១៤ កញ្ញា ២០២៦

តែ​យើង​ឃើញ​ថា ព្រះយេស៊ូដែល​មាន​ឋានៈ​ទាប​ជាង​ពួក​ទេវទូត​មួយរយៈ ព្រោះ​ព្រះអង្គ​បាន​រង‌ទុក្ខ និង​សោយ​ទិវង្គត​នោះ ឥឡូវ​នេះ ព្រះអង្គ​ទទួល​សិរី‌រុង​រឿង និង​ព្រះកិត្តិនាម​ទុក​ជា​មកុដរាជ្យ។ ដោយសារ​ព្រះហឫទ័យ​ប្រណី‌សន្ដោស​របស់​ព្រះជាម្ចាស់ ព្រះ‌គ្រីស្ត​បាន​សោយ​ទិវង្គត​សម្រាប់​មនុស្ស​គ្រប់ៗ​រូប។ អ្វីៗ​ទាំង​អស់​មាន​ជីវិត​ដោយសារ​ព្រះជាម្ចាស់ និង​សម្រាប់​ព្រះ‌អង្គ ព្រះ‌អង្គ​សព្វ​ព្រះ‌ហឫទ័យ​នឹង​នាំ​បុត្រធីតា​ជា​ច្រើន​ឱ្យ​ទទួល​សិរី‌រុង​រឿង ដូច្នេះ គួរ​គប្បី​ព្រះ‌អង្គ​ប្រោស​ប្រទាន​ឱ្យ​ម្ចាស់​នៃ​ការ​សង្គ្រោះបាន​គ្រប់​លក្ខណៈ ដោយ​រង‌ទុក្ខ​លំបាក។

បន្ទរ៖ ឱព្រះគ្រីស្តអើយ! យើងខ្ញុំសូមលើកតម្កើងព្រះអង្គ *និងកោតសរសើរព្រះអង្គ។ បន្ទរឡើងវិញ៖…
-ព្រះអង្គបានប្រោសលោះពិភពលោក ដោយសារឈើឆ្កាងដ៏វិសុទ្ធរបស់ព្រះអង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖

ចូរយើងទូលអង្វរព្រះគ្រីស្តដោយមានជំនឿចិត្ត ដ្បិតព្រះអង្គបានស៊ូទ្រាំនៅលើឈើឆ្កាង ដើម្បីសង្រ្គោះយើង ៖

បន្ទរ៖ បពិត្រព្រះអម្ចាស់ ! សូមសង្រ្គោះយើងខ្ញុំ ដោយសារឈើឆ្កាងរបស់ព្រះអង្គ !

បពិត្រព្រះបុត្រានៃព្រះជាម្ចាស់ ! ព្រះអង្គបានព្យាបាលប្រជាជនអ៊ីស្រាអែល នៅពេលពួកគេសម្លឹងមើលរូបពស់សំរិទ្ធ
—នៅថ្ងៃនេះ សូមព្រះអង្គការពារយើងខ្ញុំ ឱ្យរួចពីស្នាមរបួសដ៏កាចសាហាវនៃអំពើបាប។ (បន្ទរ)

ឱបុត្រមនុស្សអើយ ! ដូចលោកម៉ូសេលើកពស់ឡើងនៅវាលរហោស្ថានយ៉ាងណា ព្រះអង្គក៏ត្រូវគេលើកឡើងនៅលើឈើឆ្កាង នៅចំពោះមុខប្រជាជាតិទាំងអស់យ៉ាងនោះដែរ
—សូមព្រះអង្គលើកយើងខ្ញុំឡើង ឱ្យចូលរួមក្នុងជ័យជម្នះនៃឈើឆ្កាងរបស់ព្រះអង្គផង។ (បន្ទរ)

ឱព្រះបុត្រាដ៏ជាទីស្រឡាញ់របស់ព្រះបិតា ! ព្រះបិតាបានចាត់ព្រះអង្គឱ្យយាងមកក្នុងពិភពលោក ដើម្បីឱ្យអស់អ្នកជឿលើព្រះអង្គ មិនត្រូវវិនាសឡើយ
—សូមព្រះអង្គប្រោសប្រទានជីវិត ដែលគ្មានទីបញ្ចប់ដល់មនុស្សទាំងអស់ ដែលប្រាថ្នាចង់ឃើញព្រះភក្រ្តព្រះអង្គ ទល់នឹងមុខផង។ (បន្ទរ)

ព្រះបិតាបានចាត់ព្រះអង្គឱ្យមក មិនមែនដើម្បីដាក់ទោសមនុស្ស លោកទេ គឺដើម្បីសង្រ្គោះគេវិញ
—សូមប្រទានជំនឿដល់បងប្អូនយើងខ្ញុំ ហើយសូមព្រះអង្គនាំពួកគេឱ្យទៅកាន់អំណរសប្បាយនៃស្ថានបរមសុខ នៅថ្ងៃចុងក្រោយបំផុតផង។ (បន្ទរ)

ឱព្រះបុត្រាដែលគង់នៅអស់កល្បជានិច្ច ! ព្រះអង្គបានយាងមក ដើម្បីឱ្យភ្លើងឆេះនៅលើផែនដី ហើយព្រះអង្គសព្វព្រះហឫទ័យឱ្យអណ្តាតភ្លើងនោះឆេះ នៅក្នុងដួងចិត្តរបស់មនុស្សទាំងអស់
—តាមរយៈជីវិតដ៏វិសុទ្ធ សូមព្រះអង្គប្រទានឱ្យយើងខ្ញុំចូលរួមចំណែកក្នុងពន្លឺដែលមិនចេះរលត់នៃសិរីរុងរឿងរបស់ព្រះអង្គផង។ (បន្ទរ)

ឱព្រះជាម្ចាស់អើយ ! ព្រះអង្គសព្វព្រះហឫទ័យឱ្យព្រះបុត្រាតែមួយរបស់ព្រះអង្គបូជាព្រះជន្មនៅលើឈើឆ្កាង ដើម្បីសង្គ្រោះមនុស្សគ្រប់ជាតិសាសន៍។ ដូចយើងខ្ញុំបានយល់ពីគម្រោងការដ៏អស្ចារ្យនេះ នៅលើផែនដីយ៉ាងណា សូមព្រះអង្គប្រោសឱ្យយើងខ្ញុំទទួលការសង្គ្រោះ ក្នុងស្ថានបរមសុខយ៉ាងនោះដែរ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង។
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។