១៩ មេសា ២០២៦

រដូវបុណ្យចម្លង សប្តាហ៍ទី៣ ថ្ងៃអាទិត្យ

(ពេលល្ងាច)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១០,១-៥.៧

ព្រះមេស្ស៊ី ជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន
មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១៖ លុះ​ព្រះអង្គ​ប្រោស​មនុស្ស​ឱ្យ​បរិសុទ្ធផុត​ពី​បាបរួច​ហើយ ព្រះអង្គ​ក៏​គង់​នៅ​ខាង​ស្ដាំ​ព្រះ​ដ៏​ឧត្តុង្គ​ឧត្ដម នា​ស្ថាន​ដ៏​ខ្ពង់‌ខ្ពស់​បំផុត។

១	ព្រះអម្ចាស់មានព្រះបន្ទូលមកកាន់ព្រះរាជា ជាអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្រ្កាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ!”។
២	សូមព្រះអង្គប្រោសប្រទានឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណា នៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
៥	ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។
៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្ត្រប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ លុះ​ព្រះអង្គ​ប្រោស​មនុស្ស​ឱ្យ​បរិសុទ្ធផុត​ពី​បាបរួច​ហើយ ព្រះអង្គ​ក៏​គង់​នៅ​ខាង​ស្ដាំ​ព្រះ​ដ៏​ឧត្តុង្គ​ឧត្ដម នា​ស្ថាន​ដ៏​ខ្ពង់‌ខ្ពស់​បំផុត។

ទំនុកតម្កើងលេខ ១១១

ស្នា​ព្រះហស្ដដ៏​អស្ចារ្យ​របស់​ព្រះ‌អម្ចាស់

ឱព្រះជាអម្ចាស់ដ៏មានព្រះចេស្តាលើអ្វីៗទាំងអស់អើយ !
ស្នាព្រះហស្តរបស់ព្រះអង្គប្រសើរឧត្តម គួរឱ្យស្ញប់ស្ញែងពន់ពេកណាស់ (វវ ១៥,៣)។

បន្ទរទី២៖ ព្រះអម្ចាស់​បាន​រំដោះ​ប្រជារាស្ដ្រ​របស់​ព្រះអង្គឱ្យ​មាន​សេរី‌ភាព អាលេលូយ៉ា!

(បទពាក្យ ៧)

១-	ចូរលើកតម្កើងព្រះជាម្ចាស់	ប្រសើរពេកណាស់លើលោកា
	ខ្ញុំថ្កើងព្រះអង្គហួសសិរសា	ក្នុងហ្វូងមនុស្សម្នាដែលទៀងត្រង់	។
២-	គ្រប់ស្នាព្រះហស្តព្រះអម្ចាស់	ប្រសើរពេកណាស់ខ្ពស់ឧត្តុង
	អ្នកពេញចិត្តស្នាព្រះហស្តទ្រង់	ស្វះស្វែងយល់ផងកុំរារែក	។
៣-	គ្រប់ស្នាព្រះហស្តបានបញ្ចោញ	រស្មីចិញ្ចែងភ្លឺអនេក
	សេចក្តីសុចរិតល្អពន់ពេក	មិនប្រេះបាក់បែកនៅរហូត	។
៤-	ព្រះអង្គទ្រង់សព្វព្រះហឫទ័យ	ឱ្យយើងស្រមៃមិនរលត់
	ដល់ការអស្ចារ្យខ្ពស់បំផុត	ហឫទ័យអាណិតចិត្តអាសូរ	។
៥-	ព្រះអង្គប្រទានទាំងអាហារ	ដល់អ្នកវេទនាស្រែកទ្រហោ
	អ្នកដែលកោតខ្លាចទ្រង់អាសូរ	សម្ពន្ធមានយូរធ្លាប់មេត្រី	។
៦-	ព្រះអង្គសម្តែងអានុភាព	ឱ្យរាស្ត្រជ្រួតជ្រាបឥតសង្ស័យ
	គឺព្រះអង្គបានឱ្យទឹកដី	ប្រជាដទៃមកពួកគេ	។
៧-	គ្រប់ស្នាព្រះហស្តព្រះអង្គធ្វើ	សុទ្ធតែអំពើល្អឥតរេ
	សុចរិតយុត្តិធម៌ឥតប្រួលប្រែ	ដូច្នេះគួរតែជឿទាំងស្រុង	។
៨-	បញ្ហាទាំងនោះឥតចន្លោះ	មិនបាត់មួយសោះស្ថិតគង់វង្ស
	សុចរិតល្អល្អះភ្លឺត្រចង់	ក្តីពិតទៀងត្រង់យ៉ាងប្រពៃ	។
៩-	ព្រះអង្គរំដោះប្រជារាស្ត្រ	ពួកគេទាំងអស់មានសិរី
	ទ្រង់បានចងសម្ពន្ធមេត្រី	នឹងរាស្ត្រប្រុសស្រីរហូតទៅ	។
	ព្រះនាមព្រះអង្គគង់ទីខ្ពស់	វិសុទ្ធឥតមោះឥតហ្មងសៅ
	បារមីគួរស្ញែងខ្លាចពេកកូវ	រាល់យប់ថ្ងៃត្រូវតែគោរព	។
១០-	អ្នកណាដែលចង់មានប្រាជ្ញា	គួរតែគិតថាមានប្រភព
	ប្រាជ្ញានឹងកើតមានសព្វគ្រប់	បើអ្នកគោរពខ្លាចព្រះម្ចាស់	។
	អ្នកដែលធ្វើតាមប្រាជ្ញានេះ	គេអាចត្រិះរិះបានល្អល្អះ
	យើងសូមតម្កើងព្រះអម្ចាស់	ជាព្រះខ្ពង់ខ្ពស់រហូតទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះអម្ចាស់​បាន​រំដោះ​ប្រជារាស្ដ្រ​របស់​ព្រះអង្គឱ្យ​មាន​សេរី‌ភាព អាលេលូយ៉ា!

