើតមនុស្សជាបុរសជាស្ត្រី។ ព្រះជាម្ចាស់ប្រទានពរឱ្យមនុស្ស គឺព្រះអង្គមានព្រះបន្ទូលថា៖ «ចូរបង្កើតកូនចៅឱ្យកើនបានច្រើនឡើងពាសពេញលើផែនដីហើយត្រួតត្រាផែនដីទៅ! ចូរមានអំណាចលើត្រីសមុទ្រ លើបក្សាបក្សីដែលហើរនៅលើមេឃ និងលើសត្វល្អិតៗទាំងប៉ុន្មានដែលលូនវារនៅលើដី!»។

ព្រះជាម្ចាស់មានព្រះបន្ទូលថា៖ «មើល៍! យើងប្រគល់ធញ្ញជាតិទាំងប៉ុន្មានដែលមានគ្រាប់ពូជដុះនៅពាសពេញលើផែនដី និងរុក្ខជាតិដែលបង្កើតផ្លែ មានគ្រាប់បន្តពូជឱ្យអ្នក រាល់គ្នាសម្រាប់ធ្វើជាអាហារ។ យើងក៏ឱ្យធញ្ញជាតិទាំងប៉ុន្មានដល់សត្វទាំងអស់នៅលើផែនដី ដល់បក្សាបក្សីដែលហើរនៅលើមេឃ ដល់សត្វល្អិតៗទាំងប៉ុន្មានដែលលូនវារនៅលើដី គឺដល់សត្វទាំងប៉ុន្មានដែលមានដង្ហើមជីវិតសម្រាប់ធ្វើអាហារ»។ ការណ៍នេះ ក៏កើតមានឡើងដូច្នេះ។ ព្រះជាម្ចាស់ទតឃើញអ្វីៗទាំងអស់ដែលព្រះអង្គបានបង្កើតមក ទ្រង់ឈ្វេងយល់ថាល្អប្រសើរណាស់។ ពេលនោះ មានល្ងាចមានព្រឹក គឺជាថ្ងៃទីប្រាំមួយ។

ប្រសិនបើអានយ៉ាងខ្លី សូមអានត្រឹមនេះ
ផ្ទៃមេឃ ផែនដី អ្វីៗទាំងអស់នៅផ្ទៃមេឃ និងនៅលើផែនដីកើតឡើងដូច្នេះរួចរាល់សព្វគ្រប់អស់ហើយ។ នៅថ្ងៃទីប្រាំពីរ ព្រះជាម្ចាស់បង្ហើយកិច្ចការដែលព្រះអង្គបានធ្វើចប់សព្វគ្រប់។ ក្រោយពីព្រះអង្គបានបញ្ចប់ការទាំងនោះមក ទ្រង់ក៏ឈប់សម្រាក។

ទំនុកតម្កើងលេខ ១០៤(១០៣),១-២.៥-៦.១០.១២-១៤.២៤.៣៥ បទពាក្យ ៧

១	ខ្ញុំសូមតម្កើងព្រះអម្ចាស់	ប្រសើរខ្លាំងណាស់អស់ពីចិត្ត
	ព្រះអង្គជាព្រះនៃខ្ញុំពិត	ឧត្តមបំផុតលើលោកា	។
២	ព្រះអង្គទ្រង់យកពន្លឺមក	ដណ្តប់គ្រងគ្របជាភូសា
	ទ្រង់លាតអស់ទាំងផ្ទៃមេឃា	ធ្វើព្រះពន្លាល្អឥតអាក់	។
៥	រីឯផែនដីមហាធំ	ទ្រង់បានតាំងមាំឥតរង្គើ
	នៅលើគ្រឹះរឹងឥតអ្វីស្មើ	ឥតមានរង្គើមាំពេកកូវ	។
៦	ព្រះអង្គបានយកសមុទ្រគ្រប	ដណ្តប់រុំស្រោបដូចខោអាវ
	ទោះកំពូលភ្នំក៏គង់ត្រូវ	មានទឹកគ្របនៅពីលើដែរ	។
១០	ទ្រង់បញ្ជូនទឹកពីប្រភព	ឱ្យហូរសាយសព្វទៅក្នុងជ្រោះ
	ហូរតាមជ្រលងភ្នំទាំងអស់	មិនមានចន្លោះសព្វទិសា	។
១២	បក្សីបក្សាធ្វើសំបុក	រស់នៅអែអុកច្រើនពន់ពេក
	គេយំពិរោះខ្លាំងអនេក	នៅគ្រប់តាមមែកដើមព្រឹក្សា	។
១៣	ព្រះអង្គស្រោចស្រពដីទាំងឡាយ	ពីស្ថានខ្ពស់ឆ្ងាយឥតឧបមា
	ទ្រង់ប្រទានឱ្យមានគង្គា	បរិបូណ៌ហូរហៀរលើផែនដី	។
១៤	ព្រះអង្គធ្វើឱ្យមានដុះស្មៅ	ឱ្យដល់សត្វទៅជាចំនី
	ដំណាំស្អេកស្កះច្រើនពេញដី	ដល់មនុស្សប្រុសស្រីបរិភោក្តា	។
២៤	បពិត្រព្រះអើយព្រះអម្ចាស់	គ្រប់ស្នាព្រះហស្តច្រើនមិនតិច
	ផែនដីមានអ្វីច្រើនអនេក	សុទ្ធតែកើតមកពីព្រះអង្គ	។
៣៥	សូមឱ្យអ្នកបាបវិនាសបាត់	រលាយខ្ចាយខ្ចាត់ផុតស្រឡះ
	សូមឱ្យពួកគេអស់ទាំងនោះ	រលាយបាត់អស់ក្លាយជាដី	។
	រីឯរូបខ្ញុំសូមប្រណម្យ	ហត្ថាបង្គំថ្វាយម្ចាស់ថ្លៃ
	សូមលើកតម្កើងជោគសិរី	រុងរឿងប្រពៃព្រះអម្ចាស់	។

ឬទំនុកតម្កើងលេខ ៣៣ (៣២), ៤-៧.១២-១៣.២០ បទព្រហ្មគីតិ

៤	ដ្បិតព្រះជាអម្ចាស់	បន្ទូលច្បាស់ពិតទៀងត្រង់
	ព្រះអង្គតែងផ្ចិតផ្ចង់	ហើយតម្រង់តាមសន្យា	។
៥	ព្រះអង្គសព្វព្រះទ័យ	នឹងសេចក្តីពិតសត្យា
	សុចរិតគ្រប់ប្រការ	ហើយរក្សាយុតិ្តធម៌	។
	ផែនដីទាំងមូលថ្លែង	ខំសម្តែងដោយអំណរ
	ពីហប្ញទ័យបវរ	ករុណាល្អព្រះជាម្ចាស់	។
៦	ផ្ទៃមេឃហ្វូងតារា	កើតដោយសារបន្ទូលច្បាស់
	ដោយបញ្ជារបស់	ព្រះជាអម្ចាស់នៃយើង	។
៧	ព្រះអង្គបានធ្វើឱ្យ	សមុទ្រថយផ្តុំគ្នាឡើង
	រួចទ្រង់ក៏បង្ខាំង	សមុទ្រគាំងមួយកន្លែង	។
១២	ប្រជាដែលគោរព	បម្រើគ្រប់គ្មានទំនេរ
	ទុកជាព្រះឥតប្រែ	នោះជួបតែសុខគ្រប់គ្រា	។
	ជនដែលព្រះអង្គជ្រើស	ឥតមានឃ្នើសជាទ្រព្យា
	ជារាស្ត្រផ្ទាល់អង្គា	នោះមុខជារួចផុតទុក្ខ	។
១៣	ព្រះម្ចាស់ទតមកពី	ឃើញមនុស្សយើងទាំងអស់
	ជាខែលដ៏ចំណាន	សង្គ្រោះប្រាណផុតភិតភ័យ	។

ពាក្យអធិដ្ឋាន

បពិត្រព្រះអម្ចាស់ជាព្រះបិតាប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! ព្រះអង្គប្រព្រឹត្តអ្វីៗទាំងអស់ដោយព្រះប្រាជ្ញាញាណដ៏ប្រសើរបំផុត។ ព្រះអង្គប្រទានឱ្យយើងខ្ញុំមានលក្ខណៈដ៏ប្រសើរដូចព្រះអង្គ ព្រះអង្គក៏ប្រោសប្រទានយើងខ្ញុំឱ្យទៅជាបុត្រធីតារបស់ព្រះអង្គផង។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យទទួលស្គាល់ឋានៈដ៏ថ្លៃថ្នូររបស់ខ្ញុំផង។

អត្ថបទទី ២

អ្នកនិពន្ធរឿងនិទាននេះចង់ពន្យល់ឱ្យដឹងថា មនុស្សយើងត្រូវស្រឡាញ់ព្រះអម្ចាស់លើសអ្វីៗទាំងអស់។ លោកអប្រាហាំសុខចិត្តបូជាកូនថ្វាយព្រះអម្ចាស់ ដូចព្រះអង្គសព្វព្រះហប្ញទ័យឱ្យព្រះបុត្រាបូជាព្រះជន្មដែរ។

សូមថ្លែងព្រះគម្ពីរកំណើតពិភពលោក កណ ២២,១-១៨ (ឬយ៉ាងខ្លី ១-២.៩-១៣,១៥-១៨)

នៅពេលនោះ ព្រះជាម្ចាស់ល្បងមើលចិត្តលោកអប្រាហាំ។ ព្រះអង្គមានព្រះបន្ទូលហៅលោកថា៖ «អប្រាហាំអើយ!»។ លោកឆ្លើយថា៖ «ក្រាបទូលព្រះអម្ចាស់!»។ ព្រះជាម្ចាស់មានព្រះបន្ទូលថា៖ «ចូរយកអ៊ីសាក គឺកូនដ៏ជាទីស្រឡាញ់តែមួយរបស់អ្នក ហើយទៅស្រុកម៉ូរីយ៉ាទៅ។ នៅទីនោះ ចូរយកវាធ្វើជាយញ្ញបូជានៅលើភ្នំដែលយើងនឹងបង្ហាញអ្នក»។

