១៩ មីនា ២០២៦

ពាក្យអធិដ្ឋានពេលចូល

បពិត្រព្រះជាម្ចាស់ប្រកបដោយតេជានុភាពសព្វប្រការ! នៅពេលកំណត់ដែលព្រះអង្គចងសម្ពន្ធមេត្រី​ថ្មី​ជាមួយមនុស្សលោក ព្រះអង្គបានប្រគល់បន្ទុកថែទាំព្រះយេស៊ូជាព្រះសង្គ្រោះឱ្យសន្តយ៉ូសែប។ សូម​ព្រះ​អង្គទ្រង់ព្រះមេត្តាប្រោសព្រះសហគមន៍ឱ្យបង្ហាញការសង្គ្រោះរបស់ព្រះអង្គដល់មនុស្សលោកទាំង​ឡាយ​សព្វ​ថ្ងៃនេះផង។

អត្ថបទទី១៖ សូមថ្លែងព្រះគម្ពីររបស់លោកសាម៉ូអែល (២សម៧,៤-៥ក,១២-១៤ក,១៦)

ព្រះអម្ចាស់មានព្រះបន្ទូលមកកាន់លោកណាថាន់ថា៖ «អញ្ជើញទៅប្រាប់ព្រះបាទដាវីឌ ជាអ្នក​បម្រើ​របស់​យើងថា ព្រះអម្ចាស់មានព្រះបន្ទូលដូចតទៅ៖ “តើអ្នកឬដែលនឹងសាងដំណាក់សម្រាប់ឱ្យយើងនៅ? ពេល​ណាអ្នកលាចាកលោកនេះទៅជួបជុំនឹងដូនតាអ្នក យើងនឹងលើកបុត្រដែលកើតមកពីអ្នកឱ្យសោយ​រាជ្យ​បន្ត និងធ្វើឱ្យរាជ្យនោះបានខ្ជាប់ខ្ជួនផង គឺបុត្រនោះហើយដែលនឹងសាងដំណាក់សម្រាប់យើង ហើយយើង​នឹង​តាំង​រាជ្យបល័្លង្ករបស់បុត្រនោះឱ្យនៅស្ថិតស្ថេរមាំមួនជាដរាបតរៀងទៅ។ យើងនឹងរាប់គេទុកជាបុត្រ ហើយ​គេ​រាប់​យើងទុកជាបិតា។ កូនចៅអ្នកនឹងសោយរាជ្យជាដរាបតរៀងទៅ ហើយរាជបល្ល័ង្កអ្នកនៅខ្ជាប់​ខ្ជួនអស់​កល្បជានិច្ច”» ។

ទំនុកតម្កើងលេខ ៨៩(៨៨),២-៥.២៧-២៩ បទកាកគតិ

អត្ថបទទី២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្តបរិស័ទក្រុងរ៉ូម (រម ៤,១៣.១៦-១៨.២២)

