១៦ ឧសភា ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! មុនព្រះយេស៊ូយាងចេញពីលោកនេះទៅ ព្រះអង្គមានព្រះបន្ទូល​សន្យា​នឹង​ប្រ​ទាន​ព្រះវិញ្ញាណដ៏វិសុទ្ធឱ្យសាវ័ក។ ព្រះវិញ្ញាណក៏យាងមកមែន ហើយ​បាន​បំភ្លឺ​ចិត្ត​គំនិត​របស់​គេឱ្យ​យល់​គម្រោង​ការ​ដ៏​អស្ចារ្យរបស់ព្រះអង្គដែរ។ សូមទ្រង់ព្រះមេត្តាប្រទានព្រះវិញ្ញាណដ៏វិសុទ្ធឱ្យយើងខ្ញុំ តាមព្រះបន្ទូលសន្យារបស់ព្រះគ្រីស្ត។ សូមព្រះវិញ្ញាណណែនាំយើងខ្ញុំឱ្យស្គាល់ព្រះអង្គកាន់តែច្បាស់ឡើងៗផង។

សូមថ្លែងព្រះគម្ពីរកិច្ចការរបស់គ្រីស្តទូត (កក ១៨,២២-២៨)

លោកប៉ូលស្នាក់នៅក្រុងអន់ទីយ៉ូកយូរបន្តិច រួចលោកចេញដំណើរទៅសាជាថ្មី ដោយឆ្លង​កាត់​ស្រុក​កាឡា​ទី ​និង​ស្រុកព្រីគី ទាំងពង្រឹងជំនឿពួកសាវ័កទាំងអស់ផង។ មានជនជាតិយូដាម្នាក់ឈ្មោះ​ អប៉ូឡូស​ ជាអ្នក​ស្រុក​អាឡិច​សង់​ឌ្រីមកនៅក្រុងអេភេសូ។ គាត់ជាមនុស្សមានវោហា ហើយស្គាល់គម្ពីរយ៉ាងល្អិតល្អន់ គាត់បានទទួលការអប់រំអំ​ពី​មាគ៌ារបស់​ព្រះ​អម្ចា​ស់ និងមានចិត្តឧស្សាហ៍មោះមុត។ គាត់ប្រកាស​ព្រះបន្ទូល ហើយ​ប៉ិន​ប្រសប់បង្រៀន​គេយ៉ាង​ច្បាស់លាស់​អំពី​ព្រះ​យេស៊ូផង។ ក៏ប៉ុន្តែ គាត់បានដឹងត្រឹមតែពិធីជ្រមុជទឹករបស់លោកយ៉ូហានប៉ុណ្ណោះ។ គាត់បានបង្រៀនគេក្នុងធម្ម​សាលាដោយចិត្តអង់អាច។ កាលនាងព្រីស៊ីឡា និងលោកអគីឡាសបានឮគាត់បង្រៀនដូច្នេះ គេអញ្ជើញ​គាត់​ទៅ​ជា​មួយ ព្រមទាំងពន្យល់គាត់ឱ្យរឹតតែស្គាល់មាគ៌ារបស់ព្រះជាម្ចាស់ថែមទៀត។ បន្ទាប់មក ដោយលោក​អប៉ូឡូស​មាន​បំណងធ្វើដំណើរទៅកាន់ស្រុកអាខៃ បងប្អូននាំគ្នាលើកទឹកចិត្តគាត់ឱ្យទៅ ថែមទាំងសរសេរសំបុត្រទៅជម្រាប​ក្រុម​សាវ័កនៅ​ស្រុកនោះឱ្យទទួលគាត់ដោយរាក់ទាក់ផង។ លុះទៅដល់ គាត់បាន​ជួយអស់អ្នក​ជឿនៅទី​នោះ​យ៉ាង​ច្រើនតាមព្រះហឫទ័យប្រណីសន្តោសរបស់ព្រះជាម្ចាស់ ដ្បិតគាត់ចេះផ្ចាញ់សាសន៍យូដានៅមុខប្រជុំជនទាំង​អស់​ និង​វែកញែកគម្ពីរបញ្ជាក់ប្រាប់គេថា ព្រះ​យេស៊ូពិតជាព្រះគ្រីស្តមែន ។