ប្រសិនបើលើអានយ៉ាងខ្លី សូមរំលងវគ្គខាងក្រោមនេះ
លោកអប្រាហាំក្រោកពីព្រលឹមចងកែបលា ហើយយកអ្នកបម្រើពីរនាក់ ព្រមទាំងអ៊ីសាកជាកូនមកជាមួយផង។ លោកពុះអុសសម្រាប់ដុតតង្វាយ រួចហើយក៏ចេញដំណើរឆ្ពោះទៅកន្លែងដែលព្រះជាម្ចាស់មានព្រះបន្ទូលប្រាប់លោក។ លុះដល់ថ្ងៃទីបី លោកងើបមុខឡើង ឃើញកន្លែងនោះពីចម្ងាយ។ លោកប្រាប់អ្នកបម្រើថា៖ «ចូរចាំនៅទីនេះសិន ហើយមើលលាផង! ខ្ញុំនិងកូនខ្ញុំនឹងឡើងទៅថ្វាយបង្គំព្រះជាម្ចាស់នៅកន្លែងនោះរួចហើយយើងនឹងត្រឡប់មកវិញ»។
លោកអប្រាហាំយកអុសសម្រាប់ដុតតង្វាយមកឱ្យអ៊ីសាកលី រីឯលោកកាន់ដែកភ្លើង និងកាំបិតហើយទាំងពីរនាក់បណ្តើរគ្នាទៅ។ អ៊ីសាកនិយាយទៅកាន់លោកអប្រាហាំជាឪពុកថា៖ «ពុក»។ លោកអប្រាហាំឆ្លើយថា៖ «មានការអីកូន?»។ អ៊ីសាកពោលថា៖ «យើងមានភ្លើង មានអុសហើយ ចុះចៀមសម្រាប់ធ្វើយញ្ញបូជានៅឯណា?»។ លោកអប្រាហាំឆ្លើយថា៖ «ព្រះជាម្ចាស់នឹងប្រទានឱ្យណា៎កូន!»។ បន្ទាប់មក អ្នកទាំងពីរក៏បន្តដំណើរទៅមុខទៀត។

ប្រសិនបើអានយ៉ាងខ្លី សូមអានវគ្គខាងក្រោមនេះ
លុះអ្នកទាំងពីរមកដល់កន្លែងដែលព្រះជាម្ចាស់បានបង្ហាញប្រាប់ហើយ លោកអប្រាហាំសង់អាសនៈមួយ ហើយយកអុសមកគរពីលើ។ លោកចងអ៊ីសាកជាកូន រួចយកទៅដាក់ពីលើគំនរអុសដែលនៅលើអាសនៈ។ បន្ទាប់មក លោកអប្រាហាំលូកដៃទៅយកកាំបិតបម្រុងនឹងសម្លាប់កូន។ ពេលនោះ ស្រាប់តែទេវទូតរបស់ព្រះអម្ចាស់ហៅលោកពីលើមេឃមកថា៖ «អប្រាហាំអើយ! អប្រាហាំ!»។ លោកអប្រាហាំឆ្លើយថា៖ «ក្រាបទូល!»។ ទេវទូតពោលទៀតថា៖ «កុំប្រហារជីវិតកូនឡើយ! កុំធ្វើអ្វីវាឱ្យសោះ ដ្បិតឥឡូវនេះយើងដឹងថា អ្នកពិតជាគោរពកោតខ្លាចព្រះជាម្ចាស់មែន គឺអ្នកមិនរួញរានឹងយកកូនតែមួយរបស់អ្នកមកថ្វាយយើងឡើយ»។

ប្រសិនបើអានយ៉ាងខ្លី សូមរំលងវគ្គខាងក្រោយនេះ
លោកអប្រាហាំងើបមុខឡើង ឃើញពពែឈ្មោលមួយជាប់ស្នែងនៅគុម្ពោតឈើក្បែរនោះ។ លោកក៏ទៅចាប់ពពែនោះមកធ្វើយញ្ញបូជាជំនួសកូនប្រុសគាត់។

ប្រសិនបើអានយ៉ាងខ្លី សូមអានវគ្គខាងក្រោមនេះ
ទេវទូតរបស់ព្រះអម្ចាស់ហៅលោកអប្រាហាំពីលើមេឃម្តងទៀតថា៖ «ព្រះអម្ចាស់មានព្រះបន្ទូលថា ដោយអ្នកបានធ្វើដូច្នេះ គឺអ្នកមិនរួញរានឹងយកកូនតែមួយរបស់អ្នកមកថ្វាយយើង យើងសូមសន្យាយ៉ាងម៉ឺងម៉ាត់ថា ដូចយើងពិតជាព្រះអម្ចាស់យ៉ាងណា យើងក៏ពិតជានឹងឱ្យពរអ្នក ហើយនឹងធ្វើឱ្យពូជពង្សអ្នកបានកើនចំនួនច្រើនឡើងៗ ដូចចំនួនផ្កាយនៅលើមេឃ និងដូចគ្រាប់ខ្សាច់នៅឆ្នេរសមុទ្រយ៉ាងនោះដែរ។ ពូជពង្សអ្នកនឹងគ្រប់គ្រងលើពួកមារសត្រូវ។ ប្រជាជាតិទាំងប៉ុន្មាននៅលើផែនដីនឹងឱ្យពរគ្នាទៅវិញទៅមកដោយសារពូជពង្សអ្នក ព្រោះអ្នកបានស្តាប់បង្គាប់យើង»។

ទំនុកតម្កើងលេខ ១៦(១៥),៥.៨-១១ បទពាក្យ ៧

១	បពិត្រព្រះអម្ចាស់ឧត្តម	ព្រះអង្គជាចំណែកស្រស់ស្រាយ
	មត៌កនៃខ្ញុំឥតក្លែងក្លាយ	ផ្តល់អ្វីទាំងឡាយតាមប្រាថ្នា	។
៨	ខ្ញុំនឹកដល់ព្រះអម្ចាស់ជាប់	ដែលជាទម្លាប់ទ្រង់គង់ក្បែរ
	ខាងស្តាំរូបខ្ញុំឥតប្រួលប្រែ	ខ្ញុំមិនបែកបែរញាប់ញ័រឡើយ	។
៩	ហេតុនេះបានជាខ្ញុំរីករាយ	ត្រេកអរសប្បាយបានល្ហែល្ហើយ
	ខ្ញុំបានសម្រាកកាយធូស្បើយ	ដោយសុខសាន្តហើយផុតកង្វល់	។
១០	ដ្បិតព្រះអង្គមិនបោះបង់ខ្ញុំ	ឱ្យរងទុក្ខធំស្លាប់សោតសល់
	ព្រះអង្គក៏មិនបណ្តាយដល់	សពបម្រើផ្ទាល់ស្អុយរលួយ	។
១១	ព្រះអង្គបង្ហាញផ្លូវជីវិត	ឱ្យខ្ញុំឃើញពិតគ្មានភ័យព្រួយ
	ដោយព្រះអង្គគង់នៅជាមួយ	ទូលបង្គំគ្មានព្រួយអរសប្បាយ	។
	ដោយព្រះអង្គគង់នៅខាងស្តាំ	ជាប់ជាប្រចាំមិនជិនណាយ
	ទូលបង្គំសែនរីករាយសប្បាយ	អស់កល្បវែងឆ្ងាយតរៀងទៅ	។

ពាក្យអធិដ្ឋាន

បពិត្រព្រះជាម្ចាស់ដ៏វិសុទ្ធបំផុត ព្រះអង្គពិតជាព្រះបិតារបស់អស់អ្នកជឿសង្ឃឹមលើព្រះអង្គ។ ព្រះអង្គសព្វព្រះហប្ញទ័យឱ្យមនុស្សទាំងអស់អាចទៅជាបុត្រធីតារបស់ព្រះអង្គ តាមព្រះបន្ទូលសន្យាដល់លោកអប្រាហាំ។ សូមទ្រង់ព្រះមេត្តាប្រោសយើងខ្ញុំឱ្យទៅជាប្រជារាស្ត្ររបស់ព្រះអង្គ ដែលរស់នៅយ៉ាងសមរម្យតាមឋានៈរបស់យើងខ្ញុំផង។