បងប្អូនជាទីស្រឡាញ់!
ព្រះជាម្ចាស់មានព្រះបន្ទូលសន្យាមកលោកអប្រាហាំ និងពូជ​ពង្ស​របស់​លោក​ថា គេនឹងបានទទួលពិភពលោកទុកជាមត៌ក។ ព្រះអង្គសន្យាដូច្នេះ មិនមែនមកពីលោក​អប្រា​ហាំ​បាន​ប្រតិបត្តិ​តាម​ធម្មវិន័យនោះទេ គឺមកពីលោកជាមនុស្សសុចរិត ដោយលោកមានជំនឿ។ មនុស្សទទួលមត៌កតាម​ការ​ប្រ​​ណីសន្តោសរបស់ព្រះជាម្ចាស់ ដោយសារជំនឿ ដូច្នេះ ព្រះបន្ទូលសន្យារបស់ព្រះអង្គមានប្រយោជន៍​សម្រា​ប់​ពូជពង្សលោកអប្រាហាំទាំងមូល មិនត្រឹមតែសម្រាប់អស់អ្នកចូលរួមក្នុងប្រជាជនដែលប្រតិបត្តិតាម​ធម្ម​វិ​ន័យ​ប៉ុណ្ណោះទេ គឺសម្រាប់អស់អ្នកដែលមានជំនឿដូចលោកអប្រាហាំ ជាឪពុករបស់យើង​ទាំងអស់​គ្នា​ដែរ​។ ទោះ​បី​លោក​អប្រាហាំគ្មានអ្វីជាក្តីសង្ឃឹមក៏ដោយ ក៏លោកនៅ​តែមានសង្ឃឹម និងមានជំនឿដែរ។ លោកក៏ទៅជា​ឪពុក​របស់​ជាតិសាសន៍ជាច្រើន ស្របតាមព្រះបន្ទូលដែលមានថ្លែងទុកមកថា៖ “ពូជពង្សរបស់អ្នក និងមាន​ច្រើន​យ៉ាង​នេះ”។ ហេតុនេះហើយបានជាព្រះជាម្ចាស់ប្រោសលោកឱ្យបានសុចរិត។

ពិធីអបអរសាទរព្រះគម្ពីរដំណឹងល្អតាម (ទន ៨៤,៥)

អាលេលូយ៉ា! អាលេលូយ៉ា! 
បពិត្រព្រះអម្ចាស់! សូមលើកតម្កើងសិរីរុងរឿងរបស់ព្រះអង្គ! អ្នកបម្រើដ៏ស្មោះត្រង់ ពិតជាបានសុភមង្គល !
ព្រះជាម្ចាស់នឹងផ្ញើព្រះដំណាក់ព្រះអង្គឱ្យគេ ! សូមលើកតម្កើងសិរីរុងរឿងរបស់ព្រះអង្គ! អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ (មថ ១,១៦.១៨ – ២១.២៤)

លោកយ៉ាកុបបង្កើតលោកយ៉ូសែបជាស្វាមីរបស់នាងម៉ារី ដែលបង្កើតព្រះយេស៊ូហៅថាព្រះគ្រីស្ត។ នេះ​ជាដំណើររឿងអំពីកំណើតរបស់ព្រះយេស៊ូគ្រីស្ត។ នាងម៉ារី ​​មាតារបស់ព្រះអង្គត្រូវ​ជាគូដណ្តឹងរបស់​លោក​យ៉ូ​សែ​ប​​។ មុនពេលអ្នកទាំងពីររួមរស់ជាមួយគ្នា នាងម៉ារីមានផ្ទៃពោះ​ដោយសារព្រះវិញ្ញាណដ៏វិសុទ្ធរួច​ទៅហើ​យ​។​ លោ​ក​​យ៉ូសែបស្វាមីរបស់នាងជាមនុស្សសុចរិត លោកមិនចង់បំបាក់មុខនាងឡើយ គឺលោកសម្រេចចិត្តថានឹង​ផ្តាច់​ពាក្យ​ដោយស្ងាត់ៗ។ ពេលលោកកំពុងគិតដូច្នេះ ស្រាប់តែមានទេវទូតរបស់ព្រះអម្ចាស់មកប្រាប់លោក​ក្នុង​សុ​បិ​ន្ត​និ​មិត្តថា៖ លោកយ៉ូសែបជាព្រះរាជវង្សរបស់ព្រះបាទដាវីឌ! សូមកុំខ្លាចនឹងទទួលនាងម៉ារីមក​ធ្វើជាភរិយា​ឡើយ​!​ បុត្រដែលនៅក្នុងផ្ទៃនាងកើតមកពីព្រះវិញ្ញាណដ៏វិសុទ្ធ។ នាងនឹងសម្រាលបានបុត្រមួយ ហើយលោក​ត្រូវ​ថ្វាយ​ព្រះនាមថា “យេស៊ូ” ដ្បិតបុត្រនោះនឹងសង្គ្រោះប្រជារាស្ត្រព្រះអង្គឱ្យរួចពីបាបរបស់គេ ។ លុះលោកយ៉ូសែបភ្ញាក់ឡើង លោកក៏ធ្វើតាមបង្គាប់ទេវទូតរបស់ព្រះអម្ចាស់ គឺលោក​ទទួល​នាង​ម៉ារីម​ក​ធ្វើ​ជាភរិយា ប៉ុន្តែ លោកពុំបានរួមបវេណីជាមួយនាង រហូតដល់នាងសម្រាល​បានបុត្រ​ដែល​លោក​ថ្វាយ​ព្រះ​នាម​ថា “យេស៊ូ” ។

