០៨ មករា ២០២៦

ថ្ងៃព្រហស្បតិ៍ ក្រោយបុណ្យព្រះយេស៊ូសម្តែងព្រះអង្គ

 (ពេលព្រឹក)

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ចូរនាំគ្នាមក យើងលើកតម្កើងព្រះអម្ចាស់ ដ្បិតព្រះគ្រីស្តបានលេចចេញជារូបរាងហើយ។

ទំនុកតម្កើងតាមការជ្រើសរើស

• ទំនុកតម្កើងលេខ ៩៥
• ទំនុកតម្កើងលេខ ១០០
• ទំនុកតម្កើងលេខ ៦៧
• ទំនុកតម្កើងលេខ ២៤

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៨០

ឱព្រះអម្ចាស់អើយ! សូម​យាង​មក​ជួយ​ចម្ការ​ទំពាំងបាយជូរ​នេះ​ផង!

ឱព្រះអម្ចាស់យេស៊ូអើយ សូមយាងមក! (វវ ២២,២០)។

បន្ទរទី១ ៖ ឱព្រះអម្ចាស់អើយ! សូមសម្តែងព្រះបារមីដ៏រុងរឿងរបស់ព្រះអង្គឱ្យយើងខ្ញុំឃើញ ហើយសូមយាងមកសង្គ្រោះយើងខ្ញុំផង!

