១១ មករា ២០២៦

Written on 16/10/2026

Mary Siya Khim

បុណ្យព្រះអម្ចាស់ទទួលពិធីជ្រមុជទឹក

(បុណ្យគោរព)

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៨

ចម្រៀងនៃអំណរសប្បាយសម្រាប់ការសង្រ្គោះ

ព្រះអង្គនឹងហើយជា “ថ្មដែលលោកទាំងអស់គ្នាជាជាងសំណង់បោះចោល បានត្រឡប់មកជាថ្មគ្រឹះដ៏សំខាន់បំផុតវិញ” (កក ៤,១១)។

ពេលព្រឹក (ម៉ោង៩)

បន្ទរ៖ លោកយ៉ូហានព្យាយាមនិយាយការពារព្រះយេស៊ូថា ៖ «ខ្ញុំទេតើដែលត្រូវទទួលពិធីជ្រមុជទឹកពីលោក ម្ដេចក៏លោកមករកខ្ញុំវិញ!» ។

ពេលថ្ងៃត្រង់ (ម៉ោង១២)

បន្ទរ៖ ព្រះ‌យេស៊ូមានព្រះ‌បន្ទូលទៅលោកយ៉ូហានថា៖ «ឥឡូវនេះ សុំធ្វើសិនចុះ ធ្វើដូច្នេះ ទើបស្របតាមគ្រប់សេចក្ដីដែលព្រះជាម្ចាស់បានបង្គាប់ទុកមក» ។

ពេលរសៀល (ម៉ោង ៣)

បន្ទរ៖ នេះជាសក្ខីភាពរបស់លោកយ៉ូហាន ៖ ខ្ញុំបានឃើញព្រះ‌វិញ្ញាណរបស់ព្រះ‌ជាម្ចាស់យាងចុះដូចសត្វព្រាប មកសណ្ឋិតលើព្រះ‌អង្គ។

(ក)

១	ចូរលើកតម្កើងព្រះអម្ចាស់ ដ្បិតព្រះអង្គមានព្រះហឫទ័យសប្បុរស ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
២	សូមឱ្យជនជាតិអ៊ីស្រាអែលប្រកាសឡើងថា ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
៣	សូមឱ្យពូជពង្សរបស់លោកអរ៉ុនប្រកាសឡើងថា ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
៤	សូមឱ្យអស់អ្នកដែលគោរពកោតខ្លាចព្រះអម្ចាស់ ប្រកាសឡើងថា ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

(ខ)

(បទពាក្យ ៧)