អត្ថបទទី ៣

សូមថ្លែងព្រះគម្ពីរដំណើរឆ្ពោះទៅកាន់សេរីភាព សរ ១៤,១៥-១៥,១

ជនជាតិអ៊ីស្រាអែលឃើញជនជាតិអេស៊ីបដេញតាមពីក្រោយពួកគេ គេនាំគ្នាតក់ស្លុតជាខ្លាំង។ ព្រះអម្ចាស់មានព្រះបន្ទូលមកកាន់លោកម៉ូសេថា៖ «ហេតុអ្វីបានជាអ្នកស្រែកអង្វរយើងដូច្នេះ? ចូរប្រាប់កូនចៅអ៊ីស្រាអែលឱ្យចេញដំណើរទៅ។ ចូរលើកដំបងរបស់អ្នកឡើង ហើយលើកដៃតម្រង់ទៅសមុទ្រ រួចវាយទឹកសមុទ្រឱ្យញែកចេញពីគា្ន ដើម្បីឱ្យកូនចៅអ៊ីស្រាអែលដើរតាមបាទសមុទ្រ។ រីឯយើងវិញ យើងនឹងធ្វើឱ្យជនជាតិអេស៊ីបមានចិត្តរឹងចចេសដេញតាមក្រោយអ្នករាល់គ្នា។ យើងសម្តែងសិរីរុងរឿងរបស់យើង ដោយប្រហារស្តេចផារ៉ោន និងពលទ័ពទាំងមូលព្រមទាំងកម្ទេចរទេះចម្បាំង និងទ័ពសេះរបស់ស្តេច។ នៅពេលដែលយើងសម្តែងសិរីរុងរឿងដោយប្រហារស្តេចផារ៉ោន ព្រមទាំងកម្ទេចរទេះចម្បាំង និងទ័ពសេះរបស់ស្តេចនោះ ជនជាតិអេស៊ីបនឹងទទួលស្គាល់ថា យើងជាព្រះជាម្ចាស់»។ ទេវទូតរបស់ព្រះជាម្ចាស់ដែលយាងនៅខាងមុខជនជាតិអ៊ីស្រាអែល យាងទៅនៅខាងក្រោយពួកគេ។ រីឯដុំពពកដែលនៅខាងមុខ ក៏ទៅនៅខាងក្រោយពួកគេដែរ។ ដុំពពកនោះ ស្ថិតនៅចន្លោះកងទ័ពអេស៊ីប និងកងទ័ពអ៊ីស្រាអែល។ ដុំពពកនោះធ្វើឱ្យងងឹតម្ខាង និងធ្វើឱ្យម្ខាងទៀតភ្លឺនៅពេលយប់។ ហេតុនេះហើយបានជាពេញមួយយប់ កងទ័ពទាំងពីរមិនបានចូលទៅជិតគ្នាឡើយ។
លោកម៉ូសេលើកដៃតម្រង់ទៅសមុទ្រ។ ពេញមួយយប់នោះ ព្រះអម្ចាស់ធ្វើឱ្យមានខ្យល់បក់ពីទិសខាងកើតយ៉ាងខ្លាំងរុញច្រានទឹកសមុទ្រ ធ្វើឱ្យទឹកសមុទ្ររីងស្ងួត។ ផ្ទៃទឹក ក៏ញែកចេញពីគ្នា ហើយជនជាតិអ៊ីស្រាអែលនាំគ្នាដើរតាមបាតសមុទ្រ ដោយមានទឹកសមុទ្រដូចកំពែងនៅសងខាងពួកគេ។ កងទ័ពអេស៊ីប ទាំងសេះរបស់ព្រះចៅផារ៉ោន ទាំងរទេះចម្បាំង និងពលសេះទាំងប៉ុន្មានដែលដេញតាមពីក្រោយក៏ចូលទៅកណ្តាលសមុទ្រដែរ។ លុះពេលទៀបភ្លឺ ព្រះអម្ចាស់ដែលគង់នៅក្នុងដុំភ្លើង និងដុំពពកទតទៅកងទ័ពអេស៊ីប ធ្វើឱ្យកងទ័ពនោះជ្រួសច្របល់។ ព្រះអង្គធ្វើឱ្យរទេះចម្បាំងរបូតកង់ហើយកឿង ទៅមុខមិនរួច។ ជនជាតិអេស៊ីបស្រែកឡើងថា៖ «យើងនាំគ្នារត់ឱ្យឆ្ងាយពីជនជាតិអ៊ីស្រាអែលទៅ ដ្បិតព្រះអម្ចាស់រួមជាមួយពួកគេច្បាំងតទល់នឹងពួកយើងហើយ!»។
ព្រះអម្ចាស់មានព្រះបន្ទូលមកកាន់លោកម៉ូសេថា៖ «ចូរលើកដៃតម្រង់ទៅសមុទ្រ ឱ្យទឹកសមុទ្រវិលមកគ្របលើជនជាតិអេស៊ីប រទេះចម្បាំង និងទ័ពសេះរបស់ពួកគេ»។ លោកម៉ូសេលើកដៃតម្រង់ទៅសមុទ្រ។ នៅពេលថ្ងៃរះ ទឹកសមុទ្រក៏ហូរត្រឡប់មកកន្លែងដើមវិញ។ ជនជាតិអេស៊ីបនាំគ្នារត់គេចមិនទាន់ ដ្បិតព្រះអម្ចាស់ធ្វើឱ្យពួកគេលិចលង់នៅកណ្តាលសមុទ្រ។ ទឹកហូរត្រឡប់មកវិញ គ្របលើរទេះចម្បាំង ទ័ពសេះ និងកងទ័ពទាំងមូលរបស់ព្រះចៅផារ៉ោន ដែលដេញតាមជនជាតិអ៊ីស្រាអែល គ្មាននរណាម្នាក់រត់រួចឡើយ។ ចំណែកឯជនជាតិអ៊ីស្រាអែលវិញ គេបានដើរតាមបាតសមុទ្រដោយមានទឹកសមុទ្រដូចកំពែងនៅសងខាងពួកគេ។
នៅថ្ងៃនោះ ព្រះអម្ចាស់បានសង្គ្រោះជនជាតិអ៊ីស្រាអែល ឱ្យរួចពីកណ្តាប់ដៃរបស់ជនជាតិអេស៊ីប។ ជនជាតិអ៊ីស្រាអែល ឃើញសាកសពជនជាតិអេស៊ីបនៅតាមឆ្នេរសមុទ្រ ជនជាតិអ៊ីស្រាអែល ឃើញប្ញទ្ធិបារមីដ៏ខ្លាំងពូកែរបស់ព្រះអម្ចាស់ដែលបានប្រហារជនជាតិអេស៊ីប។ ហេតុនេះហើយ បានជាប្រជាជនកោតខ្លាចព្រះអម្ចាស់។ ពួកគេជឿលើព្រះអម្ចាស់ និងលើលោកម៉ូសេជាអ្នកបម្រើរបស់ព្រះអង្គ។
នៅគ្រានោះលោកម៉ូសេ និងកូនចៅអ៊ីស្រាអែលទាំងអស់ស្មូតបទដូចតទៅ៖

បទរបស់លោកម៉ូសេ សរ ១៥,១-៤.៧.១០-១១.១៣.១៧ បទព្រហ្មគីតិ

១	ខ្ញុំស្រែកច្រៀងថ្វាយព្រះ	ជាអម្ចាស់ដែលមានជ័យ
	លើទ័ពសេះល្បាញល្បី	លិចលង់ក្ស័យក្នុងសមុទ្រ	។
២	ព្រះម្ចាស់ជាកម្លាំង	ខ្ញុំឈ្នះខ្មាំងមិនភ័យស្លុត
	ខ្ញុំសូមឱនក្រាបលុត	ទាំងច្រៀងបទថ្កើងព្រះអង្គ	។
	ព្រោះទ្រង់បានសង្គ្រោះ	ខ្ញុំឱ្យរស់ផុតសៅហ្មង
	ព្រះឪពុកខ្ញុំផង	ប្រសើរខ្ពស់លើផែនដី	។
៣	ទ្រង់ជាវីរបុរស	ប្រសើរខ្ពស់លើផែនដី
	អង់អាចពូកែក្រៃ	ព្រះនាមថ្លៃ”ព្រះអម្ចាស់”	។
៤	ព្រះអង្គបានធ្វើឱ្យ	កងទ័ពថយវិនាសអស់
	ទាំងទ័ពទាំងសេះ	ត្រូវវិនាសក្នុងសមុទ្រ	។
	ទាហានអេស៊ីបខ្លាំង	ពូកែច្បាំងជៀសមិនផុត
	ជីវិតត្រូវរលត់	ក្នុងសមុទ្រជ្រៅក្រៃលែង	។
៧	ព្រះអង្គមានចេស្តា	ខ្លំាងអស្ចារ្យគួរស្ញប់ស្ញែង
	រុងរឿងខ្លាំងក្រៃលែង	អ្នកប្រឆាំងទ្រង់ផ្តួលអស់	។
	ពេលព្រះអង្គពិរោធ	ព្រះអង្គក្រោធដូចភ្លើងឆេះ
	ពួកគេត្រូវរលេះ	ដូចភ្លើងឆេះស្មៅចំបើង	។
១០	ព្រះអង្គទ្រង់ផ្លុំខ្យល់	ទឹកវិលវល់គ្របកាយា
	ពួកគេលិចមរណា	ក្នុងជលសាដូចសំណ	។
១១	បពិត្រព្រះអម្ចាស់	ប្រសើរណាស់ពេញបវរ
	តើមានព្រះណាល្អ	យុត្តិធម៌ដូចព្រះអង្គ?	។
	ទ្រង់វិសុទ្ធរឿងរុង	អស្ចារ្យខ្លាំងពេកកន្លង
	គួរស្ញែងខ្លាចព្រឺផង	ហើយមានទាំងប្ញទ្ធីខ្ពស់	។
១៣	ព្រះអង្គបានលោះលា	រាស្ត្រគ្រប់គ្នាមានរំពឹង
	ដឹកនាំគេតម្រង់	ដំណាក់ទ្រង់ដ៏ឧត្តម
១៧	ព្រះអង្គនាំប្រជា	រាស្ត្រគ្រប់គ្នាទៅលើភ្នំ
	ជាចំណែកដ៏ធំ	កន្លែងសំណាក់ព្រះអង្គ
	ឱ! ព្រះអម្ចាស់អើយ	ព្រះអង្គហើយដែលបានសង់
	ទីសក្ការៈត្រចង់	ដោយហស្តទ្រង់កសាងផ្ទាល់

ពាក្យអធិដ្ឋាន

បពិត្រព្រះអម្ចាស់ជាព្រះបិតា! កាលពីដើម ព្រះអង្គបានសង្គ្រោះប្រជាជនអ៊ីស្រាអែលឱ្យរួចពីកណ្តាប់ដៃខ្មាំងសត្រូវ។ សព្វថ្ងៃ ព្រះអង្គក៏សង្គ្រោះមនុស្សគ្រប់ជាតិសាសន៍ ដោយប្រទានជីវិតថ្មីឱ្យអស់អ្នកដែលជឿលើព្រះអង្គ។ សូមទ្រង់ព្រះមេត្តាប្រោសមនុស្សទាំងអស់ ឱ្យទៅជាពូជពង្សរបស់លោកអប្រាហាំ និងមានកិត្តិយសជាបុត្រធីតារបស់ព្រះអង្គផង។

អត្ថបទទី ៤

ព្យាការីអេសាយលើកទឹកចិត្តជនជាតិអ៊ីស្រាអែល ដែលប្រៀបបីដូចជាភរិយាដ៏ជាទីស្រឡាញ់របស់ព្រះអម្ចាស់។ ក្រុងយេរូសាឡឹមជានិមិត្តរូបនៃព្រះសហគមន៍ដែលព្រះគ្រីស្តបានបង្កើតដោយសារព្រះលោហិតព្រះអង្គ។

សូមថ្លែងព្រះគម្ពីរព្យាការីអេសាយ (អស ៥៤,៥-១៤)

