០៩ ឧសភា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យប្រទានជីវិតថ្មីឱ្យមនុស្សដោយសាជំនឿ និង​ដោយ​ពិធីជ្រមុជទឹក។ ព្រះអង្គក៏បានប្រោសយើងខ្ញុំឱ្យទៅជាបុត្រធីតារបស់ព្រះអង្គ។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យនាំដំណឹងល្អនៃការសង្គ្រោះនេះ ដល់មនុស្សលោកសព្វថ្ងៃនេះផង។

សូមថ្លែងព្រះគម្ពីរកិច្ចការរបស់គ្រីស្តទូត (កក ១៦,១-១០)

លោកប៉ូលធ្វើដំណើរចេញពីក្រុងអន់ទីយ៉ូកមកដល់ក្រុងឌែរបេ រួចទៅដល់ក្រុងលីស្ត្រា។ នៅក្រុង​លីស្ត្រា​នោះ​​ មានសាវ័កម្នាក់ឈ្មោះ​ធីម៉ូថេ ជាកូនរបស់ស្ត្រីសាសន៍យូដាម្នាក់ដែលជាអ្នកជឿ ឪពុកគាត់ជាសាសន៍ក្រិក។ គាត់​មាន​កេរ្តិ៍ឈ្មោះល្អក្នុងចំណោមបងប្អូននៅក្រុង​លីស្ត្រា និងបងប្អូននៅក្រុងអ៊ីកូញ៉ុម។ លោកប៉ូលមានបំណងយកគាត់ឱ្យរួមដំណើរទៅជាមួយ។ លោកនាំគាត់មកធ្វើពិធីកាត់ស្បែកឱ្យ ព្រោះលោកយោគយល់ដល់​សាសន៍​យូដា​នៅ​ស្រុក​នោះ​ ដ្បិតគេដឹងគ្រប់គ្នាថា ឪពុកគាត់ជាសាសន៍ក្រិក។ នៅតាមក្រុងនានាដែលពួកលោកប៉ូលធ្វើដំណើរកាត់​ លោក​ប្រាប់អ្នកជឿឱ្យដឹងអំពីសេចក្តីសម្រេចរបស់ក្រុមគ្រីស្តទូត និងព្រឹទ្ធាចារ្យនៅក្រុងយេរូសាឡឹម ហើយ​សុំឱ្យគេអនុវត្តតាម។ ព្រះសហគមន៍នានាក៏កាន់តែមាំមួនជារៀងរាល់ថ្ងៃ ហើយមានចំនួនកាន់តែច្រើនជាលំដាប់។ ព្រះវិញ្ញាណដ៏វិសុទ្ធឃាត់ពួកលោកប៉ូលមិនឱ្យទៅប្រកាសព្រះបន្ទូលនៅស្រុកអាស៊ីទេ ហេតុនេះហើយ​ បាន​ជា​លោកនាំគ្នាធ្វើដំណើរកាត់ស្រុកព្រីគី និងដែនដីកាឡាទី។ ពេលទៅដល់ជិតស្រុកមីស៊ី លោក​មានបំណង​ទៅ​ស្រុក​ប៊ីធីនី ប៉ុន្តែ ព្រះវិញ្ញាណរបស់ព្រះយេស៊ូពុំអនុញ្ញាតឱ្យទៅទេ។ ដូច្នេះ លោកនាំគ្នាឆ្លងកាត់ស្រុកមីស៊ីទៅដល់ក្រុងត្រូ​​​​​​​​​អា​ស​។ នៅពេលយប់ លោកប៉ូលនិមិត្តឃើញអ្នកស្រុកម៉ាសេដូនម្នាក់ ឈរអង្វរលោកថា៖ «សូមលោក​អញ្ជើញ​ឆ្លង​​មក​​​ស្រុកម៉ាសេដូនជួយយើងខ្ញុំផង!»។ ក្រោយពេលលោកឃើញនិមិត្ត​ហេតុនេះហើយ យើងរូត​រះ​ចេញ​ដំណើរ​ទៅ​ស្រុ​ក​ម៉ាសេដូនជាប្រញាប់ ព្រោះយើងជឿជាក់ថា ព្រះជាម្ចាស់ត្រាស់ហៅយើង​ឱ្យទៅ​នាំ​ដំណឹង​ល្អដល់អ្នក​ស្រុក​នោះ​។