៥-	ពេលខ្ញុំមានទុក្ខតប់ប្រមល់	ខ្ញុំអង្វរដល់ព្រះឥតប្រែ
	ព្រះម្ចាស់ក៏តបមកវិញដែរ	ទ្រង់ថ្នមបំពេរខ្ញុំបានសុខ	។
៦-	បើព្រះអម្ចាស់គង់នឹងខ្ញុំ	បាត់អស់ទុក្ខធំចេញពីមុខ
	លែងភ័យខ្លាចលែងកើតទុក្ខ	តើមនុស្សអាចធ្វើអ្វីខ្ញុំបាន	។
៧-	ព្រះអម្ចាស់គង់នៅជាមួយ	ទ្រង់ការពារជួយខ្ញុំសុខសាន្ត
	ឃើញអ្នកប្រឆាំងខ្ញុំប៉ុន្មាន	រត់ប្រាសចាកស្ថានដូចចិត្តប៉ង	។
៨-	មានសង្ឃឹមជ្រកនិងពឹងពាក់	មានជំនឿជាក់និងបំណង
	លើព្រះម្ចាស់ប្រសើរកន្លង	ជាងពឹងផ្អែកនឹងមនុស្សក្បាលខ្មៅ	។
៩-	មានសង្ឃឹមជ្រកនិងពាក់ពឹង	មានជំនឿរឹងមាំទាំទៅ
	លើព្រះអម្ចាស់ទើបត្រឹមត្រូវ	ជាងយើងពឹងទៅលើអ្នកធំ	។
១០-	ជនជាតិដទៃអ្នកប្រឆាំង	បានឡោមព័ទ្ធពាំងលើរូបខ្ញុំ
	តែដោយព្រះម្ចាស់អំណាចធំ	ជួយប្រយុទ្ធខ្ញុំបានឈ្នះគេ	។
១១-	គេបានរោមជិតរឹតឡោមព័ទ្ធ	ចង់ចូលសង្កត់ឱ្យខ្ញុំប្រែ
	តែដោយព្រះអម្ចាស់មើលថែ	ជួយប្រយុទ្ធដែរខ្ញុំបានជ័យ	។
១២-	វាមកឡោមព័ទ្ធខ្ញុំជុំជិត	ដូចជាហ្វូងឃ្មុំច្រើនដាសដី
	តែវាត្រូវឆេះដូចភ្លើងព្រៃ	ខ្ទេចខ្ទីម៉ត់ខៃដោយនាមព្រះ	។
១៣-	ខ្មាំងបានច្រានផ្តួលខ្ញុំយ៉ាងខ្លាំង	ខ្ញុំដួលស្លេកស្លាំងប្រឹងសំពះ
	រកឱ្យព្រះជួយឆាប់រហ័ស	ពេលនោះព្រះម្ចាស់ទ្រង់យាងមក	។
១៤-	ព្រះម្ចាស់ពិតជាកម្លាំងខ្ញុំ	ខ្ញុំស្រែកខ្ញុំយំប្រឹងស្រែករក
	មានព្រះនាមព្រះផុតទុក្ខសោក	ព្រះអង្គចេញមកច្បាំងការពារ	។
១៥-	មនុស្សសុចរិតចិត្តអង់អាច	មិនចេះកោតខ្លាចស្រែកគ្រប់គ្នា
	ច្រៀងថ្វាយព្រះអង្គមានឫទ្ធា	សម្តែងចេស្តាអានុភាព	។
១៦-	ព្រះអង្គសម្តែងបារមីខ្ពស់	ប្រសើរលើសលស់មិនទន់ទាប
	ព្រះអង្គបង្ហាញឱ្យគេជ្រាប	ឫទ្ធានុភាពអស្ចារ្យក្រៃ	។
១៧-	ខ្ញុំត្រូវនៅរស់មានជីវិត	មិនត្រូវស្លាប់ផុតចាកលោកីយ៍
	ដើម្បីរៀបរាប់ពីសេចក្តី	ស្នាព្រះហស្តថ្លៃព្រះអម្ចាស់	។
១៨-	ព្រះអង្គប្រដៅវាយអប់រំ	ទះតប់រូបខ្ញុំប្រាកដណាស់
	តែទ្រង់ស្រឡាញ់មិនឱ្យប្រាស	មិនឱ្យមានគ្រោះឬត្រូវស្លាប់	។
១៩-	ចូរនាំគ្នាបើកទ្វារឱ្យមនុស្ស	សុចរិតស្រីប្រុសមកប្រញាប់
	ខ្ញុំនឹងចូលទៅឱ្យបានឆាប់	នឹងថ្លែងរៀបរាប់អរគុណទ្រង់	។
២០-	ទ្វារនេះជាទ្វារព្រះអម្ចាស់	សូមជនស្រីប្រុសដើរតម្រង់
	អ្នកសុចរិតអើយកុំបង្អង់	ទ្វារបើកបម្រុងនៅចាំអ្នក	។
២១-	ខ្ញុំនឹងតម្កើងព្រះអម្ចាស់	ដ្បិតព្រះអង្គត្រាស់ដោយច្បាស់ជាក់
	តបឆ្លើយមកខ្ញុំពាក្យរាក់ទាក់	ថែមទាំងថ្នមថ្នាក់ខ្ញុំដិតដល់	។
២២-	ថ្មដែលជាងផ្ទះចោលខ្ទេចខ្ទាំ	ប្រែជារឹងមាំបែរជាកល់
	ជើងសសរផ្ទះមាំឥតខ្វល់	ល្បីល្បាញឮដល់សព្វជាតិសាសន៍	។
២៣-	ព្រះអង្គសម្រេចការអស្ចារ្យ	ដោយឫទ្ធិថ្លៃថ្លានៃអម្ចាស់
	អស្ចារ្យពេកក្រៃយើងឃើញច្បាស់	គួរស្ញប់ស្ញែងណាស់គួរគោរព	។
២៤-	ថ្ងៃនេះជាថ្ងៃដែលព្រះម្ចាស់	កំណត់ទុកច្បាស់ឱ្យយើងឈប់
	នាំគ្នាសប្បាយកុំនៅជ្រប់	គ្រប់ភូមិគ្រប់ស្រុកអរទាំងអស់	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