បទលើកតម្កើងតាមគម្ពីរវិវរណៈ (វវ ១៩,១-២.៥-៧)

វិវាហមង្គលការកូនចៀម

បន្ទរទី៣ ៖ អាលេលូយ៉ា! ព្រះអម្ចាស់ជាព្រះជាម្ចាស់នៃយើង ព្រះអង្គជាព្រះមហាក្សត្រ! ចូរយើងត្រេកអរសប្បាយ ហើយលើកតម្កើងសិរីរុងរឿងរបស់ព្រះអង្គ អាលេលូយ៉ា!

១	អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព
២	ដ្បិតទ្រង់វិនិច្ឆ័យយ៉ាងត្រឹមត្រូវតាមយុត្តិធម៌ អាលេលូយ៉ា! អាលេលូយ៉ា!
៥	អ្នករាល់គ្នាជាអ្នកបម្រើព្រះជាម្ចាស់ អ្នករាល់គ្នាជាអ្នកគោរពកោតខ្លាចព្រះអង្គ ទាំងតូចទាំងធំអើយ! ចូរសរសើរតម្កើងព្រះជាម្ចាស់នៃយើង!។ អាលេលូយ៉ា! អាលេលូយ៉ា!
៦	ដ្បិតព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ទ្រង់បានតាំងព្រះរាជ្យរបស់ព្រះអង្គហើយ
៧	យើងនាំគ្នាអរសប្បាយឡើង ត្រូវមានអំណររីករាយឱ្យខ្លាំង ហើយនាំគ្នាលើកតម្កើងសិរីរុងរឿងព្រះអង្គ អាលេលូយ៉ា! អាលេលូយ៉ា! ដ្បិតដល់ពេលរៀបវិវាហមង្គលការកូនចៀមហើយ ភរិយាថ្មោងថ្មីរបស់កូនចៀម ក៏បានរៀបចំខ្លួនរួចជាស្រេចហើយដែរ”។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ អាលេលូយ៉ា! ព្រះអម្ចាស់ជាព្រះជាម្ចាស់នៃយើង ព្រះអង្គជាព្រះមហាក្សត្រ! ចូរយើងត្រេកអរសប្បាយ ហើយលើកតម្កើងសិរីរុងរឿងរបស់ព្រះអង្គ អាលេលូយ៉ា!

ព្រះបន្ទូលរបស់ព្រះជាម្ចាស់ (ហប ១០,១២-១៤)

រីឯ​ព្រះ‌គ្រីស្ត​វិញ បន្ទាប់​ពី​ព្រះ‌អង្គ​បាន​ថ្វាយ​យញ្ញ‌បូជា​តែ​មួយ ដើម្បីរំដោះ​បាប​រួច​ហើយ ព្រះ‌អង្គ​គង់​នៅ​ខាង​ស្ដាំ​ព្រះ‌ជាម្ចាស់រហូត​ត​ទៅ។ ឥឡូវ​នេះ ព្រះ‌អង្គ​រង់‌ចាំ​ព្រះ‌ជាម្ចាស់​បង្ក្រាប​ខ្មាំង​សត្រូវ​របស់​ព្រះ‌អង្គ ឱ្យ​ចុះ​ចូល​ក្រោម​ព្រះ‌បាទា​ព្រះ‌អង្គ។ ដោយ‌សារ​តង្វាយ​តែ​មួយ​គត់ ព្រះ‌គ្រីស្តធ្វើឱ្យ​អស់​អ្នក​ដែល​ព្រះ‌អង្គ​បាន​ប្រោស​ឱ្យ​វិសុទ្ធហើយ​នោះ បាន​គ្រប់លក្ខណៈ​រហូត​ត​ទៅ។

