១៦ ឧសភា ២០២៦

Written on 10/02/2026

Mary Siya Khim

រដូវបុណ្យចម្លង សប្តាហ៍ទី៦ ថ្ងៃសៅរ៍

(ពេលព្រឹក)

ការអញ្ជើញមុនអធិដ្ឋាននៅពេលព្រឹក

ឱព្រះអម្ចាស់អើយ! សូមបើកបបូរមាត់របស់ទូលបង្គំ
សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ព្រះអម្ចាស់មានព្រះជន្មរស់ឡើងវិញមែន អាលេលូយ៉ា !

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៩២

កោតសរសើរព្រះជាម្ចាស់នៃពិភពទាំងមូល

ចូរច្រៀងកោតសរសើរកិច្ចប្រោសលោះរបស់ព្រះគ្រីស្ត (សន្តអាថាណាស)។

បន្ទរទី១ ៖ បពិត្រព្រះអម្ចាស់ ! កិច្ចការដែលព្រះអង្គធ្វើនាំឱ្យទូលបង្គំមានអំណរដ៏លើសលប់ ទូលបង្គំសប្បាយចិត្តនឹងស្នាព្រះហស្តរបស់ព្រះអង្គ អាលេលូយ៉ា!

២	បពិត្រព្រះអម្ចាស់! ទូលបង្គំលើកតម្កើងព្រះអង្គ ពិតជាការប្រពៃណាស់ ស្មូតបទតម្កើង សរសើរព្រះនាមរបស់ព្រះដ៏ខ្ពង់ខ្ពស់បំផុត ក៏ជាការល្អប្រពៃដែរ!
៣	ទូលបង្គំប្រកាសអំពីព្រះហឫទ័យមេត្តាករុណារបស់ព្រះអង្គ តាំងពីពេលព្រលឹមមក ហើយក៏ប្រកាសអំពីព្រះហឫទ័យស្មោះស្ម័គ្ររបស់ព្រះអង្គនៅពេលយប់
៤	ដោយលេងឃឹម ដេញចាប៉ី និងដេញពិណដែរ។
៥	បពិត្រព្រះអម្ចាស់! កិច្ចការដែលព្រះអង្គធ្វើ នាំឱ្យទូលបង្គំមានអំណរដ៏លើសលប់ ទូលបង្គំសប្បាយចិត្តនឹងស្នាព្រះហស្តរបស់ព្រះអង្គ។
៦	បពិត្រព្រះអម្ចាស់! ស្នាព្រះហស្តរបស់ព្រះអង្គប្រសើរឧត្តុង្គឧត្តមណាស់ ព្រះតំរិះរបស់ព្រះអង្គជ្រៅពន់ប្រមាណ!
៧	មនុស្សល្ងីល្ងើមិនយល់អ្វីទាំងអស់ មនុស្សឆោតល្ងង់ក៏មិនដឹងអ្វីដែរ។
៨	មនុស្សអាក្រក់ចម្រុងចម្រើនឡើងដូចស្មៅ មនុស្សទាំងប៉ុន្មានដែលប្រព្រឹត្តអំពើទុច្ចរិត ក៏រីកដុះដាលឡើងដែរ ប៉ុន្តែ គេនឹងត្រូវវិនាសអន្តរាយរហូតតរៀងទៅ។
៩	រីឯព្រះអង្គវិញ នៅស្ថានលើ ព្រះអង្គនៅជាព្រះអម្ចាស់ជានិច្ច!
១០	បពិត្រព្រះអម្ចាស់ ! ខ្មាំងសត្រូវរបស់ព្រះអង្គកំពុងតែវិនាស អស់អ្នកដែលប្រព្រឹត្តអំពើទុច្ចរិត នឹងត្រូវខ្ចាត់ខ្ចាយអស់ទៅ។
១១	ព្រះអង្គប្រទានឱ្យទូលបង្គំមានកម្លាំងដូចដំរី ព្រះអង្គបានចាក់ប្រេងថ្មីមកលើទូលបង្គំ។
១២	ទូលបង្គំឃើញខ្មាំងសត្រូវឃ្លាំមើល ព្រមទាំងឮសម្រែករបស់អស់អ្នកដែលស្អប់ទូលបង្គំ
១៣	មនុស្សសុចរិតនឹងរីកដុះដាលឡើងដូចដើមត្នោត ហើយចម្រើនធំឡើងដូចដើមតាត្រៅនៅស្រុកលីបង់។
១៤	ពួកគេប្រៀបបាននឹងដើមឈើដុះ នៅក្នុងព្រះដំណាក់របស់ព្រះអម្ចាស់ ហើយលូតលាស់នៅក្នុងព្រះ‌វិហាររបស់ព្រះ‌ជាម្ចាស់
១៥	ទោះបីគេមានវ័យចាស់ជរាក្តី ក៏គេនៅតែបង្កើតផលផ្លែដដែល គេមានពន្លកថ្មី និងមានស្លឹកលាស់ខៀវខ្ចីជានិច្ច។
១៦	ការទាំងនេះសម្តែងឱ្យឃើញថា ព្រះអម្ចាស់ជាថ្មដារបស់ខ្ញុំ ព្រះអង្គមានព្រះហឫទ័យទៀងត្រង់ជានិច្ច ឥតប្រែប្រួលសោះឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ បពិត្រព្រះអម្ចាស់ ! កិច្ចការដែលព្រះអង្គធ្វើនាំឱ្យទូលបង្គំមានអំណរដ៏លើសលប់ ទូលបង្គំសប្បាយចិត្តនឹងស្នាព្រះហស្តរបស់ព្រះអង្គ អាលេលូយ៉ា!

