១៦ កុម្ភៈ ២០២៧

ថ្ងៃអង្គារ រដូវសែសិបថ្ងៃ សប្តាហ៍ទី០១
ពណ៌ស្វាយ

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! សូមព្រះអង្គទ្រង់ព្រះមេត្តាទតមើលមហាគ្រួសាររបស់ព្រះអង្គផង! សូមទ្រង់ព្រះមេត្តាប្រោសឱ្យការតមរបស់យើងខ្ញុំ ជម្រះចិត្តគំនិតយើងខ្ញុំ សូមឱ្យយើងខ្ញុំប៉ងប្រាថ្នាចង់ស្វែងរកព្រះអង្គ និងគាប់ព្រះហប្ញទ័យព្រះអង្គជានិច្ចផង។

អត្ថបទទី១៖ សូមថ្លែងព្រះគម្ពីរព្យាការីអេសាយ (អស ៥៥,១០-១១)

ព្រះអម្ចាស់មានព្រះបន្ទូលថា៖ «ទឹកភ្លៀង និងទឹកសន្សើមធ្លាក់ពីលើមេឃមកស្រោច​ស្រពផែនដី។ ទឹកទាំងនោះមិនវិលត្រឡប់ទៅវិញ ដរាបណាទាល់តែបានធ្វើឱ្យដំណាំ​ដុះឡើង និងបង្កើតភោគផលផ្តល់ពូជបន្តសម្រាប់អ្នកសាបព្រោះ និងផ្តល់អាហារឱ្យគេបរិភោគ។ រីឯពាក្យរបស់យើងក៏ដូច្នោះដែរ គឺពាក្យដែលចេញពីមាត់របស់យើងនឹងមិន​វិលត្រឡប់មករកយើងវិញ ដរាបណាទាល់តែបាបសម្រេចការ តាមបំណងចិត្តរបស់យើង​ជាមុនសិន គឺបំពេញកិច្ចការដែលយើងចាត់ឱ្យធ្វើមករួចរាល់សព្វគ្រប់។

ទំនុកតម្កើងលេខ ៣៤ (៣៣), ៤-៧.១៦-១៩ បទកាកគតិ

៤	សូមមកប្រកាស	នឹងខ្ញុំឱ្យច្បាស់	ដោយពេលឡើងថា
	ព្រះម្ចាស់ថ្កុំថ្កើង	រុងរឿងក្រៃណា	យើងខ្ញុំគ្នីគ្នា
		តម្កើងព្រះអង្គ	។
៥	ខ្ញុំបានស្វែងរក	ព្រះម្ចាស់តបមក	ឥតមានបង្អង់
	ទ្រង់បានរំដោះ	ខ្ញុំអស់ទុក្ខផង	តក់ស្លុតមួរហ្មង
		ឆ្លងផុតទាំងអស់	។
៦	អ្នកដែលសម្លឹង	ឆ្ពោះទៅព្រះអង្គ	បានសុខឥតមោះ
	ផុតអស់ទុក្ខសោក	វិយោគរងគ្រោះ	ពួកគេទាំងនោះ
		មិនខកចិត្តឡើយ	។
៧	អស់អ្នកកម្សត់	និងមនុស្សទុគ៌ត	គេស្រែកដង្ហោយ
	ហៅរកព្រះម្ចាស់	ទ្រង់សណ្តាប់ហើយ	សង្គ្រោះគេឱ្យ
		ផុតពីគ្រោះកាច	។
១៦	ព្រះម្ចាស់តែងតែ	រំពៃមើលថែ	អស់មនុស្សសុចរិត
	ទ្រង់យកព្រះទ័យ	ទុកដាក់ពិតៗ	ថែទាំនៅជិត
		រាល់ទិនទិវា	។
១៧	ព្រះជាអម្ចាស់	តែងតែប្រកាស	ប្រឆាំងគ្រប់គ្រា
	នឹងមនុស្សអាក្រក់	ទុច្ចរិតពាលា	កុំមាននរណា
		នឹកនាដល់ឡើយ	។
១៨	ពេលអ្នកទៀងត្រង់	ស្រែករកព្រះអង្គ	ទ្រង់មិនកន្តើយ
	ព្រះអង្គសណ្តាប់	ពាក្យគេរួចហើយ	រំដោះគេឱ្យ
		ផុតគ្រោះទាំងឡាយ	។
១៩	ព្រះម្ចាស់គង់ស្ថិត	ក្បែរអ្នកគ្រាំចិត្ត	មានទុក្ខខ្វល់ខ្វាយ
	ព្រះអង្គសង្គ្រោះ	អស់អ្នកទាំងឡាយ	បានសុខសប្បាយ
		ផុតទុក្ខរីងរៃ	។

ពិធីអបអរសាទរព្រះគម្ពីរដំណឹងល្អតាម (រម ៨,១៥)

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៦,៧-១៥

នៅគ្រានោះ ក្រុមសាវ័កជួបជុំគ្នាជាមួយព្រះយេស៊ូនៅលើភ្នំ ព្រះអង្គមានព្រះបន្ទូលទៅគេថា៖ «ពេលអ្នករាល់គ្នាទូលទៅព្រះបិតា កុំពោលពាក្យច្រំដែលៗឥតប្រយោជន៍ដូចសាសន៍ដទៃឡើយ គេនឹកស្មានថា បើពោលពាក្យយ៉ាងច្រើនដូច្នេះ ព្រះរបស់គេនឹងស្តាប់គេ។ កុំធ្វើដូចគេឡើយ ដ្បិតព្រះបិតារបស់អ្នករាល់គ្នាជ្រាបនូវអ្វីៗដែលអ្នករាល់គ្នាត្រូវការមុនអ្នករាល់គ្នាទូលសុំព្រះអង្គទៅទៀត។ អ្នករាល់គ្នាត្រូវទូលព្រះអង្គដូចតទៅ៖ «ឱព្រះបិតាយើងខ្ញុំដែលគង់នៅស្ថានបរមសុខអើយ! សូមសម្តែងព្រះបារមីឱ្យមនុស្សលោកស្គាល់ព្រះនាមរបស់ព្រះអង្គ សូមឱ្យព្រះរាជ្យព្រះអង្គបានមកដល់ សូមឱ្យព្រះហប្ញទ័យរបស់ព្រះអង្គបានសម្រេចនៅលើផែនដី ដូចនៅស្ថានបរមសុខដែរ។ សូមប្រទានអាហារ ដែលយើងខ្ញុំត្រូវការនៅថ្ងៃនេះ សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យអស់អ្នក ដែលបានប្រព្រឹត្តខុសនឹងយើងខ្ញុំ។ សូមកុំបណ្តោយឱ្យយើងខ្ញុំចាញ់ការល្បួងឡើយ តែសូមរំដោះយើងខ្ញុំឱ្យរួចពីមារកំណាច។ បើអ្នករាល់គ្នាអត់ទោសឱ្យមនុស្សលោក ព្រះបិតារបស់អ្នករាល់គ្នាដែលគង់នៅស្ថានបរមសុខ ទ្រង់ក៏អត់ទោសឱ្យអ្នករាល់គ្នាដែរ។ ប៉ុន្តែ បើអ្នករាល់គ្នាមិនអត់ទោសឱ្យមនុស្សលោកទេនោះ ព្រះបិតារបស់អ្នករាល់គ្នា ក៏មិនអត់ទោសឱ្យអ្នករាល់គ្នាដែរ»។

ពាក្យថ្វាយតង្វាយ

បពិត្រព្រះបិតាដែលបានបង្កើតរបស់សព្វសារពើ! យើងខ្ញុំសូមថ្វាយព្រះអង្គនូវអ្វីៗដែលព្រះអង្គបានប្រទានឱ្យយើងខ្ញុំ ដើម្បីចិញ្ចឹមជីវិតយើងខ្ញុំនៅលើផែនដីនេះ។ សូមទ្រង់ព្រះមេត្តាញុាំងតង្វាយទាំងនេះឱ្យទៅជាព្រះកាយ និងព្រះលោហិតរបស់ព្រះគ្រីស្ត ដែលផ្តល់ជីវិតអនន្តឱ្យយើងខ្ញុំ។ ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! យើងខ្ញុំបានទទួលព្រះកាយ និងព្រះលោហិតព្រះគ្រីស្តក្នុងអភិបូជានេះ។ យើងខ្ញុំសូមអរព្រះគុណព្រះអង្គ! សូមទ្រង់ព្រះមេត្តាប្រោសយើងខ្ញុំឱ្យមានកម្លាំងដោយអគ្គសញ្ញានេះ។ សូមឱ្យយើងខ្ញុំអាចរម្ងាប់កិលេសតណ្ហា និងយកចិត្ត ទុកដាក់ស្វែងរកសម្បតិ្តបរមសុខផង។