រដូវធម្មតា សប្តាហ៍ទី២០ ថ្ងៃព្រហស្បតិ៍
សន្តប៊ែរណា ជាចៅអធិការ និងគ្រូបាធ្យាយនៃព្រះសហគមន៍
(បុណ្យរំឭកចាំបាច់)
(ពេលព្រឹក)
ការអញ្ជើញមុនអធិដ្ឋាននៅពេលព្រឹក
-
ឱព្រះអម្ចាស់អើយ! សូមបើកបបូរមាត់របស់ទូលបង្គំ
សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។
បន្ទរ៖ ចូរនាំគ្នាចូលមកជិតព្រះអង្គដោយច្រៀងយ៉ាងសប្បាយ!
ទំនុកតម្កើងតាមការជ្រើសរើស
***
ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)
ចម្រៀងចូល (សូមជ្រើសរើសបទចម្រៀងមួយ)
ទំនុកតម្កើងលេខ ១៤៣,១-១១
ពាក្យអធិដ្ឋាននៅពេលមានទុក្ខព្រួយ
ព្រះជាម្ចាស់ពុំប្រោសមនុស្សឱ្យសុចរិត ដោយការប្រព្រឹត្តតាមវិន័យទេ គឺសុចរិតដោយសារជំនឿលើព្រះយេស៊ូគ្រីស្តវិញ (កាឡ ២,១៦)។
បន្ទរទី១ ៖ សូមសម្ដែងឱ្យទូលបង្គំស្គាល់ព្រះហឫទ័យមេត្តាករុណារបស់ព្រះអង្គតាំងពីព្រលឹម។
| ១ | ឱព្រះអម្ចាស់អើយ សូមព្រះអង្គព្រះសណ្ដាប់ពាក្យអធិស្ឋានរបស់ទូលបង្គំផង សូមផ្ទៀងព្រះកាណ៌ស្ដាប់ពាក្យទទូចអង្វររបស់ទូលបង្គំ! សូមឆ្លើយតបមកទូលបង្គំ ដោយព្រះហឫទ័យសុចរិតដ៏ស្មោះស្ម័គ្ររបស់ព្រះអង្គ។ |
| ២ | សូមកុំយកទូលបង្គំដែលជាអ្នកបម្រើរបស់ព្រះអង្គទៅកាត់ក្តីឡើយ ដ្បិតគ្មានមនុស្សណាម្នាក់សុចរិតនៅចំពោះព្រះភក្ត្ររបស់ព្រះអង្គទេ។ |
| ៣ | ខ្មាំងសត្រូវតាមយាយីទូលបង្គំ គេជាន់ឈ្លីជីវិតទូលបង្គំ គេយកទូលបង្គំទៅឃុំទុកក្នុងទីងងឹត ដូចមនុស្សស្លាប់តាំងពីយូរមកហើយ។ |
| ៤ | ទូលបង្គំបាក់ទឹកចិត្តជាខ្លាំង ទូលបង្គំទាល់គំនិត។ |
| ៥ | ទូលបង្គំនឹកទៅដល់ជំនាន់ដើម ទូលបង្គំសញ្ជឹងគិតអំពីកិច្ចការទាំងប៉ុន្មានដែលព្រះអង្គបានធ្វើ ទូលបង្គំពិចារណាអំពីស្នាព្រះហស្ដរបស់ព្រះអង្គ។ |
| ៦ | ទូលបង្គំលើកដៃអង្វរព្រះអង្គ ទូលបង្គំនៅចំពោះព្រះភក្ត្ររបស់ព្រះអង្គ ប្រៀបដូចជាដីហួតហែង។ |