ឬសូមថ្លែងព្រះគម្ពីរដំណឹងល្អតាមសន្តលូកា (លក ២, ៤១-៥១)

ជារៀងរាល់ឆ្នាំក្នុងឱកាសបុណ្យចម្លង មាតាបិតារបស់ព្រះយេស៊ូតែងតែធ្វើ​ដំណើរទៅ​ក្រុង​យេ​រូ​សា​ឡឹម។ លុះដល់ព្រះយេស៊ូមានព្រះជន្មាយុដប់ពីរព្រះវស្សា មាតាបិតាក៏នាំព្រះអង្គឡើងទៅចូល​រួមក្នុង​ពិធី​បុណ្យ​តាមទំនៀមទម្លាប់។ លុះពីធីបុណ្យបានចប់សព្វគ្រប់ហើយ អ្នកទាំងពីរនាំគ្នាវិលត្រឡប់ទៅផ្ទះវិញ។ រីឯព្រះ​កុ​មារ​យេស៊ូគង់នៅក្រុងយេរូសាឡឹមនៅឡើយ តែមាតាបិតាពុំបានដឹងទេ។ គាត់នឹកស្មានថា ព្រះកុមារ​គង់​នៅ​ក្នុង​ចំ​ណោម​អស់អ្នកដែលរួម​ដំណើរជាមួយ។ ក្រោយពីបានធ្វើដំណើរអស់រយៈពេលមួយថ្ងៃ ទើបគាត់នាំគ្នា​ដើររក​ព្រះ​កុមារក្នុងចំណោមញ្ញាតមិត្តទាំងអស់ ប៉ុន្តែ រកពុំឃើញសោះ គាត់ក៏នាំគ្នាត្រឡប់​ទៅក្រុង​យេរូសា​ឡឹម​វិញ​ ដើម្បី​រកព្រះអង្គនៅទី​នោះទៀត។ បីថ្ងៃក្រោយមក មាតាបិតាឃើញព្រះយេស៊ូក្នុងព្រះវិហារ ព្រះអង្គគង់​នៅ​កណ្តា​ល​ចំណោមគ្រូអាចារ្យ កំពុងតែស្តាប់គេនិយាយ ព្រមទាំងសួរសំណួរផ្សេងៗដល់គេផង។ អស់​អ្នក​ដែល​ស្តាប់​ព្រះកុមារនឹកឆ្ងល់ពីព្រះបន្ទូលឆ្លើយឆ្លងរបស់ព្រះអង្គប្រកបដោយព្រះប្រាជ្ញាញ្ញាណ។ កាលមាតាបិតា​បាន​ឃើញព្រះកុមារហើយ គាត់នឹកឆ្ងល់យ៉ាងខ្លាំង។ មាតាសួរថា៖ “កូនអើយ! ហេតុអ្វីបានជាកូនធ្វើដូច្នេះ? ឪ​ពុក​ម្តាយព្រួយចិត្តណាស់ខំដើររកកូន។ ព្រះកុមារមានព្រះបន្ទូលតបថា៖ «ហេតុអ្វីបានជាលោកឪពុកអ្នក​ម្តាយ​រកកូនយ៉ាងហ្នឹង? តើលោកឪពុកអ្នកម្តាយមិនជ្រាបថា កូនត្រូវនៅក្នុងដំណាក់​ព្រះបិតា​របស់កូន​ទេ​ឬ?​»។​ ប៉ុន្តែ មាតាបិតាពុំបានយល់អត្ថន័យនៃព្រះបន្ទូលរបស់ព្រះកុមារឡើយ។ បន្ទាប់មក ព្រះកុមារយេស៊ូយាង​ត្រ​ឡប់​ទៅភូមិណាសារ៉ែតជាមួយមាតាបិតាវិញ ហើយធ្វើតាមឱវាទរបស់គាត់ទាំងពីរនាក់។ មាតារបស់​ព្រះអង្គ​ចង​ចាំ​ហេតុការណ៍ទាំងនោះទុកក្នុងចិត្ត។

