០២ កុម្ភៈ ២០២៧

Written on 22/12/2025

Mary Siya Khim

រដូវធម្មតា សប្ដាហ៍ទី៤ ថ្ងៃអង្គារ

បុណ្យថ្វាយព្រះឱរសយេស៊ូនៅក្នុងព្រះវិហារ

(បុណ្យគោរព)

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៩,១៣៧-១៤៤

ធម្មវិន័យរបស់ព្រះអង្គជាសេចក្តីសុចរិត

បន្ទរទី១ ៖ ប្រសិនបើអ្នករាល់គ្នាដឹងសេចក្ដីនេះ ហើយប្រតិ‌បត្តិតាម អ្នករាល់គ្នាមុខជាមានសុភមង្គលមិនខាន។

១៣៧	បពិត្រព្រះអម្ចាស់ ! ព្រះអង្គពិតជាសុចរិតមែន សេចក្តីដែលព្រះអង្គសម្រេចសុទ្ធតែត្រឹមត្រូវ !
១៣៨	ព្រះអង្គប្រទានដំបូន្មានមកដោយសុចរិត និងត្រឹមត្រូវបំផុត។
១៣៩	ទូលបង្គំក្តៅក្រហាយយ៉ាងខ្លាំង ដោយឃើញបច្ចាមិត្តរបស់ទូលបង្គំបំភ្លេចព្រះបន្ទូលរបស់ព្រះអង្គ។
១៤០	ព្រះបន្ទូលសន្យារបស់ព្រះអង្គជាក់ស្តែងហើយ ទូលបង្គំជាអ្នកបម្រើរបស់ព្រះអង្គស្រឡាញ់ព្រះបន្ទូលនេះខ្លាំងណាស់។
១៤១	ទូលបង្គំជាមនុស្សតូចតាច ហើយត្រូវគេមើលងាយទៀតផង ប៉ុន្តែ ទូលបង្គំមិនភ្លេចច្បាប់របស់ព្រះអង្គឡើយ។
១៤២	សេចក្តីសុចរិតរបស់ព្រះអង្គនៅស្ថិតស្ថេរអស់កល្បជានិច្ច ហើយធម្មវិន័យរបស់ព្រះអង្គជាសេចក្តីពិត។
១៤៣	ទូលបង្គំកើតទុក្ខអន្ទះអន្ទែងតប់ប្រមល់ជាខ្លាំង តែវិន័យរបស់ព្រះអង្គធ្វើឱ្យទូលបង្គំមានអំណរ។
១៤៤	ដំបូន្មានរបស់ព្រះអង្គសុចរិតអស់កល្បជានិច្ច សូមប្រទានឱ្យទូលបង្គំចេះរិះគិតពិចារណា ដើម្បីឱ្យទូលបង្គំមានជីវិត!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ប្រសិនបើអ្នករាល់គ្នាដឹងសេចក្ដីនេះ ហើយប្រតិ‌បត្តិតាម អ្នករាល់គ្នាមុខជាមានសុភមង្គលមិនខាន។

ទំនុកតម្កើងលេខ ៨៨

ពាក្យអធិដ្ឋានរបស់មនុស្សដែលមានជំងឺធ្ងន់ធ្ងរ

“ឥឡូវនេះ ជាពេលរបស់អស់លោកហើយ គឺជាពេលដែលម្ចាស់នៃសេចក្តីងងឹតបញ្ចោញអំណាច” (លក ២២,៥៣)។

បន្ទរទី២ ៖ បពិត្រព្រះអម្ចាស់ ! សូមឱ្យពាក្យអធិដ្ឋានរបស់ទូល‌បង្គំ បានឡើងទៅដល់ព្រះ‌អង្គ ! ។

(ក)

(បទព្រហ្មគីតិ)

