២ សីហា ២០២៦

Written on 03/03/2026

Mary Siya Khim

រដូវធម្មតា សប្ដាហ៍ទី១៨ ថ្ងៃអាទិត្យ

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ២៣

ព្រះអម្ចាស់ជាគង្វាលខ្ញុំ

កូនចៀមដែលគង់នៅកណ្តាលបល្ល័ង្ក ទ្រង់នឹងឃ្វាលពួកគេ
ព្រះអង្គនឹងនាំគេទៅរកប្រភពទឹកដែលផ្តល់ជីវិត (វវ ៧,១៧)។

បន្ទរទី១ ៖ ព្រះ‌អង្គឱ្យខ្ញុំសម្រាកនៅតាមវាលស្មៅខៀវខ្ចី អាលេលូយ៉ា! ។

១	ព្រះអម្ចាស់ជាគង្វាលខ្ញុំ ខ្ញុំមិនខ្លាចអ្វីឡើយ។
២	ព្រះអង្គឱ្យខ្ញុំសម្រាកនៅតាមវាលស្មៅខៀវខ្ចី ព្រះអង្គនាំខ្ញុំឆ្ពោះទៅកន្លែងស្ងាត់ នៅក្បែរមាត់ទឹក។
៣	ព្រះអង្គប្រទានឱ្យខ្ញុំមានកម្លាំងឡើងវិញ ព្រះអង្គនាំខ្ញុំដើរក្នុងផ្លូវដ៏សុចរិត ដោយយល់ដល់ព្រះកិត្តិនាមរបស់ព្រះអង្គ។
៤	ទោះបីទូលបង្គំដើរកាត់ជ្រលងភ្នំនៃសេចក្តីស្លាប់ក៏ដោយ ក៏ទូលបង្គំមិនខ្លាចអ្វីឡើយ ដ្បិតព្រះអង្គគង់នៅជាមួយទូលបង្គំ ព្រះអង្គតាមការពារ និងរក្សាទូលបង្គំជានិច្ច។
៥	ព្រះអង្គរៀបចំពិធីជប់លៀងឱ្យទូលបង្គំ នៅមុខបច្ចាមិត្តរបស់ទូលបង្គំ ព្រះអង្គចាក់ប្រេងលើក្បាលទូលបង្គំ ព្រះអង្គបំពេញពែងទូលបង្គំយ៉ាងហូរហៀរ។
៦	ព្រះអង្គនឹងប្រទានសុភមង្គល និងសម្តែងព្រះហឫទ័យប្រណីសន្តោស មកទូលបង្គំយ៉ាងស្មោះស្ម័គ្រ ជារៀងរាល់ថ្ងៃ អស់មួយជីវិត។ ដរាបណាខ្ញុំមានជីវិត នោះខ្ញុំនឹងរស់នៅក្នុងព្រះដំណាក់របស់ព្រះអម្ចាស់ជានិច្ច។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះ‌អង្គឱ្យខ្ញុំសម្រាកនៅតាមវាលស្មៅខៀវខ្ចី អាលេលូយ៉ា! ។

ទំនុកតម្កើងលេខ ៧៦

ពាក្យអរព្រះគុណសម្រាប់ជ័យជម្នះ

គេនឹងឃើញបុត្រមនុស្សយាងមកលើពពក ក្នុងផ្ទៃមេឃ (ម៉ាថាយ ២៤,៣០)។

បន្ទរទី២ ៖ ព្រះដ៏វិសុទ្ធរបស់ជនជាតិអ៊ីស្រាអែល ដែលគង់នៅកណ្ដាលចំណោមអ្នករាល់គ្នា ព្រះនាមរបស់ព្រះអង្គឧត្តុង្គ‌ឧត្ដមណាស់។ អាលេលូយ៉ា!

