ថ្ងៃអង្គារ រដូវធម្មតា អាទិត្យទី០៦ ឆ្នាំ«គូ»
ពណ៌បៃតង
សូមថ្លែងលិខិតគ្រីស្តទូតយ៉ាកុប (យក ១,១២-១៨)
អ្នកណាស៊ូទ្រាំនឹងទុក្ខលំបាក អ្នកនោះពិតជាមានសុភមង្គល ដ្បិតក្រោយដែលព្រះជាម្ចាស់បានល្បងលគេមើលរួចហើយ គេនឹងទទួលជីវិតទុកជារង្វាន់ ដែលព្រះអង្គបានសន្យានឹងប្រទានឱ្យអស់អ្នកដែលស្រឡាញ់ព្រះអង្គ។ ពេលនរណាម្នាក់ជួបនឹងការល្បួងមិនត្រូវពោលថា៖ “ព្រះជាម្ចាស់ល្បួងខ្ញុំ” ឡើយ ដ្បិតគ្មានអ្វីអាចល្បួងព្រះជាម្ចាស់ឱ្យធ្វើអំពើអាក្រក់បានឡើយ ហើយព្រះអង្គផ្ទាល់ក៏មិនល្បួងនរណាដែរ។ ម្នាក់ៗជួបនឹងការល្បួង មកតែពីចិត្តលោភលន់របស់ខ្លួនឯងផ្ទាល់ទាក់ទាញ និងលួងលោមបញ្ឆោតប៉ុណ្ណោះ។ ចិត្តលោភលន់រមែងតែងតែបង្កើតអំពើបាប លុះដល់អំពើបាបចម្រើនដល់កំរិតហើយ ក៏បណ្តាលឱ្យស្លាប់។ បងប្អូនជាទីស្រឡាញ់អើយ! សូមកុំយល់ច្រឡំឡើយ។ គ្រប់អំណោយដ៏ល្អវិសេស និងអ្វីៗទាំងប៉ុន្មានដ៏គ្រប់លក្ខណៈដែលយើងបានទទួល សុទ្ធតែមកពីស្ថានលើទាំងអស់ គឺមកពីព្រះបិតាដែលបង្កើតពន្លឺ។ ព្រះអង្គមិនចេះប្រែក្រឡាស់ទេ ហើយនៅក្នុងព្រះអង្គសូម្បីតែស្រមោលនៃការប្រែប្រួលក៏គ្មានផង។ ព្រះអង្គសព្វព្រះហប្ញទ័យបង្កើតយើងមកដោយារព្រះបន្ទូលនៃសេចក្តីពិត ដើម្បីឱ្យយើងបានទៅជាផលដំបូងម្យ៉ាងនៃអ្វីៗទាំងអស់ដែលព្រះអង្គបង្កើតមក។
ទំនុកតម្កើងលេខ ៩៤ (៩៣),១២-១៥.១៨-១៩ បទព្រហ្មគីតិ
| ១២ | បពិត្រព្រះអម្ចាស់ | អ្នកដែលព្រះប្រៀនប្រដៅ | |
| អប់រំព្រះវិន័យ | អ្នកនោះហើយមានមង្គល | ។ | |
| ១៣ | នៅថ្ងៃមានអាសន្ន | ទ្រង់បន្ទន់គេលែងខ្វល់ | |
| មានរណ្តៅតម្កល់ | ទុកសម្រាប់កប់មនុស្សពាល | ។ | |
| ១៤ | ដ្បិតព្រះអង្គមិនបោះ | ឱ្យនៅរស់ឈ្មោះតែលតោល | |
| ព្រះអង្គក៏មិនចោល | ចំណែកផ្ទាល់មរតកទ្រង់ | ។ | |
| ១៥ | ចៅក្រមនឹងកាត់ក្តី | ដោយប្រពៃមិនបង្អង់ | |
| អ្នកដែលមានចិត្តត្រង់ | តាមគន្លងយុត្តិធម៌ | ។ | |
| ១៨ | ពេលខ្ញុំពោលថាអស់ | កម្លាំងខ្សោះជិតដួលប្រាណ | |
| ព្រះអង្គទ្រខ្ញុំបាន | តាមព្រះហប្ញទ័យស្ម័គ្រស្មោះ | ។ | |
| ១៩ | ពេលណាមានកង្វល់ | ទុក្ខខ្វាយខ្វល់រាប់មិនអស់ | |
| ព្រះអង្គទ្រង់សន្តោស | ប្រោសឱ្យខ្ញុំអរសប្បាយ | ។ |
ពិធីអបអរសាទរព្រះគម្ពីរដំណឹងល្អតាម (ទន ៧៨,២៤)
អាលេលូយ៉ា! អាលេលូយ៉ា!
ព្រះអម្ចាស់ចិញ្ចឹមប្រជារាស្រ្តរបស់ព្រះអង្គនៅវាលរហោស្ថាន ទ្រង់ប្រទានអាហារស្ថានសួគ៌ឱ្យគេបរិភោគឆ្អែត។ អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តម៉ាកុស (មក ៨,១៤-២១)
ក្រុមសាវ័កភ្លេចយកនំប័ុងទៅជាមួយ។ នៅក្នុងទូក គេមាននំប័ុងតែមួយដុំប៉ុណ្ណោះ។ ព្រះយេស៊ូមានព្រះបន្ទូលដាក់តឿនគេថា៖«ចូរអ្នករាល់គ្នាប្រុងប្រយ័ត្ននឹងមេម្សៅរបស់ពួកផារីស៊ី ព្រមទាំងមេម្សៅរបស់ស្តេចហេរ៉ូដឱ្យមែនទែន»។ ក្រុមសាវ័កជជែកគ្នាថា៖ «លោកមានប្រសាសន៍ដូច្នេះមកពីយើងគ្មាននំប័ុងទេដឹង!»។ ព្រះយេស៊ូជ្រាបគំនិងពួកគេ ក៏មានព្រះបន្ទូលថា៖«ម្តេចក៏ជជែកគ្នាអំពីរឿងគ្មាននំប័ុងដូច្នេះ? តើអ្នករាល់គ្នាពុំទាន់ស្តាប់បាន ពុំទានយល់សេចក្តីទេឬ? ឬមួយអ្នករាល់គ្នាមានចិត្តរឹងរូសឬ? អ្នករាល់គ្នាមានភ្នែកតែមើលមិនឃើញ មានត្រចៀកតែស្តាប់មិនឮ!។ តើអ្នករាល់គ្នាចាំឬទេ កាលខ្ញុំកាច់នំប័ុងប្រាំដុំចែកឱ្យមនុស្សប្រាំពាន់នាក់ តើអ្នករាល់គ្នាប្រមូលនំប័ុងដែលសល់បានប៉ុន្មានល្អី?»។ គេទូលព្រះអង្គថា៖ «ដប់ពីរល្អី»។ «ចុះកាលខ្ញុំកាច់នំប័ុងប្រាំពីរដុំចែកឱ្យបួនពាន់នាក់ តើអ្នករាល់គ្នាប្រមូលបានប៉ុន្មានជាល?»។ គេទូលថា៖ «ប្រាំពីរជាល»។ ព្រះយេស៊ូមានព្រះបន្ទូលទៅគេថា៖ «អ្នករាល់គ្នានៅតែពុំទាន់យល់ទៀតឬ?»។