បទលើកតម្កើងតាមគម្ពីរទុតិយកថា (ទក ៣២,១-១២)

ព្រះហឫទ័យសប្បុរសរបស់ព្រះជាម្ចាស់ចំពោះប្រជារាស្រ្តរបស់ព្រះអង្គ

ច្រើនលើកច្រើនសាមកហើយដែលខ្ញុំចង់ប្រមូលផ្ដុំអ្នករាល់គ្នា ដូចមេមាន់ក្រុងកូនវានៅក្រោមស្លាប (មថ ២៣,៣៧)។

បន្ទរទី២ ៖ យើងផ្តល់ជីវិត និងដកជីវិត យើងធ្វើឱ្យរបួស និងធ្វើឱ្យជាវិញ អាលេលូយ៉ា!

(បទពាក្យ ៧)

១-	ឱផ្ទៃមេឃអើយចូរត្រងត្រាប់	ពាក្យខ្ញុំថ្លែងប្រាប់ជាដំណឹង
	ផែនដីអើយចូរអ្នកខំប្រឹង	ស្តាប់ឱ្យបានដឹងខ្ញុំបរិយាយ	។
២-	សូមឱ្យពាក្យខ្ញុំទាំងប៉ុន្មាន	ដែលបានទូន្មានរៀងរាល់ថ្ងៃ
	ឱ្យដូចសន្សើមភ្លៀងធ្លាក់ថ្មី	រុក្ខជាតិខៀវខ្ចីស្រស់បំព្រង	។
៣-	ខ្ញុំនឹងប្រកាសពីព្រះនាម	មិនព្រមនៅស្ងៀមមិនភ្លេចម្តង
	លើកតម្កើងភាពខ្ពស់កន្លង	រុងរឿងគ្មានហ្មងព្រះនៃយើង	។
៤-	ព្រះអម្ចាស់ប្រៀបដូចថ្មដា	ជាផ្ទាំងសិលាដ៏សែនរឹង
	មាគ៌ាព្រះអង្គសុចរិតត្រង់	បរិសុទ្ធឥតហ្មងឥតមានខ្ចោះ	។
៥-	ប៉ុន្តែព្រះអង្គទ្រង់ជ្រាបថា	អ្នកទាំងអស់គ្នាក្បត់ទាំងអស់
	ដោយអ្នកមានចិត្តមិនត្រង់ស្មោះ	ព្រះអង្គផាត់អស់មិនទុកនៅ	។
	លែងរាប់លែងរកលែងទុកថា	ជាបុត្រធីតាជាកូនចៅ
	អ្នករាល់គ្នាមានចិត្តអាស្រូវ	វៀចវេរមិនត្រូវក្បត់ព្រះអង្គ	។
៦-	ឱជនល្ងីល្ងើឥតប្រាជ្ញា	ចុះម្តេចឡើយណាមិនបោះបង់
	ព្រះគុណព្រះអង្គច្រើនកន្លង	តោងគិតផ្គូរផ្គងគិតនឹកនា	។
	ទ្រង់ជាបិតាដែលបង្កើត	ឱ្យមានកំណើតកើតជន្មា
	ឱ្យអ្នកបានក្លាយជាប្រជា	ជាតិមាំអស្ចារ្យខ្លាំងទៀតផង	។
៧-	ចូរអ្នករាល់គ្នានឹកនាចាំ	គិតអំពីឆ្នាំដែលកន្លង
