១២ មិថុនា ២០២៦

ព្រះហឫទ័យមេត្តាករុណារបស់ព្រះយេស៊ូ

(បុណ្យឱឡារិក)

 (ពេលព្រឹក)

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ សូមអញ្ជើញមក យើងនាំគ្នាក្រាបថ្វាយបង្គំព្រះយេស៊ូ ដ្បិតព្រះបេះដូងព្រះអង្គត្រូវរបួស ព្រោះតែស្រឡាញ់យើង។

ទំនុកតម្កើងតាមការជ្រើសរើស

• ទំនុកតម្កើងលេខ ៩៥
• ទំនុកតម្កើងលេខ ១០០
• ទំនុកតម្កើងលេខ ៦៧
• ទំនុកតម្កើងលេខ ២៤

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៦៣,២-៩

ព្រលឹងខ្ញុំស្រេកឃ្លានព្រះជាម្ចាស់

អ្នកណាដែលបានលះបង់ភាពងងឹតនៃអំពើបាប អ្នកនោះស្រេកឃ្លានព្រះជាម្ចាស់។

បន្ទរទី១៖ ព្រះ‌យេស៊ូឈរ​នៅ​មុខ​បណ្ដា‌ជន បន្លឺព្រះ‌សូរ‌សៀង​យ៉ាង​ខ្លាំង​ថា៖ «អ្នក​ណា​ស្រេក​ទឹក សុំ​អញ្ជើញ​មក​រក​ខ្ញុំ ហើយ​ពិសា​ចុះ។

២	ឱព្រះជាម្ចាស់អើយ! ព្រះអង្គពិតជាព្រះនៃទូលបង្គំមែន ទូលបង្គំស្វែងរកព្រះអង្គ ទូលបង្គំចង់នៅក្បែរព្រះអង្គណាស់ ទូលបង្គំចង់នៅជាប់ជាមួយព្រះអង្គ ដូចដីដ៏ស្ងួតបែកក្រហែងត្រូវការទឹក។
៣	ទូលបង្គំបានឃើញព្រះអង្គនៅក្នុងទីសក្ការៈ ទូលបង្គំបានឃើញឫទ្ធានុភាព និងសិរីរុងរឿងរបស់ព្រះអង្គ
៤	ដ្បិតព្រះហឫទ័យមេត្តាករុណារបស់ព្រះអង្គ ប្រសើរលើសជីវិតទៅទៀត ទូលបង្គំនឹងពោលពាក្យសរសើរតម្កើងសិរីរុងរឿងរបស់ព្រះអង្គ។
៥	ទូលបង្គំនឹងអរព្រះគុណព្រះអង្គអស់មួយជីវិតទូលបង្គំ ហើយទូលបង្គំនឹងលើកដៃឡើងថ្វាយបង្គំព្រះនាមព្រះអង្គ។
៦	ទូលបង្គំនឹងបានសប្បាយ មានសុខដុមរមនា ហើយទូលបង្គំនឹងបន្លឺសំឡេងឡើង ច្រៀងសរសើរតម្កើងព្រះអង្គ។
៧	ពេលទូលបង្គំចូលដំណេក ទូលបង្គំនឹកដល់ព្រះអង្គ ហើយពេញមួយយប់ ទូលបង្គំនឹកគិតដល់ព្រះអង្គ
៨	ដ្បិតព្រះអង្គជួយទូលបង្គំ ទូលបង្គំច្រៀងយ៉ាងសប្បាយក្រោមម្លប់បារមីព្រះអង្គ។
៩	ចិត្តគំនិតទូលបង្គំនៅជាប់ជំពាក់ចិត្តគំនិតនឹងព្រះអង្គជានិច្ច ព្រះអង្គគាំទ្រទូលបង្គំ ដោយព្រះចេស្តារបស់ព្រះអង្គ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ព្រះ‌យេស៊ូឈរ​នៅ​មុខ​បណ្ដា‌ជន បន្លឺព្រះ‌សូរ‌សៀង​យ៉ាង​ខ្លាំង​ថា៖ «អ្នក​ណា​ស្រេក​ទឹក សុំ​អញ្ជើញ​មក​រក​ខ្ញុំ ហើយ​ពិសា​ចុះ។

បទលើកតម្កើងតាមព្យាការីដានីអែល (ដន ៣,៥៧-៨៨)

ចូរគ្រប់ស្នាព្រះហស្ថទាំងអស់ សរសើរតម្កើងព្រះអម្ចាស់!

