១៧ ឧសភា ២០២៦

Written on 10/02/2026

Mary Siya Khim

បុណ្យព្រះអម្ចាស់យេស៊ូយាងឡើងស្ថានបរមសុខ

(បុណ្យឱឡារិក)

(ពេលព្រឹក)

ការអញ្ជើញមុនអធិដ្ឋាននៅពេលព្រឹក

ឱព្រះអម្ចាស់អើយ! សូមបើកបបូរមាត់របស់ទូលបង្គំ
សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ អាលេលូយ៉ា! សូមអញ្ជើញមក យើងនាំគ្នាឱនកាយក្រាបថ្វាយបង្គំព្រះគ្រីស្តជាអម្ចាស់ ដែលយាងឡើងស្ថានបរមសុខ អាលេលូយ៉ា!

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៦៣,២-៩

ព្រលឹងខ្ញុំស្រេកឃ្លានព្រះជាម្ចាស់

អ្នកណាដែលបានលះបង់ភាពងងឹតនៃអំពើបាប អ្នកនោះស្រេកឃ្លានព្រះជាម្ចាស់។

បន្ទរទី១៖ «អ្នកស្រុកកាលី‌ឡេអើយ ! ហេតុដូចម្ដេចបានជាអ្នករាល់គ្នានៅតែឈរសម្លឹងមើលទៅលើមេឃដូច្នេះ? ។ ព្រះ‌យេស៊ូនោះ ព្រះ‌ជាម្ចាស់បានលើកពីកណ្ដាលចំណោមអ្នករាល់គ្នា ឡើងទៅស្ថានបរម‌សុខហើយ ព្រះ‌អង្គនឹងយាងត្រឡប់មកវិញ តាមរបៀបដូចដែលអ្នករាល់គ្នាបានឃើញព្រះ‌អង្គយាងឡើងទៅស្ថានបរម‌សុខដែរ» អាលេលូយ៉ា!

២	ឱព្រះជាម្ចាស់អើយ! ព្រះអង្គពិតជាព្រះនៃទូលបង្គំមែន ទូលបង្គំស្វែងរកព្រះអង្គ ទូលបង្គំចង់នៅក្បែរព្រះអង្គណាស់ ទូលបង្គំចង់នៅជាប់ជាមួយព្រះអង្គ ដូចដីដ៏ស្ងួតបែកក្រហែងត្រូវការទឹក។
៣	ទូលបង្គំបានឃើញព្រះអង្គនៅក្នុងទីសក្ការៈ ទូលបង្គំបានឃើញឫទ្ធានុភាព និងសិរីរុងរឿងរបស់ព្រះអង្គ
៤	ដ្បិតព្រះហឫទ័យមេត្តាករុណារបស់ព្រះអង្គ ប្រសើរលើសជីវិតទៅទៀត ទូលបង្គំនឹងពោលពាក្យសរសើរតម្កើងសិរីរុងរឿងរបស់ព្រះអង្គ។
៥	ទូលបង្គំនឹងអរព្រះគុណព្រះអង្គអស់មួយជីវិតទូលបង្គំ ហើយទូលបង្គំនឹងលើកដៃឡើងថ្វាយបង្គំព្រះនាមព្រះអង្គ។
៦	ទូលបង្គំនឹងបានសប្បាយ មានសុខដុមរមនា ហើយទូលបង្គំនឹងបន្លឺសំឡេងឡើង ច្រៀងសរសើរតម្កើងព្រះអង្គ។
៧	ពេលទូលបង្គំចូលដំណេក ទូលបង្គំនឹកដល់ព្រះអង្គ ហើយពេញមួយយប់ ទូលបង្គំនឹកគិតដល់ព្រះអង្គ
៨	ដ្បិតព្រះអង្គជួយទូលបង្គំ ទូលបង្គំច្រៀងយ៉ាងសប្បាយក្រោមម្លប់បារមីព្រះអង្គ។
៩	ចិត្តគំនិតទូលបង្គំនៅជាប់ជំពាក់ចិត្តគំនិតនឹងព្រះអង្គជានិច្ច ព្រះអង្គគាំទ្រទូលបង្គំ ដោយព្រះចេស្តារបស់ព្រះអង្គ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ «អ្នកស្រុកកាលី‌ឡេអើយ ! ហេតុដូចម្ដេចបានជាអ្នករាល់គ្នានៅតែឈរសម្លឹងមើលទៅលើមេឃដូច្នេះ? ។ ព្រះ‌យេស៊ូនោះ ព្រះ‌ជាម្ចាស់បានលើកពីកណ្ដាលចំណោមអ្នករាល់គ្នា ឡើងទៅស្ថានបរម‌សុខហើយ ព្រះ‌អង្គនឹងយាងត្រឡប់មកវិញ តាមរបៀបដូចដែលអ្នករាល់គ្នាបានឃើញព្រះ‌អង្គយាងឡើងទៅស្ថានបរម‌សុខដែរ» អាលេលូយ៉ា!

