១៩ ឧសភា ២០២៦

Written on 11/02/2026

Mary Siya Khim

រដូវបុណ្យចម្លង សប្តាហ៍ទី៧ ថ្ងៃអង្គារ

(ពេលព្រឹក)

ការអញ្ជើញមុនអធិដ្ឋាននៅពេលព្រឹក

ឱព្រះអម្ចាស់អើយ! សូមបើកបបូរមាត់របស់ទូលបង្គំ
សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ព្រះអម្ចាស់មានព្រះជន្មរស់ឡើងវិញមែន អាលេលូយ៉ា !

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៨៥

ការសង្គ្រោះ គឺនៅជិតយើងបង្កើយ

ព្រះជាម្ចាស់បានប្រទានពរដល់ទឹកដីរបស់យើង នៅពេលព្រះសង្គ្រោះបានយាងមកផែនដីនេះ (លោកអូរីហ្សេន)។

បន្ទរទី១ ៖ ព្រះអង្គនឹងយាងមកវិញ ប្រទានឱ្យយើងខ្ញុំរស់រានមានជីវិត ដើម្បីឱ្យប្រជារាស្ដ្ររបស់ព្រះអង្គមានអំណរសប្បាយរួមជាមួយព្រះអង្គ អាលេលូយ៉ា!

២-	បពិត្រព្រះអម្ចាស់! ព្រះអង្គគាប់ព្រះហឫទ័យនឹងទឹកដីរបស់ព្រះអង្គ ព្រះអង្គបាននាំពូជពង្សរបស់លោកយ៉ាកុប ដែលជាប់ជាឈ្លើយនោះឱ្យវិលត្រឡប់មកវិញ។
៣-	ព្រះអង្គបានលើកលែងទោសឱ្យប្រជារាស្ត្ររបស់ព្រះអង្គ ព្រះអង្គបានអត់ទោសគេឱ្យរួចពីអំពើបាបទាំងប៉ុន្មាន។
៤-	ព្រះអង្គលែងព្រះពិរោធនឹងយើងខ្ញុំ ព្រះអង្គឈប់ខ្ញាល់នឹងយើងខ្ញុំទៀតហើយ។
៥-	ឱព្រះជាម្ចាស់ជាព្រះសង្គ្រោះនៃយើងខ្ញុំអើយ! សូមប្រោសឱ្យយើងខ្ញុំវិលត្រឡប់មករកព្រះអង្គវិញ សូមឈប់ប្រកែប្រកាន់យើងខ្ញុំទៀតទៅ។
៦-	តើព្រះអង្គខ្ញាល់នឹងយើងខ្ញុំរហូតឬ? តើព្រះអង្គទ្រង់ព្រះពិរោធនឹងយើងខ្ញុំអស់កល្បជាអង្វែងតរៀងទៅឬ?
៧-	តើព្រះអង្គមិនយាងមកវិញ ប្រទានឱ្យយើងខ្ញុំរស់រានមានជីវិត ដើម្បីឱ្យប្រជារាស្ត្ររបស់ព្រះអង្គមានអំណរសប្បាយរួមជាមួយព្រះអង្គទេឬ?
៨-	ឱព្រះអម្ចាស់អើយ! សូមសម្តែងព្រះហឫទ័យមេត្តាករុណាចំពោះយើងខ្ញុំ សូមសង្គ្រោះយើងខ្ញុំផង!
៩-	ខ្ញុំត្រង់ត្រាប់ស្តាប់សេចក្តីដែលព្រះជាអម្ចាស់មានព្រះបន្ទូល ព្រះអង្គមានព្រះបន្ទូលថា នឹងប្រទានសេចក្តីសុខសាន្តមកប្រជារាស្ត្រដែលជឿលើព្រះអង្គ គឺអស់អ្នកដែលមិនបែរចិត្តគំនិតទៅរកអំពើលេលារបស់ខ្លួនវិញ។
១០-	ក្នុងពេលឆាប់ៗ ព្រះអង្គនឹងសង្គ្រោះអស់អ្នកដែលគោរពកោតខ្លាចព្រះអង្គ សិរីរុងរឿងនឹងមកសណ្ធិតនៅលើទឹកដីរបស់យើង។
១១-	ព្រះអម្ចាស់នឹងសម្តែងព្រះហឫទ័យមេត្តាករុណា និងព្រះហឫទ័យស្មោះស្ម័គ្រ យុត្តិធម៌ និងសេចក្តីសុខសាន្ត ជួបគ្នានៅលើផែនដី។
១២-	សេចក្តីពិតនឹងដុះចេញពីដីមក សេចក្តីសុចរិតក៏លេចចេញមកពីផ្ទៃមេឃដែរ។
១៣-	ព្រះអម្ចាស់ផ្ទាល់ប្រទានសុភមង្គលមកយើង ទឹកដីរបស់យើងក៏បង្កើតភោគផល។
១៤-	សេចក្តីសុចរិតដើរនៅមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអង្គនឹងយាងមកវិញ ប្រទានឱ្យយើងខ្ញុំរស់រានមានជីវិត ដើម្បីឱ្យប្រជារាស្ដ្ររបស់ព្រះអង្គមានអំណរសប្បាយរួមជាមួយព្រះអង្គ អាលេលូយ៉ា!