២	ឱព្រះជាម្ចាស់ដែលជាគង្វាលនៃជនជាតិអ៊ីស្រាអែលអើយ! សូមមេត្តាព្រះសណ្តាប់យើងខ្ញុំផង ព្រះអង្គតែងដឹកនាំពូជពង្សរបស់លោកយ៉ូសែប ដូចគង្វាលដឹកនាំហ្វូងចៀម ឱ​ព្រះ‌អង្គ​ដែល​គង់​នៅ​លើ​ពួក​ខេរូប៊ីមអើយ! សូមសម្តែងព្រះបារមីដ៏រុងរឿងរបស់ព្រះអង្គ
៣	សូមសម្តែងព្រះចេស្តាឱ្យកុលសម្ពន្ធអេប្រាអ៊ីម បេនយ៉ាមីន និងម៉ាណាសេឃើញ សូមយាងមកសង្គ្រោះយើងខ្ញុំផង!
៤	ឱព្រះជាម្ចាស់អើយ! សូមនាំយើងខ្ញុំឱ្យវិលត្រឡប់មកវិញ សូមទតមកយើងខ្ញុំដោយព្រះហឫទ័យសប្បុរស នោះយើងខ្ញុំនឹងបានរួចជីវិត!
៥	បពិត្រព្រះអម្ចាស់ជាព្រះនៃពិភពទាំងមូល! តើព្រះអង្គទ្រង់ព្រះពិរោធ មិនព្រមស្តាប់ពាក្យអង្វរប្រជារាស្ត្រព្រះអង្គដល់កាលណាទៀត?
៦	ព្រះអង្គធ្វើឱ្យយើងខ្ញុំសោកសង្រេងឥតស្រាកស្រាន្ត ឱ្យយើងខ្ញុំយំខ្សោះទឹកភ្នែក។
៧	ព្រះអង្គធ្វើឱ្យប្រជាជាតិជិតខាង ឈ្លោះគ្នាដណ្តើមយកទឹកដីយើងខ្ញុំ ខ្មាំងសត្រូវចំអកឡកឡឺយដាក់យើងខ្ញុំ។
៨	ឱព្រះជាម្ចាស់នៃពិភពទាំងមូលអើយ! សូមនាំយើងខ្ញុំឱ្យវិលត្រឡប់មកវិញ សូមទតមកយើងខ្ញុំដោយព្រះហឫទ័យសប្បុរស នោះយើងខ្ញុំនឹងបានរួចជីវិត!។
៩	ព្រះអង្គបានគាស់ដើមទំពាំងបាយជូរពីស្រុកអេស៊ីបមក ព្រះអង្គបានដេញប្រជាជាតិនានាចេញពីទឹកដី ហើយយកទំពាំងបាយជូរនោះមកដាំជំនួស។
១០	ព្រះអង្គឆ្ការដីយ៉ាងស្អាត ដើម្បីឱ្យដើមទំពាំងបាយជូរនោះចាក់ឫស ហើយដុះពាសពេញនៅក្នុងស្រុក
១១	ម្លប់នៃទំពាំងបាយជូរនោះ គ្របដណ្តប់ទៅលើភ្នំនានា ហើយមែករបស់វាគ្របទៅលើដើមគគីរដ៏ខ្ពស់ៗ។
១២	ដើមទំពាំងបាយជូរបែកមែកសាខារហូតទៅដល់សមុទ្រ ហើយមានពន្លកលាស់ចេញមក រហូតទៅដល់ទន្លេអឺប្រាត។
១៣	ហេតុអ្វីបានជាព្រះអង្គរំលំរបងចម្ការទំពាំងបាយជូរនេះ បណ្តាលឱ្យអស់អ្នកធ្វើដំណើរកាត់តាមនោះ នាំគ្នាបេះផ្លែដូច្នេះ?
១៤	ជ្រូកព្រៃមកបំផ្លិចបំផ្លាញចម្ការទំពាំងបាយជូរ សត្វនានានៅទីវាល ក៏នាំគ្នាស៊ីដើមទំពាំងបាយជូរនេះដែរ។
១៥	ឱព្រះជាម្ចាស់នៃពិភពទាំងមូលអើយ! សូមយាងមកវិញ! សូមទតមើលពីស្ថានបរមសុខមក! សូមយាងមកជួយចម្ការទំពាំងបាយជូរនេះផង!
១៦	សូមការពារចម្ការទំពាំងបាយជូរដែលព្រះអង្គបានដាំ ដោយបារមីរបស់ព្រះអង្គផ្ទាល់ គឺបុត្រដែលព្រះអង្គបានពង្រឹងឱ្យមាំមួនឡើង!
១៧	សូមឱ្យខ្មាំងសត្រូវដែលបានដុតបំផ្លាញ និងកាប់ឆ្ការចម្ការទំពាំងបាយជូរនេះ ត្រូវវិនាសសូន្យ នៅពេលព្រះអង្គគំរាមកំហែងពួកគេ។
១៨	សូមដាក់ព្រះហស្តលើស្តេចដែលគង់នៅខាងស្តាំព្រះអង្គ គឺលើបុត្រមនុស្សដែលព្រះអង្គបានពង្រឹងឱ្យមាំមួនឡើង។
១៩	យើងខ្ញុំនឹងមិនបែកចិត្តចេញពីព្រះអង្គទៀតឡើយ សូមប្រោសប្រទានឱ្យយើងខ្ញុំរស់រានមានជីវិតឡើងវិញផង នោះយើងខ្ញុំគោរពបម្រើព្រះនាមរបស់ព្រះអង្គ។
២០	ឱព្រះអម្ចាស់ជាព្រះនៃពិភពទាំងមូលអើយ! សូមនាំយើងខ្ញុំឱ្យវិលត្រឡប់មកវិញ សូមទតមកយើងខ្ញុំដោយព្រះហឫទ័យសប្បុរស នោះយើងខ្ញុំនឹងបានរួចជីវិត!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ឱព្រះអម្ចាស់អើយ! សូមសម្តែងព្រះបារមីដ៏រុងរឿងរបស់ព្រះអង្គឱ្យយើងខ្ញុំឃើញ ហើយសូមយាងមកសង្គ្រោះយើងខ្ញុំផង!

បទលើកតម្កើងតាមព្យាការីអេសាយ (អស ១២,១-៦)

អំណរសប្បាយរបស់ប្រជារាស្រ្តដែលព្រះអង្គបានលោះ

អ្នកណាស្រេកទឹក សុំអញ្ជើញមករកខ្ញុំ ហើយពិសាចុះ (យហ ៧,៣៧)។

បន្ទរទី២ ៖ ព្រះអង្គបានសម្ដែងការប្រសើរអស្ចារ្យចំពោះយើង ចូរឱ្យយើងប្រកាសពីការអស្ចារ្យទាំងនេះ ឱ្យមនុស្សនៅលើផែន‌ដីទាំងមូលដឹងផង!