បទលើកតម្កើងតាមព្យាការីដានីអែល (ដន ៣,៥៧-៨៨)

ចូរគ្រប់ស្នាព្រះហស្ថទាំងអស់ សរសើរតម្កើងព្រះអម្ចាស់!

អ្នករាល់គ្នាជាអ្នកបម្រើព្រះជាម្ចាស់ ចូរសរសើរតម្កើងព្រះអង្គ (វវ ១៩,៥)។

បន្ទរទី២៖ ចូរលើកតម្កើងសិរីរុងរឿងរបស់ព្រះជាម្ចាស់ ព្រះអង្គជាព្រះមហាក្សត្រធំលើសមហាក្សត្រនានា ចូរច្រៀងកោតសរសើរព្រះអង្គ អាលេលូយ៉ា!

៥៧-	គ្រប់ស្នាព្រះហស្ត	ព្រះម្ចាស់ទាំងអស់	នៅមិនរបូត
	ជារៀងដរាប	សូមនាំគ្នាស្មូត	តម្កើងរហូត
		អស់កល្បអន្លាយ	។
៥៨-	ឱផ្ទៃមេឃអើយ	កុំនៅកន្តើយ	ហាក់ដូចជិនណាយ
	ស្មូតបទតម្កើង	ដោយចិត្តសប្បាយ	អស់កល្បអន្លាយ
		តទៅកុំឈប់	។
៥៩-	សូមឱ្យទេវទូត	តម្កើងរហូត	ទាំងថ្ងៃទាំងយប់
	ព្រះម្ចាស់ថ្កុំថ្កើង	អស់កល្បអស់កប្ប	តម្កើងកុំឈប់
		តទៅរាល់ថ្ងៃ	។
៦០-	ចូរទឹកទាំងឡាយ	អបអរសប្បាយ	លើនភាល័យ
	នាំគ្នាសរសើរ	តម្កើងម្ចាស់ថ្លៃ	កុំបង្អង់អី
		អស់កល្បអង្វែង	។
៦១-	ហ្វូងតារារះ	នៃព្រះអម្ចាស់	នាំគ្នាសម្ដែង
	តម្កើងព្រះអង្គ	សរសើរស្ញប់ស្ញែង	គ្រប់ទីកន្លែង
		តទៅឥតដាច់	។
៦២-	សូមព្រះអាទិត្យ	ព្រះចន្ទមានឫទ្ធិ	ពន្លឺចិញ្ចាច
	តម្កើងព្រះអង្គ	ដោយចិត្តអង់អាច	កុំភ័យកុំខ្លាច
		តទៅកុំប្រែ	។
៦៣-	សូមអស់ទាំងផ្កាយ	ដែលនៅរាត់រាយ	លើមេឃផងដែរ
	សរសើរតម្កើង	កុំបីប្រួលប្រែ	កុំក្រឡះកែ
		រាល់ថ្ងៃខែឆ្នាំ	។
៦៤-	សូមឱ្យសន្សើម	ទឹកភ្លៀងដ៏ឆ្នើម	ធ្លាក់ជាប្រចាំ
	ចូរលើកតម្កើង	ទាំងថ្វាយបង្គំ	ព្រះម្ចាស់ឧត្តម
		ជានិច្ចកុំរា	។
៦៥-	ចូរអស់ទាំងខ្យល់	ធ្លាប់បក់វិលវល់	រាល់ប្រាំងវស្សា
	គ្រប់ទីកន្លែង	តម្កើងព្រះជា	ម្ចាស់អ្នករាល់គ្នា
		កុំបីឆ្មៃឆ្មើង	។
