១៨ កុម្ភៈ ២០២៦

“ចូរប្រែចិត្តគំនិត និងជឿដំណឹងល្អចុះ”។ ក្នុងរដូវអប់រំពិសេស គ្រីស្តបរិស័ទយកចិត្តទុកដាក់ប្រែចិត្ត ដើម្បីវិលទៅរកព្រះជាម្ចាស់ដែលត្រាស់ហៅខ្លួនឱ្យទៅជាបុត្រធីតារបស់ព្រះអង្គ។ នេះជា “ដំណឹងល្អ” មួយដ៏អស្ចារ្យ!។ យើងជាគ្រីស្តបរិស័ទយកចិត្តទុកដាក់ស្តាប់ព្រះបន្ទូលសូមព្រះអង្គប្រែចិត្តគំនិតរបស់យើង ឱ្យយកចិត្តទុកដាក់ពង្រឹងទំនាក់ទំនងរបស់ខ្លួនផ្ទាល់ជាមួយព្រះយេស៊ូ។

អត្ថបទទី១៖ សូមថ្លែងព្រះគម្ពីរព្យាការីយ៉ូអែល (យអ២,១២-១៨)

ព្រះអម្ចាស់មានព្រះបន្ទូលថា៖ «ចូរអ្នករាល់គ្នាវិលត្រលប់មករកយើងវិញដោយស្មោះអស់ពីចិត្ត» ប្រសិនបើអ្នករាល់គ្នាប្រែចិត្តគំនិតដូច្នេះ ប្រហែលជាព្រះអង្គមិនដាក់ទោសអ្នករាល់គ្នាទេមើលទៅ! ប្រហែលជាព្រះអង្គនឹងប្រទានពរដល់អ្នករាល់គ្នាវិញហើយ អ្នករាល់គ្នានឹងមានប្រេង ម្សៅ ស្រា ធ្វើជាគ្រឿងសក្ការបូជាថ្វាយព្រះអម្ចាស់ជាព្រះរបស់អ្នករាល់គ្នាផង!។ ចូរផ្លុំត្រែនៅក្រុងស៊ីយ៉ូនឡើង! ចូរប្រកាសឱ្យអ្នកស្រុកធ្វើពិធីតមអាហារដើម្បីឱ្យបានវិសុទ្ធ ចូរប្រកាសប្រាប់អ្នកស្រុកទាំងអស់ឱ្យមកជួបជុំគ្នាធ្វើបុណ្យដ៏មហោឡារិកមួយ។ ចូរអញ្ជើញប្រជាជនទាំងអស់ឱ្យមកជួបជុំជាព្រះសហគមន៍ ចូរកោះហៅព្រឹទ្ធាចារ្យឱ្យចូលរួបរួមគ្នា និងប្រមូលទាំងក្មេងៗ ទាំងទារក ដែល​កំពុងបៅដោះឱ្យជួបជុំគ្នាផង!។ ចូរឱ្យគូរស្វាមីភរិយាថ្មោងថ្មីចេញពីបន្ទប់។ អស់លោកបូជាចារ្យដែលជាអ្នកគោរពបម្រើព្រះអម្ចាស់ត្រូវទៅយំនៅចន្លោះខ្លោងទ្វារព្រះវិហារ និងអាសនៈ ហើយទូលអង្វរថា៖ «បពិត្រព្រះអម្ចាស់! សូមអាណិតអាសូរប្រជាជនព្រះអង្គផង! សូមកុំបណ្តោយឱ្យប្រជាជាតិដទៃមើលងាយ និងចំអកដាក់ប្រជាជនផ្ទាល់របស់ព្រះអង្គឡើយ! សូមសង្រ្គោះយើងខ្ញុំផង! ក្រែងគេមើលងាយដោយពាលថា តើព្រះរបស់ប្រជាជន អ៊ីស្រាអែលគង់នៅឯណា?»។ នៅពេលនោះ ព្រះអម្ចាស់ស្រឡាញ់ប្រជាជនរបស់ព្រះអង្គលើសប្រជាជននានា ហើយទ្រង់អាណិតអាសូរដល់ប្រជាជនរបស់ព្រះអង្គផង។

ទំនុកតម្កើងលេខ ៥១ (៥០),៣-៦.១២-១៤.១៧ បទពាក្យ ៧

អត្ថបទទី២៖ សូមថ្លែងលិខិតទី២ របស់គ្រីស្តទូតប៉ូលផ្ញើរជូនគ្រីស្តបរិស័ទក្រុងកូរិថូស (២ករ ៥,២០-៦,២)

