ប្រសាសន៍លើកទីបីរបស់លោកប៊ីលដាដ:
អំណាចរបស់ព្រះជាម្ចាស់
១ លោកប៊ីលដាដ ជាអ្នកស្រុកស៊ូអា ពោលឡើងថា៖
២ «ព្រះជាម្ចាស់មានអំណាចគ្រប់គ្រង
ព្រះអង្គគួរឲ្យស្ញែងខ្លាច
ព្រះអង្គតាំងឲ្យមានសេចក្ដីសុខសាន្ត
នៅលើស្ថានដ៏ខ្ពស់បំផុត។
៣ គ្មាននរណាអាចរាប់ចំនួនកងពលរបស់
ព្រះអង្គទេ
ពន្លឺរបស់ព្រះអង្គចាំងដល់មនុស្សគ្រប់ៗគ្នា។
៤ ដូច្នេះ តើមនុស្សអាចតវ៉ាថាខ្លួនសុចរិត
នៅចំពោះព្រះភ័ក្ត្រព្រះជាម្ចាស់បានឬ?
តើអ្នកដែលកើតចេញពីស្ត្រីអះអាងថា
ខ្លួនបរិសុទ្ធដូចម្ដេចកើត?
៥ នៅចំពោះព្រះភ័ក្ត្រព្រះជាម្ចាស់
សូម្បីតែព្រះច័ន្ទក៏បាត់រស្មី
ហើយហ្វូងតារាក៏មិនភ្លឺទៅហើយ
៦ ចុះចំណង់បើមនុស្សដែលមិនខុសពីដង្កូវ
ហើយកូនមនុស្សដែលមិនខុសពីជន្លេន
តើគេរឹតតែអន់យ៉ាងណាទៅទៀត!»។