៦៦-	ចូរឱ្យកម្ដៅ	ទាំងក្នុងទាំងក្រៅ	ឱ្យមានទាំងភ្លើង
	នាំគ្នាជួយលើក	សរសើរតម្កើង	ព្រះអង្គខ្ពស់ឡើង
		តទៅឥតអាក់	។
៦៧-	ចូរឱ្យខ្យល់ក្តៅ	ពេលនេះតទៅ	និងខ្យល់ត្រជាក់
	សរសើរតម្កើង	ព្រះជាម្ចាស់អ្នក	កុំបីអន់អាក់
		ជានិច្ចតទៅ	។
៦៨-	សន្សើមនិងព្រឹល	សូមអ្នកកុំខ្ជិល	កុំបង្អង់នៅ
	ស្មូតបទតម្កើង	ព្រះម្ចាស់ជាផ្លូវ	អង្វែងតទៅ
		អស់កល្បជានិច្ច	។
៦៩-	ចូរថ្ងៃនិងយប់	កោតកុំឈរឈប់	សរសើរកុំភ្លេច
	ស្មូតបទតម្កើង	ព្រះម្ចាស់ជានិច្ច	កុំបីកែគេច
		អស់កល្បស្ថេរស្ថិត	។
៧០-	ចូរឱ្យពន្លឺ	រន្ទាលរន្ទឺ	និងភាពងងឹត
	សរសើរតម្កើង	អម្ចាស់មានឫទ្ធិ	រាល់ថ្ងៃកុំគិត
		ខ្វល់ខ្វាយឡើយណា	។
៧១-	អាកាសត្រជាក់	ខ្យល់រងាធ្លាក់	មកជាធម្មតា
	ចូរលើកតម្កើង	ព្រះអម្ចាស់ជា	ព្រះអ្នករាល់គ្នា
		កុំបីឃ្លាងឃ្លាត	។
៧២-	សូមឱ្យទឹកកក	កុំបីខានខក	ទាំងសន្សើមទៀត
	ចូរលើកតម្កើង	កុំបីរវាត	កុំឱ្យឃ្លាងឃ្លាត
		រហូតតទៅ	។
៧៣-	សូមដុំពពក	ផ្លេកបន្ទោរមក	កុំបង្អង់នៅ
	តម្កើងព្រះអង្គ	កុំបីហ្មងសៅ	ស្មូតរហូតទៅ
		អស់កល្បយូរលង់	។
៧៤-	សូមឱ្យផែនដី	ទាំងមូលលកលៃ	តម្កើងព្រះអង្គ
	សរសើរកុំឈប់	កុំនៅរេរង់	កោតសរសើរទ្រង់
		កុំប្រែសាវា	។
៧៥-	សូមឱ្យភ្នំធំ	កុំនៅសំងំ	ភ្នំតូចផងណា
	ស្មូតបទតម្កើង	ព្រះម្ចាស់រាល់គ្នា	ថ្កើងព្រះនាមា
		អស់កល្បជានិច្ច	។
៧៦-	សព្វអស់អ្វីៗ	ដែលដុះលើដី	កុំបីមានភ្លេច
	ចូរលើកតម្កើង	ព្រះម្ចាស់ជានិច្ច	កុំបីកែគេច
		អស់កល្បអន្លាយ	។
៧៧-	ចូរសមុទ្រស្ទឹង	ទន្លេល្វើយល្វឹង	តូចធំទាំងឡាយ
	នាំគ្នាតម្កើង	ដោយក្តីរីករាយ	សរសើរម្ចាស់ថ្លៃ
		ឱ្យលាន់រងំ	។
៧៨-	ចូរប្រភពទឹក	មានច្រើនសន្ធឹក	ព្រែកទាំងតូចធំ