| ៧ | ឱព្រះអម្ចាស់អើយ សូមឆ្លើយតបមកទូលបង្គំជាប្រញាប់ ដ្បិតទូលបង្គំពុំអាចទ្រាំតទៅទៀតទេ! សូមកុំលាក់ព្រះភ័ក្ត្រនឹងទូលបង្គំឡើយ ដ្បិតទូលបង្គំដូចជាមនុស្សធ្លាក់ក្នុងរណ្ដៅ។ |
| ៨ | សូមសម្ដែងឱ្យទូលបង្គំស្គាល់ព្រះហឫទ័យមេត្តាករុណារបស់ព្រះអង្គតាំងពីព្រលឹម ដ្បិតទូលបង្គំផ្ញើជីវិតលើព្រះអង្គហើយ។ សូមប្រោសប្រទានឱ្យទូលបង្គំស្គាល់ផ្លូវដែលទូលបង្គំត្រូវដើរ ដ្បិតទូលបង្គំផ្ចង់ចិត្តទៅរកព្រះអង្គ។ |
| ៩ | ឱព្រះអម្ចាស់អើយ សូមរំដោះទូលបង្គំឱ្យរួចពីខ្មាំងសត្រូវ ទូលបង្គំមកជ្រកកោននៅក្បែរព្រះអង្គ។ |
| ១០ | សូមបង្រៀនទូលបង្គំឱ្យធ្វើតាមព្រះហឫទ័យរបស់ព្រះអង្គ ដ្បិតព្រះអង្គជាព្រះនៃទូលបង្គំ សូមព្រះវិញ្ញាណដ៏សប្បុរសរបស់ព្រះអង្គដឹកនាំទូលបង្គំ ឱ្យដើរក្នុងមាគ៌ាដែលគ្មានឧបសគ្គ។ |
| ១១ | ឱព្រះអម្ចាស់អើយ សូមប្រទានឱ្យទូលបង្គំមានជីវិតឡើងវិញ ដោយយល់ដល់ព្រះនាមរបស់ព្រះអង្គ។ សូមនាំទូលបង្គំចេញពីភាពអាសន្ន ដោយព្រះហឫទ័យដ៏សុចរិតរបស់ព្រះអង្គ! |
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!
បន្ទរ ៖ សូមសម្ដែងឱ្យទូលបង្គំស្គាល់ព្រះហឫទ័យមេត្តាករុណារបស់ព្រះអង្គតាំងពីព្រលឹម។
បទលើកតម្កើងតាមព្យាការីអេសាយ (អស ៦៦,១០-១៤ក)
អំណរសប្បាយនៃស្ថានបរមសុខ
រីឯក្រុងយេរូសាឡឹមនៅស្ថានលើវិញ គឺស្ត្រីអ្នកជាដែលជាមាតារបស់យើងហ្នឹងហើយ (កាឡ ៤,២៦)។
បន្ទរទី២ ៖ ព្រះអម្ចាស់មានព្រះបន្ទូលថា: យើងនឹងឱ្យសេចក្ដីសុខសាន្តហូរមកក្រុងនេះ ដូចទឹកទន្លេ។
(បទកាកគតិ)
| ១០- | ឱអ្នកទាំងអស់ | ដែលស្រឡាញ់ស្មោះ | យេរូសាឡឹម |
| ចូរអរសប្បាយ | ទាំងក្តីសង្ឃឹម | គ្រប់គ្នាញញឹម | |
| កុំបីសៅហ្មង | ។ | ||
| អស់អ្នកកាន់ទុក្ខ | អាណិតមុខជ្រប់ | ដល់ក្រុងនេះផង | |
| ចូរអរសប្បាយ | រីករាយវិញម្តង | រួមជាមួយក្រុង | |
