០២ មីនា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គមានព្រះបញ្ជាឱ្យយើងខ្ញុំលត់ដំរូបកាយ ដើម្បីប្រែចិត្តគំនិត សូមទ្រង់ព្រះមេត្តាប្រោសយើងខ្ញុំ ឱ្យជៀសផុតពីអំពើបាប ព្រមទាំងឱ្យរស់នៅស្របតាមសេចក្តីស្រឡាញ់របស់ព្រះអង្គផង។

សូមថ្លែងព្រះគម្ពីរព្យាការីដានីអែល (ដន ៩,៤-១០)

ខ្ញុំដានីអែល ទូលអង្វរព្រះអម្ចាស់ជាព្រះរបស់ខ្ញុំ ហើយទទួលសារភាពចំពោះព្រះអង្គដូចតទៅ៖ “បពិត្រព្រះអម្ចាស់! ព្រះអង្គជាព្រះដ៏ឧត្តមគួរស្ញែងខ្លាច! ព្រះអង្គតែងតែកាន់តាមសម្ពន្ធមេត្រីរបស់ព្រះអង្គជានិច្ច ហើយមានព្រះហប្ញទ័យមេត្តាករុណាចំពោះអស់អ្នកដែល ស្រឡាញ់និងប្រតិបត្តិតាមព្រះបញ្ជារបស់ព្រះអង្គ!។ យើងខ្ញុំបានប្រព្រឹត្តអំពើបាបប្រព្រឹត្ត ខុស ប្រព្រឹត្តអំពើអាក្រក់ និងបះបោរប្រឆាំងព្រះអង្គ យើងខ្ញុំក៏បានងាកចេញពិវិន័យនិង ដំបូន្មានរបស់ព្រះអង្គ។ យើងខ្ញុំពុំបានយកចិត្តទុកដាក់ស្តាប់អស់លោកព្យាការីជាអ្នកបម្រើ របស់ព្រះអង្គ ដែលបានថ្លែងព្រះបន្ទូលក្នុងព្រះនាមព្រះអង្គ ថ្វាយស្តេច ប្រាប់នាម៉ឺន ប្រាប់ បុព្វបុរស និងប្រជាជនទាំងមូលនៅក្នុងស្រុកទេ។ បពិត្រព្រះអម្ចាស់! មានតែព្រះអង្គទេដែលសុចរិត! រីឯយើងខ្ញុំសព្វថ្ងៃនេះ យើងខ្ញុំត្រូវអាម៉ាស់ គឺទាំងអ្នកស្រុកយូដា ទាំងអ្នក ក្រុងយេរូសាឡឹម និងជនជាតិអ៊ីស្រាអែលទាំងមូល ទាំងអ្នកនៅជិត និងអ្នកនៅឆ្ងាយ គឺអ្នកដែលព្រះអង្គបានបណ្តេញឱ្យទៅរស់នៅតាមស្រុកទាំងប៉ុន្មាន ព្រោះតែយើងខ្ញុំបានប្រព្រឹត្តខុសចំពោះព្រះអង្គ។ បពិត្រព្រះអម្ចាស់! យើងខ្ញុំទាំងអស់គ្នា ទាំងស្តេច ទាំងនាម៉ឺន ទាំងបុព្វបុរស ត្រូវអាម៉ាស់មុខព្រោះតែយើងខ្ញុំបានប្រព្រឹត្តអំពើបាបទាស់នឹងព្រះហប្ញទ័យរបស់ព្រះអង្គ។ បពិត្រព្រះអម្ចាស់ជាព្រះនៃយើងខ្ញុំ! យើងខ្ញុំបានបះបោរប្រឆាំងនឹងព្រះអង្គ តែព្រះអង្គប្រកបដោយព្រះហប្ញទ័យអាណិតអាសូរ ហើយតែងតែលើកលែងទោសឱ្យយើងខ្ញុំជានិច្ច។ យើងខ្ញុំពុំបានយកចិត្តទុកដាក់ស្តាប់ព្រះសូរសៀងរបស់ព្រះអម្ចាស់ ជាព្រះរបស់យើងខ្ញុំទេ! យើងខ្ញុំក៏ពុំបានធ្វើតាមដំបូន្មានដែលព្រះអង្គប្រទានមកយើងខ្ញុំដោយសារអស់លោកព្យាការីជាអ្នបម្រើរបស់ព្រះអង្គឡើយ។

ទំនុកតម្កើងលេខ ៧៩ (៧៨), ៥.៨-៩.១១.១៣ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ៦, ៦៣,៦៨

សូមថ្លែងព្រះគម្ពីរដំណឹងល្អតាមសន្តលូកា (លក ៦,៣៦-៣៨) 

ព្រះយេស៊ូមានព្រះបន្ទូលទៅកាន់បណ្តាជនថា៖ «ចូរមានចិត្តមេត្តាករុណាដូចព្រះបិតារបស់អ្នករាល់គ្នា ដែលមានព្រះហប្ញទ័យមេត្តាករុណា។ កុំថ្កោលទោសអ្នកដទៃឱ្យ​សោះ នោះព្រះជាម្ចាស់ក៏មិនថ្កោលទោសអ្នករាល់គ្នាដែរ។ កុំផ្តន្ទាទោសអ្នកដទៃឱ្យសោះ នោះព្រះជាម្ចាស់នឹងលើកលែងទោសឱ្យអ្នករាល់គ្នា។ ចូរធ្វើអំណោយដល់អ្នកដទៃនោះព្រះជាម្ចាស់នឹងប្រទានអំណោយដល់អ្នករាល់គ្នាដែរ ទ្រង់នឹងប្រទានមកយ៉ាងបរិបូរណ៌ហូរហៀរ។ ព្រះជាម្ចាស់នឹងវាស់ឱ្យអ្នក តាមរង្វាល់ដែលអ្នកវាស់ឱ្យអ្នកដទៃ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! សូមព្រះអង្គទ្រង់ព្រះសណ្តាប់ពាក្យអង្វររបស់យើងខ្ញុំដោយអនុគ្រោះ។ ព្រះអង្គបានត្រាស់ហៅយើងខ្ញុំឱ្យគោរពបម្រើព្រះអង្គ និងថ្វាយអភិបូជានេះ។ សូមទ្រង់ព្រះមេត្តា្កការពារយើងខ្ញុំ ឱ្យជៀសផុតពីការលោភលន់គ្រប់បែបយ៉ាងផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះកាយ និងព្រះលោហិតព្រះយេស៊ូឱ្យយើងខ្ញុំ។ សូមទ្រង់ព្រះមេត្តាប្រោសយើងខ្ញុំឱ្យបានជាសះស្បើយ សូមតម្រង់ចិត្តគំនិតយើងខ្ញុំឱ្យស្វែងរកសម្បត្តិនៃស្ថានបរមសុខផង។