	ទឹកហូរពីជ្រោះ	ទឹកធ្លាក់ពីភ្នំ	កុំនៅសំងំ
		តម្កើងព្រះអង្គ	។
៧៩-	ចូរអស់ទាំងត្រី	តូចធំម្តេចក្តី	និងសត្វរស់ក្នុង
	ទន្លេសមុទ្រ	តាមព្រែកបួរបឹង	កុំសំងំឈឹង
		តម្កើងព្រះម្ចាស់	។
៨០-	សូមបក្សីសត្វ	ដែលរស់ខ្វែងខ្វាត់	ច្រើនមីរដេរដាស
	ស្មូតបទតម្កើង	ព្រះជាអម្ចាស់	កុំបីចន្លោះ
		អស់កល្បយូរលង់	។
៨១-	សូមឱ្យសត្វស្រុក	រស់នៅអែអុក	ទាំងសត្វព្រៃផង
	នាំគ្នាសរសើរ	តម្កើងព្រះអង្គ	អស់កល្បយូរលង់
		តទៅអន្លាយ	។
៨២-	ចូរឱ្យមនុស្ស	ទាំងស្រីទាំងប្រុស	កុំបីឃ្លាតឆ្ងាយ
	សរសើរព្រះអង្គ	ជាព្រះម្ចាស់ថ្លៃ	រៀងរាល់យប់ថ្ងៃ
		កុំបីអល់អែក	។
៨៣-	ឱអ៊ីស្រាអែល	អ្នកជាជាតិដែល	វិសុទ្ធពន់ពេក
	ចូរលើកតម្កើង	ព្រះខ្ពស់អនេក	ហួសទាំងផ្ទៃមេឃ
		កុំសំងំនៅ	។
៨៤-	អស់បូជាចារ្យ	ទាំងឡាយនាំគ្នា	ឆ្ពោះតម្រង់ទៅ
	តម្កើងព្រះអង្គ	ទាំងថ្ងៃយប់ជ្រៅ	កុំសំងំនៅ
		សរសើរកុំឈប់	។
៨៥-	ចូរអ្នកទាំងឡាយ	ដែលតែងខ្វល់ខ្វាយ	បម្រើគោរព
	ស្មូតតម្កើងព្រះ	ទាំងថ្ងៃទាំងយប់	កុំឈរកុំឈប់
		នៅស្ងៀមឱ្យសោះ	។
៨៦-	ចូរវិញ្ញាណក្ខ័ន្ធ	អ្នកស្លាប់ប៉ុន្មាន	កុំបីចន្លោះ
	ព្រលឹងនៃអ្នក	សុចរិតទាំងអស់	តម្កើងដោយស្មោះ
		កុំនៅកន្តើយ	។
៨៧-	អស់អ្នកគោរព	ប្រណិប័តន៍គ្រប់	ព្រះអម្ចាស់អើយ
	និងអ្នកដាក់ចិត្ត	ជាអ្នកខ្សត់ហើយ	កុំបង្អង់ឡើយ
		តម្កើងព្រះអង្គ	។
៨៨-	លោកអណានីយ៉ា	រួមជាមួយគ្នា	អសារីយ៉ាផង
	និងមីកាអែល	តម្កើងព្រះអង្គ	ស្មូតតម្កើងផង
		តទៅដរាប	។
	ព្រះអង្គរំដោះ	យើងខ្ញុំឱ្យរស់	ផុតពីក្តីស្លាប់
	ហើយទ្រង់សង្គ្រោះ	ខ្ញុំជាប្រញាប់	រួចផុតទុក្ខសព្វ
		ទាំងភ្លើងសន្ធៅ	។