អ្នករាល់គ្នាជាអ្នកបម្រើព្រះជាម្ចាស់ ចូរ​សរសើរតម្កើងព្រះអង្គ (វវ ១៩,៥)។

បន្ទរទី២៖ «អស់​អ្នក​ដែល​នឿយ‌ហត់ និង​មាន​បន្ទុក​ធ្ងន់​អើយ ! ចូរ​មក​រក​ខ្ញុំ ខ្ញុំ​នឹង​ឱ្យ​អ្នក​រាល់​គ្នា​បាន​សម្រាក» ។

៥៧-	គ្រប់ស្នាព្រះហស្ត	ព្រះម្ចាស់ទាំងអស់	នៅមិនរបូត
	ជារៀងដរាប	សូមនាំគ្នាស្មូត	តម្កើងរហូត
		អស់កល្បអន្លាយ	។
៥៨-	ឱផ្ទៃមេឃអើយ	កុំនៅកន្តើយ	ហាក់ដូចជិនណាយ
	ស្មូតបទតម្កើង	ដោយចិត្តសប្បាយ	អស់កល្បអន្លាយ
		តទៅកុំឈប់	។
៥៩-	សូមឱ្យទេវទូត	តម្កើងរហូត	ទាំងថ្ងៃទាំងយប់
	ព្រះម្ចាស់ថ្កុំថ្កើង	អស់កល្បអស់កប្ប	តម្កើងកុំឈប់
		តទៅរាល់ថ្ងៃ	។
៦០-	ចូរទឹកទាំងឡាយ	អបអរសប្បាយ	លើនភាល័យ
	នាំគ្នាសរសើរ	តម្កើងម្ចាស់ថ្លៃ	កុំបង្អង់អី
		អស់កល្បអង្វែង	។
៦១-	ហ្វូងតារារះ	នៃព្រះអម្ចាស់	នាំគ្នាសម្ដែង
	តម្កើងព្រះអង្គ	សរសើរស្ញប់ស្ញែង	គ្រប់ទីកន្លែង
		តទៅឥតដាច់	។
៦២-	សូមព្រះអាទិត្យ	ព្រះចន្ទមានឫទ្ធិ	ពន្លឺចិញ្ចាច
	តម្កើងព្រះអង្គ	ដោយចិត្តអង់អាច	កុំភ័យកុំខ្លាច
		តទៅកុំប្រែ	។
៦៣-	សូមអស់ទាំងផ្កាយ	ដែលនៅរាត់រាយ	លើមេឃផងដែរ
	សរសើរតម្កើង	កុំបីប្រួលប្រែ	កុំក្រឡះកែ
		រាល់ថ្ងៃខែឆ្នាំ	។
៦៤-	សូមឱ្យសន្សើម	ទឹកភ្លៀងដ៏ឆ្នើម	ធ្លាក់ជាប្រចាំ
	ចូរលើកតម្កើង	ទាំងថ្វាយបង្គំ	ព្រះម្ចាស់ឧត្តម
		ជានិច្ចកុំរា	។
៦៥-	ចូរអស់ទាំងខ្យល់	ធ្លាប់បក់វិលវល់	រាល់ប្រាំងវស្សា
	គ្រប់ទីកន្លែង	តម្កើងព្រះជា	ម្ចាស់អ្នករាល់គ្នា
		កុំបីឆ្មៃឆ្មើង	។
៦៦-	ចូរឱ្យកម្ដៅ	ទាំងក្នុងទាំងក្រៅ	ឱ្យមានទាំងភ្លើង
	នាំគ្នាជួយលើក	សរសើរតម្កើង	ព្រះអង្គខ្ពស់ឡើង