| សាឡឹមនេះដែរ | ។ | ||
| ១១- | សូមគ្រប់កាយា | ស្កប់ក្នុងចិន្តា | បានសុខល្ហើយល្ហែ |
| ដូចកូនដែលម្តាយ | បីបមថ្នមថែ | បំបៅនៅក្បែរ | |
| គ្មានពេលឃ្លាឃ្លាត | ។ | ||
| អ្នករាល់គ្នានឹង | បានសុខថ្កុំថ្កើង | ឥតបីរវាត | |
| រុងរឿងសិរី | ដោយក្រុងនេះទៀត | អស់ទាំងមិត្តញាតិ | |
| បានសុខគ្រប់គ្រា | ។ | ||
| ១២- | ដ្បិតព្រះអម្ចាស់ | មានបន្ទូលច្បាស់ | ថានឹងបង្ហៀរ |
| សេចក្តីសុខសាន្ត | លើក្រុងអ្នកជា | ដូចទន្លេហៀរ | |
| ទឹកធ្លាក់មិនដាច់ | ។ | ||
| យើងនឹងបង្ហូរ | ធនធានបរិបូណ៌ | មកឯងឥតភ្លេច | |
| របស់ជនជាតិ | ដទៃជាស្រេច | ឥតមានកែគេច | |
| ដូចទឹកលិចច្រាំង | ។ | ||
| យើងនឹងថ្នមថ្នាក់ | ទៅដល់អស់អ្នក | ដូចម្តាយទូទាំង | |
| បីបមថ្នមកូន | បំបៅគ្របបាំង | ក្រសោបព្រមទាំង | |
| លើកដាក់លើភ្លៅ | ។ | ||
| ១៣- | ម្តាយតែងថ្នាក់ថ្នម | កូនដោយបីបម | មិនឱ្យអាស្រូវ |
| ដូចយើងថ្នមថ្នាក់ | អ្នកឱ្យស្ថិតនៅ | ក្នុងក្រុងតទៅ | |
| លែងមានព្រាត់ប្រាស | ។ | ||
| ១៤- | កាលណាឃើញក្រុង | យេរូសាឡឹម | សុខសាន្តដូច្នេះ |
| អ្នករាល់គ្នានឹង | សប្បាយពេកណាស់ | សាច់ឈាមថ្លាស្រស់ | |
| ដូចស្មៅខៀវខ្ចី | ។ | ||
| សូមកោតសរសើរ | ដល់ព្រះបិតា | ព្រះរាជ្យបុត្រា | |
| និងព្រះវិញ្ញាណ | ជាព្រះត្រៃអង្គ | ថ្កើងថ្កានឥតហ្មង | |
| ដែលគង់ជានិច្ច | ។ |
បន្ទរ ៖ ព្រះអម្ចាស់មានព្រះបន្ទូលថា: យើងនឹងឱ្យសេចក្ដីសុខសាន្តហូរមកក្រុងនេះ ដូចទឹកទន្លេ។
ទំនុកតម្កើងលេខ ១៤៧,១-១១
ព្រះហឫទ័យសប្បុរសរបស់ព្រះជាម្ចាស់អាចសម្រេចគ្រប់កិច្ចការទាំងអស់
ព្រះអង្គជាព្រះជាម្ចាស់ យើងខ្ញុំសូមកោតសរសើរព្រះអង្គ!
ព្រះអង្គជាព្រះអម្ចាស់ យើងខ្ញុំសូមអបអរសាទរព្រះអង្គ!
បន្ទរទី៣ ៖ ចូរយើងនាំគ្នាលើកតម្កើងព្រះអម្ចាស់ !
| ១ | អាលេលូយ៉ា! ស្មូតទំនុកតម្កើងថ្វាយព្រះនៃយើង ជាការល្អប្រពៃណាស់ សរសើរតម្កើងព្រះអង្គជាការមួយដ៏សប្បាយ ហើយប្រសើរបំផុត។ |
| ២ | ព្រះអម្ចាស់សង់ក្រុងយេរូសាឡឹមឡើងវិញ ព្រះអង្គនាំជនជាតិអ៊ីស្រាអែលដែលខ្ចាត់ខ្ចាយឱ្យត្រឡប់មកវិញ។ |
| ៣ | ព្រះអង្គប្រោសអ្នកដែលមានចិត្តគ្រាំគ្រាឱ្យបានធូរស្បើយ ព្រះអង្គរុំរបួសឱ្យគេ។ |
| ៤ | ព្រះអង្គរាប់ចំនួនផ្កាយទាំងប៉ុន្មាន ហើយព្រះអង្គដាក់ឈ្មោះឱ្យផ្កាយទាំងនោះ។ |
| ៥ | ព្រះរបស់យើងធំឧត្តុង្គឧត្ដម ព្រះអង្គមានព្រះចេស្ដាដ៏ខ្លាំងបំផុត ព្រះតម្រិះរបស់ព្រះអង្គឥតមានព្រំដែនឡើយ។ |
| ៦ | ព្រះអម្ចាស់ជួយគាំទ្រជនក្រីក្រ តែព្រះអង្គបន្ទាបមនុស្សអាក្រក់ដល់ដី។ |
| ៧ | ចូរនាំគ្នាច្រៀងអរព្រះគុណព្រះអម្ចាស់ ចូរស្មូតទំនុកតម្កើងថ្វាយព្រះនៃយើង ទាំងដេញពិណកំដរផង! |
| ៨ | ព្រះអង្គធ្វើឱ្យមានពពកបាំងបិទផ្ទៃមេឃ ព្រះអង្គរៀបចំឱ្យមានភ្លៀងធ្លាក់មកលើផែនដី ព្រះអង្គធ្វើឱ្យមានស្មៅដុះនៅតាមភ្នំ |
| ៩ | ព្រះអង្គប្រទានចំណីដល់សត្វពាហនៈ ហើយពេលកូនក្អែកយំ ព្រះអង្គក៏ប្រទានចំណីដល់វាដែរ។ |
| ១០ | ព្រះអង្គមិនសព្វព្រះហឫទ័យនឹងកម្លាំងរបស់សេះទេ ហើយព្រះអង្គក៏មិនរវីរវល់នឹងកម្លាំងកាយរបស់មនុស្សដែរ |
| ១១ | តែព្រះអង្គគាប់ព្រះហឫទ័យនឹងអស់អ្នកដែលគោរពកោតខ្លាចព្រះអង្គ គឺអស់អ្នកដែលផ្ញើជីវិតលើព្រះហឫទ័យមេត្តាករុណារបស់ព្រះអង្គ។ |
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!
បន្ទរ ៖ ចូរយើងនាំគ្នាលើកតម្កើងព្រះអម្ចាស់ !
ព្រះបន្ទូលរបស់ព្រះជាម្ចាស់ (រ៉ូម ៨,១៨-២១)
ខ្ញុំយល់ឃើញថា ទុក្ខលំបាកនាបច្ចុប្បន្នកាល ពុំអាចប្រៀបផ្ទឹមនឹងសិរីរុងរឿង ដែលព្រះជាម្ចាស់សម្ដែងឱ្យយើងឃើញ នៅអនាគតកាលនោះឡើយ។ អ្វីៗសព្វសារពើដែលព្រះអង្គបង្កើតមក កំពុងតែអន្ទះអន្ទែង ទន្ទឹងរង់ចាំពេលដែលព្រះជាម្ចាស់នឹងបង្ហាញបុត្រធីតារបស់ព្រះអង្គ ដ្បិតអ្វីៗទាំងអស់នោះបែរទៅជាឥតន័យ តែមិនមែនដោយចិត្តឯងទេ គឺព្រះជាម្ចាស់បានតម្រូវដូច្នេះ។ ពិភពលោកនៅតែមានសង្ឃឹមថា ព្រះអង្គនឹងលោះឱ្យរួចផុតពីវិនាសអន្តរាយ ដើម្បីឱ្យមានសេរីភាព និងសិរីរុងរឿងនៃបុត្រធីតារបស់ព្រះជាម្ចាស់។