ព្រះអម្ចាស់មានបន្ទូលមកក្រុងយេរូសាឡឹមថា៖ «ស្វាមីរបស់អ្នក គឺព្រះអង្គដែលបានបង្កើតអ្នក!។ ព្រះអង្គមានព្រះនាមថា “ព្រះអម្ចាស់នៃពិភពទាំងមូល”។ ព្រះដែលបានលោះអ្នកមកនោះ គឺព្រះដ៏វិសុទ្ធនៃជនជាតិអ៊ីស្រាអែល ព្រះអង្គមានព្រះនាមថា “ព្រះជាម្ចាស់នៃផែនដីទាំងមូល”។ អ្នកប្រៀបដូចជាស្ត្រីដែលប្តីបោះបង់ចោល ហើយកើតទុក្ខក្រៀមក្រំក្នុងចិត្ត។ តែឥឡូវនេះ ព្រះអម្ចាស់ត្រាស់ហៅអ្នកឱ្យវិលមកវិញហើយ! ព្រះរបស់អ្នកមានព្រះបន្ទូលថា៖ “បុរសពុំអាចចោលភរិយាដែលរៀបការកាលពីនៅវ័យក្មេងនោះបានឡើយ”។ យើងបានបោះបង់អ្នកមួយភ្លែតមែន តែយើងនឹងទទួលអ្នកមកវិញ ដោយចិត្តអាណិតអាសូរពន់ពេកណាស់។ យើងបានខឹងសម្បារនឹងអ្នក ព្រមទាំងគេចមុខចេញពីអ្នកមួយរយៈមែន។ ប៉ុន្តែឥឡូវនេះ យើងអាណិតមេត្តាអ្នក ព្រោះយើងស្រឡាញ់អ្នកអស់កល្បជានិច្ច»។ នេះជាព្រះបន្ទូលរបស់ព្រះជាម្ចាស់ដែលលោះអ្នកមកវិញ។ កាលពីជំនាន់លោកណូអេ យើងបានសន្យាយ៉ាងម៉ឹងម៉ាត់ថា មិនឱ្យទឹកជន់លិចផែនដីម្តងទៀតទេ ឥឡូវនេះក៏ដូច្នោះដែរ យើងសន្យាថា យើងលែងខឹង លែងគំរាមអ្នកទៀតហើយ។ ទោះបីភ្នំតូចធំកក្រើករំពើកក្តី ក៏សេចក្តីស្រឡាញ់របស់យើងចំពោះអ្នកមិនប្រែប្រួលដែរ រីឯសម្ពន្ធមេត្រីរបស់យើងដែលផ្តល់ឱ្យបានសុខសាន្តនោះ ក៏ស្ថិតស្ថេររហូតតទៅ”។ នេះជាព្រះបន្ទូលរបស់ព្រះជាម្ចាស់ដែលអាណិតមេត្តាអ្នក។ ក្រុងដ៏សែនវេទនាអើយ! អ្នកត្រូវខ្យល់ព្យុះបក់បោកគ្មានអ្នកណាបានសម្រាលទុក្ខអ្នកទេ! តែឥឡូវនេះ យើងយកថ្មដ៏ល្អប្រណីតមកសង់អ្នកឡើងវិញ យើងយកត្បូងកណ្ឌៀងចាក់ជាគ្រឹះ យើងយកត្បូងទទឹមធ្វើជាប៉ម យកពេជ្យចរណៃធ្វើជាទ្វារ ព្រមទាំងយកត្បូងមកធ្វើជាកំពែង។ យើងជាព្រះអម្ចាស់នឹងប្រៀនប្រដៅកូនចៅអ្នកដោយខ្លួនយើងផ្ទាល់ ហើយកូនចៅអ្នកនឹងបានសេចក្តីសុខសាន្តយ៉ាងបរិបូណ៌។ ព្រះអង្គនឹងការពារអ្នកឱ្យបានរឹងមាំដោយសារសេចក្តីសុចរិត ហើយអ្នកនឹងគ្មានភ័យខ្លាចអ្វីឡើយ ដ្បិតគ្មាននរណាមកសង្កត់សង្កិន មកបំភ័យឱ្យអ្នកតក់ស្លុតទៀតទេ»។

ទំនុកតម្កើង ៣០(២៩),២-៦.៩.១២-១៣ បទពាក្យ ៧

៣	ឱ! ព្រះអម្ចាស់ដែលជាព្រះ	ប្រសើរពេកណាស់ខ្ពស់ថ្កើងថ្កាន
	ខ្ញុំអង្វរសុំក្តីសុខសាន្ត	ហើយទ្រង់ប្រោសប្រាណឱ្យបានជា	។
៤	បពិត្រព្រះម្ចាស់ដ៏ឧត្តម	ស្រង់ទូលបង្គំផុតវេទនា
	ចេញពីរណ្តៅជនមរណា	ប្រទានជីវ៉ារស់ជាថ្មី	។
៥	ឱ! អ្នករាល់គ្នាដែលជារាស្ត្រ	របស់ព្រះម្ចាស់ដ៏ប្រពៃ
	ចូរច្រៀងតម្កើងនាមម្ចាស់ថ្លៃ	វិសុទ្ធពេកក្រៃនៃព្រះអង្គ	។
៦	ព្រះអង្គខ្ញាល់តែមួយភ្លែតសោះ	ប្រណីសន្តោសមនុស្សទាំងពួង
	ពេលល្ងាចគេយំចិត្តមួរហ្មង	ព្រលឹមស្រាងឡើងអរសប្បាយ	។
១២	ព្រះអង្គធ្វើឱ្យផុតអស់ទុក្ខ	អាប់អួរសព្វមុខមិនមានហ្មង
	ឥតមានកាន់ទុក្ខរីករាយម្តង	ខោអាវល្អផងពាក់សប្បាយ	។
១៣	ខ្ញុំមិននៅស្ងៀមធ្វើឆ្មៃឆ្មើង	ស្មូត្របទតម្កើងមិនជិនណាយ
	ឱ! ព្រះម្ចាស់អើយខ្ញុំឱនកាយ	ក្រាបបង្គំថ្វាយលើកតម្កើង	។

ពាក្យអធិដ្ឋាន

បពិត្រព្រះអម្ចាស់ប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! សូមទ្រង់ព្រះមេត្តាបង្កើនចំនួនបុត្រធីតារបស់ព្រះអង្គតាមព្រះបន្ទូលសន្យាដល់បុព្វបុរស។ សូមឱ្យព្រះសហគមន៍សម្តែងធម៌មេត្តាករុណារបស់ព្រះអង្គឱ្យ មនុស្សគ្រប់ជាតិសាសន៍ជឿសង្ឃឹមលើព្រះអង្គផង។

អត្ថបទទី ៥

ព្រះជាម្ចាស់មានធម៌មេត្តាករុណាសព្វព្រះហប្ញទ័យឱ្យមនុស្សបានសេចក្តីសុខដ៏ពិតប្រាកដ។ អស់អ្នកដែលសុខចិត្តទទួលព្រះអំណោយទានព្រះអង្គ ពិតជានឹងបានសុភមង្គល។

សូមថ្លែងព្រះគម្ពីរព្យាការីអេសាយ (អស ៥៥,១-១១)

ព្រះអម្ចាស់មានព្រះបន្ទូលថា៖ «អស់អ្នកដែលស្រេកទឹកអើយ! ចូរនាំគ្នាមករកទឹកឯណោះ! ទោះបីអ្នករាល់គ្នាគ្មានប្រាក់ក៏ដោយ ចូរមកហើយពិសាទៅ! ចូរមកយកអាហារបរិភោគ! ចូរនាំគ្នាមកយកស្រាទំពាំងបាយជូរ និងទឹកដោះគោដោយមិនបាច់ចំណាយប្រាក់ឬបង់ថ្លៃអ្វីឡើយ!។ ហេតុអ្វីបានជាអ្នករាល់គ្នាយកប្រាក់ទៅទិញអាហារដែលមិនអាចចិញ្ចឹមជីវិតបាន? ហេតុអ្វីបានជាអ្នករាល់គ្នាបង់កម្លាំងរកអាហារដែលមិនអាចចម្អែតក្រពះបានដូច្នេះ? ចូរស្តាប់យើង នោះអ្នករាល់គ្នានឹងបានបរិភោគអាហារយ៉ាងឆ្ងាញ់ ហើយសប្បាយចិត្តនឹងអាហារដ៏មានឱជារស! ចូរផ្ទៀងត្រចៀកស្តាប់! ចូរនាំគ្នាមកជិតយើង! ចូរត្រងត្រាប់ស្តាប់នោះអ្នករាល់គ្នានឹងមានជីវិត! យើងនឹងចងសម្ពន្ធមេត្រីជាមួយអ្នករាល់គ្នា គឺសម្ពន្ធមេត្រីដែលនៅស្ថិតស្ថេរអស់កល្បជានិច្ច ដើម្បីបញ្ជាក់នូវសេចក្តីមេត្តាករុណាដ៏ស្មោះត្រង់របស់យើងចំពោះស្តេចដាវីឌ។ យើងបានតែងតាំងស្តេចដាវីឌឱ្យធ្វើជាសាក្សីរបស់យើងនៅមុខកុលសម្ពន្ធទាំងអស់ ព្រមទាំងឱ្យធ្វើជាអ្នកដឹកនាំប្រជាជាតិទាំងឡាយ។ អ៊ីស្រាអែលអើយ! អ្នកនឹងហៅប្រជាជាតិមួយដែលអ្នកមិនស្គាល់ពីមុនឱ្យមក ហើយប្រជាជាតិដែលមិនស្គាល់អ្នកនឹងរត់មករកអ្នក ព្រោះព្រះអម្ចាស់ជាព្រះរបស់អ្នក និងជាព្រះដ៏វិសុទ្ធរបស់ជនជាតិអ៊ីស្រាអែល ទ្រង់ប្រទានឱ្យអ្នកបានថ្កុំថ្កើងរុងរឿង។ ចូរស្វែងរកព្រះអម្ចាស់ក្នុងពេលដែលព្រះអង្គសព្វព្រះហប្ញទ័យឱ្យអ្នករាល់គ្នារកព្រះអង្គឃើញ! ចូរអង្វរព្រះអង្គក្នុងពេលដែលទ្រង់គង់នៅជិតអ្នករាល់គ្នា! ត្រូវឱ្យមនុស្សអាក្រក់លះបង់ផ្លូវរបស់ខ្លួន មនុស្សពាលក៏ត្រូវលះបង់ចិត្តគំនិតអាក្រក់ដែរ ត្រូវឱ្យអ្នកនោះបែរមករកព្រះអម្ចាស់វិញ ព្រះអង្គមុខជាមេត្តាករុណាដល់គេពុំខាន ឱ្យតែគេងាកមករកព្រះនៃយើងវិញនោះ ព្រះអង្គអត់ទោសឱ្យគេទាំងស្រុង។ ព្រះអម្ចាស់មានព្រះបន្ទូលថា៖ «គំនិតយើងខុសប្លែកពីគំនិតអ្នករាល់គ្នា រីឯរបៀបដែលយើងប្រព្រឹត្ តក៏ខុសប្លែកពីគំនិតរបស់អ្នករាល់គ្នាយ៉ាងនោះដែរ។ ទឹកភ្លៀង និងទឹកសន្សើមធ្លាក់ពីលើមេឃមកស្រោចស្រពផែនដី។ ទឹកទាំងនោះមិនវិលត្រឡប់ទៅវិញ ដរាបណាទាល់តែបានធ្វើឱ្យដំណាំដុះឡើងបង្កើតភោគផល ផ្តល់ពូជសម្រាប់អ្នកសាបព្រោះ និងផ្តល់អាហារឱ្យគេបរិភោគ។ រីឯពាក្យរបស់យើងក៏ដូច្នោះដែរ គឺពាក្យដែលចេញពីមាត់របស់យើងនឹងមិនវិលត្រឡប់មករកយើងវិញ ដរាបណាទាល់តែបានសម្រេចតាមបំណងចិត្តរបស់យើងជាមុនសិន គឺបំពេញកិច្ចការដែលយើងចាត់ឱ្យមកធ្វើរួចរាល់សព្វគ្រប់»។

