១១ មីនា ២០២៦

អធិដ្ឋានពេលចូល

បពិត្រព្រះអម្ចាស់យើងខ្ញុំ! ព្រះអង្គចាត់ចែងឱ្យមានរដូវអប់រំពិសេសនេះសម្រាប់ហ្វឹកហ្វឺនយើងខ្ញុំឱ្យរួមរស់ជាមួយព្រះគ្រីស្ត និងឱ្យទទួលព្រះបន្ទូលព្រះអង្គដែរ។ សូមទ្រង់ព្រះមេត្តាប្រោសយើងខ្ញុំឱ្យបម្រើព្រះអង្គដោយចិត្តស្មោះ និងឱ្យចូលចិត្តអធិដ្ឋានរួមជាមួយគ្នាផង។

សូមថ្លែងព្រះគម្ពីរទុតិយកថា (ទក ៤,១.៥-៩)

លោកម៉ូសេមានប្រសាសន៍ទៅកាន់ប្រជាជនអ៊ីស្រាអែលថា៖ «ឥឡូវនេះអ៊ីស្រាអែលអើយ ចូរស្តាប់ហើយប្រតិបត្តិតាមក្រឹត្យវិន័យ និងបញ្ជាផ្សេងៗដែលខ្ញុំបង្រៀនអ្នករាល់គ្នា ដើម្បីឱ្យអ្នករាល់គ្នាមានជីវិត ហើយចូលទៅកាន់កាប់ទឹកដីដែលព្រះអម្ចាស់ជាព្រះនៃដូនតារបស់អ្នករាល់គ្នាប្រគល់ឱ្យអ្នករាល់គ្នា។ អ្នករាល់គ្នាឃើញស្រាប់ហើយថា ខ្ញុំបង្រៀនក្រឹត្យវិន័យ និងបទបញ្ជាផ្សេងៗដល់អ្នករាល់គ្នា ដូចព្រះអម្ចាស់ជាព្រះរបស់ខ្ញុំបានបង្គាប់មកខ្ញុំ ដើម្បីឱ្យអ្នករាល់គ្នាប្រតិបត្តិតាមនៅក្នុងស្រុកដែលអ្នករាល់គ្នានឹងចូលទៅកាន់កាប់។ អ្នករាល់គ្នាត្រូវកាន់ ព្រមទាំងប្រតិបត្តិតាមក្រឹត្យវិន័យ និងបទបញ្ជាទាំងនោះ ដើម្បីឱ្យអ្នករាល់គ្នាមានប្រាជ្ញាឈ្លាសវៃនៅចំពោះមុខសាសន៍នានា។ ពេលឮអំពីក្រឹត្យវិន័យទាំងប៉ុន្មានពួកគេនឹងពោលថា ប្រជាជាតិដ៏ធំនេះពិតជាមានប្រាជ្ញាឈ្លាសវៃមែន!។ តើប្រជាជាតិដ៏ធំណាមួយមានព្រះដែលគង់នៅជិតគេ ដូចព្រះអម្ចាស់ជាព្រះនៃយើងគង់នៅជិតយើងគ្រប់ពេលដែលយើងអង្វររកព្រះអង្គ? តើប្រជាជាតិដ៏ធំណាមួយមានក្រឹត្យវិន័យ និងបញ្ជាត្រឹមត្រូវដូចវិន័យទាំងប៉ុន្មានដែលខ្ញុំថ្លែងប្រាប់អ្នករាល់គ្នាថ្ងៃនេះ?។ ហេតុនេះ ចូរប្រយ័ត្ន ហើយប្រុងស្មារតីរៀងរាល់ថ្ងៃក្នុងជីវិតរបស់អ្នក ដើម្បីកុំឱ្យភ្លេចហេតុការណ៍ដែលអ្នកបានឃើញផ្ទាល់នឹងភ្នែក ក្រែងលោចិត្តរបស់អ្នកលែងនឹកនាដល់ហេតុការណ៍នោះ។ ចូរប្រាប់កូន និងចៅរបស់អ្នករាល់គ្នាឱ្យដឹងអំពីហេតុការណ៍នេះដែរ»។

ទំនុកតម្កើងលេខ ១៤៧ (១៤៦), ១២-១៦.១៩-២០ បទពាក្យ ៧

ពិធីអបអរសាទរព្រះគម្ពីរដំណឹងល្អតាម (យហ៦,៦៣,៦៨)

សូមថ្លែងព្រះគម្ពីរដំណឹងល្អតាមសន្តម៉ាថាយ (មថ ៥,១៧-១៩) 

នៅគ្រានោះ ក្រុមសាវ័កជួបជុំជាមួយព្រះយេស៊ូនៅលើភ្នំ ព្រះអង្គមានព្រះបន្ទូលទៅគេថា៖ «សុំកុំនឹកស្មានថា ខ្ញុំមកលុបបំបាត់ធម្មវិន័យ ឬសេចក្តីប្រៀនប្រដៅរបស់ព្យាការី​ចោលឡើយ។ ខ្ញុំមិនមែនមកលុបបំបាត់ទេ គឺខ្ញុំមកធ្វើឱ្យគម្ពីរមានអត្ថន័យពេញលក្ខណៈទៅវិញទេ។ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា ដរាបណាផ្ទៃមេឃ និងផែនដីនៅស្ថិតស្ថេរ ដរាបនោះគ្មានក្បៀស ឬបន្តក់ណាមួយក្នុងធម្មវិន័យត្រូវលុបបាត់ឡើយ គឺគម្ពីរទាំងមូលនឹងនៅស្ថិតស្ថេររហូតដល់ទីបំផុត។ អ្នកណាល្មើសបញ្ញត្តិតូចមួយ ហើយបង្រៀនអ្នកផ្សេងឱ្យធ្វើតាម អ្នកនោះនឹងមានឋានៈតូចជាងគេក្នុងព្រះរាជ្យនៃស្ថានបរមសុខ ផ្ទុយទៅវិញ អ្នកណាប្រតិបត្តិតាមវិន័យ ហើយបង្រៀនអ្នកផ្សេងឱ្យប្រតិបត្តិតាម អ្នកនោះនឹងមានឋានៈធំក្នុងព្រះរាជ្យនៃស្ថានបរមសុខ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! សូមព្រះអង្គទ្រង់ព្រះមេត្តាទទួលតង្វាយ និងពាក្យអង្វររបស់ប្រជារាស្ត្រព្រះអង្គដែលរួបរួមគ្នាថ្វាយអភិបូជានេះ សូមថែរក្សាការពារយើងខ្ញុំឱ្យរួចពីអន្តរាយគ្រប់បែបយ៉ាងផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! យើងខ្ញុំបានទទួលព្រះកាយ និងព្រះលោហិតព្រះយេស៊ូគ្រីស្តជាព្រះបុត្រាព្រះអង្គ។ សូមទ្រង់ព្រះមេត្តាជម្រះចិត្តគំនិតយើងខ្ញុំឱ្យបានបរិសុទ្ធ ផុតពីសៅហ្មងនានា។ សូមប្រោសយើងខ្ញុំឱ្យយល់អត្ថន័យព្រះបន្ទូលសន្យានៃព្រះរាជ្យរបស់ព្រះអង្គផង។