បន្ទរ៖ ចូរលើកតម្កើងសិរីរុងរឿងរបស់ព្រះជាម្ចាស់ ព្រះអង្គជាព្រះមហាក្សត្រធំលើសមហាក្សត្រនានា ចូរច្រៀងកោតសរសើរព្រះអង្គ អាលេលូយ៉ា!

ទំនុកតម្កើងលេខ ១៤៩

ចម្រៀងនៃអំណរសប្បាយរបស់សន្តបុគ្គល

ចូរបុត្រធីតាទាំងឡាយនៃព្រះសហគមន៍ ដែលជាប្រជាជនថ្មីរបស់ព្រះជាម្ចាស់ ត្រេកអរសប្បាយចំពោះព្រះគ្រីស្ត ដែលជាស្តេចរបស់ពួកគេ (Hesychius)។

បន្ទរទី៣៖ នៅពេលដែលក្រុមគ្រីស្ដទូតកំពុងតែមើលព្រះអង្គនោះ ព្រះជាម្ចាស់ក៏លើកព្រះ‌អង្គឡើងទៅលើមេឃ ព្រមទាំងមានពពកមកបាំងព្រះ‌អង្គបាត់ពីភ្នែកគេទៅ អាលេលូយ៉ា!

១	ចូរច្រៀងបទថ្មីថ្វាយព្រះ‌អម្ចាស់! ចូរច្រៀងសរសើរព្រះ‌អង្គនៅក្នុងអង្គប្រជុំរបស់អ្នកជឿព្រះ‌អង្គ!
២	ចូរឲ្យជនជាតិអ៊ីស្រា‌អែលរីក‌រាយនឹងព្រះ‌អង្គ ដែលបានបង្កើតគេមក សូមឲ្យប្រជាជនក្រុងស៊ីយ៉ូនមានអំណរសប្បាយ នឹងព្រះ‌មហាក្សត្ររបស់ខ្លួន!
៣	ចូរនាំគ្នារាំសរសើរតម្កើងព្រះ‌អង្គ ចូរនាំគ្នាស្មូត្រទំនុក‌តម្កើងថ្វាយព្រះ‌អង្គ ដោយវាយក្រាប់ និងដេញពិណ!
៤	ដ្បិតព្រះ‌អម្ចាស់គាប់ព្រះ‌ហឫទ័យនឹងប្រជា‌រាស្ដ្ររបស់ព្រះ‌អង្គ ព្រះ‌អង្គលើកកិត្តិយសមនុស្សទន់‌ទាបដោយសង្គ្រោះពួកគេ
៥	ចូរឲ្យអស់អ្នកដែលជឿលើព្រះ‌អង្គនាំគ្នាអរសប្បាយដ៏លើស‌លប់ ដោយលើកតម្កើងសិរី‌រុងរឿងរបស់ព្រះ‌ជាម្ចាស់ សូម្បីតែនៅពេលយប់ ក៏គេស្រែកតម្កើងព្រះ‌អង្គដោយអំណរដែរ!
៦	សូមឲ្យគេសរសើរតម្កើងព្រះ‌អង្គមិនដាច់ពីមាត់ ហើយឲ្យគេកាន់ដាវមុខពីរនៅជាប់នឹងដៃជា‌និច្ច
៧	ដើម្បីសង‌សឹកប្រជា‌ជាតិនានា និងដាក់ទោសជាតិសាសន៍ទាំង‌ឡាយ
៨	ហើយយកច្រវាក់ចងស្តេច និងដាក់ខ្នោះមេដឹកនាំរបស់ពួកគេ។
៩	ការដាក់ទោសសាសន៍ទាំងនោះ ស្របតាមការសម្រេចរបស់ព្រះ‌ជាម្ចាស់នេះហើយ ដែលជាកិត្តិយសដ៏រុង‌រឿងរបស់អស់អ្នកស្មោះ‌ត្រង់នឹងព្រះ‌អង្គ!

បន្ទរ៖ នៅពេលដែលក្រុមគ្រីស្ដទូតកំពុងតែមើលព្រះអង្គនោះ ព្រះជាម្ចាស់ក៏លើកព្រះ‌អង្គឡើងទៅលើមេឃ ព្រមទាំងមានពពកមកបាំងព្រះ‌អង្គបាត់ពីភ្នែកគេទៅ អាលេលូយ៉ា!

ព្រះបន្ទូលរបស់ព្រះជាម្ចាស់ (ហប ១០,១១-១៤)

បូជាចារ្យគ្រប់ៗរូបតែងតែឈរបំពេញមុខងាររបស់ខ្លួនជារៀងរាល់ថ្ងៃ ហើយថ្វាយយញ្ញ‌បូជាដដែលៗជាញឹកញាប់ ជាយញ្ញ‌បូជាដែលពុំអាចដកបាបបានជាដាច់ខាត។ រីឯព្រះ‌គ្រីស្តវិញ បន្ទាប់ពីព្រះ‌អង្គបានថ្វាយយញ្ញ‌បូជាតែមួយ ដើម្បីរំដោះបាបរួចហើយ ព្រះ‌អង្គគង់នៅខាងស្ដាំព្រះ‌ជាម្ចាស់រហូតតទៅ។ ឥឡូវនេះ ព្រះ‌អង្គរង់‌ចាំព្រះ‌ជាម្ចាស់បង្ក្រាបខ្មាំងសត្រូវរបស់ព្រះ‌អង្គ ឱ្យចុះចូលក្រោមព្រះ‌បាទាព្រះ‌អង្គ។ ដោយ‌សារតង្វាយតែមួយគត់ ព្រះ‌គ្រីស្តធ្វើឱ្យអស់អ្នកដែលព្រះ‌អង្គបានប្រោសឱ្យវិសុទ្ធហើយនោះ បានគ្រប់លក្ខណៈរហូតតទៅ។