ទំនុកតម្កើងរបស់ព្យាការីអេសាយ អស ១២,២.៤-៦ បទពាក្យ ៧

២	ព្រះអម្ចាស់ជាព្រះសង្គ្រោះ	ជីវិតខ្ញុំរស់ស្គាល់តែសុខ
	លែងភ័យលែងខ្លាចលែងកើតទុក្ខ	ពីនេះទៅមុខពឹងលើព្រះ	។
	ដ្បិតព្រះអម្ចាស់ជាកម្លាំង	ខ្ញុំអាចតតាំងអាចយកឈ្នះ
	ខ្ញុំនឹងច្រៀងថ្វាយព្រះអម្ចាស់	ព្រោះទ្រង់សង្គ្រោះដល់រូបខ្ញុំ	។
៤	ចូរអរព្រះគុណព្រះអម្ចាស់	ហើយចូរប្រកាសនាមព្រះអង្គ
	ថ្លែងស្នាព្រះហស្តអស្ចារ្យទ្រង់	ប្រាប់ប្រជាជនផងទាំងឡាយ	។
៥	ចូរស្មូត្រទំនុកតម្កើងថ្វាយ	ព្រះអម្ចាស់ថ្លៃគ្រប់ៗកាយ
	ដ្បិតការអស្ចារ្យច្រើនពេកក្រៃ	ឱ្យមនុស្សលើដីបានដឹងផង	។
៦	អុះឱ! អ្នកក្រុងស៊ីយ៉ូនអើយ	ចូរកុំកន្តើយស្រែករំពង
	ដោយអរសប្បាយដ្បិតព្រះអង្គ	វិសុទ្ធឥតហ្មងព្រះនៃយើង	។

ពាក្យអធិដ្ឋាន

បពិត្រព្រះជាម្ចាស់ប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! មានតែព្រះអង្គទេដែលអាចបំពេញសេចក្តីសង្ឃឹមរបស់មនុស្សលោកបាន។ ព្រះអង្គបានប្រទានដំណឹងអំពីការសង្គ្រោះដោយសារអស់លោកព្យាការី។ សូមទ្រង់ព្រះមេត្តាទាក់ទាញចិត្តគំនិតនៃបុត្រធីតារបស់ព្រះអង្គ ឱ្យមានបំណងប្រព្រឹត្តតែកិច្ចការដែលគាប់ព្រះហប្ញទ័យព្រះអង្គ។

អត្ថបទទី ៦

ព្យាការីបារុក ប្រៀនប្រដៅអំពីព្រះប្រាជ្ញាញាណរបស់ព្រះជាម្ចាស់។ អ្នកណាប្រព្រឹត្តតាមព្រះប្រាជ្ញាញាណ អ្នកនោះដើរតាមព្រះគ្រីស្ត។

សូមថ្លែងព្រះគម្ពីរព្យាការីបារុក (បរ ៣,៩-៤,៤)

ជនជាតិអ៊ីស្រាអែលអើយ! ចូរស្តាប់វិន័យដែលផ្តល់ជីវិត! ចូរផ្ទៀងត្រចៀកត្រងត្រាប់ស្តាប់ដើម្បីរិះគិតពិចារណា។ ជនជាតិអ៊ីស្រាអែលអើយ! តើមានរឿងអ្វី? ហេតុអ្វីបានជាអ្នករស់នៅក្នុងស្រុករបស់ខ្មាំងសត្រូវដូច្នេះ? ហេតុអ្វីបានជាអ្នកកាន់តែចាស់ទៅៗនៅលើទឹកដីជនបរទេសដូច្នេះ? ហេតុអ្វីបានជាអ្នកជាប់ស្មៅហ្មង ដោយរស់នៅជាមួយមនុស្សស្លាប់ដូច្នេះ? ហេតុអ្វីបានជាឈ្មោះរបស់អ្នកមានកត់នៅក្នុងបញ្ជីមច្ចុរាជ? អ្នកជួបហេតុការណ៍នេះ មកពីអ្នកបោះបង់ប្រភពនៃព្រះប្រាជ្ញាញាណចោល ប្រសិនបើអ្នកដើរតាមមាគ៌ារបស់ព្រះជាម្ចាស់ អ្នកនឹងរស់នៅដោយសេចក្តីសុខសាន្តជារៀងរហូត។ ចូរស្វែងយល់ឱ្យដឹងថា តើការត្រិះរិះពិចារណា កម្លាំង និងចំណេះដឹងបានមកពីណា? អ្នកមុខជាដឹងថាជីវិត និងអាយុវែង ពន្លឺភ្នែកភ្លឺថ្លា និងសេចក្តីសុខសាន្តកើតពីប្រភពនោះដែរ។
តើនរណារកព្រះដំណាក់នៃព្រះប្រាជ្ញាញាណឃើញ? តើនរណាយល់តម្លៃដ៏ថ្លៃថ្លារបស់ព្រះប្រាជ្ញាញាណ? តើពួកមេដឹកនាំប្រជាជាតិនានានៅឯណា? តើអ្នកបង្រ្កាបសត្វតិរច្ឆាននៅឯណាដែរ? តើអ្នកដែលចេះផ្សាំងបក្សាបក្សីនៅឯណា? តើអ្នកដែលប្រមូលមាសប្រាក់ជាច្រើនអនេក ហើយអាងលើធនធានរបស់ខ្លួននៅឯណា? តើជាងទងដែលខំបញ្ចេញស្នាដៃហួសពីការស្មាននៅឯណា?។ ពួកគេត្រូវវិនាសសាបសូន្យ គេបាត់បង់ជីវិត ហើយមានអ្នកផ្សេងមកធ្វើការជំនួសវិញ។ ក្រោយពួកគេមានអ្នកផ្សេងទៀតកើតមក ហើយរស់នៅលើផែនដីនេះ ប៉ុន្តែពួកគេក៏មិនស្គាល់ផ្លូវឆ្ពោះទៅកាន់ព្រះប្រាជ្ញាញាណដែរ។ ពួកគេមិនយកចិត្តទុកដាក់នឹងស្វែងរកព្រះប្រាជ្ញាញាណ ហើយមិនរវល់នឹងព្រះអង្គទៀត។ រីឯកូនចៅរបស់ពួកគេ ក៏ដើរតាមផ្លូវផ្សេងពីឪពុកដែរ។ គ្មាននរណាតំណាលពីព្រះប្រាជ្ញាញាណនៅស្រុកកាណាន គ្មាននរណាឃើញព្រះប្រាជ្ញាញាណនៅស្រុកតេម៉នទៀតដែរ។ សូម្បីតែកូនចៅរបស់នាងហាការ ដែលតែងតែស្វែងរកចំណេះដឹងនៅលើផែនដី ឈ្មួញនៅស្រុកម៉េរ៉ន និងស្រុកតេម៉ន អ្នកតែងនិយាយរឿងព្រេង ឬទស្សនវិទូក៏មិនបានស្គាល់ផ្លូវទៅកាន់ព្រះប្រាជ្ញាញាណ ហើយក៏មិនចាំផ្លូវទៅរកព្រះអង្គដែរ។ ប្រជាជនអ៊ីស្រាអែលអើយ! ពិភពលោកដែលជាព្រះដំណាក់ផ្ទាល់របស់ព្រះជាម្ចាស់ធំទូលាយណាស់ ទឹកដីរបស់ព្រះអង្គក៏ធំទូលំទូលាយដែរ! ពិភពលោកធំធេង គ្មានព្រំដែនខ្ពស់ណាស់ គ្មាននរណាវាស់បានទេ។ មនុស្សមាឌធំៗ ហើយមានឈ្មោះល្បីនៅគ្រាដំបូងបានកើតនៅទីនោះ ពួកគេមានមាឌធំសម្បើម និងស្ទាត់ជំនាញធ្វើសង្គ្រាម។ ប៉ុន្តែ ព្រះជាម្ចាស់មិនបានជ្រើរើសពួកគេទេ ព្រះអង្គក៏មិនបានបង្ហាញមាគ៌ានៃព្រះប្រាជ្ញាញាណឱ្យពួកគេស្គាល់ដែរ។ ពួកគេត្រូវបាត់បង់ជីវិត ព្រោះគេគ្មានសុភនិច្ឆ័យ មិនចេះរិះគិតពិចារណា។ តើនរណាបានឡើងទៅលើមេឃ ដើម្បីទៅចាប់យកព្រះប្រាជ្ញាញាណនាំចុះពីពពកមក? តើនរណាឆ្លងទៅត្រើយម្ខាងនៃសមុទ្រ រកឃើញព្រះប្រាជ្ញាញាណ ហើយនាំគ្នាយកមកដោយដូរនឹងមាសយ៉ាងសន្ធឹកសន្ធាប់? គ្មាននរណាស្គាល់ផ្លូវទៅកាន់ព្រះប្រាជ្ញាញាណ ហើយក៏គ្មាននរណាប៉ងប្រាថ្នាដើរតាមមាគ៌ារបស់ព្រះប្រាជ្ញាញាណដែរ។ ប៉ុន្តែ ព្រះជាម្ចាស់ដែលជ្រាបអ្វីៗសព្វគ្រប់ទាំងអស់ ព្រះអង្គស្គាល់ព្រះប្រាជ្ញាញាណយ៉ាងច្បាស់។ ព្រះអង្គរកព្រះប្រាជ្ញាញាណឃើញដោយសារព្រះតំរិះរបស់ព្រះអង្គ។ ព្រះអង្គរៀបចំផែនដីឱ្យស្ថិតនៅអស់កល្បជានិច្ច រួចព្រះអង្គបង្កើតសត្វចតុប្បាទឱ្យនៅពាសពេញ។ ព្រះអង្គចាត់ពន្លឺទៅ ពន្លឺក៏ចេញដំណើរទៅ។ ព្រះអង្គហៅពន្លឺមកវិញ ពន្លឺក៏មកវិញទាំងញ័ររន្ធត់។ ផ្កាយបញ្ចេញរស្មីនៅកន្លែងប្រចាំការដោយអំណរសប្បាយ។ ព្រះអង្គហៅផ្កាយ ហើយផ្កាយក៏ទូលឆ្លើយថា៖ «ក្រាបទូលព្រះជាម្ចាស់!»។ ផ្កាយបញ្ចេញរស្មីដោយអំណរសប្បាយថ្វាយព្រះដែលបានបង្កើតពួកវា។ ព្រះអង្គពិតជាព្រះនៃយើង កុំពឹងផ្អែកលើព្រះឯណាផ្សេងក្រៅពីព្រះអង្គឡើយ។ ព្រះអង្គរកឃើញ មាគ៌ាឆ្ពោះទៅកាន់ព្រះប្រាជ្ញាញាណ ព្រះអង្គបានបង្ហាញមាគ៌ានោះឱ្យលោកយ៉ាកុបជាអ្នកបម្រើរបស់ព្រះអង្គ និងជនជាតិអ៊ីស្រាអែលដ៏ជាទីស្រឡាញ់របស់ព្រះអង្គស្គាល់ដែរ។ តាំងពីពេលនោះមក គេឃើញព្រះប្រាជ្ញាញាណនៅលើផែនដី ហើយព្រះអង្គរស់នៅក្នុងចំណោមមនុស្សលោក។
ជនជាតិអ៊ីស្រាអែលអើយ! យើងមានសុភមង្គលហើយ ដ្បិតយើងអាចស្គាល់អ្វីដែលគាប់ព្រះហប្ញទ័យព្រះជាម្ចាស់។

