០៦ ឧសភា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គបានបង្កើតមនុស្សឱ្យមានលក្ខណៈដ៏ប្រសើរ ដូចព្រះអង្គ។ ដោយ​ព្រះអង្គ​ប្រោសព្រះយេស៊ូឱ្យមានសិរីរុងរឿង ព្រះអង្គក៏បើកផ្លូវយើងខ្ញុំអាចស្គាល់ព្រះអង្គបាន។ សូម​ទ្រង់ព្រះមេត្តា​បំភ្លឺចិត្ត​គំ​និត​​​យើងខ្ញុំ និងចិត្តគំនិតមនុស្សគ្រប់ជាតិសាសន៍ឱ្យស្គាល់ព្រះអង្គ និងនាំគ្នាគោរពថ្វាយបង្គំព្រះអង្គតាមប្រពៃណី​រៀង​ៗខ្លួនផង។

សូមថ្លែងព្រះគម្ពីរកិច្ចការរបស់គ្រីស្តទូត (កក ១៥,១-៦)

នៅគ្រានោះ មានអ្នកខ្លះមកពីស្រុកយូដា នាំគ្នាប្រៀនប្រដៅបងប្អូនគ្រីស្តបរិស័ទនៅក្រុងអន់ទីយ៉ូក​ថា៖ «ប្រ​សិ​ន​បើបងប្អូនមិនទទួលពិធីកាត់ស្បែកតាមទំនៀមទម្លាប់របស់លោកម៉ូសេទេនោះ បងប្អូន​មិន​អាច​ទទួល​ការ​សង្គ្រោះបានឡើយ»។ លោកប៉ូល និងលោក​បារណាបាសប្រកែកជំទាស់នឹងអ្នកទាំងនោះ ព្រមទាំង​ជជែក​វែក​ញែក​ជា​មួយពួកគេយ៉ាងខ្លាំង។ បងប្អូនសម្រេចចិត្តចាត់លោកប៉ូល និងលោកបារ​ណាបាសឱ្យទៅក្រុងយេរូសាឡឹម ដោយ​មានបងប្អូនខ្លះទៀតទៅជាមួយផង ដើម្បីឱ្យទៅជម្រាបក្រុមគ្រីស្តទូត និងក្រុមព្រឹទ្ធាចារ្យអំពីរឿងនេះ។ ព្រះសហគម​ន៍​បាន​ជួយឧបត្ថម្ភពួកលោកក្នុងការធ្វើដំណើរ។ លោកនាំគ្នាឆ្លងកាត់ស្រុកភេនីស៊ី ស្រុកសាម៉ារី ទាំង​រៀប​រាប់ប្រាប់ពួកបង​ប្អូន​យ៉ាងក្បោះក្បាយថា សាសន៍ដទៃបានបែរចិត្តមករកព្រះជាម្ចាស់។ ដំណឹងនេះ ធ្វើឱ្យបងប្អូនមានអំណរ​សប្បាយ​យ៉ាងខ្លាំងគ្រប់ៗគ្នា។ កាលមកដល់ក្រុងយេរូសាឡឹមហើយ ព្រះសហគមន៍ ក្រុមគ្រីស្តទូត និងក្រុម​ព្រឹទ្ធា​ចារ្យ​នាំគ្នាទទួលពួកលោក។ ពួកលោកក៏ជម្រាបអំពីកិច្ចការទាំងប៉ុន្មានដែលព្រះជាម្ចាស់បានធ្វើជាមួយពួកលោក។ ពេលនោះ មានបងប្អូន​ខ្លះខាង​គណៈ​ផារីស៊ីដែលជាអ្នកជឿ នាំគ្នាក្រោកឈរឡើងពោលថា៖ «ត្រូវតែធ្វើពិធីកាត់ស្បែកឱ្យសាសន៍ដទៃ ហើយត្រូវ​បង្គាប់​​គេឱ្យប្រតិបត្តិតាមធម្មវិន័យរបស់លោកម៉ូសេដែរ»។ ក្រុមគ្រីស្តទូត និងក្រុមព្រឹទ្ធាចារ្យក៏ប្រជុំគ្នា ដើម្បីពិនិត្យ​ពិច័យមើលសំណុំរឿងនេះ។

ទំនុកតម្កើងលេខ ១២២ (១២១),១-៥ បទកាកគតិ

ពិធីអបអរសាទរព្រះគម្ពីរដំណឹងល្អតាម (រម ៧,៤)

សូមថ្លែងព្រះគម្ពីរដំណឹងល្អតាមសន្តយ៉ូហាន (យហ ១៥,១-៨)

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅ​កាន់​ក្រុម​សាវ័ក​ថា៖ «ខ្ញុំហ្នឹងហើយជាដើមទំពាំងបាយជូរដ៏ពិតប្រាកដ រីឯព្រះបិតាខ្ញុំជាម្ចាស់ចំការ។ មែកណានៅជាប់នឹងខ្ញុំ តែ​​ឥតមានផ្លែ ព្រះបិតាកាត់មែកនោះចោល។ រីឯមែកណាមានផ្លែ ព្រះអង្គលួសមែកនោះ ដើម្បីឱ្យ​មាន​ផ្លែ​កាន់​តែ​ច្រើន​ឡើង​ទៀត។ ពាក្យដែលខ្ញុំបានប្រាប់ ធ្វើឱ្យអ្នករាល់គ្នាបរិសុទ្ធរួចទៅហើយ។ ចូរស្ថិតនៅជាប់នឹងខ្ញុំ ដូចខ្ញុំស្ថិតនៅជាប់នឹងអ្នករាល់គ្នាដែរ។ ប្រសិនបើមែកមិនស្ថិតនៅជាប់នឹងដើមទេ វា​ពុំ​អាច​បង្កើត​ផល​ដោយ​ឯកឯងបានឡើយ។ រីឯអ្នករាល់គ្នាក៏ដូច្នោះដែរ បើមិនស្ថិតនៅជាប់នឹងខ្ញុំទេ អ្នករាល់​គ្នា​ពុំអាច​បង្កើត​ផល​បាន​ទាល់​តែសោះ​។ ខ្ញុំនេះហើយជាដើមទំពាំងបាយជូរ អ្នករាល់គ្នាជាមែក។ អ្នកណាស្ថិតនៅជាប់នឹងខ្ញុំ ហើយខ្ញុំនៅ​ជាប់​នឹងអ្នកនោះ ទើបអ្នកនោះបង្កើត​ផលបានច្រើន។ បើដាច់ពីខ្ញុំ អ្នករាល់គ្នាពុំអាចធ្វើអ្វីកើតឡើយ។ អ្នកណា​មិន​ស្ថិត​នៅជាប់នឹងខ្ញុំ អ្នកនោះប្រៀបបាននឹងមែកដែលគេ​បោះចោលទៅខាងក្រៅ ហើយស្វិតក្រៀម។ បន្ទាប់មក គេ​រើស​​មែកទាំងនោះបោះទៅក្នុងភ្លើងឆេះអស់ទៅ។ បើអ្នករាល់គ្នាស្ថិតនៅជាប់នឹងខ្ញុំ ហើយបើពាក្យខ្ញុំស្ថិតនៅជាប់​នឹង​អ្នករាល់គ្នា ចូរទូលសុំអ្វីៗតាមតែអ្នករាល់គ្នាប្រាថ្នាចង់បានចុះ នោះអ្នករាល់គ្នាមុខតែបានទទួល​ជាមិន​ខាន​។ ​ព្រះ​បិតារបស់ខ្ញុំសម្តែងសិរីរុងរឿងដោយអ្នករាល់គ្នាបង្កើតផលផ្លែបានច្រើន និងដោយ​អ្នក​រាល់​គ្នា​ជា​សិស្សរបស់ខ្ញុំមែន»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ក្នុងអភិបូជានេះ យើងខ្ញុំ​នាំ​គ្នាចូលរួម​ជា​មួយ​ព្រះបុត្រា​ព្រះអង្គ​ ដែលបាន​បូជា​ព្រះជន្ម​ថ្វាយព្រះអង្គ សូមទ្រង់ព្រះមេត្តាលើកទឹកចិត្តយើងខ្ញុំ ក្នុងពេលព្រះអង្គជម្រះយើងខ្ញុំឱ្យបានបរិសុទ្ធ។ សូម​ឱ្យ​យើង​ខ្ញុំភ្ជាប់ចិត្តជាមួយព្រះយេស៊ូជានិច្ចផង គឺព្រះយេស៊ូមានព្រះជន្មគង់នៅ និងសោយរាជ្យអស់កល្បជាអង្វែង​តរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានទាំងព្រះបន្ទូល ទាំងព្រះកាយរបស់ព្រះគ្រីស្តឱ្យយើងខ្ញុំ។ សូមទ្រង់ព្រះមេត្តាប្រោសប្រទានឱ្យយើងខ្ញុំស្ថិតនៅជាប់នឹងព្រះគ្រីស្ត និងឱ្យព្រះគ្រីស្តស្ថិតនៅជាប់ជាមួយយើងខ្ញុំដែរ។ សូមឱ្យយើងខ្ញុំអាចបង្កើតផល ដែលសម្តែងសិរីរុងរឿងរបស់ព្រះអង្គសព្វថ្ងៃនេះផង។