២៧ ឧសភា ២០២៦

សូមថ្លែងលិខិតទី១ របស់គ្រីស្តទូតសិលា (១សល ១,១៨-២៥)

បងប្អូនជាទីស្រឡាញ់!
បងប្អូនជ្រាបស្រាប់ហើយថា ព្រះជាម្ចាស់បានលោះបងប្អូន​ឱ្យរួចពីរបៀបរស់នៅដ៏ឥតន័យ ដែលជាដំណែលតពីបុព្វបុរសរបស់បងប្អូន មិនមែន​ដោយសារអ្វីៗដែលរមែងតែងតែរលាយសាបសូន្យ ដូចជាមាសឬប្រាក់ទេ គឺ​​ដោយសារព្រះលោហិតដ៏ថ្លៃវិសេសរបស់ព្រះ​គ្រីស្ត ដែលប្រៀបបាននឹងកូនចៀមដ៏ល្អ​ឥត​​ខ្ចោះ ឥតស្លាកស្នាម។ ព្រះជាម្ចាស់បានជ្រើសតាំងព្រះគ្រីស្តមុនកំណើតពិភព​លោក​ទៅទៀត ហើយបានបង្ហាញព្រះអង្គឱ្យមនុស្សលោកឃើញ នៅគ្រាចុងក្រោយ​នេះ ព្រោះតែបងប្អូន។ ដោយសារព្រះគ្រីស្ត បងប្អូន​ជឿលើព្រះជាម្ចាស់ ដែលបានប្រោស​ព្រះអង្គឱ្យទទួលព្រះជន្មថ្មីដ៏រុងរឿង ហើយប្រទានសិរីរុងរឿងមកព្រះអង្គ ដើម្បីឱ្យ​បងប្អូនមានជំនឿ និងមានសង្ឃឹមលើព្រះជាម្ចាស់។ បងប្អូនបានជម្រះព្រលឹងឱ្យបានបរិសុទ្ធ ដោយស្តាប់តាមសេចក្តីពិត ដើម្បីឱ្យ​បងប្អូនចេះស្រឡាញ់គ្នាយ៉ាងស្មោះស្ម័គ្រដូចបងប្អូនបង្កើត។ ចូរស្រឡាញ់គ្នាទៅវិញទៅមកឱ្យអស់ពីដួងចិត្ត!។ ព្រះជាម្ចាស់បានប្រោសបងប្អូនឱ្យកើតជាថ្មី មិនមែន​ដោយពូជដែលតែងតែរលួយទេ គឺដោយពូជមិនចេះរលួយ។ ពូជនេះគឺព្រះបន្ទូល​របស់ព្រះជាម្ចាស់ ព្រះបន្ទូលនេះផ្តល់ជីវិត ហើយនៅស្ថិតស្ថេរជាដរាប ដ្បិតមនុស្ស​គ្រប់ៗរូបប្រៀបបាននឹងស្មៅ រីឯសិរីរុងរឿងទាំងប៉ុន្មានរបស់គេ ប្រៀបបាននឹងស្មៅ​តែងតែក្រៀម ហើយផ្កាក៏រុះរោយដែរ។ ប៉ុន្តែ ព្រះបន្ទូលរបស់ព្រះអម្ចាស់នៅស្ថិតស្ថេរអស់កល្បជានិច្ច។ ព្រះបន្ទូលនេះគឺជាដំណឹងល្អ ដែលគេបាននាំយកមកជូនបងប្អូន។

ទំនុកតម្កើងលេខ ១៤៧,១២-១៥,១៩-២០ បទព្រហ្មគិត

ពិធីអបអរសាទរព្រះគម្ពីរដំណឹងល្អតាម (មក ១០,៤៥)

អាលេលូយ៉ា! អាលេលូយ៉ា!
បុត្រមនុស្សមកក្នុងពិភពលោកនេះដើម្បីបម្រើគេ ព្រមទាំងបូជាជីវិតដើម្បីលោះមនុស្សទាំងអស់ផង។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស (មក ១០,៣២-៤៥)