ទំនុកតម្កើងលេខ ១៩(១៨),៨-១១ បទកាកគតិ

៨	ព្រះធម្មវិន័យ	ល្អល្អះប្រពៃ	ប្រសើរថ្កើងថ្កាន
	ផ្តល់កម្លាំងចិត្ត	ឥតមានស្រាកស្រាន្ត	អ្នកល្ងង់ប្រែប្រាណ
		ជាមានប្រាជ្ញា	។
៩	បញ្ជារបស់	ព្រះម្ចាស់ទាំងអស់	ត្រឹមត្រូវសត្យា
	ឱ្យចិត្តអំណរ	សប្បាយក្រៃណា	បំភ្លឺចិន្តា
		ថ្លៃថ្លាត្រចង់	។
១០	ការគោរពកោត	ព្រះអម្ចាស់សោត	វិសេសយល់យង់
	ស្ថិតស្ថេរចិរកាល	តទៅគង់វង្ស	ការវិនិច្ឆ័យទ្រង់
		ក៏ត្រង់ត្រឹមត្រូវ	។
១១	គួរឱ្យប្រាថ្នា	ចង់បានណាស់ណា	ជាងមាសឆ្អិនឆ្អៅ
	ផ្អែមជាងទឹកឃ្មុំ	ខែចែត្រខែក្តៅ	ហូរជោរចេញទៅ
		ចាកពីបង្គង	។

ពាក្យអធិដ្ឋាន

បពិត្រព្រះជាម្ចាស់! ព្រះអង្គតែងតែត្រាស់ហៅមនុស្សដែលនៅឆ្ងាយៗឱ្យចូលរួមក្នុងព្រះសហគមន៍។ សូមទ្រង់ព្រះមេត្តាការពារ ថែរក្សាអស់អ្នកដែលបានទទួលអគ្គសញ្ញាជ្រមុជទឹក ឱ្យមានជំនឿកាន់តែមាំឡើងៗផង។

អត្ថបទទី ៧

កាលពីដើម ព្យាការីអេស៊េគីអែលជូនដំណឹងអំពីព្រះជាម្ចាស់ប្រទានជីវិតថ្មីឱ្យអ្នកជឿ។ អ្នកទទួលអគ្គសញ្ញាជ្រមុជទឹក ទទួលចិត្តគំនិតថ្មី និងវិញ្ញាណថ្មីតាមព្រះបន្ទូលសន្យារបស់ព្រះអង្គ។

សូមថ្លែងព្រះគម្ពីរព្យាការីអេសេគីអែល (អគ ៣៦,១៦-២៨)

ព្រះអម្ចាស់មានព្រះបន្ទូលមកខ្ញុំដូចតទៅនេះ៖ «កូនមនុស្សអើយ! ពេលកូនចៅអ៊ីស្រាអែលរស់នៅលើទឹកដីរបស់ខ្លួននៅឡើយ ពួកគេបានធ្វើឱ្យទឹកដីនេះទៅជាសៅហ្មងដោយសារអំពើអាក្រក់ និងមារយាទថោកទាបរបស់ពួកគេ។ ពួកគេធ្វើឱ្យទឹកដីនេះទៅជាសៅហ្មង ដោយការបង្ហូរឈាម និងការថ្វាយបង្គំព្រះក្លែងក្លាយ។ ហេតុនេះហើយ បានជាយើងជះកំហឹងរបស់យើងទៅលើពួកគេ។ យើងបានកម្ចាត់កម្ចាយពួកគេឱ្យទៅនៅក្នុងចំណោមប្រជាជាតិទាំងឡាយ យើងបំបែកពួកគេឱ្យទៅរស់នៅតាមស្រុកនានា។ យើងដាក់ពួកគេតាមអំពើអាក្រក់ និងតាមមារយាទថោកទាបរបស់ខ្លួន។ ពេលទៅដល់ស្រុករបស់ប្រជាជាតិទាំងឡាយ ពួកគេបានបង្អាប់បង្អោននាមដ៏វិសុទ្ធរបស់យើង ហើយម្ចាស់ស្រុកនិយាយអំពីពួកគេថា “ពួកនេះជាប្រជាជនរបស់ព្រះអម្ចាស់ ពួកគេចាកចេញពីស្រុករបស់ព្រះអង្គមក”។ យើងចង់រក្សានាមដ៏វិសុទ្ធរបស់យើង ដែលកូនចៅអ៊ីស្រាអែលបានបង្អាប់បង្អោននៅក្នុងចំណោមប្រជាជាតិទាំងឡាយ ដែលពួកគេស្នាក់អាស្រ័យនៅ។
ហេតុនេះ ចូរប្រាប់កូនចៅអ៊ីស្រាអែលថា ព្រះជាម្ចាស់មានព្រះបន្ទូលដូចតទៅ កូនចៅអ៊ីស្រាអែលអើយ! យើងធ្វើដូច្នេះ មិនមែនដោយយល់ដល់អ្នករាល់គ្នាទេ គឺយល់ដល់នាមដ៏វិសុទ្ធរបស់យើងដែលអ្នករាល់គ្នាបានបង្អាប់បង្អោនក្នុងចំណោមប្រជាជាតិទាំងឡាយដែលអ្នករាល់គ្នាអាស្រ័យនៅជាមួយ។ យើងនឹងសម្តែងបារមីឱ្យប្រជាជាតិនានាស្គាល់នាមដ៏វិសុទ្ធរបស់យើង គឺនាមដែលអ្នករាល់គ្នាបានបង្អាប់បង្អោនក្នុងចំណោមប្រជាជាតិទាំងនោះ។ ពេលណាយើងសម្តែងភាពវិសុទ្ធរបស់យើងក្នុងចំណោមអ្នករាល់គ្នាឱ្យប្រជាជាតិទាំងនោះឃើញ ពេលនោះពួកគេនឹងទទួលស្គាល់ថា យើងពិតជាព្រះអម្ចាស់មែន។ នេះជាព្រះបន្ទូលរបស់ព្រះជាអម្ចាស់។ យើងនឹងយកអ្នករាល់គ្នាចេញពីចំណោមប្រជាជាតិទាំងឡាយ យើងនឹងប្រមូលអ្នករាល់គ្នាពីគ្រប់ស្រុក ឱ្យវិលត្រឡប់មកមាតុភូមិវិញ។ យើងនឹងប្រោសទឹកដ៏បរិសុទ្ធលើអ្នករាល់គ្នា នោះអ្នករាល់គ្នានឹងបានបរិសុទ្ធ។ យើងនឹងជម្រះអ្នករាល់គ្នាឱ្យបានស្អាតបរិសុទ្ធ ផុតពីអំពើសៅហ្មងទាំងឡាយ លែងឱ្យអ្នករាល់គ្នាជាប់ចិត្តនឹងព្រះក្លែងក្លាយទាំងប៉ុន្មាន។ យើងនឹងប្រគល់ចិត្តគំនិតថ្មីឱ្យអ្នករាល់គ្នា ហើយដាក់វិញ្ញាណថ្មីក្នុងអ្នករាល់គ្នា។ យើងនឹងដកចិត្តរឹងដូចថ្មចេញពីអ្នករាល់គ្នា រួចឱ្យអ្នករាល់គ្នាមានចិត្តអាណិតអាសូរវិញ។ យើងនឹងដាក់វិញ្ញាណរបស់យើងក្នុងអ្នករាល់គ្នា ដើម្បីឱ្យអ្នករាល់គ្នាអាចធ្វើតាមដំបូន្មាន ហើយកាន់តាមវិន័យរបស់យើង។ អ្នករាល់គ្នានឹងរស់នៅក្នុងស្រុកដែលយើងបានប្រគល់ឱ្យដូនតាអ្នករាល់គ្នា អ្នករាល់គ្នានឹងទៅជាប្រជារាស្ត្ររបស់យើង ហើយយើងនឹងទៅជាព្រះរបស់អ្នករាល់គ្នា»។

ទំនុកតម្កើងលេខ ៤២(៤១),២-៣ បទកាកគតិ

២	បពិត្រព្រះម្ចាស់	ខ្ញុំប្រាថ្នាណាស់	ចង់នៅជាមួយ
	គិតដេកមិនលក់	យប់នឹកថ្ងៃព្រួយ	ចង់នៅជាមួយ
		ដូចក្តាន់រកទឹក	។
៣	ខ្ញុំស្រេកខ្ញុំឃ្លាន	ព្រះម្ចាស់ដ៏មាន	បារមីមានប្ញទ្ធិ
	ព្រះជន្មគង់នៅ	ស្ថិតស្ថេរពិតៗ	ខ្ញុំចង់នៅជិត
		ព្រះភក្ត្រព្រះអង្គ	។

ទំនុកតម្កើងលេខ ៤៣(៤២),៣-៤ បទពាក្យ ៧

៣	សូមផ្តល់ពន្លឺនិងក្តីពិត	ឱ្យនៅស្ថេរស្ថិតហើយតម្រង់
	ទៅភ្នំវិសុទ្ធដ៏ផូរផង់	ដំណាក់ព្រះអង្គសមសព្វគ្រប់	។
៤	ខ្ញុំនឹងឆ្ពោះទៅទីអាសនៈ	ព្រះអង្គឥតអាក់ជាប្រភព
	នៃក្តីអំណរដ៏លើសលប់	តម្កើងមិនឈប់ដោយតន្ត្រី	។

ពាក្យអង្វរ

បពិត្រព្រះជាម្ចាស់! ព្រះអង្គបានបង្ហាញធម៌មេត្តាករុណារបស់ព្រះអង្គ ដោយប្រោសព្រះបុត្រាឱ្យមានព្រះជន្មរស់ឡើងវិញ។ សូមទ្រង់ព្រះមេត្តាប្រោសព្រះសហគមន៍ឱ្យបានពោរពេញទៅដោយព្រះជន្មព្រះអង្គផង សូមឱ្យព្រះសហគមន៍អាចប្រកាសអំពីធម៌មេត្តា ករុណារបស់ព្រះអង្គដល់មនុស្សគ្រប់រូបនៅក្នុងលោកនេះផង។

ពិធីជ្រមុជទឹក

សូមថ្លែងព្រះគម្ពីរព្យាការីអេសាយ (អស ១២,២,៤-៦)