	ឪពុកដូនតាកុំមានហ្មង	រ៉ាយរ៉ាប់ប្រាប់ផងហេតុការណ៍គ្រប់	។
៨-	ពេលព្រះខ្ពង់ខ្ពស់ប្រទានដី	ជាកេរថ្លាថ្លៃទ្រព្យសំណព្វ
	ពេលទ្រង់បំបែកមនុស្សលោកសព្វ	ថែមទាំងកំណត់ព្រំដែនឱ្យ	។
	ព្រះអង្គប្រទានតាមចំនួន	ឱ្យបានសមសួនមិនបណ្តោយ
	គ្នាតិចបានតិចមិនឱ្យធ្លោយ	គ្នាច្រើនទ្រង់ឱ្យធំល្វើយល្វឹង	។
៩-	ព្រះម្ចាស់ជ្រើសយកអ៊ីស្រាអែល	ទុកជារាស្ត្រផ្ទាល់នៃព្រះអង្គ
	ទាំងពូជយ៉ាកុបថែមទៀតផង	ទុកជាកេរទ្រង់ដ៏ថ្កើងថ្កាន	។
១០-	ព្រះម្ចាស់រកឃើញអ៊ីស្រាអែល	នៅតាមទីវាលរហោស្ថាន
	ក្នុងដីហួតហែងព្រៃស្មសាន	សុទ្ធតែតិរច្ឆានស្នាក់នៅជុំ	។
	តែព្រះអង្គបានបីបាច់ថែ	ថ្នាក់ថ្នមរូបគេហើយអប់រំ
	ការពារក្រសោបឱ្យនៅជុំ	គេរស់សុខដុមផុតវេទនា	។
១១-	ព្រះអង្គការពារនិងណែនាំ	ឱ្យដើរត្រង់ចំផ្លូវសាស្តា
	ដូចសត្វឥន្ទ្រីយ៍ជាបក្សា	ត្រដាងស្លាបវាបាំងកូនបាន	។
១២-	មានតែព្រះម្ចាស់មួយព្រះអង្គ	ដឹកនាំរាស្ត្រទ្រង់យ៉ាងចំណាន
	ឱ្យគេរស់នៅយ៉ាងសុខសាន្ត	ព្រះផ្សេងមិនបានដូចទ្រង់ឡើយ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ យើងផ្តល់ជីវិត និងដកជីវិត យើងធ្វើឱ្យរបួស និងធ្វើឱ្យជាវិញ អាលេលូយ៉ា!

ទំនុកតម្កើងលេខ ៨

សិរីរុងរឿងរបស់ព្រះ‌ជាម្ចាស់ និងកិត្តិយសរបស់មនុស្ស

ព្រះជាម្ចាស់បានបង្ក្រាបអ្វីៗទាំងអស់ ឱ្យនៅក្រោមព្រះបាទារបស់ព្រះគ្រីស្ត
ព្រមទាំងប្រទានឱ្យព្រះអង្គគង់នៅលើអ្វីៗទាំងអស់ ធ្វើជាសិរសាលើព្រះសហគមន៍ (អភ ១,២២)។

បន្ទរទី៣ ៖ ព្រះអង្គប្រទានសិរី‌រុងរឿង និងកិត្តិយសដល់អ្នកដែលព្រះអង្គបានចាក់ប្រេងអភិសេក ទុកជាមកុដរាជ្យ អាលេលូយ៉ា!