		តទៅឥតអាក់	។
៦៧-	ចូរឱ្យខ្យល់ក្តៅ	ពេលនេះតទៅ	និងខ្យល់ត្រជាក់
	សរសើរតម្កើង	ព្រះជាម្ចាស់អ្នក	កុំបីអន់អាក់
		ជានិច្ចតទៅ	។
៦៨-	សន្សើមនិងព្រឹល	សូមអ្នកកុំខ្ជិល	កុំបង្អង់នៅ
	ស្មូតបទតម្កើង	ព្រះម្ចាស់ជាផ្លូវ	អង្វែងតទៅ
		អស់កល្បជានិច្ច	។
៦៩-	ចូរថ្ងៃនិងយប់	កោតកុំឈរឈប់	សរសើរកុំភ្លេច
	ស្មូតបទតម្កើង	ព្រះម្ចាស់ជានិច្ច	កុំបីកែគេច
		អស់កល្បស្ថេរស្ថិត	។
៧០-	ចូរឱ្យពន្លឺ	រន្ទាលរន្ទឺ	និងភាពងងឹត
	សរសើរតម្កើង	អម្ចាស់មានឫទ្ធិ	រាល់ថ្ងៃកុំគិត
		ខ្វល់ខ្វាយឡើយណា	។
៧១-	អាកាសត្រជាក់	ខ្យល់រងាធ្លាក់	មកជាធម្មតា
	ចូរលើកតម្កើង	ព្រះអម្ចាស់ជា	ព្រះអ្នករាល់គ្នា
		កុំបីឃ្លាងឃ្លាត	។
៧២-	សូមឱ្យទឹកកក	កុំបីខានខក	ទាំងសន្សើមទៀត
	ចូរលើកតម្កើង	កុំបីរវាត	កុំឱ្យឃ្លាងឃ្លាត
		រហូតតទៅ	។
៧៣-	សូមដុំពពក	ផ្លេកបន្ទោរមក	កុំបង្អង់នៅ
	តម្កើងព្រះអង្គ	កុំបីហ្មងសៅ	ស្មូតរហូតទៅ
		អស់កល្បយូរលង់	។
៧៤-	សូមឱ្យផែនដី	ទាំងមូលលកលៃ	តម្កើងព្រះអង្គ
	សរសើរកុំឈប់	កុំនៅរេរង់	កោតសរសើរទ្រង់
		កុំប្រែសាវា	។
៧៥-	សូមឱ្យភ្នំធំ	កុំនៅសំងំ	ភ្នំតូចផងណា
	ស្មូតបទតម្កើង	ព្រះម្ចាស់រាល់គ្នា	ថ្កើងព្រះនាមា
		អស់កល្បជានិច្ច	។
៧៦-	សព្វអស់អ្វីៗ	ដែលដុះលើដី	កុំបីមានភ្លេច
	ចូរលើកតម្កើង	ព្រះម្ចាស់ជានិច្ច	កុំបីកែគេច
		អស់កល្បអន្លាយ	។
៧៧-	ចូរសមុទ្រស្ទឹង	ទន្លេល្វើយល្វឹង	តូចធំទាំងឡាយ
	នាំគ្នាតម្កើង	ដោយក្តីរីករាយ	សរសើរម្ចាស់ថ្លៃ
		ឱ្យលាន់រងំ	។
៧៨-	ចូរប្រភពទឹក	មានច្រើនសន្ធឹក	ព្រែកទាំងតូចធំ