២-	បពិត្រព្រះអម្ចាស់	ទ្រង់ជាព្រះសង្គ្រោះខ្ញុំ
	ថ្ងៃយប់ខ្ញុំស្រែកយំ	អង្វរសុំក្តីមេត្តា	។
៣-	សូមឱ្យពាក្យអង្វរ	ខ្ញុំឮខ្ទ័រដល់សោតា
	សូមទ្រង់ផ្ទៀងព្រះកាណ៌	ស្តាប់ផងណាសូរសម្រែក	។
៤-	ព្រោះដ្បិតទូលបង្គំ	មានទុក្ខធំខ្លាំងអនេក
	ខ្លោចផ្សារជាពន់ពេក	ក្តីស្លាប់ស្រែកហៅកៀកកិត	។
៥-	គេចាត់ទុករូបខ្ញុំ	ក្នុងចំណោមអ្នកដែលជិត
	ហៀបនឹងអស់ជីវិត	ឬនៅជិតអ្នកដែលស្លាប់	។
៦-	ខ្លួនខ្ញុំដេកស្តូកស្តឹង	គ្មានទីពឹងសែនអួរអាប់
	បីដូចមនុស្សស្លាប់	ទ្រង់លែងរាប់រកនឹកនា	។
៧-	ព្រះអង្គបានបង់បោះ	រូបខ្ញុំរស់នៅកំព្រា
	ឱ្យរងទុក្ខវេទនា	សែនរងាក្នុងរណ្តៅ	។
៨-	ព្រះពិរោធព្រះអង្គ	សង្កត់ចងខ្ញុំទុកនៅ
	ដូចទឹកបោកសំដៅ	រារាំងផ្លូវទូលបង្គំ	។
៩-	ព្រះអង្គឱ្យអស់អ្នក	ដែលធ្លាប់ស្ម័គ្រស្និទ្ធនឹងខ្ញុំ
	ឆ្ងាយពីទូលបង្គំ	ទាំងស្អប់ខ្ពើមថែមទៀតផង	។
១០-	ភ្នែកខ្ញុំប្រែស្រវាំង	វេទនាខ្លាំងពេកកន្លង
	ខ្ញុំអង្វរព្រះអង្គ	លើកដៃផងសូមប្រណី	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ បពិត្រព្រះអម្ចាស់ ! សូមឱ្យពាក្យអធិដ្ឋានរបស់ទូល‌បង្គំ បានឡើងទៅដល់ព្រះ‌អង្គ ! ។

បន្ទរទី៣ ៖ ឱព្រះអម្ចាស់អើយ ! ទូលបង្គំស្រែកហៅព្រះអង្គ សូមកុំលាក់ព្រះភក្ត្រឡើយ ! ។

(ខ)

១១	តើព្រះអង្គធ្លាប់ធ្វើការអស្ចារ្យសម្រាប់មនុស្សស្លាប់ឬ? តើមនុស្សដែលស្លាប់ទៅហើយ អាចក្រោកឡើងសរសើរតម្កើងព្រះអង្គកើតឬ?
១២	តើអ្នកដែលនៅក្នុងផ្នូរអាចថ្លែងពីព្រះហឫទ័យមេត្តាករុណារបស់ព្រះអង្គ ហើយអ្នកដែលវិនាសបាត់បង់ជីវិតទៅហើយនោះ អាចថ្លែងពីព្រះហឫទ័យស្មោះស្ម័គ្ររបស់ព្រះអង្គកើតឬ?
១៣	តើអ្នកដែលនៅក្នុងស្ថានងងឹត អាចស្គាល់ស្នាព្រះហស្តដ៏អស្ចារ្យរបស់ព្រះអង្គបានឬ? តើអ្នកដែលមនុស្សម្នាភ្លេចសូន្យទៅហើយនោះ អាចស្គាល់សេចក្តីសុចរិតរបស់ព្រះអង្គដូចម្តេចបាន?
១៤	ឱព្រះអម្ចាស់អើយ ! ទូលបង្គំស្រែកហៅព្រះអង្គ ទូលបង្គំចូលមកអង្វរចំពោះព្រះភក្រ្តព្រះអង្គតាំងពីព្រឹក។
១៥	ឱព្រះអម្ចាស់អើយ! ហេតុអ្វីបានជាព្រះអង្គបោះបង់ចោលទូលបង្គំដូច្នេះ? ហេតុអ្វីបានជាព្រះអង្គលាក់ព្រះភក្រ្តពីទូលបង្គំ?
១៦	ទូលបង្គំលំបាកវេទនាជិតស្លាប់តាំងពីក្មេងមកម្ល៉េះ ព្រះអង្គធ្វើឱ្យទូលបង្គំភ័យតក់ស្លុតអស់សង្ឃឹម។
១៧	ព្រះពិរោធដ៏ខ្លាំងក្លារបស់ព្រះអង្គសង្កត់មកលើទូលបង្គំ ព្រះអង្គធ្វើឱ្យទូលបង្គំភ័យតក់ស្លុតបាត់ស្មារតី។
១៨	ទុក្ខទោសទាំងនេះប្រៀបបាននឹងមហាសាគរ ដែលនៅឡោមព័ទ្ធទូលបង្គំ ព្រមទាំងគ្របពីលើទូលបង្គំជារៀងរាល់ថ្ងៃ។
១៩	ព្រះអង្គបានដេញមិត្តភក្តិ ព្រមទាំងអ្នកជិតស្និតនឹងទូលបង្គំចេញឆ្ងាយពីទូលបង្គំ មានតែភាពងងឹតប៉ុណ្ណោះ ដែលនៅជាមួយទូលបង្គំ។

បន្ទរ ៖ ឱព្រះអម្ចាស់អើយ ! ទូលបង្គំស្រែកហៅព្រះអង្គ សូមកុំលាក់ព្រះភក្ត្រឡើយ! ។

ពេលព្រឹក (ម៉ោង៩)

