០២ មករា ២០២៦

Written on 25/10/2026

Mary Siya Khim

ចាប់ពីថ្ងៃទី២ មករា ដល់បុណ្យព្រះយេស៊ូសម្តែងព្រះអង្គ

សន្តបាស៊ីល និងសន្តក្រេគ័រ ជាជនដ៏ប្រសើរឧត្តម នៅណាស៊ីយ៉ាង

(បុណ្យរំឭកចាំបាច់)

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

បទចម្រៀងចូល

ទំនុកតម្កើងលេខ ១១៩,២៥-៣២

ខ្ញុំជំពាក់ចិត្តនឹងដំបូន្មានព្រះអង្គ

ពេលព្រឹក (ម៉ោង៩)

បន្ទរ៖ មាតា‌បិតារបស់ព្រះ‌យេស៊ូងឿងឆ្ងល់នឹងសេចក្ដីដែលលោកតាស៊ីម៉ូនមានប្រសាសន៍អំពីព្រះ‌ឱរសណាស់។

ពេលថ្ងៃត្រង់ (ម៉ោង១២)

បន្ទរ៖ នាងម៉ារីចងចាំព្រះបន្ទូលទាំងនេះទុកក្នុងចិត្ត ថែមទាំងត្រិះរិះពិចារណាទៀតផង។

ពេលរសៀល (ម៉ោង៣)

បន្ទរ៖ ភ្នែករបស់ទូលបង្គំបានឃើញការសង្រ្គោះ ដែលព្រះអង្គបានប្រទានមកឱ្យប្រជាជាតិទាំងអស់។

២៥	ទូលបង្គំធ្លាក់ខ្លួនដុនដាបយ៉ាងខ្លាំង សូមប្រោសឱ្យទូលបង្គំបានរស់ ស្របតាមព្រះបន្ទូលរបស់ព្រះអង្គផង!។
២៦	ទូលបង្គំរៀបរាប់អំពីដំណើរជីវិតរបស់ទូលបង្គំ ព្រះអង្គក៏ឆ្លើយតបមកទូលបង្គំ សូមបង្រៀនក្រិត្យវិន័យរបស់ព្រះអង្គ ឱ្យទូលបង្គំស្គាល់ផង!។
២៧	សូមជួយទូលបង្គំ ឱ្យយល់អំពីអត្ថន័យនៃច្បាប់របស់ព្រះអង្គ ទូលបង្គំទើបនឹងសញ្ជឹងគិតអំពីការអស្ចារ្យដែលព្រះអង្គបានសម្តែង!។
២៨	ទូលបង្គំមានទុក្ខយំសោកសង្រេង សូមលើកទឹកចិត្តទូលបង្គំឡើងវិញ តាមព្រះបន្ទូលសន្យារបស់ព្រះអង្គផង។
២៩	សូមនាំទូលបង្គំឱ្យចេញឆ្ងាយពីមាគ៌ាភូតភរនៃព្រះក្លែងក្លាយ សូមប្រណីសន្តោសបង្រៀនធម្មវិន័យឱ្យទូលបង្គំស្គាល់ផង!
៣០	ទូលបង្គំប្តេជ្ញាចិត្តស្មោះត្រង់នឹងព្រះអង្គ ទូលបង្គំសុខចិត្តធ្វើតាមសេចក្តីដែលព្រះអង្គសម្រេចមក។
៣១	ទូលបង្គំជំពាក់ចិត្តនឹងដំបូន្មានរបស់ព្រះអង្គ ឱព្រះអម្ចាស់អើយ! សូមកុំឱ្យទូលបង្គំខកចិត្តឡើយ!
៣២	ទូលបង្គំយកចិត្តទុកដាក់នឹងដើរតាមមាគ៌ារបស់ព្រះអង្គ ដ្បិតព្រះអង្គប្រោសចិត្តគំនិតទូលបង្គំឱ្យបានភ្លឺស្វាង។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ទំនុកតម្កើងលេខ ២៦

