២០ ឧសភា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! ដោយព្រះ​អង្គប្រោស​ឱ្យព្រះ​យេ​ស៊ូ​ទទួលព្រះជន្មថ្មី ព្រះអង្គបានប្រទានសេចក្តីសង្ឃឹមដ៏អស្ចារ្យឱ្យយើងខ្ញុំ​។ សូមទ្រង់​ព្រះមេត្តា​ប្រោស​ប្រទាន​ឱ្យយើង​ខ្ញុំ​ជា​ព្រះសហគមន៍រួបរួមគ្នាជាចិត្តថ្លើមតែមួយ និងសម្តែងសេចក្តីសង្ឃឹមដល់មនុស្សសព្វថ្ងៃនេះផង។

សូមថ្លែងព្រះគម្ពីរកិច្ចការរបស់គ្រីស្តទូត (កក ២០,២៨-៣៨)

នៅគ្រានោះ លោកប៉ូលលាក្រុមព្រឹទ្ធាចារ្យព្រះសហគមន៍ក្រុងអេភេសូ។ លោកមានប្រសាសន៍​ថា៖​ «សូម​បង​ប្អូនថែរក្សាខ្លួនឯង និងថែរក្សាក្រុមអ្នកជឿទាំងមូលផង ព្រោះព្រះវិញ្ញាណ​ដ៏វិសុទ្ធបាន​តែងតាំង​បងប្អូនធ្វើជាអ្នក​ទទួល​ខុសត្រូវនេះ ចូរបងប្អូនឃ្វាលព្រះសហ​គមន៍របស់ព្រះជាម្ចាស់ដែលព្រះអង្គបានលោះមក ដោយសារព្រះលោហិតរបស់ព្រះអង្គផ្ទាល់។ ខ្ញុំដឹងច្បាស់ថា ពេលខ្ញុំចេញផុតទៅ នឹងមានមនុស្សចិត្តសាហាវដូចចចកនាំគ្នាចូល​មក​ក្នុង​ចំណោមបងប្អូន គេនឹងធ្វើបាបក្រុមអ្នកជឿឥតត្រាប្រណីឡើយ ថែមទាំងមានអ្នកខ្លះក្នុងចំណោមបងប្អូននាំគ្នា​ពោល​ពាក្យបញ្ឆោត ដើម្បីទាក់ទាញក្រុមសាវ័កឱ្យទៅតាមគេទៀតផង។ ហេតុនេះ សូមបងប្អូនប្រុងស្មារតីឱ្យមែនទែន ដោយ​នឹកចាំថា ខ្ញុំបានដាស់តឿនបងប្អូនគ្រប់ៗរូបទាំងទឹកភ្នែកក្នុងរវាងបីឆ្នាំទាំងយប់ទាំងថ្ងៃឥតមានឈប់ឈរ។ ឥ​ឡូវនេះ ខ្ញុំសូមផ្ញើបងប្អូននឹងព្រះជាម្ចាស់ ហើយផ្ញើនឹងព្រះបន្ទូលស្តីអំពីព្រះហឫទ័យប្រណីសន្តោសរបស់ព្រះអង្គ។ មានតែព្រះអង្គទេដែលអាចកសាងព្រះសហគមន៍ ព្រមទាំងឱ្យបងប្អូនទទួលមត៌ករួមជាមួយប្រជាជនដ៏វិសុទ្ធ។ ខ្ញុំមិនដែលចង់បានមាសប្រាក់ ឬសម្លៀកបំពាក់អ្វីពីនរ​ណាឡើយ។ បងប្អូនជ្រាបស្រាប់ហើយថា ខ្ញុំបាន​ធ្វើ​ការដោយផ្ទាល់ដៃដើម្បីផ្គត់ផ្គង់សេចក្តីត្រូវការរបស់ខ្ញុំ និងសេចក្តីត្រូវការរបស់អស់​អ្នកដែលនៅជាមួយខ្ញុំ។ ក្នុងគ្រប់​កិច្ច​ការទាំងអស់ ខ្ញុំតែងតែប្រាប់ឱ្យបងប្អូនដឹងថា ត្រូវតែធ្វើការនឿយហត់បែបនេះឯងដើម្បីជួយទំនុកបម្រុង​អស់អ្នក​ដែល​ក្រខ្សត់ ហើយត្រូវចងចាំព្រះបន្ទូលរបស់ព្រះអម្ចាស់យេស៊ូថា “បើឱ្យ នោះនឹងបាន​សុភមង្គលច្រើនជាងទទួល”»​។ លោកមានប្រសាសន៍ដូច្នេះរួចហើយ ក៏លុតជង្គង់ចុះអធិដ្ឋានជាមួយពួកគេទាំងអស់។ ពួកព្រឹទ្ធាចារ្យ​ទាំង​នោះ​​នាំគ្នាទ្រហោយំឱបកលោកប៉ូល ហើយថើបលោកទៀតផង ជាពិសេស គេព្រួយ​ចិត្ត​មក​ពីលោក​ប៉ូល​មាន​ប្រ​សាសន៍​ថា គេនឹងលែងឃើញមុខលោកទៀតហើយ។ បន្ទាប់មក គេក៏ជូនដំណើរលោករហូតដល់សំពៅ។