បន្ទរ៖ ព្រះអម្ចាស់មានព្រះជន្មរស់ឡើងវិញហើយ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះអង្គបានបង្ហាញខ្លួនឱ្យលោកស៊ីម៉ូនឃើញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ព្រះ‌យេស៊ូមាន​ព្រះ‌បន្ទូល​ទៅ​គេ​ថា៖ «សុំ​យក​ត្រី​ដែល​អ្នក​រាល់​គ្នា​ទើប​នឹង​ចាប់​បាន​មក​ណេះ!»។ លោក​ស៊ីម៉ូន‌សិលា​ចុះ​ទៅ​ក្នុង​ទូក ទាញ​អួន​ដែល​មាន​ត្រី​ពេញ​មក​ដាក់​លើ​គោក អាលេលូយ៉ា!

• តាមបែបសូត្រ
• តាមបែបស្មូត

ពាក្យអង្វរសកល

ចូរយើងដង្ហោយហៅរកព្រះគ្រីស្តជាអម្ចាស់ ដោយអំណរសប្បាយនៅក្នុងដួងចិត្ត ព្រោះព្រះអង្គបានសោយទិវង្គត និងរស់ឡើងវិញ ហើយមានព្រះជន្មគង់នៅជានិច្ច ដើម្បីទូលអង្វរឱ្យយើងខ្ញុំ ៖

បន្ទរ ៖ ឱព្រះមហាក្សត្រដ៏មានជ័យជម្នះអើយ ! សូមព្រះអង្គសណ្តាប់ពាក្យអង្វរយើងខ្ញុំ !

បពិត្រព្រះសង្រ្គោះ ! ព្រះអង្គជាព្រះពន្លឺបំភ្លឺមនុស្សគ្រប់ជាតិសាសន៍
—សូមព្រះអង្គបញ្ជូនភ្លើងនៃព្រះវិញ្ញាណដ៏វិសុទ្ធមកក្នុងដួងចិត្តយើងខ្ញុំ ដូចយើងខ្ញុំប្រកាសថា ព្រះអង្គមានព្រះជន្មរស់ឡើងវិញមែន។ (បន្ទរ)

បពិត្រព្រះអម្ចាស់យេស៊ូ ! សូមឱ្យជនជាតិអ៊ីស្រាអែលទទួលស្គាល់ព្រះអង្គជាព្រះមេស្ស៊ី
—ហើយសូមឱ្យផែនដីទាំងមូល ពោរពេញដោយសិរីរុងរឿងរបស់ព្រះអង្គ។ (បន្ទរ)

សូមព្រះអង្គរក្សាយើងខ្ញុំក្នុងការរួបរួមនៃសន្តបុគ្គលទាំងឡាយ
—ហើយសូមប្រទានឱ្យយើងខ្ញុំបានសម្រាកពីការងារពលកម្មក្នុងក្រុមហ៊ុន។ (បន្ទរ)

ព្រះអង្គមានជ័យជម្នះលើខ្មាំងសត្រូវ ព្រះអង្គបានបំផ្លាញអំណាចនៃសេចក្តីស្លាប់នៅក្នុងយើងខ្ញុំ
—ដើម្បីឱ្យយើងខ្ញុំអាចរស់នៅសម្រាប់ព្រះអង្គតែមួយគត់ ដែលមានជ័យជម្នះ និងជាព្រះអម្ចាស់អស់កល្បជានិច្ច មិនចេះសាបសូន្យឡើយ។ (បន្ទរ)

ឱព្រះគ្រីស្តអើយ ! ព្រះអង្គបានស្តាប់បង្គាប់រហូតដល់សោយទិវង្គត និងមានព្រះជន្មរស់ឡើងវិញ ទៅគង់ខាងស្តាំព្រះបិតា
—ដោយព្រះហឫទ័យសប្បុរសរបស់ព្រះអង្គ សូមទ្រង់ព្រះមេត្តាទទួលបងប្អូនរបស់ព្រះអង្គ ឱ្យចូលក្នុងព្រះរាជ្យនៃសិរីរុងរឿងនោះផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះអម្ចាស់ជាព្រះបិតា ! ព្រះអង្គប្រោសឱ្យព្រះយេស៊ូទទួលព្រះជន្មផ្ទាល់របស់ព្រះអង្គ ហើយទ្រង់ក៏ប្រោសឱ្យយើងខ្ញុំ មានកិត្តិយសជាបុត្រធីតារបស់ព្រះអង្គដែរ។ សូមព្រះអង្គមេត្តាពង្រឹងជំនឿ សេចក្តីសង្ឃឹម និងសេចក្តីស្រឡាញ់របស់យើងខ្ញុំឱ្យរស់នៅតាមឋានៈដ៏ថ្លៃថ្នូររបស់ខ្លួនជានិច្ច។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។