២	បពិត្រព្រះអម្ចាស់ ជាម្ចាស់របស់យើងខ្ញុំ! ព្រះនាមរបស់ព្រះអង្គថ្កុំថ្កើងរុងរឿង លើសផ្ទៃមេឃទៅទៀត!។
៣	ព្រះអង្គបានប្រើពាក្យសរសើរតម្កើងរបស់ក្មេងៗ និងទារកដែលនៅបៅ ធ្វើជាកម្លាំងប្រយុទ្ធនឹងបច្ចាមិត្តរបស់ព្រះអង្គ ដើម្បីបង្ក្រាបខ្មាំងសត្រូវដ៏កាចសាហាវឱ្យវិនាសសូន្យ។
៤	ពេលទូលបង្គំសម្លឹងមើលផ្ទៃមេឃ ដែលជាស្នាព្រះហស្តរបស់ព្រះអង្គ ហើយសម្លឹងមើលព្រះចន្ទ និងហ្វូងតារា ដែលព្រះអង្គដាក់នៅលើមេឃនោះ
៥	ទូលបង្គំសួរខ្លួនឯងថា តើមនុស្សមានឋានៈអ្វី បានជាព្រះអង្គនឹកគិតដល់គេដូច្នេះ? តើបុត្រមនុស្សជាអ្វី បានជាព្រះអង្គយកព្រះហឫទ័យទុកដាក់នឹងគេយ៉ាងនេះ?
៦	ព្រះអង្គបានធ្វើឱ្យមនុស្សមានឋានៈទាបជាងទេវតាតែបន្តិចប៉ុណ្ណោះ។ ព្រះអង្គប្រទានសិរីរុងរឿង និងកិត្តិយសដល់គេទុកជាមកុដរាជ្យ។
៧	ព្រះអង្គប្រទានឱ្យគេគ្រប់គ្រងលើអ្វីៗទាំងអស់ ដែលព្រះអង្គបានបង្កើតមក ព្រះអង្គបានបង្ក្រាបអ្វីៗទាំងអស់ឱ្យនៅក្រោមជើងរបស់គេ
៨	គឺទាំងចៀម ទាំងគោ និងសត្វព្រៃទាំងប៉ុន្មាន
៩	ព្រមទាំងបក្សាបក្សីនៅលើមេឃ ត្រីនៅក្នុងសមុទ្រ និងសត្វទាំងអស់ដែលរស់នៅបាតសមុទ្រ។
១០	បពិត្រព្រះអម្ចាស់ជាម្ចាស់របស់យើងខ្ញុំអើយ! ព្រះនាមរបស់ព្រះអង្គថ្កុំថ្កើងរុងរឿងពាសពេញលើផែនដីទាំងមូល! ។

បន្ទរ ៖ ព្រះអង្គប្រទានសិរី‌រុងរឿង និងកិត្តិយសដល់អ្នកដែលព្រះអង្គបានចាក់ប្រេងអភិសេក ទុកជាមកុដរាជ្យ អាលេលូយ៉ា!

ព្រះបន្ទូលរបស់ព្រះជាម្ចាស់ (រ៉ូម ១៤,៧-៩)

ក្នុងចំណោមបង‌ប្អូន គ្មាននរណាម្នាក់រស់ ឬស្លាប់សម្រាប់ខ្លួនឯងឡើយ ដ្បិតបើយើងរស់ យើងរស់សម្រាប់ព្រះ‌អម្ចាស់ ហើយបើយើងស្លាប់ ក៏ស្លាប់សម្រាប់ព្រះ‌អម្ចាស់ដែរ។ ទោះបីយើងរស់ក្តី ស្លាប់ក្តី យើងថ្វាយខ្លួនទៅព្រះ‌អម្ចាស់ជា‌និច្ច ដ្បិតព្រះ‌គ្រីស្ដបានសោយទិវង្គត និងមានព្រះ‌ជន្មរស់ឡើងវិញ ដើម្បីធ្វើជាព្រះ‌អម្ចាស់ទាំងលើមនុស្សស្លាប់ទាំងលើមនុស្សរស់។

បន្ទរ៖ ព្រះអម្ចាស់មានព្រះជន្មរស់ឡើងវិញ *អាលេលូយ៉ា! អាលេលូយ៉ា!។ បន្ទរឡើងវិញ៖...

—ព្រះអង្គត្រូវគេព្យួរនៅលើឈើឆ្កាងសម្រាប់យើងខ្ញុំ។ បន្ទរ៖ *...

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖...

ទំនុកតម្កើងរបស់លោកសាការី

បន្ទរ៖ ខ្ញុំសុំប្រាប់ឲ្យអ្នករាល់គ្នាដឹងច្បាស់ថា អ្វីៗដែលអ្នករាល់គ្នាទូលសូមព្រះ‌បិតាក្នុងនាមខ្ញុំ ព្រះ‌អង្គមុខជាប្រទានឲ្យអ្នករាល់គ្នាមិនខាន។

ពាក្យអង្វរសកល

ព្រះគ្រីស្តបានបង្ហាញឱ្យយើងស្គាល់ពីជីវិតដែលស្ថិតស្ថេរជារៀងរហូត។ ចូរយើងស្រែកទូលព្រះអង្គ ដោយជំនឿ និងអំណរសប្បាយថា ៖

បន្ទរ៖ បពិត្រព្រះអម្ចាស់ ! សូមឱ្យការរស់ឡើងវិញរបស់ព្រះអង្គ នាំព្រះ‌ហឫទ័យប្រណី‌សន្ដោសដ៏លើស‌លប់របស់ព្រះ‌អង្គមកយើងខ្ញុំ !

ឱគង្វាលអស់កល្បជានិច្ច! សូមព្រះអង្គទតមកហ្វូងចៀមរបស់ព្រះអង្គ ពេលពួកគេក្រោកពីដំណេក
—សូមព្រះអង្គចិញ្ចឹមយើងខ្ញុំជាមួយនឹងព្រះបន្ទូល ដែលផ្តល់ជីវិត និងអាហារពីស្ថានបរមសុខផង។ (បន្ទរ)

សូមព្រះអង្គថែរក្សាការពារយើងខ្ញុំពីពួកឆ្កែចចក និងជនស៊ីឈ្នួល
—ហើយសូមព្រះអង្គប្រោសឱ្យយើងខ្ញុំមានចិត្តស្មោះត្រង់ ក្នុងការស្តាប់តាមព្រះសូរសៀងរបស់ព្រះអង្គផង។ (បន្ទរ)

ព្រះអង្គគង់នៅជាមួយអ្នកប្រកាសដំណឹងល្អគ្រប់ៗរូប ហើយប្រទានឱ្យពួកគេមានអំណាចក្នុងការថ្លែងព្រះបន្ទូល
—នៅថ្ងៃនេះ សូមព្រះអង្គធ្វើឱ្យយើងខ្ញុំក្លាយជាអ្នកប្រកាសដំណឹងល្អ អំពីការរស់ឡើងវិញរបស់ព្រះអង្គ ដោយសារជីវិតដ៏វិសុទ្ធរបស់យើងខ្ញុំ។ (បន្ទរ)

សូមព្រះអង្គធ្វើជាអំណរសប្បាយដ៏លើសលុបរបស់យើងខ្ញុំ ដែលគ្មាននរណាអាចយកចេញពីយើងខ្ញុំបានឡើយ
—ដូច្នេះ យើងខ្ញុំអាចបដិសេធអំពើបាប ហើយឈោងឆ្ពោះទៅកាន់ជីវិតអស់កល្បជានិច្ច។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះអម្ចាស់ជាព្រះបិតា! ព្រះអង្គអប់រំចិត្តគំនិតយើងខ្ញុំឱ្យចេះធ្វើអំពើល្អអស់មួយជីវិត ដោយរួមជាមួយព្រះគ្រីស្តជាព្រះបុត្រាព្រះអង្គ។ សូមព្រះអង្គប្រោសប្រណីឱ្យយើងខ្ញុំភ្ជាប់ចិត្តនឹងគម្រោងការណ៍ដ៏អស្ចារ្យនៃបុណ្យចម្លងដែលនាំឱ្យជីវិតយើងខ្ញុំកាន់តែប្រសើរទៅៗ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង។
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។