១០ មេសា ២០២៦

Written on 20/01/2026

Mary Siya Khim

ថ្ងៃសុក្រ សប្តាហ៍បុណ្យចម្លង

(ពេលល្ងាច)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១០,១-៥.៧

ព្រះមេស្ស៊ី គឺជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១ ៖ នាងម៉ារីជាអ្នកស្រុកម៉ាដាឡា និងនាងម៉ារីម្នាក់ទៀតនាំគ្នាទៅមើលផ្នូរ អាលេលូយ៉ា! ។

១	ព្រះជាអម្ចាស់មានព្រះបន្ទូលមកកាន់ព្រះរាជា ជាព្រះអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្ក្រាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ! ”។
២	សូមព្រះជាអម្ចាស់ប្រោសប្រទាន ឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណានៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
៥	ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។
៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្រ្តប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ នាងម៉ារីជាអ្នកស្រុកម៉ាដាឡា និងនាងម៉ារីម្នាក់ទៀតនាំគ្នាទៅមើលផ្នូរ អាលេលូយ៉ា! ។

ទំនុកតម្កើងលេខ ១១៤,១-៨

ប្រជាជនអ៊ីស្រាអែលបានសេរីភាពពីប្រទេសអេស៊ីប

អ្នកដែលបានលះបង់ពិភពលោកនេះ ក៏ត្រូវបានដឹកនាំចេញពីប្រទេសអេស៊ីបផងដែរ (សន្តអូគូស្ទីន)។

បន្ទរទី២៖ សុំមកមើលកន្លែងដែលគេដាក់ព្រះ‌សពព្រះ‌អង្គឯ‌ណេះសិន។ អាលេលូយ៉ា !

(បទពាក្យ ៧)

១-	ពេលអ៊ីស្រាអែលបានចាកចេញ	ពីអេស៊ីបវិញហើយពេលនោះ
	ពូជពង្សយ៉ាកុបចេញទាំងអស់	ពីដីបរទេសមិនសល់នៅ	។
២-	ឯប្រជាជនជាតិយូដា	បានក្លាយទៅជាឥតហ្មងសៅ
	ជាប្រជាជាតិមិនអាស្រូវ	វិសុទ្ធពេកកូវផ្ទាល់ព្រះអង្គ	។
៣-	ពេលទឹកសមុទ្រឃើញពួកគេ	តក់ស្លុតម៉្លេះទេមិនបង្អង់
	គេចខ្លួនថយទៅមិនរេរង់	ទាំងយ័រដាន់ផងក៏ថយដែរ	។
៤-	ភ្នំតូចភ្នំធំភ្នំទាំងអស់	នៅមិនស្ងៀមសោះដូចពពែ
	លោតទៅលោតមកមិនឈប់ទេ	ភ្នំតូចលោតដែរដូចកូនចៀម	។
៥-	ឱសមុទ្រអើយម្តេចក៏អ្នក	រត់គេចជាជាក់ទៅនៅស្ងៀម
	អ្នកធ្លាប់រលកលោតរវាម	ម្តេចសំងំស្ងៀមធ្មឹងដូច្នេះ	។
	ឱទឹកទន្លេយ័រដាន់អើយ	ពេលនេះម្តេចឡើយរត់លឿនម៉្លេះ
	ម្តេចអ្នកដកខ្លួនឆាប់ដូច្នេះ	តើរឿងទាំងនេះមកពីអ្វី	។
៦-	ភ្នំអើយម្តេចអ្នកមិនឈប់លោត	ផ្លាស់ប្តូររហូតដូចសត្វព្រៃ
	ភ្នំតូចអើយអ្នកលោតព្រោះអ្វី	មិនស្គាល់យប់ថ្ងៃមិនសម្រាក	។
៧-	ឱផែនដីអើយចូររីករាយ	អំណរសប្បាយចំពោះភក្រ្ត
	ព្រះជាអម្ចាស់របស់អ្នក	និងចំពោះភក្រ្តព្រះយ៉ាកុប	។
៨-	គឺទ្រង់បានធ្វើឱ្យសិលា	ប្រែក្លាយទៅជាបឹងសាយសព្វ
	ឱ្យថ្មប្រែក្លាយជាប្រភព	ទឹកហូរឥតឈប់ឥតស្រាកស្រាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ សុំមកមើលកន្លែងដែលគេដាក់ព្រះ‌សពព្រះ‌អង្គឯ‌ណេះសិន។ អាលេលូយ៉ា !

បទលើកតម្កើងតាមគម្ពីរវិវរណៈ (វវ ១៩,១-២.៥-៧)

វិវាហមង្គលការកូនចៀម

បន្ទរទី៣៖ ព្រះ‌យេស៊ូមានព្រះ‌បន្ទូលថា៖ «កុំភ័យ‌ខ្លាចអ្វីឡើយ! សុំទៅប្រាប់បង‌ប្អូនខ្ញុំឲ្យទៅស្រុកកាលី‌ឡេទៅ គេនឹងឃើញខ្ញុំនៅទីនោះ» ។ អាលេលូយ៉ា !

១	អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព
២	ដ្បិតទ្រង់វិនិច្ឆ័យទោសយ៉ាងត្រឹមត្រូវ តាមយុត្តិធម៌ អាលេលូយ៉ា!
៥	អាលេលូយ៉ា! អ្នករាល់គ្នាជាអ្នកបម្រើព្រះជាម្ចាស់ អ្នករាល់គ្នាជាអ្នកគោរពកោតខ្លាចព្រះអង្គ ទាំងតូចទាំងធំអើយ! ចូរសរសើរតម្កើងព្រះជាម្ចាស់នៃយើង!។ អាលេលូយ៉ា!
៦	អាលេលូយ៉ា! ដ្បិតព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គបានតាំងព្រះរាជ្យរបស់ព្រះអង្គហើយ
៧	យើងនាំគ្នាអរសប្បាយឡើង ត្រូវមានអំណររីករាយឱ្យខ្លាំង ហើយនាំគ្នាលើកតម្កើងសិរីរុងរឿងព្រះអង្គ អាលេលូយ៉ា! អាលេលូយ៉ា! ដ្បិតដល់ពេលរៀបវិវាហមង្គលការកូនចៀមហើយ ភរិយាថ្មោងថ្មីរបស់កូនចៀម ក៏បានរៀបចំខ្លួនរួចជាស្រេចហើយដែរ។ អាលេលូយ៉ា!

បន្ទរ៖ ព្រះ‌យេស៊ូមានព្រះ‌បន្ទូលថា៖ «កុំភ័យ‌ខ្លាចអ្វីឡើយ! សុំទៅប្រាប់បង‌ប្អូនខ្ញុំឲ្យទៅស្រុកកាលី‌ឡេទៅ គេនឹងឃើញខ្ញុំនៅទីនោះ» ។ អាលេលូយ៉ា!

ព្រះបន្ទូលរបស់ព្រះជាម្ចាស់ (ហប ៥,៨-១០)

ថ្វី‌ដ្បិតតែព្រះ‌អង្គជាព្រះ‌បុត្រាក៏ដោយ ព្រះ‌អង្គក៏បានរៀនស្ដាប់បង្គាប់ ដោយរង‌ទុក្ខលំបាក។ បន្ទាប់ពីព្រះ‌អង្គបានគ្រប់លក្ខណៈហើយ ព្រះ‌អង្គក៏បានទៅជាប្រភពនៃការសង្គ្រោះដ៏នៅស្ថិត‌ស្ថេរអស់កល្ប‌ជានិច្ច សម្រាប់អស់អ្នកដែលស្ដាប់បង្គាប់ព្រះ‌អង្គ ហើយព្រះ‌ជាម្ចាស់ក៏ប្រកាសតែង‌តាំងព្រះ‌អង្គជាមហាបូជា‌ចារ្យ តាមរបៀបព្រះ‌បាទមែល‌គីសេ‌ដែកដែរ។

-ជំនួសឱ្យឃ្លាបន្ទរខាងក្រោមគឺ ៖

បន្ទរ៖ នេះជាថ្ងៃដែលព្រះអម្ចាស់បានបង្កើតមក ចូរយើងត្រេកអរសប្បាយ និងរីករាយឡើង អាលេលូយ៉ា!

ទំនុកតម្កើងរបស់ព្រះនាងម៉ារី

បន្ទរ៖ ពេលនោះ សាវ័កដែលព្រះ‌យេស៊ូស្រឡាញ់និយាយថា៖ «ព្រះ‌អម្ចាស់ទេតើ!»។ អាលេលូយ៉ា!

ពាក្យអង្វរសកល

ព្រះគ្រីស្តជាផ្លូវ ជាសេចក្តីពិត និងជាជីវិត។ ចូរយើងកោតសរសើរព្រះអង្គ ហើយទូលថា ៖

បន្ទរ៖ ឱព្រះបុត្រារបស់ព្រះជាម្ចាស់ដែលមានព្រះជន្មគង់នៅ ! សូមប្រទានព្រះពរដល់ប្រជារាស្រ្តព្រះអង្គ !

យើងខ្ញុំសូមទូលអង្វរព្រះយេស៊ូជាអម្ចាស់ សម្រាប់អ្នកបម្រើពិធីបុណ្យទាំងអស់របស់ព្រះសហគមន៍
—ដូចអស់លោកបានធ្វើពិធីកាច់នំប៉័ងនៃជីវិតសម្រាប់យើងខ្ញុំយ៉ាងណា សូមឱ្យអស់លោកផ្ទាល់បានទទួលនូវការចិញ្ចឹម និងកម្លាំងយ៉ាងនោះដែរ។ (បន្ទរ)

យើងខ្ញុំសូមទូលអង្វរព្រះអង្គសម្រាប់គ្រីស្តបរិស័ទគ្រប់និកាយ ដើម្បីឱ្យមនុស្សទាំងអស់សាកសមនឹងការត្រាស់ហៅរបស់ខ្លួន
—ហើយសូមព្រះអង្គការពារពួកគេក្នុងការរួបរួមនៃព្រះវិញ្ញាណដ៏វិសុទ្ធ ដោយសារចំណងនៃសេចក្តីសុខសាន្ត។ (បន្ទរ)

យើងខ្ញុំសូមទូលអង្វរព្រះអង្គសម្រាប់ថ្នាក់ដឹកនាំរបស់យើងខ្ញុំ សូមឱ្យពួកគេដឹកនាំដោយយុត្តិធម៌ និងក្តីមេត្តា
—ហើយផ្សព្វផ្សាយភាពសុខដុម និងសេចក្តីសុខសាន្ត ទៅដល់ពិភពលោក។ (បន្ទរ)

យើងខ្ញុំសូមទូលអង្វរសម្រាប់ខ្លួនយើងខ្ញុំផ្ទាល់ ដើម្បីឱ្យដួងចិត្តរបស់យើងខ្ញុំបានជ្រះស្អាតបរិសុទ្ធ និងច្រៀងសរសើរតម្កើងព្រះអង្គ ក្នុងសហភាពរវាងជនដ៏វិសុទ្ធទាំងឡាយ —សូមឱ្យយើងខ្ញុំរួមគ្នាសាជាថ្មីជាមួយនឹងបងប្អូនយើងខ្ញុំ ដែលបានលាចាកលោកនេះ យើងខ្ញុំសូមសរសើរចំពោះសេចក្តីសប្បុរសរបស់ព្រះអង្គ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច ! ព្រះអង្គបានប្រទានការអាថ៌កំបាំងដ៏អស្ចារ្យនៃបុណ្យចម្លងដល់យើងខ្ញុំ ដើម្បីសម្រុះសម្រួលជាមួយមនុស្សលោកក្នុងសម្ពន្ធមេត្រីរបស់ព្រះអង្គ។ សូមព្រះអង្គមេត្តារៀបចំចិត្តគំនិតរបស់យើងខ្ញុំ ឱ្យយើងខ្ញុំប្រព្រឹត្តគ្រប់កិច្ចការស្របតាមជំនឿ ដែលយើងខ្ញុំប្រកាស។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។