ទំនុកតម្កើងលេខ ៤៧ (៤៦), ២-៣.៨-១០ បទកាកគតិ

ពិធីអបអរសាទរព្រះគម្ពីរដំណឹងល្អតាម (យហ ១៦,២៨)

សូមថ្លែងព្រះគម្ពីរដំណឹងល្អតាមសន្តយ៉ូហាន (យហ ១៦,២៣-២៨)

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូល​ទៅ​កាន់​ក្រុម​សាវ័ក​ថា៖ «នៅពេលនោះ អ្នករាល់គ្នាលែងសួរអ្វីពីខ្ញុំទៀតហើយ។ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា អ្វីៗដែល​អ្នក​​រាល់គ្នាទូលសុំព្រះបិតាក្នុងនាមខ្ញុំ ព្រះអង្គមុខជានឹងប្រទានឱ្យអ្នករាល់គ្នាជាមិនខាន។ មកដល់ពេលនេះ អ្នករាល់គ្នា​ពុំទាន់បានទូលសូមអ្វីក្នុងនាមខ្ញុំទេ ចូរទូលសូមទៅ! អ្នករាល់គ្នានឹងបានទទួល ហើយអ្ន​ករាល់​គ្នា​នឹងមា​នអំ​ណរ​ពេញ​លក្ខណៈ។ ខ្ញុំបាននិយាយប្រាប់អ្នករាល់គ្នាអំពីសេចក្តីទាំងនេះ ដោយប្រើប្រស្នា។ បន្តិចទៀត ខ្ញុំនឹង​និយាយ​យ៉ាង​ច្បាស់ៗប្រាប់អ្នករាល់គ្នាអំពីព្រះបិតា ខ្ញុំមិនប្រើប្រស្នាទៀតទេ។ នៅគ្រានោះ កាលណាអ្នករាល់គ្នាទូលសុំអ្វី​ៗពី​ព្រះ​បិតាក្នុងនាមខ្ញុំ ខ្ញុំមិនប្រាប់អ្នករាល់គ្នាថា ខ្ញុំនឹងអង្វរព្រះអង្គឱ្យអ្នករាល់គ្នាឡើយ ដ្បិត​ព្រះបិតា​មាន​ព្រះ​ហឫ​ទ័យ​ស្រឡាញ់អ្នករាល់គ្នា ព្រោះអ្នករាល់គ្នាបានស្រឡាញ់ខ្ញុំ ហើយជឿថា ខ្ញុំចេញពីព្រះជាម្ចាស់មក ខ្ញុំបានចេញ​ពីព្រះ​បិតា​មក​ក្នុងលោកនេះ ហើយឥឡូវ ខ្ញុំចេញពីលោកនេះទៅឯព្រះបិតាវិញ»។

ពាក្យថ្វាយតង្វាយ

បពិត្រព្រះបិតាជាទីស្រឡាញ់! ក្នុងអភិបូជានេះ យើងខ្ញុំសូមចូលរួមជាមួយព្រះគ្រីស្តដែល​បានបូ​ជាព្រះ​ជន្ម​។ ​យើងខ្ញុំក៏នាំគ្នាអង្វរព្រះអង្គរួមជាមួយព្រះយេស៊ូដែរ។ សូមទ្រង់ព្រះមេត្តា​ប្រទាន​ព្រះ​វិញ្ញាណឱ្យយាងមក​សណ្ឋិត​ជា​មួយ​យើងខ្ញុំ តាមព្រះបន្ទូលសន្យារបស់ព្រះយេស៊ូ ជាព្រះបុត្រាដែលគង់នៅជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រោសប្រទានឱ្យយើងខ្ញុំទៅជាបុត្រធីតារបស់ព្រះអង្គ ដោយ​រួម​ជា​មួយព្រះយេស៊ូជាព្រះបុត្រាព្រះអង្គ សូមទ្រង់ព្រះមេត្តាប្រទានព្រះវិញ្ញាណឱ្យយើងខ្ញុំ សូមឱ្យ​យើង​ខ្ញុំរួម​ស្លាប់​រួមរស់​ជា​មួយ​ព្រះបុត្រា ក្នុងគ្រប់កិច្ចការប្រចាំជីវិតយើងខ្ញុំផង។