នៅគ្រានោះ ព្រះយេស៊ូយាងឡើងទៅក្រុងយេរូសាឡឹមជាមួយក្រុមសាវ័ក។ ព្រះ​អង្គយាងនាំមុខគេ ក្រុមសាវ័កភ័យខ្លាចជាខ្លាំង រីឯអស់អ្នកដែលដើរតាមក្រោយក៏ភិតភ័យដែរ។ ព្រះយេស៊ូនាំក្រុមសាវ័កទាំងដប់ពីរនាក់មកជាមួយព្រះអង្គសាជាថ្មី រួចមានព្រះបន្ទូលអំពីហេតុការណ៍ដែលនឹងកើតមានដល់ព្រះអង្គថា៖ «ឥឡូវនេះ យើង​ឡើងទៅក្រុងយេរូសាឡឹម។ បុត្រមនុស្សនឹងត្រូវគេបញ្ជូនទៅក្នុងកណ្តាប់ដៃពួកនាយក​​បូជាចារ្យ និងពួកធម្មាចារ្យ។ គេនឹងកាត់ទោសប្រហារជីវិតលោក គេនឹងបញ្ជូនលោកទៅក្នុងកណ្តាប់ដៃរបស់សាសន៍ដទៃ ពួកនោះនឹងចំអកឱ្យលោក ព្រមទាំង​ស្តោះទឹកមាត់ដាក់លោក។ គេនឹងវាយធ្វើបាបលោក រួចសម្លាប់លោកទៀតផង ប៉ុន្តែ បីថ្ងៃក្រោយមក លោកនឹងរស់ឡើងវិញ»។ បន្ទាប់មក លោកយ៉ាកុប និងលោកយ៉ូហានជាកូនលោកសេបេដេ ចូលមកគាល់​ព្រះយេស៊ូ​ទូលថា៖ «ព្រះគ្រូ ! សូមលោកមេត្តាយល់ព្រមតាមពាក្យសុំរបស់យើងខ្ញុំផង»។ ព្រះយេស៊ូមានព្រះបន្ទូលសួរគេថា៖ «តើអ្នកទាំងពីរចង់ឱ្យខ្ញុំធ្វើអ្វី?»។ គេទូលព្រះអង្គថា៖ «ពេលព្រះគ្រូគ្រងរាជ្យប្រកបដោយសិរីរុងរឿង សូមប្រទានឱ្យយើងខ្ញុំបានអង្គុយអមព្រះគ្រូផង គឺម្នាក់នៅខាងស្តាំ ម្នាក់នៅខាងឆ្វេង»។ ព្រះយេស៊ូ​មានព្រះបន្ទូលថា៖ «អ្នកទាំងពីរមិនដឹងថា ខ្លួនសុំអ្វីឡើយ តើអ្នកអាចទទួលពែងដែល​ខ្ញុំត្រូវទទួលនោះបានឬទេ? អ្នកអាចទទួលពិធីជ្រមុជដែលខ្ញុំត្រូវទទួលបានឬទេ»។ គេទូលព្រះអង្គថា៖ «យើងខ្ញុំអាចទទួលបាន»។ ព្រះយេស៊ូមានព្រះបន្ទូលថា៖ «អ្នកនឹងទទួលពែងដែលខ្ញុំត្រូវទទួល និងទទួលពិធីជ្រមុជដែលខ្ញុំត្រូវទទួលបានមែន ចំពោះឯរឿងដែលអ្នកចង់អង្គុយនៅខាងស្តាំ និងខាងឆ្វេងខ្ញុំនោះ ខ្ញុំមិនអាចសម្រេចបានឡើយ ព្រោះកន្លែងនោះបម្រុងទុកសម្រាប់តែអ្នកដែល​ព្រះជាម្ចាស់បានសម្រេចឱ្យប៉ុណ្ណោះ»។ ពេលសាវ័កទាំងដប់នាក់ទៀតឮដូច្នេះ ពួកគេទាស់ចិត្តនឹងលោកយ៉ាកុប និងលោក​យ៉ូហានជាខ្លាំង។ ព្រះយេស៊ូត្រាស់ហៅក្រុមសាវ័កទាំងអស់មក ហើយមានព្រះបន្ទូល​ថា៖ «អ្នករាល់គ្នាដឹងស្រាប់ហើយ អ្នកដែលគេចាត់ទុកជាមេគ្រប់គ្រងស្រុក តែងតែជិះជាន់ប្រជារាស្ត្ររបស់ខ្លួន រីឯអ្នកធំតែងតែប្រើអំណាចខ្លួនលើប្រជារាស្ត្រ។ ក្នុង​ចំណោមអ្នករាល់គ្នា មិនមែនដូច្នេះទេ។ ផ្ទុយទៅវិញ បើមានម្នាក់ចង់ធ្វើធំជាងគេ​ក្នុងចំណោមអ្នករាល់គ្នា ត្រូវឱ្យអ្នកនោះបម្រើអ្នករាល់គ្នាវិញ។ ក្នុងចំណោមអ្នក​រាល់គ្នា បើមានម្នាក់ចង់ធ្វើមេគេ ត្រូវធ្វើជាទាសកររបស់គេគ្រប់គ្នាសិន ដ្បិតបុត្រ​មនុស្សមកក្នុងពិភពលោកនេះ មិនមែនដើម្បីឱ្យគេបម្រើលោកទេ គឺលោកមក​បម្រើគេវិញ ព្រមទាំងបូជាជីវិតដើម្បីលោះមនុស្សទាំងអស់ផង »។