(ក)

(បទពាក្យ ៧)

២-	ព្រះម្ចាស់សម្តែងឱ្យគេស្គាល់	រូបព្រះអង្គផ្ទាល់នៅយូដា
	ឯអ៊ីស្រាអែលល្បីអស្ចារ្យ	ព្រះនាមនេះណាឮឆ្ងាយក្រៃ	។
៣-	ព្រះពន្លាជ័យល្អប៉ប្រឹម	យេរូសាឡឹមក្រុងល្បាញល្បី
	ដំណាក់ព្រះអង្គដ៏ប្រិមប្រិយ៍	ស្ថិតនៅលើដីក្រុងស៊ីយ៉ូន	។
៤-	គឺទីនោះហើយទ្រង់សម្រេច	ព្រះអង្គកម្ទេចឱ្យហ្មត់សូន្យ
	គ្រឿងសស្ត្រាវុធច្រើនរាប់ផ្លូន	ធ្នូដាវមាំមួនកប់ក្នុងដី	។
៥-	បពិត្រព្រះម្ចាស់ដ៏ឧត្តម	ព្រះអង្គជិតជុំដោយសិរី
	រុងរឿងចិញ្ចែងចិញ្ចាចក្រៃ	ពេលត្រឡប់វៃមកពីភ្នំ	។
៦-	ទ្រង់ដកអាវុធពីអ្នកច្បាំង	គេហេវហត់ខ្លាំងស្ទើររលំ
	ទាហានពូកែដេកសំងំ	មិនមកជួបជុំលែងប្រយុទ្ធ	។
៧-	ឱព្រះនៃលោកយ៉ាកុបអើយ	ទ្រង់គំរាមហើយគេតក់ស្លុត
	រទេះចំបាំងគាំងរហូត	សេះដើរមិនរួចលែងអង់អាច	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះដ៏វិសុទ្ធរបស់ជនជាតិអ៊ីស្រាអែល ដែលគង់នៅកណ្ដាលចំណោមអ្នករាល់គ្នា ព្រះនាមរបស់ព្រះអង្គឧត្តុង្គ‌ឧត្ដមណាស់។ អាលេលូយ៉ា!

បន្ទរទី៣ ៖ មនុស្ស‌ម្នាលើផែន‌ដីនៅស្ងៀមស្ងាត់ដោយកោតខ្លាច ពេលព្រះ‌អង្គក្រោកឡើងវិនិច្ឆ័យទោស អាលេលូយ៉ា! ។

(ខ)

៨	បពិត្រព្រះអង្គ! ព្រះគួរជាទីស្ញែងខ្លាចណាស់! ពេលព្រះអង្គព្រះពិរោធ តើនរណាអាចទ្រាំឈរនៅចំពោះព្រះភក្ត្ររបស់ព្រះអង្គបាន?
៩	ព្រះអង្គមានព្រះបន្ទូលជំនំជំរះពីលើមេឃមក មនុស្សម្នាលើផែនដី នៅស្ងៀមស្ងាត់ដោយកោតខ្លាច
១០	នៅពេលព្រះអង្គក្រោកឡើងវិនិច្ឆ័យ ដើម្បីសង្គ្រោះមនុស្សទន់ទាបទាំងប៉ុន្មាន នៅលើផែនដី។
១១	ព្រះអង្គធ្វើឱ្យកំហឹងរបស់មនុស្សលោក ប្រែទៅជាការលើកសរសើរតម្កើងព្រះអង្គវិញ អស់អ្នកដែលនៅសេសសល់ពីសង្គ្រាម នឹងនាំគ្នាមកថ្វាយបង្គំព្រះអង្គ។
១២	អស់អ្នកដែលនៅជុំវិញព្រះអង្គអើយ! ចូរបន់ស្រន់ចំពោះព្រះជាម្ចាស់ ជាព្រះរបស់អ្នករាល់គ្នា ហើយលាបំណន់ផង! ចូរយកតង្វាយមកថ្វាយព្រះដ៏គួរឱ្យស្ញែងខ្លាច!
១៣	ព្រះអង្គបំបាក់អំនួតរបស់ស្តេចនានា ព្រះអង្គធ្វើឱ្យព្រះមហាក្សត្រទាំងឡាយនៅលើផែនដី តក់ស្លុត ស្ញែងខ្លាចព្រះអង្គ។

បន្ទរ ៖ មនុស្ស‌ម្នាលើផែន‌ដីនៅស្ងៀមស្ងាត់ដោយកោតខ្លាច ពេលព្រះ‌អង្គក្រោកឡើងវិនិច្ឆ័យទោស អាលេលូយ៉ា! ។

ពេលព្រឹក (ម៉ោង៩)

ព្រះបន្ទូលរបស់ព្រះជាម្ចាស់ (រ៉ូម ៥,១-២.៥)