(បទពាក្យ ៧)

១-	ឱព្រះម្ចាស់អើយទូលបង្គំ	លើកហត្ថប្រណម្យសូមតម្កើង	
	គ្រាមុនព្រះអង្គពិរោធយើង	ឥឡូវព្រះអង្គសម្រាលទុក្ខ	។
២-	ព្រះអម្ចាស់ជាព្រះសង្គ្រោះ	ជីវិតខ្ញុំរស់ស្គាល់តែសុខ	
	លែងភ័យលែងខ្លាចលែងកើតទុក្ខ	ពីនេះទៅមុខពឹងលើព្រះ	។
	ដ្បិតព្រះអម្ចាស់ជាកម្លាំង	ខ្ញុំអាចតតាំងអាចយកឈ្នះ	
	ខ្ញុំនឹងច្រៀងថ្វាយព្រះអម្ចាស់	ព្រោះទ្រង់សង្គ្រោះដល់រូបខ្ញុំ	។
៣-	ព្រះម្ចាស់សង្គ្រោះអ្នករាល់គ្នា	ផុតទុក្ខគ្រប់គ្រារស់សុខដុម	
	ចូរទៅដងទឹកត្រជាក់ជុំ	ចេញពីប្រភពសង្គ្រោះផង	។
៤-	ចូរអរព្រះគុណព្រះអម្ចាស់	ហើយចូរប្រកាសនាមព្រះអង្គ	
	ថ្លែងស្នាព្រះហស្តអស្ចារ្យទ្រង់	ប្រាប់ប្រជាជនផងទាំងឡាយ	។
៥-	ចូរស្មូតទំនុកតម្កើងថ្វាយ	ព្រះអម្ចាស់ថ្លៃគ្រប់ៗកាយ	
	ដ្បិតការអស្ចារ្យច្រើនពេកក្រៃ	ឱ្យមនុស្សលើដីបានដឹងផង	។
៦-	អុះឱ អ្នកក្រុងស៊ីយ៉ូនអើយ	ចូរកុំកន្តើយស្រែករំពង	
	ដោយអរសប្បាយដ្បិតព្រះអង្គ	វិសុទ្ធឥតហ្មងព្រះនៃយើង	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ	
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះអង្គបានសម្ដែងការប្រសើរអស្ចារ្យចំពោះយើង ចូរឱ្យយើងប្រកាសពីការអស្ចារ្យទាំងនេះ ឱ្យមនុស្សនៅលើផែន‌ដីទាំងមូលដឹងផង!

ទំនុកតម្កើងលេខ ៨១

សម្ពន្ធមេត្រីដែលចងឡើងវិញយ៉ាងឱឡារិក

បង‌ប្អូន​អើយ ចូរ​ប្រយ័ត្ន​ក្រែង​លោ​នរណា​ម្នាក់ ក្នុង​ចំណោម​បង‌ប្អូន បែរ​ជា​មាន​ចិត្ត​អាក្រក់​លែង​ជឿ
រហូត​ដល់​ទៅ​ងាក​ចេញ​ពី​ព្រះ‌ជាម្ចាស់​ដ៏​មាន​ព្រះ‌ជន្ម​រស់ (ហប ៣,១២)។

បន្ទរទី៣ ៖ ចូរបន្លឺសំឡេងដោយអំណរថ្វាយព្រះជាម្ចាស់ ដែលជាកម្លាំងរបស់យើង!