	ទឹកហូរពីជ្រោះ	ទឹកធ្លាក់ពីភ្នំ	កុំនៅសំងំ
		តម្កើងព្រះអង្គ	។
៧៩-	ចូរអស់ទាំងត្រី	តូចធំម្តេចក្តី	និងសត្វរស់ក្នុង
	ទន្លេសមុទ្រ	តាមព្រែកបួរបឹង	កុំសំងំឈឹង
		តម្កើងព្រះម្ចាស់	។
៨០-	សូមបក្សីសត្វ	ដែលរស់ខ្វែងខ្វាត់	ច្រើនមីរដេរដាស
	ស្មូតបទតម្កើង	ព្រះជាអម្ចាស់	កុំបីចន្លោះ
		អស់កល្បយូរលង់	។
៨១-	សូមឱ្យសត្វស្រុក	រស់នៅអែអុក	ទាំងសត្វព្រៃផង
	នាំគ្នាសរសើរ	តម្កើងព្រះអង្គ	អស់កល្បយូរលង់
		តទៅអន្លាយ	។
៨២-	ចូរឱ្យមនុស្ស	ទាំងស្រីទាំងប្រុស	កុំបីឃ្លាតឆ្ងាយ
	សរសើរព្រះអង្គ	ជាព្រះម្ចាស់ថ្លៃ	រៀងរាល់យប់ថ្ងៃ
		កុំបីអល់អែក	។
៨៣-	ឱអ៊ីស្រាអែល	អ្នកជាជាតិដែល	វិសុទ្ធពន់ពេក
	ចូរលើកតម្កើង	ព្រះខ្ពស់អនេក	ហួសទាំងផ្ទៃមេឃ
		កុំសំងំនៅ	។
៨៤-	អស់បូជាចារ្យ	ទាំងឡាយនាំគ្នា	ឆ្ពោះតម្រង់ទៅ
	តម្កើងព្រះអង្គ	ទាំងថ្ងៃយប់ជ្រៅ	កុំសំងំនៅ
		សរសើរកុំឈប់	។
៨៥-	ចូរអ្នកទាំងឡាយ	ដែលតែងខ្វល់ខ្វាយ	បម្រើគោរព
	ស្មូតតម្កើងព្រះ	ទាំងថ្ងៃទាំងយប់	កុំឈរកុំឈប់
		នៅស្ងៀមឱ្យសោះ	។
៨៦-	ចូរវិញ្ញាណក្ខ័ន្ធ	អ្នកស្លាប់ប៉ុន្មាន	កុំបីចន្លោះ
	ព្រលឹងនៃអ្នក	សុចរិតទាំងអស់	តម្កើងដោយស្មោះ
		កុំនៅកន្តើយ	។
៨៧-	អស់អ្នកគោរព	ប្រណិប័តន៍គ្រប់	ព្រះអម្ចាស់អើយ
	និងអ្នកដាក់ចិត្ត	ជាអ្នកខ្សត់ហើយ	កុំបង្អង់ឡើយ
		តម្កើងព្រះអង្គ	។
៨៨-	លោកអណានីយ៉ា	រួមជាមួយគ្នា	អសារីយ៉ាផង
	និងមីកាអែល	តម្កើងព្រះអង្គ	ស្មូតតម្កើងផង
		តទៅដរាប	។
	ព្រះអង្គរំដោះ	យើងខ្ញុំឱ្យរស់	ផុតពីក្តីស្លាប់
	ហើយទ្រង់សង្គ្រោះ	ខ្ញុំជាប្រញាប់	រួចផុតទុក្ខសព្វ
		ទាំងភ្លើងសន្ធៅ	។

