១៥ មេសា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! រៀងរាល់ឆ្នាំ យើងខ្ញុំជាព្រះសហគមន៍នាំគ្នានឹករំពឹងអំពីព្រះអង្គបានប្រោសព្រះយេស៊ូឱ្យក្រោកឈរឡើងពីចំណោមមនុស្សស្លាប់។ ព្រះអង្គបានប្រោសយើងខ្ញុំឱ្យមានកិត្តិយស ឱ្យមានចិត្តសង្ឃឹម និងឱ្យមានជីវិតថ្មីដែរ។ សូមទ្រង់ព្រះមេត្តាពង្រឹងជំនឿ និងសេចក្តីស្រឡាញ់របស់យើងខ្ញុំផង។

សូមថ្លែងព្រះគម្ពីរកិច្ចការរបស់គ្រីស្តទូត (កក ៥,១៧-២៦)

ពេលនោះលោកមហាបូជាចារ្យ និងអស់អ្នកដែលនៅជាមួយលោកទាំងប៉ុន្មាន គឺពួកខាងគណៈសាឌូស៊ីមានចិត្តក្តៅក្រហាយជាខ្លាំង។ គេលើកគ្នាទៅចាប់ក្រុម​គ្រីស្ត​ទូត យកមកឃុំឃាំងនៅពន្ធនាគារសាធារណៈ។ លុះដល់យប់ មានទេវទូតរបស់​ព្រះ​អម្ចាស់មកបើកទ្វារពន្ធនាគារឱ្យក្រុមគ្រីស្តទូតចេញទាំងពោលថា៖ «សូមអញ្ជើញ​ទៅឈរក្នុងព្រះវិហារ ហើយប្រកាសព្រះបន្ទូលទាំងអស់ដែលផ្តល់ជីវិតនេះឱ្យ​ប្រជាជនស្តាប់ទៅ»។ កាលបានឮពាក្យទេវទូត ក្រុមគ្រីស្តទូតនាំគ្នាចូលទៅក្នុងព្រះ​វិហារតាំងពីព្រលឹម ហើយនាំគ្នាបង្រៀនប្រជាជន។ លោកមហាបូជាចារ្យ និងអស់អ្នកដែលនៅជាមួយលោក កោះហៅក្រុមប្រឹក្សាជាន់ខ្ពស់ទាំងមូល គឺព្រឹទ្ធ​សភានៃប្រជាជន​អ៊ីស្រាអែលមក​ជួបជុំគ្នា រួចចាត់អ្នកយាមឱ្យទៅនាំក្រុមគ្រីស្តទូត​ពីពន្ធនាគារមក។ ពេលទៅដល់ទីឃុំឃាំង គេពុំឃើញក្រុមគ្រីស្តទូតទេ។ គេ​នាំគ្នាវិលមកវិញ​រាយ​ការណ៍ជម្រាបអង្គប្រជុំថា៖ «យើងខ្ញុំឃើញទីឃុំឃាំងនៅ​បិទជិតល្អណាស់ ហើយពួកអ្នកយាមក៏​​ឈរ​​យាម​​នៅ​ខាងមុខ​ទ្វារដែរ ​តែពេល​យើងខ្ញុំបើកទ្វារ ពុំឃើញ​មាននរណាម្នាក់នៅក្នុងទីនោះសោះ»។ កាលមេកងរក្សា​ព្រះវិហារ និងពួកនាយកបូជាចារ្យឮដូច្នោះ គេមិនដឹងជាត្រូវគិតយ៉ាងណាអំពីក្រុមគ្រីស្តទូត ​និងអំពីហេតុការណ៍ដែល​កើតឡើងនោះឡើយ។ ពេលនោះ មានម្នាក់ចូលមកជម្រាបអង្គប្រជុំថា៖ «ពួកអ្នកដែលអស់លោកបានចា​ប់​​ឃុំឃាំង​កំពុងតែឈរបង្រៀនប្រជាជនក្នុងព្រះវិហារឯណោះ!»។ មេកងរក្សាព្រះវិហារក៏នាំទាហានចេញទៅចាប់ក្រុមគ្រីស្តទូតបណ្តើរមក តែឥតមាន​ធ្វើ​បាបអ្វីទេ ព្រោះគេខ្លាចប្រជាជន​យកដុំថ្មគប់។