២	ចូរបន្លឺសំឡេងដោយអំណរថ្វាយព្រះជាម្ចាស់ ដែលជាកម្លាំងរបស់យើង! ចូរអបអរសាទរព្រះរបស់លោកយ៉ាកុប!
៣	ចូរនាំគ្នាប្រគុំតូរ្យតន្ត្រីឡើង ចូរវាយស្គរ និងលេងពិណយ៉ាងពីរោះ ព្រមទាំងដេញចាប៉ីផងដែរ!
៤	ចូរផ្លុំស្នែងនៅពេលចាប់ផ្តើមខ្នើត នៅពេលខែពេញបូរមី គឺជាថ្ងៃបុណ្យរបស់យើង
៥	ព្រោះជាច្បាប់នៅស្រុកអ៊ីស្រាអែល ជាបទបញ្ជានៃព្រះរបស់លោកយ៉ាកុប
៦	ជាវិន័យដែលព្រះអង្គបង្គាប់មកពូជពង្សរបស់លោកយ៉ូសែប នៅពេលដែលព្រះអង្គវាយប្រហារស្រុកអេស៊ីប។ ខ្ញុំឮសំឡេងមួយដែលខ្ញុំមិនធ្លាប់ឮទាល់តែសោះ បន្លឺថា ៖
៧	“យើងបានយកអង្រែកដ៏ធ្ងន់ចុះពីស្មាអ្នក ហើយក៏យកបន្ទុកដ៏ធ្ងន់ចេញពីដៃអ្នកដែរ!
៨	នៅគ្រាមានទុក្ខវេទនា អ្នកបានស្រែកហៅយើង យើងក៏បានរំដោះអ្នក យើងបានឆ្លើយតបពីក្នុងខ្យល់ព្យុះ យើងបានល្បងលមើលចិត្តអ្នក នៅក្បែរប្រភពទឹកមេរីបា។
៩	ប្រជារាស្ត្ររបស់យើងអើយ! ចូរស្តាប់សេចក្តីដែលយើងរំលឹកដាស់តឿនអ្នក ឱអ៊ីស្រាអែលអើយ! ចូរស្តាប់ពាក្យយើង
១០	កុំឱ្យមានព្រះណាទៀតនៅក្នុងចំណោមអ្នកឡើយ កុំថ្វាយបង្គំព្រះដទៃឱ្យសោះ
១១	យើងជាព្រះអម្ចាស់ ជាព្រះរបស់អ្នក យើងបាននាំអ្នកចេញពីស្រុកអេស៊ីបមក ចូរបើកចិត្តឱ្យទូលាយ យើងនឹងឱ្យពរអ្នកយ៉ាងពេញបរិបូណ៌។
១២	ប៉ុន្តែ ប្រជារាស្ត្ររបស់យើងមិនបានស្តាប់សំឡេងយើងទេ អ៊ីស្រាអែលក៏មិនចង់ស្គាល់យើងទៀតដែរ។
១៣	ហេតុនេះហើយបានជាយើងបណ្តោយគេទៅតាមចិត្តរឹងរូសរបស់ខ្លួន ឱ្យគេនាំគ្នាប្រព្រឹត្តតាមទំនើងចិត្តគេទៅចុះ!។
១៤	ប្រសិនបើប្រជារាស្ត្ររបស់យើង ស្តាប់សំឡេងរបស់យើង ប្រសិនបើអ៊ីស្រាអែលដើរតាមមាគ៌ារបស់យើង
១៥	យើងមុខជានឹងបង្ក្រាបខ្មាំងសត្រូវរបស់គេ យើងនឹងវាយប្រហារបច្ចាមិត្តរបស់គេ មួយរំពេចជាមិនខាន។
១៦	អស់អ្នកដែលស្អប់ព្រះអម្ចាស់ នឹងនាំគ្នាមកចុះចូលនឹងព្រះអង្គ ព្រះអង្គនឹងដាក់ទោសគេជាដរាបតរៀងទៅ។
១៧	ព្រះជាម្ចាស់នឹងប្រទានស្រូវដ៏ល្អៗ មកឱ្យអ៊ីស្រាអែលបរិភោគ ព្រមទាំងឱ្យគេមានទឹកឃ្មុំបរិភោគយ៉ាងបរិបូណ៌ផង។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ចូរបន្លឺសំឡេងដោយអំណរថ្វាយព្រះជាម្ចាស់ ដែលជាកម្លាំងរបស់យើង!

ព្រះបន្ទូលរបស់ព្រះជាម្ចាស់ (អស ៦២,១១-១២)

ព្រះអម្ចាស់​ប្រកាស​ប្រាប់​មនុស្ស‌ម្នា​ដែលនៅ​ទី​ដាច់​ស្រយាល​នៃ​ផែនដីដូច​ត​ទៅ: ចូរ​ប្រាប់​ប្រជាជន​នៅ​ក្រុង​ស៊ីយ៉ូន​ថា មើល​ហ្ន៎! ព្រះ‌សង្គ្រោះ​របស់​អ្នកព្រះ‌អង្គ​យាង​មក​ដល់ ទាំង​នាំ​យក​អស់​អ្នកដែល​ព្រះ‌អង្គ​បាន​លោះ​មក​ជា​មួយ​ផង ពួក​គេ​នាំ​គ្នា​ដើរ​នៅ​មុខ​ព្រះ‌អង្គ។ គេ​នឹង​ហៅ​អ្នក​ទាំង​នោះ​ថា ប្រជា‌រាស្ដ្រ​ដ៏‌វិសុទ្ធប្រជា‌រាស្ដ្រ​ដែល​ព្រះ‌អម្ចាស់​បាន​លោះ។ រីឯ​អ្នក​វិញ មនុស្ស‌ម្នា​នឹង​ហៅ​អ្នក​ថា ទី‌ក្រុង​បណ្តូល​ចិត្ត ក្រុង​ដែល​គេ​មិន​បោះ‌បង់​ចោល។