ពាក្យអធិស្ឋានរបស់ជនស្លូតត្រង់

ព្រះ‌អង្គបានជ្រើស‌រើសយើងក្នុងអង្គព្រះ‌គ្រីស្ត តាំងពីមុនកំណើតពិភព‌លោកមកម៉្លេះ
ដើម្បីឲ្យយើងវិសុទ្ធ និងឥតសៅ‌ហ្មងនៅចំពោះព្រះ‌ភក្ត្រព្រះ‌អង្គ (អភ ១,៤)។

(បទកាកគតិ)

១-	ឱព្រះអម្ចាស់	ព្រះអង្គជាព្រះ	ប្រពៃឧត្តម
	សូមរកយុត្តិធម៌	ឱ្យទូលបង្គំ	ដែលអស់យើងខ្ញុំ
		ទុកចិត្តព្រះអង្គ	។
២-	ឱព្រះអម្ចាស់	សូមស្ទង់ឱ្យច្បាស់	លចិត្តមើលផង
	ពិនិត្យរូបខ្ញុំ	ហើយពិសោធល្បង	ចិត្តខ្ញុំឥតហ្មង
		ស្មោះស្ម័គ្រជានិច្ច	។
៣-	ទូលបង្គំស្រមៃ	នឹកពីព្រះទ័យ	ព្រះអង្គឥតភ្លេច
	ហើយបានធ្វើតាម	ឥតមានកែគេច	តាមជាប់ជានិច្ច
		មិនគេចបែកបែរ	។
៤-	ទូលបង្គំមិនធ្លាប់	អង្គុយអែបជាប់	ពួកពាលប៉ោឡែ
	ឬពួកខិលខូច	ជនអាវ៉ាសែ	ពុតត្បុតហូរហែ
		ក៏មិនសេពគប់	។
៥-	ខ្ញុំមិនចូលចិត្ត	ពួកអ្នកប្រព្រឹត្ត	អាក្រក់ងល់ងប់
	មិនធ្វើល្ងីល្ងើ	អង្គុយរួមរួប	ទោះថ្ងៃឬយប់
		នឹងពួកពាលា	។
៦-	ឱព្រះអម្ចាស់	ខ្ញុំសូមប្រកាស	ស្មោះឥតរួញរា
	ទូលបង្គំលាងដៃ	គឺបញ្ជាក់ថា	រូបខ្ញុំគឺជា
		មនុស្សឥតសៅហ្មង	។
៧-	ព្រមទាំងបន្លឺ	សំឡេងរន្ទឺ	អរគុណព្រះអង្គ
	និងរៀបរាប់ពី	ការអស្ចារ្យផង	របស់ព្រះអង្គ
		មានទាំងប៉ុន្មាន	។
៨-	បពិត្រព្រះម្ចាស់	ខ្ញុំចូលចិត្តណាស់	ដំណាក់សុខសាន្ត
	របស់ព្រះអង្គ	គឺជាទីស្ថាន	សិរីថ្កើងថ្កាន
		ព្រះអង្គស្ថិតនៅ	។
៩-	សូមកុំទុកឱ្យ	ខ្ញុំស្លាប់ជាមួយ	មនុស្សបាបអាស្រូវ
	កុំដកជីវិត	ទូលបង្គំយកទៅ	នឹងពួកឃោរឃៅ
		ធ្លាប់បង្ហូរឈាម	។
១០-	ពួកនោះចូលចិត្ត	នាំគ្នាប្រព្រឹត្ត	ផ្ទុយពីបំរាម
	អំពើទុច្ចរិត	ដែលព្រះលោកហាម	ខំបង្ហូរឈាម
		ឬស៊ីសំណូក	។
១១-	ឯខ្ញុំចូលចិត្ត	ធ្វើតែសុចរិត	មិនព្រមច្របូក
	ច្របល់នឹងពួក	ធ្លាប់ស៊ីសំណូក	សូមរំដោះយក
		រូបខ្ញុំនេះផង	។
១២-	រូបខ្ញុំឈរនៅ	កន្លែងត្រឹមត្រូវ	សុចរិតទៀងត្រង់
	ទូលបង្គំនឹងលើក	តម្កើងព្រះអង្គ	ឱ្យខ្ពស់ឧត្តុង
		ក្នុងប្រជុំធំ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

ទំនុកតម្កើងលេខ ២៨,១-៣.៦-៩

ការទូលអង្វរ និងពាក្យអរព្រះគុណ

“បពិត្រព្រះបិតា ទូលបង្គំសូមអរព្រះគុណព្រះអង្គ ដែលទ្រង់ព្រះសណ្តាប់ទូលបង្គំ” (យហ ១១,៤១)។

១	ឱព្រះអម្ចាស់អើយ! ទូលបង្គំស្រែកអង្វររកព្រះអង្គ។ ព្រះអង្គជាថ្មដាការពារនៃទូលបង្គំ! សូមព្រះសណ្តាប់សម្រែករបស់ទូលបង្គំផង! ប្រសិនបើព្រះអង្គនៅស្ងៀម មិនឆ្លើយតបនឹងទូលបង្គំទេនោះ ទូលបង្គំមុខជាធ្លាក់ទៅក្នុងរណ្តៅមិនខាន!
២	ពេលទូលបង្គំដង្ហោយហៅព្រះអង្គ ទូលបង្គំលើកដៃសំពះ ទៅកាន់ទីសក្ការៈរបស់ព្រះអង្គ សូមទ្រង់ព្រះសណ្តាប់ពាក្យអង្វររបស់ទូលបង្គំផង។
៣	សូមកុំដាក់ទោសទូលបង្គំ ដូចព្រះអង្គដាក់ទោសជនពាល និងមនុស្សប្រព្រឹត្តអំពើទុច្ចរិតឡើយ គេនិយាយរាក់ទាក់ជាមួយអ្នកដទៃ តែមានកលល្បិចនៅក្នុងចិត្តនោះ។
៦	សូមលើកតម្កើងព្រះអម្ចាស់! ដ្បិតព្រះអង្គទ្រង់ព្រះសណ្តាប់ពាក្យខ្ញុំស្រែកអង្វរ។
៧	ព្រះអម្ចាស់ជាបន្ទាយ និងជាខែលការពារខ្ញុំ ខ្ញុំទុកចិត្តលើព្រះអង្គ ហើយព្រះអង្គបានសង្គ្រោះខ្ញុំ ខ្ញុំមានចិត្តរីករាយយ៉ាងខ្លាំង ខ្ញុំនឹងសរសើរតម្កើងព្រះអង្គដោយបទចម្រៀង!។
៨	ព្រះអម្ចាស់ជាកម្លាំងការពារប្រជារាស្ត្ររបស់ព្រះអង្គ ព្រះអង្គជាកំពែងសម្រាប់សង្គ្រោះព្រះគ្រីស្ត ដែលព្រះអង្គបានចាក់ប្រេងអភិសេក។
៩	ឱព្រះអម្ចាស់អើយ! សូមសង្គ្រោះប្រជារាស្ត្ររបស់ព្រះអង្គផង! សូមព្រះអង្គធ្វើជាគង្វាលថែរក្សាពួកគេរហូតតរៀងទៅ!។

ពេលព្រឹក (ម៉ោង៩)

បន្ទរ៖ មាតា‌បិតារបស់ព្រះ‌យេស៊ូងឿងឆ្ងល់នឹងសេចក្ដីដែលលោកតាស៊ីម៉ូនមានប្រសាសន៍អំពីព្រះ‌ឱរសណាស់។

ព្រះបន្ទូលរបស់ព្រះជាម្ចាស់ (អស ១១,១-៣ក)

មានខ្នែងមួយដុះចេញពីគល់របស់លោកយេសាយ ព្រះ‌វិញ្ញាណរបស់ព្រះ‌អម្ចាស់នឹងសណ្ឋិតនៅលើព្រះ‌បុត្រានោះ គឺជាព្រះ‌វិញ្ញាណដែលផ្តល់ប្រាជ្ញាឱ្យចេះពិចារណាដឹងខុសត្រូវ ព្រះ‌វិញ្ញាណដែលផ្តល់ការឈ្លាសវៃ និងចិត្តអង់‌អាច ព្រះ‌វិញ្ញាណដែលបំភ្លឺឱ្យស្គាល់ និងគោរពកោតខ្លាចព្រះ‌អម្ចាស់ព្រមទាំងឱ្យមានអំណរសប្បាយក្នុងការកោតខ្លាចព្រះ‌អម្ចាស់។

បន្ទរ៖ ព្រះអម្ចាស់បាននឹកចាំពីព្រះបន្ទូលសន្យារបស់ព្រះអង្គ អាលេលូយ៉ា!

—ព្រះអង្គបានថែរក្សាជំនឿប្រជាជនអ៊ីស្រាអែល អាលេលូយ៉ា!

ពេលថ្ងៃត្រង់ (ម៉ោង១២)

បន្ទរ៖ នាងម៉ារីចងចាំព្រះបន្ទូលទាំងនេះទុកក្នុងចិត្ត ថែមទាំងត្រិះរិះពិចារណាទៀតផង។

ព្រះបន្ទូលរបស់ព្រះជាម្ចាស់ (អស ៤២,១)

ព្រះ‌អម្ចាស់មានព្រះ‌បន្ទូលថា: លោកនេះហើយជាអ្នកបម្រើដែលយើងគាំ‌ទ្រ ជាអ្នកដែលយើងបានជ្រើស‌រើស និងជាទីគាប់‌ចិត្តរបស់យើង។ យើងដាក់វិញ្ញាណរបស់យើងលើលោក។ លោកនឹងបង្ហាញឱ្យប្រជា‌ជាតិទាំង‌ឡាយស្គាល់ការវិនិច្ឆ័យ។

បន្ទរ៖ នៅចុងបំផុតនៃផែនដីទាំងមូល អាលេលូយ៉ា!

—បានឃើញពីឫទ្ធានុភាពរបស់ព្រះជាម្ចាស់ អាលេលូយ៉ា!

ពេលរសៀល (ម៉ោង៣)

បន្ទរ៖ ភ្នែករបស់ទូលបង្គំបានឃើញការសង្រ្គោះ ដែលព្រះអង្គបានប្រទានមកឱ្យប្រជាជាតិទាំងអស់។

ព្រះបន្ទូលរបស់ព្រះជាម្ចាស់ (អស ៤៩,៦)

ព្រះ‌អង្គមានព្រះ‌បន្ទូលមកខ្ញុំថា: អ្នកមិនគ្រាន់តែជាអ្នកបម្រើដែលណែ‌នាំកុល‌សម្ព័ន្ធនៃកូនចៅរបស់លោកយ៉ាកុបឱ្យងើបឡើង និងនាំកូនចៅអ៊ីស្រា‌អែលដែលនៅសេស‌សល់ឱ្យវិលមកវិញប៉ុណ្ណោះទេ គឺយើងតែង‌តាំងអ្នកឱ្យធ្វើជាពន្លឺសម្រាប់បំភ្លឺប្រជា‌ជាតិទាំង‌ឡាយ ហើយនាំការសង្គ្រោះរបស់យើងរហូតដល់ស្រុកដាច់ស្រយាលនៃផែន‌ដី។

បន្ទរ៖ ធម៌មេត្តាករុណា និងសេចក្តីពិត បានមកជាមួយគ្នា អាលេលូយ៉ា!

—យុត្តិធម៌ និងសេចក្តីសុខសាន្តជួបគ្នានៅលើផែនដី អាលេលូយ៉ា!

ពាក្យអធិដ្ឋាន

ឱព្រះជាម្ចាស់! ព្រះអង្គសព្វព្រះហឫទ័យបំភ្លឺព្រះសហគមន៍ ដោយសារការប្រៀនប្រដៅ និងការរស់នៅរបស់សន្តបាស៊ីល និងសន្តក្រេគ័រ។ សូមព្រះអង្គមេត្តាប្រោសយើងខ្ញុំឲ្យយកចិត្តទុកដាក់ស្វែងរកសេចក្តីពិត និងសេចក្តីស្រឡាញ់ ដើម្បីឲ្យយើងខ្ញុំប្រព្រឹត្តនូវអ្វីៗទាំងអស់ ដោយចិត្តសុភាពរាបសារ។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ
និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!