(មិនមានសូត្រ “ ធម៌កោតសរសើរ ” ក្នុងបទលើកតម្កើងនេះទេ)

បន្ទរ៖ «អស់​អ្នក​ដែល​នឿយ‌ហត់ និង​មាន​បន្ទុក​ធ្ងន់​អើយ ! ចូរ​មក​រក​ខ្ញុំ ខ្ញុំ​នឹង​ឱ្យ​អ្នក​រាល់​គ្នា​បាន​សម្រាក»។

ទំនុកតម្កើងលេខ ១៤៩

ចម្រៀងនៃអំណរសប្បាយរបស់សន្តបុគ្គល

ចូរបុត្រធីតាទាំងឡាយនៃព្រះសហគមន៍ ដែលជាប្រជាជនថ្មីរបស់ព្រះជាម្ចាស់ ត្រេកអរសប្បាយចំពោះ​ព្រះគ្រីស្ត ដែលជាស្តេចរបស់ពួកគេ (Hesychius)។

បន្ទរទី៣៖ កូន​អើយ ចូរ​ទុក​ចិត្ត​លើឪពុក ហើយ​ពេញ​ចិត្ត​យក​តម្រាប់​តាម​ឪពុក។

១	ចូរ​ច្រៀង​បទ​ថ្មីថ្វាយ​ព្រះ‌អម្ចាស់! ចូរ​ច្រៀង​សរសើរ​ព្រះ‌អង្គនៅ​ក្នុង​អង្គ​ប្រជុំ​របស់​អ្នក​ជឿ​ព្រះ‌អង្គ!
២	ចូរ​ឲ្យ​ជន​ជាតិ​អ៊ីស្រា‌អែលរីក‌រាយ​នឹង​ព្រះ‌អង្គ​ ដែល​បាន​បង្កើត​គេ​មក សូម​ឲ្យ​ប្រជាជន​ក្រុង​ស៊ីយ៉ូនមាន​អំណរ​សប្បាយ នឹង​ព្រះ‌មហា​ក្សត្រ​របស់​ខ្លួន!
៣	ចូរ​នាំ​គ្នា​រាំ​សរសើរ​តម្កើង​ព្រះ‌អង្គ ចូរ​នាំ​គ្នា​ស្មូត្រ​ទំនុក‌តម្កើង​ថ្វាយ​ព្រះ‌អង្គ ដោយ​វាយ​ក្រាប់ និង​ដេញ​ពិណ!
៤	ដ្បិត​ព្រះ‌អម្ចាស់​គាប់​ព្រះ‌ហឫទ័យនឹង​ប្រជា‌រាស្ដ្រ​របស់​ព្រះ‌អង្គ ព្រះ‌អង្គ​លើក​កិត្តិយស​មនុស្ស​ទន់‌ទាបដោយ​សង្គ្រោះ​ពួក​គេ
៥	ចូរ​ឲ្យ​អស់​អ្នក​ដែល​ជឿ​លើ​ព្រះ‌អង្គនាំ​គ្នា​អរ​សប្បាយ​ដ៏​លើស‌លប់ ដោយ​លើក​តម្កើង​សិរី‌រុង​រឿង​របស់​ព្រះ‌ជាម្ចាស់ សូម្បី​តែ​នៅ​ពេល​យប់ ក៏​គេ​ស្រែក​តម្កើង​ព្រះ‌អង្គ​ដោយ​អំណរ​ដែរ!
៦	សូម​ឲ្យ​គេ​សរសើរ​តម្កើង​ព្រះ‌អង្គ​មិន​ដាច់​ពី​មាត់ ហើយ​ឲ្យ​គេ​កាន់​ដាវ​មុខ​ពីរ​នៅ​ជាប់​នឹង​ដៃ​ជា‌និច្ច
៧	ដើម្បី​សង‌សឹក​ប្រជា‌ជាតិ​នានា និង​ដាក់​ទោស​ជាតិ​សាសន៍​ទាំង‌ឡាយ
៨	ហើយ​យក​ច្រវាក់​ចង​ស្តេច និង​ដាក់​ខ្នោះ​មេ​ដឹក​នាំ​របស់​ពួក​គេ។
៩	ការ​ដាក់​ទោស​សាសន៍​ទាំង​នោះ ស្រប​តាម​ការ​សម្រេច​របស់​ព្រះ‌ជាម្ចាស់​នេះ​ហើយ ដែល​ជា​កិត្តិយស​ដ៏​រុង‌រឿង​របស់​អស់​អ្នកស្មោះ‌ត្រង់​នឹង​ព្រះ‌អង្គ!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ កូន​អើយ ចូរ​ទុក​ចិត្ត​លើឪពុក ហើយ​ពេញ​ចិត្ត​យក​តម្រាប់​តាម​ឪពុក។

ព្រះបន្ទូលរបស់ព្រះជាម្ចាស់ (យរ ៣១,៣៣)

សម្ពន្ធមេត្រី​ថ្មីដែល​យើង​នឹង​ចង​ជា​មួយ​ប្រជាជន​អ៊ីស្រា‌អែល​នៅ​ពេល​ខាង​មុខ មាន​ដូច​ត​ទៅ: យើង​នឹង​ដាក់​វិន័យ​របស់​យើង​នៅ​ក្នុង​ជម្រៅ​ចិត្ត​របស់​ពួក​គេ យើង​នឹង​ចារ​វិន័យ​នោះ​ក្នុង​ចិត្ត​គំនិត​របស់​ពួក​គេ យើង​នឹង​ធ្វើ​ជា​ព្រះ​របស់​ពួក​គេ ពួក​គេ​ធ្វើជា​ប្រជា‌រាស្ដ្រ​របស់​យើង -នេះ​ជា​ព្រះ‌បន្ទូល​របស់​ព្រះ‌អម្ចាស់។

បន្ទរ៖ ចូរ​យក​នឹមរបស់​ខ្ញុំ​ដាក់​លើ​អ្នក​រាល់​គ្នា *ហើយ​រៀន​ពីខ្ញុំ​ទៅ។ បន្ទរឡើងវិញ៖…
-ដ្បិត​ខ្ញុំ​ស្លូត និង​មាន​ចិត្ត​សុភាព។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ ដ្បិត​ព្រះ‌អង្គ​សព្វ​ព្រះ‌ហឫ‌ទ័យ​យាង​មក រំដោះ​ប្រជា‌រាស្ដ្រ​របស់​ព្រះ‌អង្គ។

• តាមបែបសូត្រ
• តាមបែបស្មូត

ពាក្យអង្វរសកល

បងប្អូនជាទីស្រឡាញ់ ! ចូរយើងទូលអង្វរព្រះអម្ចាស់យេស៊ូ ដែលមានព្រះហឫទ័យសុភាព និងស្លូតបូត។ ចូរយើងទូលព្រះអង្គថា ៖

បន្ទរ៖ បពិត្រព្រះអម្ចាស់ដែលមានព្រះហឫទ័យមេត្តាករុណាដ៏លើសលុប ! សូមអាណិតអាសូរយើងខ្ញុំ !

បពិត្រព្រះយេស៊ូ ! ព្រះអង្គពោរពេញដោយសភាវៈរបស់ព្រះជាម្ចាស់ស្ថិតនៅក្នុងព្រះអង្គ
—សូមប្រោសប្រទានឱ្យយើងខ្ញុំចូលរួមចំណែកក្នុងជីវិតជាព្រះជាម្ចាស់របស់ព្រះអង្គផង។ (បន្ទរ)

បពិត្រព្រះយេស៊ូ ! ព្រះអង្គជាទ្រព្យសម្បត្តិនៃព្រះប្រាជ្ញាញាណ និងចំណេះដឹងគ្រប់យ៉ាង
—សូមប្រោសប្រទានឱ្យយើងខ្ញុំបានស្គាល់ព្រះប្រាជ្ញាញាណដ៏សម្បូរបែបរបស់ព្រះជាម្ចាស់ តាមរយៈព្រះសហគមន៍។ (បន្ទរ)

បពិត្រព្រះយេស៊ូ ! ព្រះបិតាសព្វព្រះហឫទ័យនឹងព្រះអង្គខ្លាំងណាស់
—សូមជួយឱ្យយើងខ្ញុំស្តាប់ឮព្រះបន្ទូលព្រះអង្គ ហើយចងចាំទុកនៅក្នុងចិត្ត។ (បន្ទរ)

បពិត្រព្រះយេស៊ូ ! យើងខ្ញុំទាំងអស់គ្នាបានទទួលលក្ខណៈពេញលេញរបស់ព្រះអង្គ
—សូមព្រះអង្គចាក់បង្ហូរនូវធម៌មេត្តា និងសេចក្តីពិតរបស់ព្រះបិតា មកលើយើងខ្ញុំយ៉ាងបរិបូណ៌ផង។ (បន្ទរ)

បពិត្រព្រះយេស៊ូ ! ព្រះអង្គជាប្រភពនៃជីវិត និងភាពដ៏វិសុទ្ធគ្រប់យ៉ាង !
—សូមប្រោសឱ្យយើងខ្ញុំបានវិសុទ្ធ និងគ្មានកំហុសក្នុងសេចក្តីស្រឡាញ់ផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ! យើងខ្ញុំសូមលើកតម្កើងសិរីរុងរឿងនៃព្រះហឫទ័យរបស់ព្រះបុត្រា និងនឹករឭកដល់សេចក្តីស្រឡាញ់ដ៏អស្ចារ្យរបស់ព្រះអង្គសម្រាប់យើងខ្ញុំ។ សូមព្រះអង្គប្រណីសន្តោសយើងខ្ញុំដោយបង្ហូរព្រះអំណោយទាន តាមមុខរបួសព្រះបេះដូងរបស់ព្រះអង្គ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង។
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។