បន្ទរ៖ ស្តេចទាំងប៉ុន្មាននៅលើផែនដី *នឹងលុតជង្គង់ក្រាបថ្វាយបង្គំព្រះអម្ចាស់។ បន្ទរឡើងវិញ៖…
-ហើយនឹងមានមនុស្សមកពីគ្រប់ជាតិសាសន៍ទាំងបុរស និងស្រ្តី នាំគ្នាគោរពបម្រើព្រះអង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ ប្រជាជនទាំងអស់ដែលមកពីទីឆ្ងាយ គេ​មា​ន​កាន់​តង្វាយ​គ្រប់​ដៃ មក​ថ្វាយ​ព្រះ‌មហា​ក្សត្រ​នៃ​ស្ថាន‌បរម​សុខ អាលេលូយ៉ា!។

• តាមបែបសូត្រ
• តាមបែបស្មូត

ពាក្យអង្វរសកល

ចូរត្រេកអរសប្បាយចំពោះស្នាព្រះហស្តដ៏អស្ចារ្យរបស់ព្រះអម្ចាស់ ដ្បិតព្រះអង្គបានប្រោសប្រទានឱ្យយើងមានក្តីសង្ឃឹម ដោយសារកំណើតព្រះបុត្រាព្រះអង្គ។ ចូរយើងស្រែកហ៊ោឡើង ដោយអំណរសប្បាយយ៉ាងក្រៃលែងថា ៖

បន្ទរ៖ សូមលើកតម្កើងសិរីរុងរឿងរបស់ព្រះជាម្ចាស់ នៅស្ថានដ៏ខ្ពង់ខ្ពស់បំផុត !

ដោយរួមជាមួយពួកទេវទូត ពួកអយ្យកោ និងពួកព្យាការី
—យើងខ្ញុំសូមកោតសរសើរព្រះអម្ចាស់។ (បន្ទរ)

រួមជាមួយព្រះនាងម៉ារី ជាព្រហ្មចារិនី និងជាមាតាព្រះជាម្ចាស់
—សត្វលោកទាំងមូល សូមប្រកាសពីភាពឧដុង្គឧត្តមរបស់ព្រះអម្ចាស់។ (បន្ទរ)

រួមជាមួយក្រុមគ្រីស្តទូត និងអ្នកប្រកាសដំណឹងល្អ
—យើងខ្ញុំសូមអរព្រះគុណព្រះអម្ចាស់។ (បន្ទរ)

រួមជាមួយនឹងមរណសាក្សីដ៏វិសុទ្ធទាំងឡាយ
—យើងខ្ញុំសូមថ្វាយរូបកាយរបស់យើងខ្ញុំទៅព្រះអង្គ ដូចជាជនរងគ្រោះដែលឧទ្ទិសខ្លួនថ្វាយ។ (បន្ទរ)

រួមជាមួយសាក្សីដ៏វិសុទ្ធទាំងឡាយនៅក្នុងព្រះសហគមន៍
—យើងខ្ញុំសូមថ្វាយការរស់នៅរបស់យើងខ្ញុំចំពោះព្រះអង្គ ក្នុងជំនឿដ៏ជ្រាលជ្រៅបំផុត។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់អើយ ! ដោយសារព្រះបុត្រាដ៏ជាទីស្រឡាញ់ប្រសូតជាមនុស្ស ពន្លឺដ៏ត្រចះត្រចង់របស់ព្រះអង្គបានបំភ្លឺដល់មនុស្សគ្រប់ជាតិសាសន៍។ សូមព្រះអង្គមេត្តាប្រោសឲ្យយើងខ្ញុំទទួលសិរីរុងរឿងរបស់ព្រះគ្រីស្ត ដែលជាពន្លឺមិនចេះរលត់។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ
និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។