០៦ មករា ២០២៦

(ពេលល្ងាច)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

បទចម្រៀងចូល

ទំនុកតម្កើងលេខ ៤៩

កុំទុកចិត្តលើទ្រព្យសម្បត្តិ!

“អ្នកមានពិបាកចូលទៅក្នុងព្រះរាជ្យនៃស្ថានបរមសុខណាស់” (មថ ១៩,២៣)។

បន្ទរទី១ ៖ អ្នករាល់គ្នាពុំអាចគោរពបម្រើព្រះជាម្ចាស់ផង ហើយគោរពបម្រើទ្រព្យសម្បត្តិទុកជាព្រះផងបានឡើយ។

(ក)

២	ប្រជាជនទាំងឡាយអើយ ! ចូរនាំគ្នាត្រងត្រាប់ស្តាប់ ! មនុស្សម្នាដែលរស់នៅលើផែនដីទាំងមូលអើយ ! ចូរនាំគ្នាយកចិត្តទុកដាក់ស្តាប់ !
៣	គឺទាំងអ្នកតូច ទាំងអ្នកធំ ទាំងអ្នកមាន ទាំងអ្នកក្រ !
៤	ខ្ញុំនឹងបរិយាយអំពីគតិបណ្ឌិត ខ្ញុំនឹងសម្តែងចេញនូវគោលគំនិតប្រកបដោយប្រាជ្ញា។
៥	ខ្ញុំនឹងផ្ចង់ចិត្តស្តាប់ពាក្យប្រៀនប្រដៅរបស់អ្នកប្រាជ្ញ ខ្ញុំនឹងដោះស្រាយប្រស្នាទាំងលេងពិណកំដរផង។
៦	នៅគ្រាមានអាសន្ន ឬពេលមានខ្មាំងសត្រូវមកឡោមព័ទ្ធ ខ្ញុំមិនភ័យខ្លាចអ្វីឡើយ។
៧	មនុស្សអាក្រក់តែងតែទុកចិត្តលើទ្រព្យរបស់ខ្លួន គេអួតអាងព្រោះមានទ្រព្យសម្បត្តិស្តុកស្តម្ភ។
៨	ពុំមាននរណាម្នាក់អាចលោះអ្នកដទៃបានឡើយ ហើយក៏ពុំអាចបង់ថ្លៃថ្វាយព្រះជាម្ចាស់ ដើម្បីលោះជីវិតរបស់ខ្លួនបានដែរ
៩	តម្លៃលោះជីវិតរបស់មនុស្សថ្លៃណាស់ ទោះបីជាគេខំបង់ថ្លៃយ៉ាងណាក៏ដោយ ក៏មិនគ្រប់ដែរ។
១០	តើមនុស្សអាចរស់រហូត គេចផុតពីរណ្តៅនៃមច្ចុរាជបានឬ?
១១	យើងឃើញច្បាស់ថា អ្នកប្រាជ្ញក៏ដូចជាមនុស្សឆោតល្ងង់ អាប់ឥតប្រាជ្ញាដែរ គេត្រូវតែស្លាប់ទាំងអស់គ្នា ហើយទុកទ្រព្យសម្បត្តិខ្លួនឱ្យអ្នកដទៃ។
១២	ខ្ញុំនឹកក្នុងចិត្តថា គេហដ្ឋានរបស់គេនឹងស្ថិតស្ថេររហូតតទៅ លំនៅដ្ឋានរបស់គេនៅគង់វង្សពីជំនាន់មួយទៅជំនាន់មួយ ហើយដាក់ឈ្មោះដីធ្លីរបស់គេ តាមឈ្មោះរបស់ខ្លួនថែមទៀត។
១៣	មនុស្សដែលមានកិត្តិយសរុងរឿង ពុំអាចគេចផុតពីស្លាប់បានទេ គេនឹងត្រូវបាត់បង់ជីវិត ដូចសត្វតិរច្ឆាន។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ អ្នករាល់គ្នាពុំអាចគោរពបម្រើព្រះជាម្ចាស់ផង ហើយគោរពបម្រើទ្រព្យសម្បត្តិទុកជាព្រះផងបានឡើយ។

បន្ទរទី២ ៖ ព្រះអម្ចាស់មានព្រះបន្ទូលថា "ចូរប្រមូលទ្រព្យសម្បត្តិទុកនៅស្ថានបរមសុខវិញ” ។

(ខ)

១៤-	អ្នកដែលទុកចិត្ត	លើខ្លួនឯងពិត	នោះគ្មានមារយាទ
	ពេញចិត្តពាក្យខ្លួន	ជាមនុស្សមានស្នៀត	អនាគតទៀត
		យ៉ាប់យ៉ឺនពេកក្រៃ	។
១៥-	អ្នកនោះប្រៀបបាន	ចៀមសត្វតិរច្ឆាន	ដែលគេប្រល័យ
	មច្ចុរាជឃុំគ្រង	វាយឥតសំចៃ	ឃ្វាលរាល់យប់ថ្ងៃ
		មិនឱ្យឃ្លាតឆ្ងាយ	។
	រីមនុស្សសុចរិត	នឹងជាន់ឈ្លីពិត	លើរូបរាងកាយ
	របស់ពួកគេ	រលាយអន្តរាយ	ទៅដល់ទីឆ្ងាយ
		ក្នុងស្ថានមនុស្សស្លាប់	។
១៦-	ប៉ុន្តែព្រះម្ចាស់	មានឫទ្ធិខ្លាំងណាស់	រំដោះខ្ញុំឆាប់
	ផុតពីអំណាច	នៃសេចក្តីស្លាប់	ព្រះអង្គប្រញាប់
		មកយកខ្ញុំទៅ	។
១៧-	ពេលអ្នកឃើញគេ	សម្បត្តិឡើងទ្វេ	កុំបីហ្មងសៅ
	ឃើញទ្រព្យគេច្រើន	ចម្រើនតទៅ	សំងំពួននៅ
		កុំភ័យខ្លាចអី	។
១៨-	នៅពេលគេស្លាប់	គេពុំអាចចាប់	យករបស់អ្វី
	អស់ទាំងសម្បត្តិ	ទ្រព្យធនផ្សេងក្តី	ចូលទៅក្នុងដី
		អ្នកក្ស័យបានឡើយ	។
១៩-	ពេលមានជីវិត	គេតែងនឹកគិត	ថាសុខឥតស្បើយ
	ថាខ្លួនគេនឹង	មិនខ្វល់អ្វីឡើយ	អ្នកផងកោតហើយ
		ដែលគេមានបាន	។
២០-	គេគង់នឹងត្រូវ	ធ្លាក់ខ្លួនចុះទៅ	ជួបនឹងសន្តាន
	ជីតាជីដូន	មានទាំងប៉ុន្មាន	ទៅក្នុងទីស្ថាន
		ដែលគ្មានពន្លឺ	។
២១-	អ្នកមានកិត្តិយស	រុងរឿងខ្ពង់ខ្ពស់	ល្បីល្បាញរន្ទឺ
	មិនយល់អ្វីសោះ	មិនភ័យព្រួយព្រឺ	អ្នកនោះហើយគឺ
		ដូចសត្វដែលស្លាប់	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ ព្រះអម្ចាស់មានព្រះបន្ទូលថា "ចូរប្រមូលទ្រព្យសម្បត្តិទុកនៅស្ថានបរមសុខវិញ” ។

បទលើកតម្កើងតាមគម្ពីរវិវរណៈ (វវ ៤,១១. ៥,៩-១០.១២)

ទំនុកតម្កើងសម្រាប់ការប្រោសលោះ

បន្ទរទី៣ ៖ កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលសិរីរុងរឿង និងព្រះកិត្តិនាម។

១១	“បពិត្រព្រះអម្ចាស់ជាព្រះនៃយើងខ្ញុំ ព្រះអង្គសមនឹងទទួលសិរីរុងរឿង ព្រះកិត្តិនាម និងឫទ្ធានុភាព ដ្បិតព្រះអង្គបានបង្កើតរបស់សព្វសារពើមក អ្វីៗទាំងអស់សុទ្ធតែកើតមាន ហើយនៅស្ថិតស្ថេរ ដោយសារព្រះហឫទ័យរបស់ព្រះអង្គ”។
៩	គេនាំគ្នាច្រៀងបទចម្រៀងថ្មីថា ៖ “ព្រះអង្គសមនឹងទទួលក្រាំង ហើយបកត្រាផង ព្រោះទ្រង់ត្រូវគេសម្លាប់ធ្វើយញ្ញបូជា ព្រះអង្គបានលោះមនុស្សពីគ្រប់ពូជ គ្រប់ភាសា គ្រប់ប្រជាជន និងពីគ្រប់ជាតិសាសន៍ យកមកថ្វាយព្រះជាម្ចាស់ ដោយសារព្រះលោហិតរបស់ព្រះអង្គ។
១០	ព្រះអង្គបានធ្វើឱ្យគេទៅជារាជាណាចក្រ និងជាក្រុមបូជាចារ្យ បម្រើព្រះជាម្ចាស់របស់យើង ហើយអ្នកទាំងនោះ នឹងគ្រងរាជ្យលើផែនដី”។
១២	នាំគ្នាបន្លឺសំឡេងយ៉ាងខ្លាំងៗថា ៖ «កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលឫទ្ធានុភាព រាជសម្បត្តិ ព្រះប្រាជ្ញាញាណ ឥទ្ធិឫទ្ធិ ព្រះកិត្តិនាម សិរីរុងរឿង និងការសរសើរតម្កើង”។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលសិរីរុងរឿង និងព្រះកិត្តិនាម។

ព្រះបន្ទូលរបស់ព្រះជាម្ចាស់ (អភ ២,៣ខ-៥)

ពី​កំណើត​មក យើង​ជា​មនុស្ស ដែល​ត្រូវ​តែ​ទទួល​ទោស​ពី​ព្រះជាម្ចាស់ ដូច​មនុស្ស​ឯ​ទៀតៗ​ដែរ ក៏​ប៉ុន្តែ ព្រះ‌ជាម្ចាស់​ដែល​តែង‌តែ​មាន​ព្រះ‌ហឫទ័យ​អាណិត​មេត្តា​ដ៏​ច្រើន​ពន់​ប្រមាណ​នោះ ព្រះ‌អង្គ​មាន​ព្រះ‌ហឫទ័យ​ស្រឡាញ់​យើង​ខ្លាំង​បំផុត គឺ​ទោះ​បី​យើង​ស្លាប់​ដោយ‌សារ​អំពើ​បាប​របស់​យើង​ហើយ​ក៏​ដោយ ក៏​ព្រះ‌អង្គ​បាន​ប្រោស​ប្រទាន​ឲ្យ​យើង​មាន​ជីវិត​រស់ រួម​ជា​មួយ​ព្រះ‌គ្រីស្ត​វិញ​ដែរ។ ព្រះ‌ជាម្ចាស់​បាន​សង្គ្រោះ​បង‌ប្អូន មក​ពី​ព្រះ‌អង្គ​មាន​ព្រះ‌ហឫទ័យ​ប្រណី‌សន្ដោស។

បន្ទរ៖ ប្រជាជនទាំងឡាយ ទាំងបុរស ទាំងស្រ្តី និងគ្រប់សញ្ជាតិ *នឹង​បាន​ទទួលពរ​ដោយសារ​ព្រះអង្គ។ បន្ទរឡើងវិញ៖…
-ប្រជា‌ជាតិនានា នឹងនាំគ្នាថ្លែងពីសិរី‌រុង​រឿងរបស់ព្រះ‌អម្ចាស់។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ ព្រះគ្រីស្តជាព្រះពន្លឺចេញពីព្រះពន្លឺ នៅពេលព្រះអង្គបង្ហាញខ្លួននៅលើផែនដី ពួកហោរាចារ្យបាននាំយកដង្វាយមកថ្វាយព្រះអង្គ។ អាលេលូយ៉ា!