បងប្អូនជាទីស្រឡាញ់!
យើងជាទូតរបស់ព្រះគ្រីស្ត គឺដូចជាព្រះជាម្ចាស់មានព្រះបន្ទូលដាស់តឿនបងប្អូនតាមរយៈយើងដែរ។ យើងសូមអង្វរបងប្អូនក្នុងព្រះនាមព្រះគ្រីស្តថា៖ ទុកឱ្យព្រះជាម្ចាស់ផ្សះផ្សាបងប្អូនឱ្យជានានឹងព្រះអង្គវិញទៅ!។ ព្រះគ្រីស្តគ្មានបាបទាល់តែសោះ តែព្រះជាម្ចាស់បានធ្វើឱ្យព្រះអង្គទៅជាតួបាបសម្រាប់យើង ដើម្បីប្រោសយើងឱ្យបានសុចរិតរួមជាមួយព្រះគ្រីស្តដែរ។ ដោយយើងធ្វើការរួមជាមួយព្រះជាម្ចាស់ យើងសូមទូន្មានបងប្អូនថា កុំទទួលការប្រណីសន្តោសរបស់ព្រះជាម្ចាស់យកមកទុកចោលជាអសារឥត ការឡើយ ដ្បិតព្រះជាម្ចាស់មានព្រះបន្ទូលថា៖ «យើងបានឆ្លើយតបមកអ្នក នៅគ្រាណាដែលយើងគាប់ចិត្ត យើងបានជួបអ្នកនៅថ្ងៃណាដែលយើងសង្រ្គោះមនុស្សលោក»​។ គ្រាដែលព្រះជាម្ចាស់គាប់ព្រះហប្ញទ័យ គឺឥឡូវនេះហើយ! ថ្ងៃដែលព្រះជាម្ចាស់សង្រ្គោះមនុស្សលោក គឺឥឡូវនេះហើយ! ។

ពិធីអបអរសាទរព្រះគម្ពីរដំណឹងល្អតាម (ទន ៨០,៨.១៩-២០)

​សូមថ្លែងព្រះគម្ពីរដំណឹងល្អតាមសន្តម៉ាថាយ (មថ ៦,១-៦.១៦-១៨)

នៅគ្រានោះ ក្រុមសាវ័កជួបជុំជាមួយព្រះយេស៊ូនៅលើភ្នំ។ ព្រះអង្គមានព្រះបន្ទូលទៅគេថា៖ «កុំធ្វើបុណ្យទាននៅមុខមនុស្សម្នា ដើម្បី​ឱ្យគេឃើញនោះឡើយ។ ធ្វើបែបនេះ អ្នករាល់គ្នាពុំទទួលរង្វាន់អ្វីពីព្រះបិតារបស់អ្នករាល់គ្នាដែលគង់នៅស្ថានបរមសុខទេ។ ពេលណាអ្នកធ្វើទានដល់ជនក្រីក្រ កុំស្រែកប្រកាសក្តែងៗដូចពួកមានពុតតែងធ្វើនៅក្នុងធម្មសាលា ឬនៅតាមដងផ្លូវ ដើម្បីឱ្យមនុស្សម្នាកោតសរសើរនោះឡើយ។ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា អ្នកទាំងនោះបានទទួលរង្វាន់របស់គេហើយ។ រីឯអ្នកវិញ កាលណាដៃស្តាំអ្នកធ្វើទាន មិនបាច់ឱ្យដៃឆ្វេងដឹងឡើយ ដើម្បីឱ្យទានរបស់អ្នកនៅស្ងាត់កំបាំង។ ព្រះបិតារបស់អ្នកទតឃើញអំពើដែលអ្នកធ្វើនៅក្នុងទីស្ងាត់កំបាំង ទ្រង់នឹងប្រទានរង្វាន់មកឱ្យអ្នកវិញ។ កាលណាអ្នករាល់គ្នាអធិដ្ឋាន កុំធ្វើដូចពួកអ្នកមានពុតឡើយ គេចូលចិត្តឈរអធិដ្ឋាននៅក្នុងធម្មសាលា និងនៅត្រង់ថ្នល់កែង ដើម្បីឱ្យមនុស្សម្នាឃើញ។ ខ្ញុំសូមប្រាប់ឱ្យអ្នករាល់គ្នាដឹងច្បាស់ថា ពួកទាំងនោះបានទទួលរង្វាន់របស់គេហើយ។ រីឯអ្នកវិញ កាលណាអ្នកអធិដ្ឋានត្រូវចូលទៅក្នុងបន្ទប់ បិទទ្វារឱ្យជិត ហើយទូលទៅកាន់ព្រះបិតារបស់អ្នកដែលគង់​នៅក្នុងទីស្ងាត់កំបាំង។ ព្រះបិតារបស់អ្នកដែលទតឃើញនៅក្នុងទីស្ងាត់កំបាំង ទ្រង់នឹងប្រទានរង្វាន់មកអ្នកជាពុំខាន។ កាលណាអ្នករាល់គ្នាតមអាហារ កុំធ្វើមុខក្រៀមដូចពួកអ្នកមានពុតនោះឡើយ។ ពួកគេបង្ហាញទឹកមុខឱ្យអ្នកដទៃឃើញថា ខ្លួនតមអាហារ។ ខ្ញុំសុំប្រាប់អ្នករាល់គ្នាឱ្យដឹងច្បាស់ថា អ្នកទាំងនោះបានទទួលរង្វាន់របស់គេហើយ។ រីឯអ្នកវិញ កាលណាអ្នកតមអាហារ ត្រូវចាក់ទឹកអប់លើក្បាល ហើយលុបមុខផង កុំឱ្យមនុស្សម្នាឃើញថា អ្នកតមឡើយ ឱ្យតែព្រះបិតារបស់អ្នកដែលគង់នៅទីស្ងាត់កំបាំងទ្រង់នឹងប្រទានរង្វាន់មកអ្នកជាមិនខាន»។