ទំនុកតម្កើងលេខ ១០០ (៩៩), ១-៣.៥ បទកាកគតិ

ពិធីអបអរសាទរព្រះគម្ពីរដំណឹងល្អតាម (កូឡូ ៣,១)

សូមថ្លែងព្រះគម្ពីរដំណឹងល្អតាមសន្តយ៉ូហាន (យហ ១៥,១៨-២១)

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅកាន់​ក្រុម​សា​វ័ក​​ថា៖ «ប្រសិនបើមនុស្សលោកស្អប់អ្នករាល់គ្នា ចូរដឹងថា គេបានស្អប់ខ្ញុំមុនស្អប់អ្នករាល់គ្នាទៅទៀត។ ប្រសិនបើ​អ្នក​រាល់​គ្នាកើតមកពីលោកីយ៍ នោះលោកីយ៍មុខជាស្រឡាញ់អ្នករាល់គ្នា ព្រោះអ្នករាល់គ្នានៅខាងគេ។ ប៉ុន្តែ ខ្ញុំបានយក​អ្នករាល់គ្នាចេញពីអំណាចលោកីយ៍មក ហើយអ្នករាល់គ្នាមិនកើតពីលោកីយ៍ទេ ហេតុនេះហើយ​ បាន​ជាលោកីយ៍ស្អប់អ្នករាល់គ្នា។ ចូរនឹកចាំពាក្យដែលខ្ញុំបាននិយាយប្រាប់អ្នករាល់គ្នាថា “អ្នកបម្រើមិនធំជាងម្ចាស់ឡើយ”។ ប្រសិន​បើ​គេបៀតបៀនខ្ញុំ គេមុខជាបៀតបៀនអ្នករាល់គ្នាដែរ។ ប្រសិនបើគេប្រតិបត្តិតាមពាក្យខ្ញុំ គេមុខជាប្រតិបត្តិតាម​ពាក្យ​របស់​អ្នករាល់គ្នាដែរ។ ប៉ុន្តែ គេប្រព្រឹត្តអំពើទាំងនោះចំពោះអ្នករាល់គ្នា ព្រោះតែនាមខ្ញុំ មកពីគេ​ពុំបានស្គាល់​ព្រះអង្គ​ដែល​បានចាត់ខ្ញុំឱ្យមកទេ»។

ពាក្យថ្វាយតង្វាយ

បពិត្រព្រះបិតា! ក្នុងអភិបូជានេះ យើងខ្ញុំសូមរួមជាមួយព្រះយេស៊ូដើម្បីលើកតម្កើងព្រះអង្គ។ ទោះមនុស្ស​លោក​​មិនស្រឡាញ់ព្រះអង្គក៏ដោយ ក៏ព្រះអង្គនៅតែស្រឡាញ់មនុស្សលោកជានិច្ច។ សូមទ្រង់ព្រះមេត្តាទទួលកាយ វាចា ចិត្ត ដែលយើងខ្ញុំសូមថ្វាយក្នុងនាមមនុស្សលោកទាំងអស់។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យឱ្យយើងខ្ញុំចូលរួមជាមួយព្រះយេស៊ូគ្រីស្ត​ដែល​បាន​បូជា​ព្រះជន្ម។ ព្រះអង្គក៏បានជ្រើសរើស និងចាត់យើងខ្ញុំឱ្យទៅក្នុងពិភពលោកនេះ។ សូមទ្រង់​ព្រះមេត្តា​ប្រោសឱ្យ​យើង​​ខ្ញុំមានចិត្តស្រឡាញ់អ្នកដែលស្អប់យើងខ្ញុំ ដូចព្រះបុត្រាព្រះអង្គ។ សូមលើកទឹកចិត្តគ្រីស្តបរិស័ទ​ដែលត្រូវគេបៀត​បៀន​ផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ។