២២ មេសា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គណែនាំ និងគាំទ្រព្រះសហគមន៍ឱ្យលូតលាស់ជានិច្ច។ សូមទ្រង់ព្រះមេត្តាប្រទានជំនឿឱ្យយើងខ្ញុំ កុំឱ្យយើងខ្ញុំអស់សង្ឃឹមនៅគ្រាពិបាក សូមឱ្យយើងខ្ញុំសុខចិត្តរួមស្លាប់រួមរស់ជាមួយព្រះយេស៊ូដែលសោយទិវង្គត និងមានព្រះជន្ម​រស់​ឡើងវិញ​ផង​។ ​ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

សូមថ្លែងព្រះគម្ពីរកិច្ចការរបស់គ្រីស្តទូត (កក ៨,១-៨)

តាំងពីថ្ងៃដែលជនជាតិយូដាប្រហារជីវិតលោកស្ទេផានមក ព្រះសហគមន៍​នៅក្រុងយេរូសាឡឹមត្រូវគេបៀត​បៀន​ជាខ្លាំង អ្នកជឿទាំង​ប៉ុន្មាន លើកលែង​តែក្រុមគ្រីស្តទូតចេញបាក់បែកខ្ញែកគ្នាពាសពេញស្រុកយូដា និងស្រុកសាម៉ារី។ អស់អ្នកដែលគោរពប្រណិប័តន៍ព្រះជាម្ចា​ស់ នាំគ្នាបញ្ចុះសពលោកស្ទេផាន និងយំសោកយ៉ាងខ្លាំងទៀតផង។ រីឯ​លោក​សូលវិញ លោកខំប្រឹងរំលាយ​ព្រះសហគមន៍ ដោយចូលពីផ្ទះមួយទៅផ្ទះមួយ ចាប់អ្នកជឿទាំងប្រុស ទាំងស្រី​យកទៅឃុំឃាំង។ ក្រុមសាវ័កដែលបែកខ្ញែកគ្នានោះធ្វើដំណើរពីកន្លែង​មួយ​ទៅកន្លែងមួយ ទាំងនាំ​ដំណឹង​ល្អអំពី​ព្រះ​បន្ទូល។ លោកភីលីពធ្វើដំណើរទៅក្រុងមួយនៅស្រុកសាម៉ារី ហើយប្រកាសប្រាប់អ្នកក្រុងអំពីព្រះគ្រីស្ត។ មហាជន​រួមចិត្តគំនិតគ្នា ពេញចិត្តនឹងពាក្យសំដីរបស់លោកភីលីព ព្រោះគេបានឮ​លោក​មានប្រសាសន៍ និងបាន​ឃើញ​ទីសម្គាល់ដ៏អស្ចារ្យដែលលោកធ្វើ គឺមានខ្មោច​ជាច្រើន​ចេញ​ពីមនុស្សទាំង​ស្រែក​ខ្លាំងៗ និងមាន​មនុស្សខ្វិន ​មនុស្ស​ស្លាប់ដៃ​ជើងជាច្រើនបានជា។ ប្រជាជននៅក្រុងនោះមានអំណរសប្បាយដ៏លើស​លប់។

ទំនុកតម្កើងលេខ ៦៦(៦៥), ១-៧ បទកាកគតិ

ពិធីអបអរសាទរព្រះគម្ពីរដំណឹងល្អតាម (រម៦,៩)

សូមថ្លែងព្រះគម្ពីរដំណឹងល្អតាមសន្តយ៉ូហាន (យហ ៦,៣៥-៤០) 

ក្រោយពីព្រះយេស៊ូប្រទាននំប័ុងឱ្យបណ្តាជន ព្រះអង្គមានព្រះបន្ទូលថា៖ ​«ខ្ញុំ​នេះហើយជាអាហារដែលផ្តល់ជីវិត។ អ្នកណាមករកខ្ញុំ លែងឃ្លានទៀតហើយ​ អ្នកណាជឿលើខ្ញុំក៏លែងស្រេកទៀតដែរ។ ប៉ុន្តែ ខ្ញុំបាននិយាយប្រាប់អ្នករាល់គ្នារួចហើយថា “អ្នករាល់គ្នាបានឃើញ តែអ្នករាល់គ្នាមិនជឿទេ”។ អស់អ្នក​ដែលព្រះបិតាប្រទានមកខ្ញុំតែងតែមករកខ្ញុំ ហើយខ្ញុំមិនបោះបង់ចោលអ្នកដែល​មករកខ្ញុំជាដាច់ខាត ដ្បិតខ្ញុំចុះពីស្ថានបរមសុខមកដើម្បីធ្វើតាមព្រះហឫទ័យរបស់ព្រះអង្គដែលចាត់ខ្ញុំឱ្យមក គឺពុំមែនធ្វើតាមបំណងចិត្តរបស់ខ្ញុំទេ។ រីឯ​ព្រះអង្គដែលចាត់ខ្ញុំឱ្យមកនោះ ទ្រង់មិនសព្វព្រះហឫទ័យឱ្យនរណាម្នាក់ក្នុងបណ្តាលអស់អ្នកដែលព្រះអង្គប្រទានមកខ្ញុំត្រូវវិនាសអន្តរាយឡើយ តែព្រះអង្គ​សព្វព្រះហឫទ័យឱ្យខ្ញុំប្រោសគេឱ្យមានជីវិតរស់ឡើងវិញ នៅថ្ងៃចុងក្រោយ​បំផុត។ ព្រះបិតារបស់ខ្ញុំសព្វព្រះហឫទ័យឱ្យអស់អ្នកដែលបានឃើញព្រះបុត្រា ហើយជឿលើព្រះបុត្រាមានជីវិតអស់កល្បជានិច្ច។ ខ្ញុំក៏នឹងប្រោសអ្នកនោះឱ្យ​មានជីវិតដ៏ពេញលេញនៅថ្ងៃចុងក្រោយបំផុតផង»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតារបស់ព្រះយេស៊ូគ្រីស្ត និងជាព្រះបិតាយើងខ្ញុំ! ព្រះអង្គមានព្រះហឫទ័យសប្បុរសយ៉ាងក្រៃលែង គឺព្រះអង្គប្រទានព្រះជន្មផ្ទាល់របស់ព្រះអង្គដល់អស់អ្នកដែលជឿសង្ឃឹមលើព្រះបុត្រាព្រះអង្គ សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យសុខចិត្តថ្វាយខ្លួនទៅព្រះអង្គ ដោយរួមស្លាប់រួមរស់ជាមួយព្រះយេស៊ូ។

ពាក្យអរព្រះគុណ

បពិត្រព្រះអម្ចាស់ជាព្រះបិតា ប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមអរព្រះគុណព្រះអង្គ ដ្បិតព្រះអង្គបានប្រទានជំនឿលើព្រះយេស៊ូជាព្រះបុត្រាឱ្យយើងខ្ញុំ។ ព្រះយេស៊ូក៏មិនបោះបង់ចោលអ្នកណាដែលមករកព្រះអង្គដែរ។ សូមទ្រង់ព្រះមេត្តាប្រោសប្រទានឱ្យយើងខ្ញុំមានជំនឿកាន់តែមាំមួនឡើង ព្រមទាំងប្រព្រឹត្តតាមជំនឿនេះផង។