បទលើកតម្កើងតាមព្យាការីអេសាយ (អស ២៦,១-៤.៧-៩.១២)

ទំនុកតម្កើងក្រោយពេលមានជ័យជម្នះលើខ្មាំងសត្រូវ

កំពែងរបស់ក្រុងមានគ្រឹះដប់‌ពីរ (វវ ២១,១៤)។

បន្ទរទី២ ៖ ឱព្រះអម្ចាស់អើយ ! យើងខ្ញុំផ្ញើជីវិតលើព្រះអង្គ ព្រះអង្គបានប្រទានសេចក្តីសុខសាន្តឱ្យយើងខ្ញុំ អាលេលូយ៉ា!

(បទកាកគតិ)

១-	យើងមានក្រុងមួយ	មាំឥតភ័យព្រួយ	ព្រោះព្រះម្ចាស់បាន
	ប្រទាននូវការ	សង្គ្រោះគ្រប់ប្រាណ	ដូចកំពែងបាន
		ការពាររ៉ាប់រង	។
២-	ចូរយើងបើកទ្វារ	កុំបីរួញរា	កុំឱ្យមានហ្មង
	ឱ្យប្រជាជាតិ	សុចរិតទាំងពួង	ស្ម័គ្រស្មោះកន្លង
		បានចូលមកជិត	។
៣-	បពិត្រព្រះម្ចាស់	ព្រះអង្គទ្រង់ប្រោស	ដល់ប្រជាជាតិ
	មានក្តីសុខសាន្ត	ឥតបីឃ្លាងឃ្លាត	ទាំងជីវិតទៀត
		ផ្ញើព្រះឥតភ្លេច	។
៤-	ចូរមានសង្ឃឹម	ដោយក្តីញញឹម	លើព្រះជានិច្ច
	ទាំងកាយជីវិត	ឥតមានពេលភ្លេច	ជាថ្មរំលេច
		ស្ថិតស្ថេរអស់កល្ប	។
៧-	បពិត្រព្រះម្ចាស់	អស្ចារ្យពេកណាស់	ទ្រង់បង្ហាញដល់
	មនុស្សសុចរិត	បានដឹងបានស្គាល់	មាគ៌ានិមល
		សែនល្អកន្លង	។
៨-	ឱព្រះអម្ចាស់	យើងខ្ញុំទាំងអស់	ជីវិតផ្ញើទ្រង់
	ហើយសូមដើរតាម	មាគ៌ារឿងរុង	ដែលព្រះអង្គទ្រង់
		ត្រួសត្រាយទុកស្រាប់	។
	ចិត្តយើងគ្រប់គ្នា	តែងតែប្រាថ្នា	ថ្លែងមិនឈរឈប់
	ព្រះនាមព្រះអង្គ	ដែលល្បីសាយសព្វ	ពាសពេញលើភព
		ប្រសើរកន្លង	។
៩-	ទោះជាពេលយប់	ចង់ជ្រកក្រោមម្លប់	បារមីនៃទ្រង់
	ទូលបង្គំខំស្វែង	រកតែព្រះអង្គ	តាំងពីព្រឹកព្រាង
		ឥតមានសំចៃ	។
១២-	បពិត្រព្រះម្ចាស់	ប្រសើរពេកណាស់	ទ្រង់តែងអាណិត
	ផ្តល់ក្តីសុខសាន្ត	អ្វីខ្ញុំប្រព្រឹត្ត	ដែលមានមកពិត
		គឺទ្រង់សម្រេច	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ ឱព្រះអម្ចាស់អើយ ! យើងខ្ញុំផ្ញើជីវិតលើព្រះអង្គ ព្រះអង្គបានប្រទានសេចក្តីសុខសាន្តឱ្យយើងខ្ញុំ អាលេលូយ៉ា!