ព្រះ‌ជាម្ចាស់ជាព្រះ‌សង្គ្រោះរបស់ខ្ញុំ ខ្ញុំផ្ញើជីវិតលើព្រះ‌អង្គ ខ្ញុំលែងភ័យ‌ខ្លាចទៀតហើយ ដ្បិតព្រះ‌អម្ចាស់ជាកម្លាំងរបស់ខ្ញុំ ខ្ញុំនឹងច្រៀងថ្វាយព្រះ‌អង្គ ព្រោះព្រះ‌អង្គបានសង្គ្រោះខ្ញុំ»។ នៅគ្រានោះ អ្នករាល់គ្នានឹងពោលឡើងថា៖ ចូរអរ‌ព្រះ‌គុណព្រះ‌អម្ចាស់ ចូរប្រកាសព្រះ‌នាមរបស់ព្រះ‌អង្គ ចូរថ្លែងពីស្នាព្រះ‌ហស្ដដ៏អស្ចារ្យរបស់ព្រះ‌អង្គប្រាប់ប្រជាជនទាំង‌ឡាយ។ ចូររំឭកឱ្យគ្រប់ៗគ្នាដឹងថា ព្រះ‌នាមរបស់ព្រះ‌អង្គឧត្តុង្គ‌ឧត្ដមណាស់។ ចូរស្មូត្រទំនុក‌តម្កើងថ្វាយព្រះ‌អម្ចាស់ ដ្បិតព្រះ‌អង្គបានធ្វើការផ្សេងៗដ៏អស្ចារ្យបំផុត ចូរប្រកាសពីការអស្ចារ្យទាំងនេះឱ្យមនុស្សនៅលើផែន‌ដីទាំងមូលដឹងផង! អ្នកក្រុងស៊ីយ៉ូនអើយចូរនាំគ្នាបន្លឺសំឡេងជ័យ‌ឃោសដោយអំណរ! ដ្បិតព្រះដ៏‌វិសុទ្ធរបស់ជនជាតិអ៊ីស្រា‌អែលដែលគង់នៅកណ្ដាលចំណោមអ្នករាល់គ្នា ព្រះ‌អង្គឧត្តុង្គ‌ឧត្ដម!

ទំនុកតម្កើងលេខ ៥១ (៥០), ៣-៤.១២-១៣.១៨-១៩ បទពាក្យ ៧

៣	ឱព្រះជាម្ចាស់ទូលបង្គំ	សូមលើកទោសខ្ញុំហើយមេត្តា
	តាមព្រះហឫទ័យករុណា	លើសលប់អស្ចារ្យព្រះអង្គផង	។
	សូមលើកទោសឱ្យទូលបង្គំ	ផុតទុក្ខក្រៀមក្រំគ្រានេះម្តង
	ព្រះទ័យអាណិតអាសូរផង	ព្រោះតែព្រះអង្គឥតមានខ្ចោះ	។
៤	សូមជួយលុបលាងខ្ញុំឱ្យជ្រះ	ឱ្យស្អាតស្រឡះពីកំហុស
	ជួយជម្រះខ្ញុំស្អាតផងចុះ	ឱ្យបរិសុទ្ធអស់អំពើបាប	។
១២	ឱព្រះជាអម្ចាស់ខ្ញុំអើយ	សូមជួយប្រោសឱ្យបរិសុទ្ធ
	បង្កើតចិត្តថ្មីមាំមោះមុត	រឹងប៉ឹងបំផុតដល់ខ្ញុំផង	។
១៣	សូមកុំបោះបង់រូបខ្ញុំចោល	ឱ្យនៅតែលតោលឆ្ងាយព្រះអង្គ
	កុំដកវិញ្ញាណដ៏ត្រចង់	វិសុទ្ធព្រះអង្គពីខ្ញុំឡើយ
១៨	ព្រះអង្គមិនដែលសព្វព្រះទ័យ	ឱ្យដាក់យញ្ញថ្វាយច្រើនឬតិច
	ទោះតង្វាយដុតទាំងមូលស្រេច	ក៏ទ្រង់គ្មានកិច្ចចង់បានដែរ
១៩	យញ្ញដែលព្រះអង្គសព្វព្រះទ័យ	ឱ្យរូបខ្ញុំថ្វាយរាល់ថ្ងៃខែ
	គឺចិត្តសោកសៅទុក្ខឥតល្ហែ	និងចិត្តកែប្រែលែងក្អេងក្អាង

ពាក្យអធិដ្ឋាន

បពិត្រព្រះជាម្ចាស់! ដោយព្រះអង្គប្រោសព្រះបុត្រាឱ្យមានព្រះជន្មរស់ឡើងវិញ ព្រះអង្គបានបំភ្លឺមនុស្សលោកដែលរស់នៅក្នុងភាពងងឹត សូមទ្រង់ព្រះមេត្តាពង្រឹងជំនឿរបស់យើងខ្ញុំជាព្រះសហគមន៍។ សូមឱ្យយើងខ្ញុំយកចិត្តទុកដាក់រស់នៅតាមឋានៈជាបុត្រធីតារបស់ព្រះអង្គ និងបម្រើព្រះអង្គដោយចិត្តស្មោះ។

អត្ថបទទី ៨

ពេលអ្នកមានជំនឿទទួលអគ្គសញ្ញាជ្រមុជទឹក គេរួមស្លាប់ជាមួយព្រះគ្រីស្ត។ ពេលងើបពីទឹកឡើង អ្នកជឿហាក់ដូចជារស់ឡើងវិញ។

សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងរ៉ូម (រម ៦,៣-១១)

បងប្អូនជាទីស្រឡាញ់!
យើងទាំងអស់គ្នាដែលបានទទួលអគ្គសញ្ញាជ្រមុជទឹក បានរួមជាមួយព្រះគ្រីស្តយេស៊ូ គឺយើងបានជ្រមុជរួមជាមួយព្រះអង្គដែលសោយទិវង្គត។ ហេតុនេះ ដោយពិធីជ្រមុជទឹក យើងរួមស្លាប់ជាមួយព្រះអង្គ យើងក៏ដូចជាបានចូលទៅក្នុងផ្នូររួមជាមួយព្រះអង្គដែរ។ ដូច្នេះ ព្រះគ្រីស្តទទួលព្រះជន្មរស់ថ្មីដោយសារសិរីរុងរឿងរបស់ព្រះបិតាយ៉ាងណា យើងក៏រស់នៅតាមរបៀបថ្មីយ៉ាងនោះដែរ។ ប្រសិនបើយើងរួមស្លាប់ជាមួយព្រះអង្គដែលសោយទិវង្គត យើងក៏នឹងរួមជាមួយព្រះអង្គដែលទទួលព្រះជន្មថ្មីដែរ។ យើងដឹងថា ចរិកចាស់របស់យើងបានជាប់ឆ្កាងជាមួយព្រះអង្គរួចហើយ ដើម្បីឱ្យខ្លួនយើងដែលជាប់បាបនេះ ត្រូវវិនាសសាបសូន្យកុំឱ្យយើងធ្វើជាខ្ញុំបម្រើរបស់បាបតទៅទៀត ដ្បិតអ្នកដែលស្លាប់មិនទាក់ទាមនឹងបាបទៀតទេ។ ដូច្នេះ ប្រសិនបើយើងរួមស្លាប់ជាមួយព្រះគ្រីស្ត យើងក៏ជឿថា យើងនឹងមានជីវិតរួមជាមួយព្រះអង្គដែរ ព្រោះយើងដឹងថា ព្រះគ្រីស្តដែលទទួលព្រះជន្មថ្មីនោះ ទ្រង់លែងសោយទិវង្គតហើយមច្ចុរាជគ្មានអំណាចលើព្រះអង្គទៀតទេ ដ្បិតព្រះអង្គបានសោយទិវង្គតនោះ គឺសោយទិវង្គតឱ្យបានរួចពីអំណាចបាបម្តងជាស្រេច។ ឥឡូវនេះ ព្រះអង្គមានព្រះជន្មរស់នោះ គឺរស់សម្រាប់ព្រះជាម្ចាស់។ រីឯបងប្អូនវិញក៏ដូច្នោះដែរ ចូរចាត់ទុកថាខ្លួនស្លាប់រួច ផុតពីអំណាចបាប ហើយបងប្អូនមានជីវិតសម្រាប់ព្រះជាម្ចាស់ ដោយរួមជាមួយព្រះគ្រីស្តយេស៊ូ។

ទំនុកតម្កើងលេខ ១១៨(១១៧),១.៤.១៦-១៧.២២-២៣ បទពាក្យ ៧

១	សូមលើកតម្កើងព្រះអម្ចាស់	ប្រសើរពេកណាស់ព្រះទ័យថ្លៃ
	សប្បុរសករុណាត្រាប្រណី	ស្ថិតស្ថេររាល់ថ្ងៃរហូតទៅ	។
៤	អស់អ្នកគោរពកោតខ្លាចប្រណី	ត្រូវប្រកាសឱ្យក្តែងៗ
	ដូចអ៊ីស្រាអែលកុំបីក្រែង	ហប្ញទ័យស្ញប់ស្ញែងនៅស្ថិតស្ថេរ	។
១៦	ព្រះអង្គសម្តែងបារមីខ្ពស់	ប្រសើរលើសលប់មិនទន់ទាប
	ព្រះអង្គបង្ហាញឱ្យគេជ្រាប	ប្ញទ្ធានុភាពអស្ចារ្យក្រៃ	។
១៧	ខ្ញុំត្រូវនៅរស់មានជីវិត	មិនត្រូវស្លាប់ផុតចាកលោកីយ៍
	ដើម្បីរៀបរាប់ពីសេចក្តី	ស្នាព្រះហស្តថ្លៃព្រះអម្ចាស់	។
២២	ថ្មដែលជាងផ្ទះចោលខ្ទេចខ្ទាំ	ប្រែជារឹងមាំបែរជាកល់
	ជើងសសរផ្ទះមាំឥតខ្វល់	ល្បីល្បាញឮដល់សព្វជាតិសាសន៍	។
២៣	ព្រះអង្គសម្រេចការអស្ចារ្យ	ដោយប្ញទ្ធិថ្លៃថ្លានៃអម្ចាស់
	អស្ចារ្យពេកក្រៃយើងឃើញច្បាស់	គួរស្ញប់ស្ញែងណាស់គួរគោរព	។

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា! អាលេលូយ៉ា!

“ព្រះគ្រីស្តទទួលព្រះជន្មថ្មី!” នេះជាដំណឹងល្អដែលគ្រីស្តទូតប្រកាសដល់មនុស្សលោក ប៉ុន្តែគ្មាននរណាអាចយល់ការអាថ៌កំបាំងនេះបានទេ ព្រោះអស្ចារ្យពេក។ ហេតុនេះហើយ បានជាអ្នកនិពន្ធគម្ពីរដំណាលថា មានទេវទូតមកប្រាប់ដំណឹងនេះ។ យើងរកភស្តុតាងអំពីព្រះយេស៊ូមានព្រះជន្មថ្មីពុំបានសោះ។ មានតែអ្នកជឿទេដែល “ឃើញ” ព្រះអង្គមានព្រះជន្ម ជាពិសេសដោយនឹកគិតពីសកម្មភាពរបស់ព្រះអង្គ ដែលប្រែចិត្តគំនិតរបស់មនុស្ស។

សូមថ្លែងព្រះគម្ពីរដំណឹងល្អតាមសន្តម៉ាថាយ (មថ ២៨,១-១០)

ក្រោយថ្ងៃសប្ប័ទ គឺនៅព្រឹកថ្ងៃអាទិត្យ នាងម៉ារី ជាអ្នកស្រុកម៉ាដាឡា និងនាងម៉ារីម្នាក់ ទៀតនាំគ្នាទៅមើលផ្នូរ។ ពេលនោះ ស្រាប់តែផែនដីរញ្ជួយយ៉ាងខ្លាំង មានទេវទូតរបស់ ព្រះអម្ចាស់ចុះពីស្ថានបរមសុខមក ប្រមៀលថ្មចេញពីមាត់ផ្នូរហើយអង្គុយលើថ្មនោះថែម ទៀតផង។ ទេវទូតនោះ មានទ្រង់ទ្រាយភ្លឺដូចផ្លេកបន្ទោរ និងមានសម្លៀកបំពាក់សដូច សំឡី។ ពួកទាហានភ័យញ័រជាខ្លាំង ភាំងស្មារតីដូចមនុស្សស្លាប់។ ទេវទូតនិយាយទៅកាន់ ស្ត្រីៗថា៖«កុំខ្លាចអ្វី! ខ្ញុំដឹងថា នាងៗមករកព្រះយេស៊ូជាអ្នកភូមិណាសារ៉ែតដែលគេ ឆ្កាងនោះ»។ ព្រះអង្គមិននៅទីនេះទេ ព្រះជាម្ចាស់បានប្រោសព្រះអង្គឱ្យមានព្រះជន្ម រស់ឡើងវិញ ដូចទ្រង់មានព្រះបន្ទូលរួចមកហើយ! សុំមកមើលកន្លែងដែលគេដាក់ព្រះសព ព្រះអង្គឯណេះសិន ហើយសឹមអញ្ជើញទៅប្រាប់សាវ័ករបស់ព្រះអង្គជាប្រញាប់ថា ព្រះអង្គ មានមានព្រះជន្មរស់ឡើងវិញហើយ ឥឡូវនេះព្រះអង្គយាងទៅស្រុកកាលីឡេមុនអ្នករាល់គ្នា។ នៅទីនោះ អ្នករាល់គ្នានឹងឃើញព្រះអង្គ។ សុំនាងជ្រាប!»។ ស្រ្តីទាំងនោះប្រញាប់ប្រញាល់ចេញពីផ្នូរទាំងភ័យ ទាំងអរយ៉ាងខ្លាំង នាំដំណឹងនេះរត់ ទៅជម្រាបក្រុមសាវ័ក។ ពេលនេះ ស្រាប់តែព្រះយេស៊ូយាងមកជួបពួកនាង ទ្រង់មាន ព្រះបន្ទូលថា៖«ជម្រាបសួរនាង!»។ នាងទាំងនោះក៏ចូលមកឱបព្រះបាទា ហើយក្រាប ថ្វាយបង្គំព្រះអង្គ។ ព្រះយេស៊ូមានព្រះបន្ទូលថា៖«កុំភ័យខ្លាចអ្វីឡើយ! សុំទៅប្រាប់ បងប្អូនខ្ញុំ ឱ្យទៅស្រុកកាលីឡេទៅ គេនឹងឃើញខ្ញុំនៅទីនោះ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! យើងខ្ញុំសូមថ្វាយកាយ វាចា ចិត្ត រួមនឹងសក្ការបូជារបស់ព្រះយេស៊ូជាព្រះបុត្រាព្រះអង្គ សូមទ្រង់ព្រះមេត្តាទទួលដោយអនុគ្រោះ។

ធម៌លើកតម្កើង

បពិត្រព្រះអម្ចាស់ជាព្រះបិតា! យើងខ្ញុំសូមលើកតម្កើងសិរីរុងរឿងព្រះអង្គគ្រប់ពេលវេលា ជាពិសេសនៅរាត្រីនេះ (នៅថ្ងៃនេះ) ជារាត្រីដែលព្រះគ្រីស្តបានបូជាព្រះជន្ម។ ព្រះគ្រីស្តពិតជាបានរំដោះបាបមនុស្សលោក។ ដោយទ្រង់សោយទិវង្គត ទ្រង់បានដកអំពើបាបពីមនុស្សលោក ហើយរំលាយអំណាចនៃសេចក្តីស្លាប់។ ដោយទ្រង់មានព្រះជន្មរស់ឡើងវិញ ទ្រង់បានប្រទានជីវិតថ្មីឱ្យយើងខ្ញុំ។
អាស្រ័យហេតុនេះហើយ បានជាយើងខ្ញុំដែលបានកើតជាថ្មី ត្រេកអរសប្បាយរីករាយ និងសូមចូលរួមជាមួយទេវទូត និងសន្តបុគ្គលទាំងឡាយ ដើម្បីប្រកាសសិរីរុងរឿងរបស់ព្រះអង្គថា៖ “សន្តវិសុទ្ធ!”។

ពាក្យអរព្រះគុណ

បពិត្រព្រះអម្ចាស់ជាព្រះបិតា! យើងខ្ញុំសូមអរព្រះគុណព្រះអង្គម្តងទៀត! ដោយព្រះអង្គប្រោសព្រះយេស៊ូឱ្យមានព្រះជន្មរស់ឡើងវិញ ព្រះអង្គបានប្រទានជីវិតថ្មីឱ្យយើងខ្ញុំ។ សូមទ្រង់ព្រះមេត្តាប្រទានព្រះវិញ្ញាណរបស់ព្រះអង្គឱ្យយើងខ្ញុំ។ សូមពង្រឹងជំនឿរបស់យើងខ្ញុំ ឱ្យធ្វើជាសាក្សីអំពីការសង្គ្រោះរបស់ព្រះអង្គក្នុងលោកបច្ចុប្បន្ននេះផង។

ថ្ងៃសៅរ៍ពិសិដ្ឋ រាត្រីបុណ្យចម្លង ឆ្នាំ«ក» ​ ព្រះយេស៊ូមានជ័យជម្នះលើសេចក្តីស្លាប់ ពណ៌ស

ពិធីបុណ្យក្នុងរាត្រីនេះចែកជាបួនភាគៈ

១- ពិធីគោរពព្រះគ្រីស្តជាពន្លឺបំភ្លឺមនុស្សលោក

២- ពិធីគោរពព្រះគ្រីស្តជាបន្ទូលនៃព្រះជាម្ចាស់

អត្ថបទទី​ ១

សូមថ្លែងព្រះគម្ពីរកំណើត កណ ១,១-២,២(ឬយ៉ាងខ្លី ១,២៦-៣១)

ទំនុកតម្កើងលេខ ១០៤(១០៣),១-២.៥-៦.១០.១២-១៤.២៤.៣៥ បទពាក្យ ៧

ឬទំនុកតម្កើងលេខ ៣៣ (៣២), ៤-៧.១២-១៣.២០ បទព្រហ្មគីតិ

ពាក្យអធិដ្ឋាន

អត្ថបទទី ២

សូមថ្លែងព្រះគម្ពីរកំណើតពិភពលោក កណ ២២,១-១៨ (ឬយ៉ាងខ្លី ១-២.៩-១៣,១៥-១៨)

ទំនុកតម្កើងលេខ ១៦(១៥),៥.៨-១១ បទពាក្យ ៧

ពាក្យអធិដ្ឋាន

អត្ថបទទី ៣

សូមថ្លែងព្រះគម្ពីរដំណើរឆ្ពោះទៅកាន់សេរីភាព សរ ១៤,១៥-១៥,១

បទរបស់លោកម៉ូសេ សរ ១៥,១-៤.៧.១០-១១.១៣.១៧ បទព្រហ្មគីតិ

ពាក្យអធិដ្ឋាន

អត្ថបទទី ៤

សូមថ្លែងព្រះគម្ពីរព្យាការីអេសាយ (អស ៥៤,៥-១៤)

ទំនុកតម្កើង ៣០(២៩),២-៦.៩.១២-១៣ បទពាក្យ ៧

ពាក្យអធិដ្ឋាន

អត្ថបទទី ៥

សូមថ្លែងព្រះគម្ពីរព្យាការីអេសាយ (អស ៥៥,១-១១)

ទំនុកតម្កើងរបស់ព្យាការីអេសាយ អស ១២,២.៤-៦ បទពាក្យ ៧

ពាក្យអធិដ្ឋាន

អត្ថបទទី ៦

សូមថ្លែងព្រះគម្ពីរព្យាការីបារុក (បរ ៣,៩-៤,៤)

ទំនុកតម្កើងលេខ ១៩(១៨),៨-១១ បទកាកគតិ

ពាក្យអធិដ្ឋាន

អត្ថបទទី ៧

សូមថ្លែងព្រះគម្ពីរព្យាការីអេសេគីអែល (អគ ៣៦,១៦-២៨)

ទំនុកតម្កើងលេខ ៤២(៤១),២-៣ បទកាកគតិ

ទំនុកតម្កើងលេខ ៤៣(៤២),៣-៤ បទពាក្យ ៧

ពាក្យអង្វរ

ពិធីជ្រមុជទឹក

សូមថ្លែងព្រះគម្ពីរព្យាការីអេសាយ (អស ១២,២,៤-៦)

ទំនុកតម្កើងលេខ ៥១ (៥០), ៣-៤.១២-១៣.១៨-១៩ បទពាក្យ ៧

ពាក្យអធិដ្ឋាន

អត្ថបទទី ៨

សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងរ៉ូម (រម ៦,៣-១១)

ទំនុកតម្កើងលេខ ១១៨(១១៧),១.៤.១៦-១៧.២២-២៣ បទពាក្យ ៧

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តម៉ាថាយ (មថ ២៨,១-១០)

ពាក្យថ្វាយតង្វាយ

ធម៌លើកតម្កើង

ពាក្យអរព្រះគុណ

ថ្ងៃសៅរ៍ពិសិដ្ឋ រាត្រីបុណ្យចម្លង ឆ្នាំ«ក»
ព្រះយេស៊ូមានជ័យជម្នះលើសេចក្តីស្លាប់
ពណ៌ស

អត្ថបទទី ១