ពិធីរោយផេះ

កាលជំនាន់ដើម ជនជាតិអ៊ីស្រាអែលតែងតែរោយផេះលើក្បាលធ្វើជាសញ្ញាសម្គាល់ថា គេកាន់ទុក្ខ ឬសូមឱ្យព្រះជាម្ចាស់លើកលែងទោសឱ្យគេផង។ នៅដើមរដូវអប់រំពិសេសនេះ យើងជាគ្រីស្តបរិស័ទក៏សូមព្រះអង្គលើកលែងទោសឱ្យយើងដែរ សូមព្រះអង្គប្រែចិត្តគំនិតយើងផង។

ពាក្យអធិដ្ឋាន សូមព្រះជាម្ចាស់ប្រទានពរដល់គ្រីស្តបរិស័ទ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហប្ញទ័យលើកលែងទោសឱ្យអស់អ្នក ដែលដាក់ខ្លួន និងស្ម័គ្រចិត្តកែប្រែចិត្តគំនិត។ សូមទ្រង់ព្រះមេត្តាទទួលពាក្យអង្វររបស់យើងខ្ញុំ។ សូមប្រទានពរឱ្យយើងខ្ញុំដែលហៀបនឹងរោយផេះលើខ្លួន សូមជម្រះចិត្តគំនិតយើងខ្ញុំ ដើម្បីឱ្យយើងខ្ញុំអាចចូលរួមជាមួយព្រះបុត្រាដែលសោយទិវង្គត និងមានព្រះជន្មថ្មី ហើយសោយរាជ្យអស់កល្បជាអង្វែងតរៀងទៅ។

-​ ក្នុងពេលរោយផេះ លោកបូជាចារ្យមានប្រសាសន៍ថា៖

បពិត្រព្រះអម្ចាស់ជាព្រះបិតា! នៅថ្ងៃចូលរដូវអប់រំពិសេស យើងខ្ញុំសូមថ្វាយកាយ វាចា ចិត្ត រួមជាមួយសក្ការៈបូជារបស់ព្រះយេស៊ូ សូមព្រះអង្គប្រែចិត្តគំនិតយើងខ្ញុំឱ្យមានចិត្តស្រឡាញ់ព្រះអង្គ និងអ្នកដទៃយ៉ាងពិតប្រាកដ។ ដូច្នេះ យើងខ្ញុំអាចចូលរួមជាមួយព្រះ យេស៊ូ ដែលទ្រង់សោយទុក្ខលំបាក ព្រមទាំងមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែងអើយ! ពេលចាប់ផ្តើមរដូវអប់រំពិសេសនេះ យើងខ្ញុំសូមអរព្រះគុណព្រះអង្គ ដ្បិតព្រះអង្គប្រោសប្រទានឱ្យយើងខ្ញុំផ្ចង់ចិត្តគំនិតមករកព្រះអង្គវិញ ដោយរួមជាមួយព្រះយេស៊ូគ្រីស្តជាអម្ចាស់យើងខ្ញុំ។ គឺព្រះគ្រីស្តនេះហើយ ដែលបង្ហាញមាគ៌ាឱ្យយើងខ្ញុំរួចផុតពីកិលេសតណ្ណា។ ព្រះគ្រីស្តប្រទានឱ្យយើងខ្ញុំស្មឹងស្មាធិ អធិដ្ឋាន មានចិត្តសទ្ធាជ្រះថ្លា អាចរម្ងាប់ចិត្តលោភលន់។ អាស្រ័យហេតុនេះហើយ បានជាយើងខ្ញុំសូមចូលរួមជាមួយសន្តបុគ្គលទាំងឡាយ ដើម្បីប្រកាសថា៖ “ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះកាយ និងព្រះលោហិតនៃព្រះបុត្រាព្រះអង្គឱ្យយើងខ្ញុំជាអាហារ។ សូមទ្រង់ព្រះមេត្តាប្រទានព្រះវិញ្ញាណព្រះអង្គ មកញុាំងចិត្តគំនិតយើងខ្ញុំ សូមឱ្យយើងខ្ញុំយកចិត្តទុកដាក់ប្រតិបត្តិតាមយុតិ្តធម៌ និងមេត្តាករុណា ដើម្បីឱ្យយើងខ្ញុំគាប់ព្រះហប្ញទ័យព្រះអង្គ និងបានជាសះស្បើយផង!។