ដោយព្រះជាម្ចាស់ប្រោសយើងឱ្យបានសុចរិត ព្រោះតែយើងមានជំនឿ យើងក៏មានសន្តិភាពជាមួយនឹងព្រះអង្គ តាមរយៈព្រះយេស៊ូគ្រីស្តជាអម្ចាស់នៃយើងដែរ។ ព្រោះតែព្រះគ្រីស្ត និងដោយសារជំនឿ យើងមានមាគ៌ាចូលទៅកាន់ជីវិតថ្មី ហើយយើងក៏ស្ថិតនៅក្នុងជីវិតថ្មីនេះយ៉ាងខ្ជាប់ខ្ជួន ទាំងខ្ពស់មុខ ដោយសង្ឃឹមថានឹងបានទទួលសិរីរុងរឿងរបស់ព្រះជាម្ចាស់។ សេចក្តីសង្ឃឹមមិនធ្វើឱ្យយើងខកចិត្តឡើយ ព្រោះព្រះជាម្ចាស់បានចាក់បង្ហូរព្រះហឫទ័យស្រឡាញ់របស់ព្រះអង្គ មកក្នុងចិត្តយើង ដោយប្រទានព្រះវិញ្ញាណដ៏វិសុទ្ធមកយើង។

បន្ទរ៖ ខ្ញុំនឹងច្រៀងសរសើរព្រះ‌ហឫទ័យមេត្តា‌ករុណារបស់ព្រះ‌អម្ចាស់ រហូតតទៅ។

-ខ្ញុំនឹងប្រកាសអំពីព្រះ‌ហឫទ័យស្មោះ‌ស្ម័គ្ររបស់ព្រះ‌អង្គ អស់‌កល្បជា អង្វែងតរៀងទៅ។

ពេលថ្ងៃត្រង់ (ម៉ោង១២)

ព្រះបន្ទូលរបស់ព្រះជាម្ចាស់ (រ៉ូម ៨,២៦)

យ៉ាងណា‌មិញ ព្រះ‌វិញ្ញាណក៏យាងមកជួយយើងដែលទន់ខ្សោយនេះដែរ ដ្បិតយើងពុំដឹងអធិស្ឋានដូចម្ដេច ដើម្បីឱ្យបានសមនោះឡើយ តែព្រះ‌វិញ្ញាណផ្ទាល់ព្រះ‌អង្គទូល‌អង្វរឱ្យយើង ដោយព្រះ‌សូរសៀងដែលគ្មាននរណាអាចថ្លែងបាន។

បន្ទរ៖ ព្រះអម្ចាស់អើយ! សូមទ្រង់ព្រះសណ្តាប់ពាក្យទូលអង្វររបស់ទូលបង្គំផង!

-សូមប្រោសប្រទានឱ្យទូលបង្គំមានប្រាជ្ញា ដូចព្រះអង្គមានព្រះបន្ទូលសន្យា!

ពេលរសៀល (ម៉ោង៣)

ព្រះបន្ទូលរបស់ព្រះជាម្ចាស់ (២ករ ១,២១-២២)

គឺព្រះ‌ជាម្ចាស់ហើយ ដែលប្រទានឱ្យយើង និងបង‌ប្អូនមានជំនឿខ្ជាប់‌ខ្ជួនលើព្រះ‌គ្រីស្ត ព្រមទាំងបានចាក់ប្រេងគលើយើងផង ហើយព្រះ‌អង្គក៏បានដៅសញ្ញាសម្គាល់របស់ព្រះ‌អង្គលើយើង និងប្រទានព្រះ‌វិញ្ញាណមកបញ្ចាំចិត្តយើងផងដែរ។

បន្ទរ៖ ព្រះ‌អម្ចាស់ជាពន្លឺ និងជាព្រះសង្គ្រោះខ្ញុំ។

-ព្រះអង្គការពារជីវិតខ្ញុំ។

ពាក្យអធិដ្ឋាន

ឱព្រះបិតាជាអម្ចាស់អើយ! ព្រះអង្គសព្វព្រះហឫទ័យគង់ក្នុងចិត្តមនុស្សសុចរិតទៀងត្រង់។ សូមព្រះអង្គមេត្តាប្រោសឱ្យយើងខ្ញុំរស់នៅតាមរបៀបដែលគាប់ព្រះហឫទ័យព្រះអង្គ និងសូមយាងមកតាំងទីលំនៅក្នុងដួងចិត្តរបស់យើងខ្ញុំជានិច្ច។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!