បន្ទរ៖ ព្រះគ្រីស្តយាងឡើងស្ថានបរមសុខ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះ‌អង្គបាននាំពួកជាប់ជាឈ្លើយទៅជាមួយ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ ខ្ញុំឡើងទៅឯព្រះ‌បិតាខ្ញុំ ដែលជាព្រះ‌បិតារបស់អ្នករាល់គ្នា ខ្ញុំឡើងទៅឯព្រះរបស់ខ្ញុំដែលជាព្រះរបស់អ្នករាល់គ្នាដែរ» អាលេលូយ៉ា!

ពាក្យអង្វរសកល

គេបានលើកព្រះអម្ចាស់ឡើងទៅលើយ៉ាងខ្ពស់ពីផែនដី ហើយព្រះអង្គបានទាញអ្វីៗទាំងអស់មកឯព្រះអង្គ។
ចូរយើងស្រែករកព្រះអង្គ ដោយអំណរសប្បាយថា ៖

បន្ទរ៖ បពិត្រព្រះយេស៊ូជាអម្ចាស់ ! ព្រះអង្គជាព្រះមហាក្សត្រនៃសិរីរុងរឿង !

ឱព្រះយេស៊ូជាអម្ចាស់ ជាព្រះមហាក្សត្រនៃសិរីរុងរឿងអើយ ! ព្រះអង្គបានថ្វាយសក្ការបូជា ដូចជាជនរងគ្រោះសម្រាប់អំពើបាបម្តងជាស្រេច ហើយព្រះអង្គយាងឡើងស្ថានបរមសុខ ទៅគង់ខាងស្តាំព្រះបិតា
—សូមព្រះអង្គធ្វើឱ្យអស់អ្នកដែលព្រះអង្គប្រោសឱ្យវិសុទ្ធ បានគ្រប់លក្ខណ៍រាល់ពេលវេលាផង។ (បន្ទរ)

ព្រះអង្គជាបូជាចារ្យអស់កល្បជានិច្ច និងជាអ្នកបម្រើនៃសម្ពន្ធមេត្រីថ្មី ! ព្រះអង្គមានព្រះជន្មគង់នៅជារៀងរហូត ដើម្បីទូលអង្វរឱ្យយើងខ្ញុំ
—សូមព្រះអង្គជួយសង្រ្គោះប្រជាជនដែលអធិដ្ឋានទៅកាន់ព្រះអង្គផង។ (បន្ទរ)

បពិត្រព្រះយេស៊ូ ! ព្រះអង្គបានបង្ហាញខ្លួនឱ្យក្រុមសាវ័កឃើញព្រះអង្គដែលនៅមានជីវិត អស់រយៈពេលសែសិបថ្ងៃ ក្រោយពីរងទុក្ខលំបាក
—សូមព្រះអង្គបញ្ជាក់ជំនឿរបស់យើងខ្ញុំនៅថ្ងៃនេះ។ (បន្ទរ)

នៅថ្ងៃនេះ ព្រះអង្គមានព្រះបន្ទូលសន្យាថានឹងប្រទានព្រះវិញ្ញាណឱ្យក្រុមគ្រីស្តទូត ដើម្បីឱ្យពួកគេធ្វើជាសាក្សីអំពីព្រះអង្គ រហូតដល់ចុងបំផុតនៃផែនដី
—ដោយសារឫទ្ធានុភាពនៃព្រះវិញ្ញាណដ៏វិសុទ្ធ សូមព្រះអង្គពង្រឹងសក្ខីភាពរបស់យើងខ្ញុំ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ! នៅថ្ងៃនេះ យើងខ្ញុំមានអំណរសប្បាយ ដោយព្រះគ្រីស្តជាព្រះសង្រ្គោះយាងឡើងស្ថានបរមសុខ ដើម្បីរៀបចំកន្លែងឱ្យយើងខ្ញុំ។ សូមព្រះអង្គប្រោសឱ្យយើងខ្ញុំរស់នៅក្នុងលោកនេះ ដោយភ្ជាប់ចិត្តឯស្ថានបរមសុខ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង។
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។