១ លោកបាឡាមយល់ឃើញថា ព្រះអម្ចាស់សព្វព្រះហឫទ័យប្រទានពរដល់ជនជាតិអ៊ីស្រាអែល លោកមិនបានចេញទៅសួរព្រះជាម្ចាស់ដូចមុនៗទេ តែលោកបែរមុខទៅរកវាលរហោស្ថាន។ ២ លោកសម្លឹងមើលទៅ ឃើញជនជាតិអ៊ីស្រាអែលបោះជំរំតាមកុលសម្ព័ន្ធរបស់គេរៀងៗខ្លួន។ ព្រះវិញ្ញាណរបស់ព្រះជាម្ចាស់ក៏យាងមកសណ្ឋិតលើលោកបាឡាម ៣ លោកថ្លែងដូចតទៅ៖
«នេះជាពាក្យរបស់បាឡាម កូនរបស់បេអ៊រ
នេះជាពាក្យរបស់អ្នកពូកែឈ្វេងយល់
៤ នេះជាពាក្យរបស់អ្នកដែលឮព្រះបន្ទូល
របស់ព្រះជាម្ចាស់
អ្នកដែលឃើញនិមិត្តហេតុអស្ចារ្យ
ពីព្រះដ៏មានឫទ្ធានុភាពខ្ពង់ខ្ពស់បំផុត
អ្នកដែលស្លុងស្មារតី
ហើយមើលឃើញយ៉ាងច្បាស់។
៥ កូនចៅយ៉ាកុបអើយ
ពន្លារបស់អ្នកស្អាតណាស់!
កូនចៅអ៊ីស្រាអែលអើយ
ទីលំនៅរបស់អ្នកក៏ស្អាតដែរ!
៦ គឺប្រៀបដូចជាទឹកជ្រោះហូរ
ដូចសួនឧទ្យាន ដែលស្ថិតនៅក្បែរទន្លេ
ដូចដើមក្រឹស្នា ដែលព្រះអម្ចាស់បានដាំ
ដូចដើមតាត្រៅ ដែលដុះនៅតាមមាត់ទឹក។
៧ ទឹកនឹងហូរចេញពីអាងរបស់គេយ៉ាងបរិបូណ៌
គ្រាប់ពូជរបស់គេនឹងលូតលាស់
ព្រោះសម្បូរទឹក
ស្តេចរបស់គេនឹងមានជ័យជម្នះលើស្តេចអកាក់
នគររបស់គេនឹងបានខ្លាំងពូកែ។
៨ ព្រះជាម្ចាស់បាននាំពួកគេចេញពីស្រុកអេស៊ីប
ដោយប្រើកម្លាំងដ៏ខ្លាំង ដូចសត្វរមាស។
ពួកគេកម្ទេចប្រជាជាតិនានាដែលជាបច្ចាមិត្ត
ហើយបំបាក់ឆ្អឹង និងបាញ់ព្រួញប្រហារ
អ្នកទាំងនោះទៀតផង។
៩ ពួកគេក្រាប ពួកគេដេក ដូចសត្វសិង្ហ
តើនរណាហ៊ានដាស់ពួកគេ?
អ្នកណាឲ្យពរអ៊ីស្រាអែល
អ្នកនោះនឹងទទួលពរ
អ្នកណាដាក់បណ្ដាសាអ៊ីស្រាអែល
អ្នកនោះមុខជាត្រូវបណ្ដាសាពុំខាន!»។
១០ ពេលនោះ ព្រះបាទបាឡាក់ក្រេវក្រោធទាស់នឹងលោកបាឡាម ស្តេចទះព្រះហស្ដខ្លាំងៗ ទាំងមានរាជឱង្ការថា៖ «យើងបានហៅលោកមក ដើម្បីឲ្យលោកដាក់បណ្ដាសាខ្មាំងសត្រូវរបស់យើង តែលោកបែរជាឲ្យពរពួកគេរហូតដល់បីដងទៅវិញ!។ ១១ ឥឡូវនេះ ចូរលោករត់ទៅផ្ទះរបស់លោកវិញទៅ! យើងមានបំណងផ្តល់កិត្តិយសឲ្យលោក តែព្រះអម្ចាស់រារាំងលោកមិនឲ្យទទួលកិត្តិយសនេះទេ!»។ ១២ លោកបាឡាមទូលស្តេចវិញថា៖ «ទូលបង្គំបានប្រាប់អស់អ្នកដែលព្រះករុណាចាត់ឲ្យទៅជួបទូលបង្គំរួចហើយថា ១៣ “ទោះបីព្រះបាទបាឡាក់ប្រទានមាស ឬប្រាក់ដែលមានពេញនៅក្នុងវាំងមកខ្ញុំក្តី ក៏ខ្ញុំពុំអាចសម្រេចការល្អ ឬអាក្រក់ ដោយខ្លួនឯង ខុសនឹងបញ្ជារបស់ព្រះអម្ចាស់ជាដាច់ខាត។ ខ្ញុំនឹងថ្លែងតែសេចក្ដីណាដែលព្រះអម្ចាស់មានព្រះបន្ទូលមកខ្ញុំ”។ ១៤ ឥឡូវនេះ មុនពេលទូលបង្គំវិលទៅជួបជុំនឹងប្រជាជនរបស់ទូលបង្គំវិញ សូមព្រះអង្គយាងមកជិតទូលបង្គំ ដើម្បីទូលបង្គំទូល ថ្វាយអំពីការដែលជនជាតិអ៊ីស្រាអែលនឹងប្រព្រឹត្តចំពោះប្រជាជនរបស់ព្រះករុណា នៅពេលខាងមុខ»។
១៥ លោកបាឡាមថ្លែងដូចតទៅ៖
«នេះជាពាក្យរបស់បាឡាម កូនរបស់បេអ៊រ
នេះជាពាក្យរបស់អ្នកពូកែឈ្វេងយល់
១៦ នេះជាពាក្យរបស់អ្នកដែលបានឮព្រះបន្ទូល
របស់ព្រះជាម្ចាស់
អ្នកដែលស្គាល់តម្រិះរបស់ព្រះដ៏ខ្ពង់ខ្ពស់បំផុត
អ្នកដែលបានឃើញនិមិត្តហេតុអស្ចារ្យ
ពីព្រះដ៏មានឫទ្ធានុភាពខ្ពង់ខ្ពស់បំផុត
អ្នកដែលស្លុងស្មារតី
ហើយមើលឃើញយ៉ាងច្បាស់។
១៧ ខ្ញុំឃើញស្តេចមួយអង្គ
តែមិនមែនក្នុងពេលឥឡូវនេះទេ
ខ្ញុំសម្លឹងមើលស្តេចនោះ
តែមិនមែននៅជិតទេ។
មានផ្កាយមួយរះចេញពីយ៉ាកុប
មានដំបងរាជ្យមួយចេញពីអ៊ីស្រាអែល
ស្តេចនោះនឹងវាយបំបែកក្បាលរបស់ម៉ូអាប់
ហើយប្រល័យកូនចៅទាំងអស់របស់សេត។
១៨ ស្តេចនឹងកាន់កាប់ស្រុកអេដុម
នឹងកាន់កាប់ស្រុកសៀរ ដែលជាសត្រូវ
ពេលនោះ អ៊ីស្រាអែលពង្រឹងកម្លាំងរបស់ខ្លួន។
១៩ ស្តេចដែលចេញពីយ៉ាកុបនឹងគ្រងរាជ្យ
ជាក្សត្រាធិរាជ។
ព្រះអង្គនឹងកម្ទេចអស់អ្នកដែលនៅសេសសល់
ក្នុងទីក្រុង»។
២០ ពេលឃើញជនជាតិអាម៉ាឡេក
លោកបាឡាមថ្លែងថា៖
«អាម៉ាឡេកជាប្រជាជាតិមួយធំជាងគេមែន
ប៉ុន្តែ នៅទីបំផុត ពួកគេនឹងត្រូវអន្តរាយ»។
២១ ពេលឃើញជនជាតិគីនី
លោកថ្លែងថា៖
«អ្នកមានទីលំនៅដ៏រឹងមាំ
ដូចសត្វធ្វើសំបុកនៅលើថ្មដា។
២២ ក៏ប៉ុន្តែ គេនីនឹងត្រូវភ្លើងឆាបឆេះ
អាស្សួរនឹងនាំអ្នកទៅជាឈ្លើយ!»។
២៣ លោកថ្លែងទៀតថា៖
«ពេលព្រះជាម្ចាស់វិនិច្ឆ័យទោស
តើនរណាអាចរស់រានបាន!
២៤ មានទ័ពសំពៅមកពីស្រុកគីទីម
ពួកគេនឹងបង្ក្រាបអាស្សួរ និងហេប៊ែរ
ប៉ុន្តែ អ្នកទាំងនោះក៏នឹងត្រូវអន្តរាយដែរ»។
២៥ លោកបាឡាមក្រោកឡើង វិលត្រឡប់ទៅស្រុករបស់លោកវិញ រីឯព្រះបាទបាឡាក់ក៏ចាកចេញទៅដែរ។