ពាក្យថ្វាយតង្វាយ

បពិត្រព្រះអម្ចាស់! យើងខ្ញុំគ្មានអ្វីយកមកថ្វាយព្រះអង្គ ក្រៅពីកាយ វាចា ចិត្តឡើយ។ សូម​ទ្រង់​ព្រះ​មេត្តា​ប្រោសយើងខ្ញុំឱ្យថ្វាយខ្លួនទាំងស្រុង  រួមជាមួយសក្ការបូជារបស់ព្រះយេស៊ូដោយចិត្តស្មោះ ដូចសន្តយ៉ូសែប ដែលបានថ្វាយខ្លួនបម្រើព្រះបុត្រាព្រះអង្គ គឺព្រះយេស៊ូដែលមានព្រះជន្មគង់នៅ និងសោយរាជ្យ​អស់​កល្បជាអង្វែងតរៀងទៅ។

ធម៌លើកតម្កើង

បពិត្រព្រះបិតាដ៏វិសុទ្ធបំផុត  ជាព្រះអម្ចាស់ដែលមានព្រះជន្មគង់នៅអស់កល្បជានិច្ច និងដែលមានតេ​ជានុ​ភាព​សព្វប្រការ! ពេលយើងខ្ញុំនាំគ្នាគោរពសន្តយ៉ូសែប យើងខ្ញុំសរសើរតម្កើង​ព្រះអង្គដែល​បាន​ជ្រើស​រើស​សន្តយ៉ូសែប ជាបុរសដ៏សុចរិតឱ្យធ្វើជាស្វាមីរបស់នាងព្រហ្មចារិនីម៉ារី ជាព្រះមាតា​ព្រះ​យេស៊ូ​ជា​ព្រះ​អម្ចាស់​។ សន្តយ៉ូសែបពិតជាអ្នកបម្រើដ៏ស្មោះត្រង់ និងឈ្លាសវៃ ដែលទទួលបន្ទុក​ធ្វើជាឪពុក​ថែរក្សាការ​ពារ​ព្រះ​បុត្រាព្រះអង្គ គឺព្រះយេស៊ូគ្រីស្តជាអម្ចាស់យើងខ្ញុំ ដែលចាប់កំណើតដោយព្រះវិញ្ញាណដ៏វិសុទ្ធ ។
អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ ដោយប្រកាសថា៖ ” ព្រះដ៏វិសុទ្ធ ! ព្រះដ៏វិសុទ្ធ ! ព្រះដ៏វិសុទ្ធ ! “

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានអាហារដ៏វិសុទ្ធឱ្យយើងខ្ញុំជាមហាគ្រួសាររបស់​ព្រះ​អង្គ​ទទួលទាន។ សូមព្រះអង្គមេត្តាបំភ្លឺចិត្តគំនិតយើងខ្ញុំជាព្រះសហគមន៍ ឱ្យស្គាល់ព្រះហឫទ័យព្រះអង្គ និង​ប្រ​ព្រឹត្តតាមជានិច្ច ដូចសន្តយ៉ូសែបផង ។