ទំនុកតម្កើងលេខ ៦៨ (៦៧), ២៩-៣០.៣៣-៣៦ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម (យហ ១៧,១)

សូមថ្លែងព្រះគម្ពីរដំណឹងល្អតាមសន្តយ៉ូហាន (យហ ១៧,១១-១៩)

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គងើបព្រះ​ភក្រ្ត​ទត​ទៅ​លើ​មេឃ​ ហើយមានព្រះបន្ទូលថា៖ «ឱព្រះបិតាដ៏វិសុទ្ធអើយ! សូមថែរក្សាអ្នកទាំងនោះដោយព្រះនាមព្រះអង្គផង គឺព្រះ​នាម​នេះ​ហើយដែលព្រះអង្គបានប្រទានមកទូលបង្គំ ដើម្បីឱ្យគេរួមគ្នាជាអង្គតែមួយ ដូចយើងជាអង្គតែមួយដែរ។ កាល​ទូល​បង្គំនៅជាមួយអ្នកទាំងនោះ ទូលបង្គំបានថែរក្សាគេដោយព្រះនាមដែលព្រះអង្គបានប្រទានមកទូលបង្គំ។ ទូល​បង្គំ​បានការពារគេ ហើយគ្មាននរណាត្រូវវិនាសបាត់បង់ឡើយ លើកលែងតែម្នាក់ដែលត្រូវវិនាស ស្របតាម​សេចក្តី​ដែល​មានចែងទុកក្នុងគម្ពីរប៉ុណ្ណោះ។ ឥឡូវនេះ ទូលបង្គំទៅឯព្រះអង្គ ទូលបង្គំនិយាយដូច្នេះ ពេល​ទូលបង្គំនៅក្នុង​លោក​នេះនៅឡើយ ដើម្បីឱ្យគេមានអំណររបស់ទូលបង្គំ ជាអំណរដ៏ពេញលក្ខណៈ។ ទូលបង្គំបានប្រទាន​ព្រះ​បន្ទូល​របស់ព្រះអង្គ​ឱ្យគេ តែមនុស្សលោកស្អប់គេ ពីព្រោះគេមិនកើតពីលោកីយ៍ទេ ដូចជាទូល​បង្គំមិន​កើតពីលោកីយ៍​នេះ​ដែរ​។ ទូលបង្គំមិនអង្វរព្រះអង្គឱ្យ​យកគេចេញពីលោកនេះឡើយ គឺសូមទ្រង់មេត្តាការពារគេពីអំណាចមារ​កំណាច​វិញ​។ គេមិនកើតពីលោកីយ៍ទេ ដូច​ទូលបង្គំមិនកើតពីលោកីយ៍នេះដែរ។ សូមប្រោសគេ​ឱ្យវិសុទ្ធដោយសារ​សេចក្តី​ពិត គឺព្រះបន្ទូលរបស់ព្រះអង្គនោះហើយជាសេចក្តីពិត។ ទូលបង្គំចាត់គេឱ្យ​ទៅក្នុងលោក ដូចព្រះ​អង្គ​បាន​ចាត់​ទូល​បង្គំឱ្យមកក្នុងលោកដែរ។ រីឯទូលបង្គំវិញ ទូលបង្គំបូជាជីវិតថ្វាយព្រះអង្គជាប្រយោជន៍ដល់គេ ដើម្បីឱ្យគេ​បាន​វិសុទ្ធ ដោយសារសេចក្តីពិត»។

ពាក្យថ្វាយតង្វាយ

បពិត្រព្រះបិតាជាទីស្រឡាញ់! យើងខ្ញុំជឿថា ព្រះយេស៊ូបានបូជាព្រះជន្មថ្វាយព្រះអង្គ ដើម្បីឱ្យ​យើងខ្ញុំ​ទៅ​ជា​​ប្រជារាស្រ្តដ៏វិសុទ្ធរបស់ព្រះអង្គ។ សូមទ្រង់ព្រះមេត្តាប្រោសយើងខ្ញុំឱ្យបានវិសុទ្ធដោយសាសេចក្តីពិត។ សូមបង្រួមយើ​​​ង​​​ខ្ញុំក្នុងសក្ការបូជារបស់ព្រះយេស៊ូ​គ្រីស្ត ដែលមានព្រះជន្មគង់នៅ និង​សោយ​រាជ្យ​អស់​កល្ប​ជា​អង្វែង​តរៀង​ទៅ។

ពាក្យអរព្រះគុណ

បពិត្រព្រះបិតាដ៏វិសុទ្ធ ក្នុងអភិបូជានេះ ព្រះអង្គប្រោសយើងខ្ញុំឱ្យរួបរួមជាអង្គតែមួយនឹងព្រះយេស៊ូ ដូច​ព្រះ​អង្គ​ និងព្រះបុត្រាជាអង្គតែមួយដែរ។ សូមទ្រង់ព្រះមេត្តាថែរក្សាយើងខ្ញុំទាំងអស់គ្នាជាគ្រីស្តបរិស័ទ ដោយព្រះ​នាម​ព្រះគ្រី​ស្ត សូមឱ្យគ្រីស្តបរិស័ទគ្រប់និកាយគោរពគ្នាទៅវិញទៅមក និងយកចិត្តទុកដាក់រួបរួមគ្នាផង។