ទំនុកតម្កើងលេខ ៣៤ (៣៣),២-៩ បទកាកគតិ

អបអរសាទរព្រះគម្ពីរដំណឹងល្អតាម (យហ ៣,១៦)

សូមថ្លែងព្រះគម្ពីរដំណឹងល្អតាមសន្តយ៉ូហាន (យហ ៣,១៦-២១)

ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយបានជា​ព្រះអង្គ​ប្រទានព្រះបុត្រាតែមួយរបស់ព្រះអង្គមក ដើម្បីឱ្យអស់អ្នកដែលជឿលើព្រះបុត្រាមានជីវិតអស់កល្បជានិច្ច គឺមិនឱ្យគេវិនាសឡើយ។ ព្រះ​ជាម្ចាស់បានចាត់ព្រះបុត្រារបស់ព្រះអង្គឱ្យយាងមក្នុងលោកនេះ ពុំមែន​ដើម្បីដាក់ទោសមនុស្សលោកទេ គឺដើម្បីសង្រ្គោះមនុស្សលោកដោយសារ​ព្រះបុត្រាវិញ។ អ្នកជឿលើព្រះបុត្រា មិនត្រូវទទួលទោសទេ រីឯអ្នកមិន​ជឿវិញ បានទទួលទោសរួចស្រេចទៅហើយ ព្រោះគេពុំបានជឿលើព្រះនាមព្រះបុត្រាតែមួយរបស់ព្រះជាម្ចាស់។ ហេតុដែលបណ្តាលឱ្យមានទោសនោះ គឺពន្លឺបានយាងមកក្នុងពិភពលោក ប៉ុន្តែមនុស្សលោកចូលចិត្តភាពងងឹតជាងពន្លឺ ដ្បិតអំពើរបស់គេសុទ្ធតែអាក្រក់។ អស់អ្នកដែលប្រព្រឹត្តអំពើអាក្រក់ តែងតែស្អប់ពន្លឺ ហើយមិនចូលមករកពន្លឺឡើយ ព្រោះខ្លាចគេឃើញអំពើដែល​ខ្លួនគេប្រព្រឹត្ត។ ផ្ទុយទៅវិញ អស់អ្នកដែលប្រព្រឹត្តតាមសេចក្តីពិត តែងតែ​ចូលមករកពន្លឺ ដើម្បីឱ្យគេឃើញថា អំពើដែលខ្លួនប្រព្រឹត្តនោះ ស្របតាម​ព្រះជាម្ចាស់មែន។

ពាក្យថ្វាយតង្វាយ

បពិត្រព្រះបិតាដែលស្រឡាញ់មនុស្សលោកយ៉ាងខ្លាំងជាទីបំផុត! ព្រះអង្គចាត់ព្រះបុត្រាតែមួយរបស់ព្រះអង្គឱ្យយាងមកដើម្បីឱ្យអស់អ្នកជឿសង្ឃឹមលើព្រះបុត្រាទទួលព្រះជន្មផ្ទាល់របស់ព្រះអង្គ យើងខ្ញុំសូមផ្ញើជីវិតទាំងស្រុងទៅលើព្រះអង្គក្នុងអភិបូជានេះ ដោយរួមជាមួយព្រះយេស៊ូជាព្រះបុត្រាព្រះអង្គ និងជាព្រះអម្ចាស់យើងខ្ញុំ ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀង​ទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! កាលពីដើមព្រះអង្គបានប្រោសប្រទានឱ្យសាវ័កដែលជាមនុស្សកំសាក ហ៊ានពុះពារឧបសគ្គនានា ប្រកាសព្រះបន្ទូលដែលផ្តល់ជីវិតឱ្យមនុស្សលោក។ សូមទ្រង់ព្រះមេត្តាប្រទានសេចក្តីក្លាហានឱ្យយើងខ្ញុំផង សូមឱ្យយើងខ្ញុំហ៊ានធ្វើសាក្សីពីជំនឿរបស់យើងខ្ញុំគ្រប់ពេលវេលា។