(គ)

២៥	ឱព្រះអម្ចាស់អើយ! សូមសង្គ្រោះយើងខ្ញុំ! ឱព្រះអម្ចាស់អើយ! សូមប្រទានឱ្យយើងខ្ញុំមានជោគជ័យ!
២៦	សូមលើកតម្កើងព្រះអង្គ ដែលយាងមកក្នុងព្រះនាមព្រះអម្ចាស់ យើងដែលស្ថិតនៅក្នុងព្រះដំណាក់របស់ព្រះអម្ចាស់ សូមឱ្យពរអ្នករាល់គ្នា។
២៧	មានតែព្រះអម្ចាស់ទេ ដែលជាព្រះដ៏ពិតតែមួយព្រះអង្គ ព្រះអង្គបានប្រទានពន្លឺឱ្យយើង ចូរនាំគ្នាលើកធាងទន្សែឡើង ហើយហែជាក្បួនរហូតដល់ជ្រុងអាសនៈ
២៨	ព្រះអង្គជាព្រះនៃទូលបង្គំ ទូលបង្គំនឹងសរសើរតម្កើងព្រះអង្គ ឱព្រះនៃទូលបង្គំអើយ ! ទូលបង្គំសូមលើកតម្កីងព្រះអង្គ !
២៩	ចូរលើកតម្កើងព្រះអម្ចាស់ ដ្បិតព្រះអង្គមានព្រះហឫទ័យសប្បុរស ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!

ពេលព្រឹក (ម៉ោង៩)

បន្ទរ៖ លោកយ៉ូហានព្យាយាមនិយាយការពារព្រះយេស៊ូថា ៖ «ខ្ញុំទេតើដែលត្រូវទទួលពិធីជ្រមុជទឹកពីលោក ម្ដេចក៏លោកមករកខ្ញុំវិញ!» ។

ព្រះបន្ទូលរបស់ព្រះជាម្ចាស់ (អស ១១,១-៣)

មានខ្នែងមួយដុះចេញពីគល់របស់លោកយេសាយ ព្រះ‌វិញ្ញាណរបស់ព្រះ‌អម្ចាស់នឹងសណ្ឋិតនៅលើព្រះ‌បុត្រានោះ គឺជាព្រះ‌វិញ្ញាណដែលផ្តល់ប្រាជ្ញាឱ្យចេះពិចារណាដឹងខុសត្រូវ ព្រះ‌វិញ្ញាណដែលផ្តល់ការឈ្លាសវៃ និងចិត្តអង់‌អាច ព្រះ‌វិញ្ញាណដែលបំភ្លឺឱ្យស្គាល់ និងគោរពកោតខ្លាចព្រះ‌អម្ចាស់ ព្រមទាំងឱ្យមានអំណរសប្បាយក្នុងការកោតខ្លាចព្រះ‌អម្ចាស់ ព្រះ‌បុត្រានេះមិនវិនិច្ឆ័យតាមលក្ខណៈខាងក្រៅឡើយ ហើយព្រះ‌អង្គក៏មិនកាត់ក្តីតាមដែលឮគេនិយាយដែរ។

បន្ទរ៖ ព្រះអង្គត្រូវតែប្រសើរឡើង។

—ខ្ញុំត្រូវតែថយចុះវិញ។

ពេលថ្ងៃត្រង់ (ម៉ោង១២)

បន្ទរ៖ ព្រះ‌យេស៊ូមានព្រះ‌បន្ទូលទៅលោកយ៉ូហានថា៖ «ឥឡូវនេះ សុំធ្វើសិនចុះ ធ្វើដូច្នេះ ទើបស្របតាមគ្រប់សេចក្ដីដែលព្រះជាម្ចាស់បានបង្គាប់ទុកមក» ។

ព្រះបន្ទូលរបស់ព្រះជាម្ចាស់ (អស ៤២,១)

ព្រះ‌អម្ចាស់មានព្រះ‌បន្ទូលថា: លោកនេះហើយជាអ្នកបម្រើដែលយើងគាំ‌ទ្រ ជាអ្នកដែលយើងបានជ្រើស‌រើស និងជាទីគាប់‌ចិត្តរបស់យើង។យើងដាក់វិញ្ញាណរបស់យើងលើលោក។ លោកនឹងបង្ហាញឱ្យប្រជា‌ជាតិទាំង‌ឡាយស្គាល់ការវិនិច្ឆ័យ។

បន្ទរ៖ លោកនេះជាអ្នកបម្រើដ៏ជាទីស្រឡាញ់របស់យើង។

—យើងគាប់‌ចិត្តនឹងព្រះ‌អង្គណាស់!។

ពេលរសៀល (ម៉ោង ៣)

បន្ទរ៖ នេះជាសក្ខីភាពរបស់លោកយ៉ូហាន ៖ ខ្ញុំបានឃើញព្រះ‌វិញ្ញាណរបស់ព្រះ‌ជាម្ចាស់យាងចុះដូចសត្វព្រាប មកសណ្ឋិតលើព្រះ‌អង្គ។

ព្រះបន្ទូលរបស់ព្រះជាម្ចាស់ (អស ៤៩,៦)

ព្រះ‌អង្គមានព្រះ‌បន្ទូលមកខ្ញុំថា: អ្នកមិនគ្រាន់តែជាអ្នកបម្រើដែលណែ‌នាំកុល‌សម្ព័ន្ធនៃកូនចៅរបស់លោកយ៉ាកុបឱ្យងើបឡើង និងនាំកូនចៅអ៊ីស្រា‌អែលដែលនៅសេស‌សល់ ឱ្យវិលមកវិញប៉ុណ្ណោះទេ គឺយើងតែង‌តាំងអ្នកឱ្យធ្វើជាពន្លឺ សម្រាប់បំភ្លឺប្រជា‌ជាតិទាំង‌ឡាយ ហើយនាំការសង្គ្រោះរបស់យើង រហូតដល់ស្រុកដាច់ស្រយាលនៃផែន‌ដី។

បន្ទរ៖ ព្រះ‌វិញ្ញាណរបស់ព្រះ‌អម្ចាស់នឹងសណ្ឋិតនៅលើព្រះ‌បុត្រានោះ

—ហើយព្រះអង្គនឹងបង្ហាញឱ្យប្រជាជាតិនានា បានឃើញភាពដ៏វិសុទ្ធនៃព្រះជាម្ចាស់។

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ! ពេលព្រះយេស៊ូទទួលពិធីជ្រមុជទឹក ព្រះអង្គសម្តែងឲ្យមនុស្សលោកស្គាល់ឋានៈរបស់ព្រះគ្រីស្ត ជាព្រះបុត្រាដ៏ជាទីស្រឡាញ់របស់ព្រះអង្គ។ សូមព្រះអង្គមេត្តាបំភ្លឺចិត្តគំនិតរបស់អស់អ្នកដែលទទួលពិធីជ្រមុជទឹក ដោយព្រះវិញ្ញាណដ៏វិសុទ្ធ ឲ្យបន្តបេសកកម្មរបស់ព្រះយេស៊ូក្នុងពិភពលោកនេះ។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!