បន្ទរ៖ ទូលបង្គំស្រែកអង្វរព្រះអង្គ *តាំងពីមុនថ្ងៃរះទៅទៀត។ បន្ទរឡើងវិញ៖…
-ព្រះអង្គតែងតែសង្រ្គោះទូលបង្គំជានិច្ច។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…
ទំនុកតម្កើងរបស់លោកសាការី
បន្ទរ ៖ ឱសន្តប៊ែរណាដ៏មានសុភមង្គល ! ជីវិតរបស់លោកពោរពេញដោយសិរីរុងរឿងនៃព្រះបន្ទូលរបស់ព្រះជាម្ចាស់ សូមបំភ្លឺព្រះសហគមន៍រួមជាមួយ នឹងជំនឿ និងលទ្ធិដ៏ពិតប្រាកដ។
ពាក្យអង្វរសកល
ចូរយើងទូលអង្វរព្រះជាម្ចាស់ ដែលប្រទានការសង្រ្គោះមកឱ្យប្រជារាស្ត្ររបស់ព្រះអង្គ ៖
បន្ទរ៖ ឱព្រះអម្ចាស់អើយ ! ព្រះអង្គជាជីវិតរបស់យើងខ្ញុំ។
សូមលើកតម្កើងព្រះជាម្ចាស់ ជាព្រះបិតារបស់ព្រះយេស៊ូគ្រីស្តជាអម្ចាស់ ដោយព្រះហឫទ័យមេត្តាករុណារបស់ព្រះអង្គ យើងខ្ញុំត្រឡប់មករស់នៅក្នុងជីវិត ដោយមានសេចក្តីសង្ឃឹមឡើងវិញ
—ដោយសារព្រះយេស៊ូគ្រីស្តមានព្រះជន្មរស់ឡើងវិញ។ (បន្ទរ)
ព្រះអង្គបានបង្កើតមនុស្សជារូបតំណាងរបស់ព្រះអង្គ ហើយព្រះអង្គបានបង្កើតគេសាជាថ្មីនៅក្នុងអង្គព្រះគ្រីស្ត
—សូមព្រះអង្គសូនយើងខ្ញុំឱ្យមានលក្ខណៈដូចព្រះបុត្រារបស់ព្រះអង្គផង។ (បន្ទរ)
សូមព្រះអង្គចាក់បង្ហូរសេចក្តីស្រឡាញ់របស់ព្រះអង្គ តាមរយៈព្រះវិញ្ញាណដ៏វិសុទ្ធ
—សូមព្រះអង្គព្យាបាលរបួសដែលមាននៅក្នុងដួងចិត្តយើងខ្ញុំ ដោយសារតែការស្អប់ខ្ពើម និងច្រណែនឈ្នានីសផង។ (បន្ទរ)
នៅថ្ងៃនេះ សូមព្រះអង្គប្រទានឱ្យកម្មករមានការងារធ្វើ ឱ្យអ្នកស្រេកឃ្លានមានអាហារបរិភោគ និងឱ្យអ្នកកើតទុក្ខព្រួយ មានអំណរសប្បាយវិញ
—សូមព្រះអង្គប្រទានព្រះអំណោយទាន និងការប្រោសលោះដល់មនុស្សទាំងឡាយផង។ (បន្ទរ)
ធម៌ “ឱព្រះបិតា”
ពាក្យអធិដ្ឋាន
ឱព្រះជាម្ចាស់អើយ ! ព្រះអង្គសព្វព្រះហឫទ័យឱ្យសន្តប៊ែរណា មានចិត្តឆេះឆួលស្រឡាញ់ព្រះដំណាក់ព្រះអង្គ និងធ្វើជាពន្លឺបំភ្លឺព្រះសហគមន៍។ តាមរយៈពាក្យទូលអង្វររបស់លោក សូមព្រះអង្គមេត្តាប្រោសឱ្យយើងខ្ញុំមានចិត្តស្រឡាញ់ព្រះអង្គយ៉ាងខ្លាំង និងប្រព្រឹត្តអ្វីៗទាំងអស់ក្នុងឋានៈជាបុត្រធីតាពោរពេញដោយពន្លឺ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!
ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង។
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។