• តាមបែបសូត្រ
• តាមបែបស្មូត

ពាក្យអង្វរសកល

ដោយរួមជាមួយគ្រីស្តបរិស័ទទាំងអស់ នៅក្នុងការអធិដ្ឋាន និងកោតសរសើរព្រះអង្គ យើងខ្ញុំទទួចអង្វរព្រះអម្ចាស់ថា ៖

បន្ទរ៖ បពិត្រព្រះបិតា! សូមព្រះអង្គសណ្តាប់ពាក្យអង្វររបស់បុត្រធីតាព្រះអង្គផង !

សូមព្រះអង្គជួយដល់អស់អ្នកដែលមិនទាន់ស្គាល់ព្រះជាម្ចាស់ ឱ្យពួកគេស្វែងរកវត្តមានរបស់ព្រះអង្គនៅក្នុងស្រមោល និងការព្យាករនៃចិត្តរបស់មនុស្ស
—សូមប្រោសឱ្យពួកគេទៅជាមនុស្សថ្មី នៅក្នុងពន្លឺរបស់ព្រះគ្រីស្ត។ (បន្ទរ)

សូមព្រះអង្គទតមកអស់អ្នកដែលគោរពតម្កើងព្រះអង្គ ជាព្រះជាម្ចាស់ ដ៏ពិតប្រាកដតែមួយ និងទន្ទឹងរង់ចាំព្រះអង្គយាងមកវិញ វិនិច្ឆ័យទោស នៅថ្ងៃចុងក្រោយបំផុត ដោយក្តីមេត្តា
—សូមឱ្យពួកគេអាចទទួលស្គាល់សេចក្តីស្រឡាញ់ដ៏នៅឋិតឋេររបស់ព្រះអង្គ ចំពោះយើងខ្ញុំផង។ (បន្ទរ)

សូមព្រះអង្គនឹកចាំដល់អស់អ្នកដែលព្រះអង្គបានផ្តល់ជីវិត ពន្លឺ និងអ្វីៗដ៏ល្អគ្រប់យ៉ាងឱ្យពួកគេ
—សូមកុំបណ្តោយឱ្យពួកគេឃ្លាតឆ្ងាយពីព្រះអង្គឡើយ។ (បន្ទរ)

សូមព្រះអង្គទតមកអ្នកដំណើរទាំងអស់ ដោយការមើលថែពីពួកទេវទូត
—សូមការពារយើងខ្ញុំ ឱ្យរួចផុតពីគ្រោះថ្នាក់ជាយថាហេតុ និងពីសេចក្តីស្លាប់ដែលមើលមិនឃើញផង។ (បន្ទរ)

ព្រះអង្គបានបង្ហាញសេចក្តីពិតដល់អ្នកស្លាប់ ពេលពួកគេនៅលើផែនដី
—សូមណែនាំពួកគេឱ្យសញ្ជឹងគិតពីព្រះភក្រ្តដ៏ស្រស់ស្អាតនៃព្រះអង្គផង។ (បន្ទរ)

ធម៌ "ឱព្រះបិតា"

ពាក្យអធិដ្ឋាន

ឱព្រះបិតាដែលមានព្រះជន្មគង់នៅអស់កល្បជានិច្ចអើយ! ព្រះបុត្រាចាប់កំណើតជាមនុស្ស ដោយប្រសូតពីព្រះនាងព្រហ្មចារិនីម៉ារី។ សូមព្រះអង្គប្រោសឲ្យយើងខ្ញុំកែប្រែចិត្តគំនិត និងប្រព្រឹត្តរាល់កិច្ចការ ដើម្បីគាប់ព្រះហឫទ័យព្រះអង្គជានិច្ច។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ
និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន!