២៦ កញ្ញា ២០២៦

សូមថ្លែងព្រះគម្ពីរសាស្ដា (សស ១១,៩-១២,៨)

យុវជនអើយ ចូរសប្បាយទាន់ខ្លួនអ្នកនៅក្មេង ចូរឱ្យចិត្តរបស់អ្នកបានរីករាយ​ក្នុងគ្រាយុវវ័យនេះ ចូរប្រព្រឹត្តតាមចិត្តប៉ង់ប្រាថ្នានិងតាមការយល់ឃើញរបស់អ្នកទៅ។ ក៏ប៉ុន្ដែ តោងដឹងថា ព្រះជាម្ចាស់នឹងវិនិច្ឆ័យគ្រប់កិច្ចការដែលអ្នកធើ្វ។ ចូរដកទុក្ខកង្វល់ចេញពីចិត្តរបស់អ្នក ហើយដកអ្វីៗដែលនាំឱ្យរូបកាយអ្នកឈឺចាប់នោះចេញ ដ្បិតយុវវ័យនិងគ្រាពេញវ័យមិននៅស្ថិតស្ថេរយូរឡើយ។ ក្នុងពេលដែលអ្នកនៅក្មេង​នៅ​ឡើយ ត្រូវនឹកដល់ព្រះអាទិកររបស់អ្នកមុនពេលថ្ងៃវេទនាមកដល់ និងមុនពេលអាយុរបស់អ្នកកាន់តែជ្រេរទៅៗហើយពេលនោះ អ្នកនឹងពោលថា«ខ្ញុំលែងសប្បាយក្នុងជីវិត​ទៀតហើយ»។ ត្រូវនឹកដល់ព្រះអង្គ មុនពេលពន្លឺព្រះអាទិត្យ ព្រះច័ន្ទ និងផ្កាយ​ទាំងឡាយប្រែទៅជាអាប់រស្មី ហើយមុនពេលពពកនិងភ្លៀងមកដល់ផ្ទួនៗគ្នា។ នៅ​ថ្ងៃនោះ អ្នកយាមផ្ទះនឹងរញីរញ័រ មនុស្សដ៏ខ្លាំងពូកែបែរជាកោងខ្នង ស្រី្ដៗដែលកិនម្សៅនឹងឈប់កិនមកពីខ្វះគ្នាជួយ ហើយអស់អ្នកដែលធ្លាប់តែសម្លឹងតាមបង្អួច ប្រែជា​ងងឹតភ្នែក។ ជីវិតរបស់អ្នកនឹងរសាត់បាត់ទៅ ដូចទ្វារដែលបែរទៅរកផ្លូវត្រូវគេបិទដូចសំឡេងត្បាល់កិនដែលឮកាន់តែខ្សោយទៅៗ ដូចសំឡេងបក្សាបក្សីស្ងាត់សូន្យទៅ​វិញ និងដូចសំឡេងស្រ្ដីចម្រៀងទាំងអស់ចុះខ្សោយ។ ពេលនោះអ្នកនឹងមិនហ៊ានឡើងទៅកាន់ទីខ្ពស់ៗ ហើយក៏មិនហ៊ានធើ្វដំណើរដែរ។ សក់របស់អ្នកនឹងស្កូវដូចផ្កា​កប្បាស អ្នកលែងរហ័សរហួនដូចកណ្ដូប អ្នកនឹងលែងដឹងរសជាតិអាហារទៀតហើយ។ មនុស្សលោកចេះតែឈានទៅរកទីលំនៅដែលស្ថិតស្ថេររហូត។ ពួកស៊ីឈ្នួលយំនិងដើរ​ក្រឡឹងជុំវិញផ្ទះអ្នក រង់ចាំពេលអ្នកស្លាប់។ ពេលនោះ ខ្សែជីវិតត្រូវដាច់ដូចជាថូមាស​បែក ដូចក្អមបែកនៅប្រភពទឹក ឬដូចរហាត់យោងទឹកបាក់ធ្លាក់ទៅក្នុងអណ្ដូង។ ពេល​​នោះ រូបកាយដែលជាធូលីដីនឹងវិលទៅជាដីដូចដើមវិញ រីឯវិញ្ញាណដែលព្រះជាម្ចាស់​ប្រទានឱ្យក៏នឹងវិលទៅកាន់ព្រះអង្គវិញដែរ។
សាស្ដាបានថ្លែងថា អ្វីៗទាំងអស់សុទ្ធតែគ្មានន័យ គ្មានខ្លឹមសារ និងឥតបានការ។

ទំនុកតម្កើងលេខ ៩០ (៨៩),៣-៦.១២-១៤.១៧ បទពាក្យ ៧

ពិធីអបអរសាទរព្រះគម្ពិរដំណឹងល្អតាម ២ធម១,១០

សូមថ្លែងព្រះគម្ពីរដំណឹងល្អតាមសន្តលូកា (លក ៩,៤៣-៤៥) 

នៅពេលនោះ មនុស្សគ្រប់គ្នាកំពុងកោតស្ញប់ស្ញែងនឹងការទាំងប៉ុន្មានដែលព្រះ​យេស៊ូប្រព្រឹត្ត។ ព្រះអង្គមានព្រះបន្ទូលទៅក្រុមសាវ័កថា៖ «ចូរអ្នករាល់គ្នាត្រងត្រាប់​ស្ដាប់ពាក្យទាំងនេះ ហើយចងចាំទុកក្នុងចិត្ត គឺបុត្រមនុស្សនឹងត្រូវគេបញ្ជូនទៅក្នុងកណ្ដាប់ដៃរបស់មនុស្សលោកជាមិនខាន»។ សាវ័កពុំបានយល់ព្រះបន្ទូលនេះទេ ព្រោះ​ព្រះជាម្ចាស់មិនទាន់បានសម្ដែងអត្ថន័យឱ្យគេយល់ ប៉ុន្ដែ ពួកគេមិនហ៊ានទូលសួរព្រះអង្គអំពីរឿងនេះឡើយ។