ព្រះបន្ទូលរបស់ព្រះជាម្ចាស់ (អស ៨,១៤)

ពេលនោះ ព្រះអង្គផ្ទាល់នឹងធ្វើជាទីសក្ការៈ តែព្រះ‌អង្គជាថ្ម ដែលនាំឱ្យប្រជាជាតិអ៊ីស្រាអែលទាំងពីរនគរប៉ះទង្គិច ជាសិលាដែលនាំឱ្យគេជំពប់ដួល ហើយក៏ជាជង់ និងជាអន្ទាក់ដល់ក្រុងយេរូ‌សាឡឹមដែរ។

បន្ទរ៖ ព្រះ‌អម្ចាស់បានសម្រេចតាមព្រះ‌បន្ទូលសន្យាហើយ
—ព្រះ‌អង្គតែង‌តែសម្ដែងព្រះ‌ហឫទ័យមេត្តា‌ករុណា និងព្រះ‌ហឫទ័យស្មោះ‌ស្ម័គ្រ ចំពោះកូនចៅអ៊ីស្រា‌អែលជា‌និច្ច។

ពេលថ្ងៃត្រង់ (ម៉ោង១២)

ព្រះបន្ទូលរបស់ព្រះជាម្ចាស់ (អស ៤២,១៣)

ព្រះ‌អម្ចាស់ស្រឡាញ់ប្រជាជនរបស់ព្រះ‌អង្គយ៉ាងខ្លាំង ព្រះ‌អង្គយាងចេញទៅដូចវីរជន ដូចអ្នកចម្បាំងដ៏ចំណាន ព្រះ‌អង្គបន្លឺព្រះសូរសៀង ស្រែកកម្លា ហើយយកជ័យ‌ជម្នះលើខ្មាំងសត្រូវ។

បន្ទរ៖ មនុស្ស‌ម្នាដែលរស់នៅគ្រប់ទីដាច់ស្រយាលនៃផែន‌ដី បានឃើញការសង្គ្រោះនៃព្រះរបស់យើង
—មនុស្សនៅលើផែនដីទាំងមូលអើយ ចូរបន្លឺសំឡេងតម្កើងព្រះអម្ចាស់ដោយអំណរ !

ពេលរសៀល (ម៉ោង៣)

ព្រះបន្ទូលរបស់ព្រះជាម្ចាស់ (អស ១២,៥-៦)

ចូរស្មូតទំនុកតម្កើងថ្វាយព្រះ‌អម្ចាស់ ដ្បិតព្រះអង្គបានធ្វើការផ្សេងៗដ៏អស្ចារ្យបំផុត ចូរប្រកាសពីការអស្ចារ្យទាំងនេះឱ្យមនុស្សនៅលើផែន‌ដីទាំងមូលដឹងផង! អ្នកក្រុងស៊ីយ៉ូនអើយ ចូរនាំគ្នាបន្លឺសំឡេងជយឃោសដោយអំណរ! ដ្បិតព្រះដ៏‌វិសុទ្ធរបស់ជនជាតិអ៊ីស្រាអែល ដែលគង់នៅកណ្ដាលចំណោមអ្នករាល់គ្នា ព្រះ‌អង្គឧត្តុង្គ‌ឧត្ដម!។

បន្ទរ៖ ព្រះ‌អម្ចាស់នឹងសម្ដែងព្រះ‌ហឫទ័យមេត្តាករុណា និងព្រះ‌ហឫទ័យស្មោះ‌ស្ម័គ្រចំពោះយើង
—ធ្វើឱ្យយើងស្គាល់យុត្តិធម៌ និងសេចក្ដីសុខ‌សាន្ត។

ពាក្យអធិដ្ឋាន

បពិត្រព្រះជាម្ចាស់ដ៏មានឫទ្ធានុភាពសព្វប្រការ ហើយមានព្រះជន្មគង់នៅជានិច្ច! ព្រះអង្គស្រឡាញ់មនុស្សលោកខ្លាំងណាស់ រហូតដល់ចាត់ព្រះបុត្រាតែមួយរបស់ព្រះអង្គមកប្រសូត្រជាមនុស្ស។ នៅថ្ងៃនេះ យើង ខ្ញុំនាំគ្នានឹករឭកដល់ព្រះបុត្រាដែលនាងម៉ារី និងលោកយ៉ូសែប យកទៅថ្វាយព្រះអម្ចាស់ក្នុងព្រះវិហារក្រុងយេរូសាឡឹម។ ដោយព្រះហឫទ័យប្រណីសន្តោស សូមព្រះអង្គប្រោសយើងខ្ញុំឱ្យថ្វាយខ្លួនទៅព្រះអង្គ ដោយចិត្តបរិសុទ្ធផង។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

-សូមកោតសរសើរព្រះអម្ចាស់ !
-សូមអរព្រះគុណព្រះជាម្ចាស់ !