ទំនុកតម្កើងលេខ ៦៧

មនុស្សគ្រប់ជាតិសាសន៍នឹងនាំគ្នាមកក្រាបថ្វាយបង្គំព្រះអម្ចាស់

សូមបង‌ប្អូនជ្រាបថា ព្រះជាម្ចាស់បានប្រទានព្រះបន្ទូល ស្តីអំពីការសង្គ្រោះរបស់ព្រះអង្គឱ្យសាសន៍ដទៃវិញ (កក ២៨,២៨)។

បន្ទរទី៣ ៖ ផែនដីបានបង្កើតភោគផល ប្រជាជាតិទាំងឡាយនាំគ្នាសប្បាយរីករាយ នាំគ្នាស្រែកជយឃោស អាលេលូយ៉ា!

២-	ឱព្រះជាម្ចាស់អើយ! សូមព្រះអង្គអាណិតមេត្តាយើងខ្ញុំ សូមប្រទានពរដល់យើងខ្ញុំ សូមទតមកយើងខ្ញុំដោយព្រះហឫទ័យសប្បុរសផង!
៣-	ដូច្នេះ មនុស្សនៅលើផែនដីនឹងស្គាល់មាគ៌ារបស់ព្រះអង្គ ហើយក្នុងចំណោមប្រជាជាតិទាំងឡាយ គេនឹងស្គាល់ការសង្គ្រោះរបស់ព្រះអង្គ!
៤-	បពិត្រព្រះជាម្ចាស់! សូមឱ្យប្រជាជនទាំងឡាយ នាំគ្នាលើកតម្កើងព្រះអង្គ សូមឱ្យប្រជាជនទាំងអស់រួមគ្នាលើកតម្កើងព្រះអង្គ!
៥-	ប្រជាជាតិទាំងឡាយច្រៀងដោយសប្បាយរីករាយ ដ្បិតព្រះអង្គគ្រប់គ្រងប្រជារាស្ត្រនានាដោយយុត្តិធម៌ ព្រះអង្គដឹកនាំប្រជាជាតិទាំងឡាយនៅលើផែនដី។
៦-	បពិត្រព្រះជាម្ចាស់! សូមឱ្យប្រជាជនទាំងឡាយនាំគ្នាលើកតម្កើងព្រះអង្គ សូមឱ្យប្រជាជនទាំងអស់រួមគ្នាលើកតម្កើងព្រះអង្គ!
៧-	ផែនដីបានបង្កើតភោគផល ព្រះជាម្ចាស់ជាព្រះនៃយើងប្រទានពរឱ្យយើង។
៨-	សូមព្រះជាម្ចាស់ប្រទានពរឱ្យយើង! សូមឱ្យមនុស្សម្នាដែលរស់នៅលើផែនដីទាំងមូល គោរពកោតខ្លាចព្រះអង្គ!

បន្ទរ ៖ ផែនដីបានបង្កើតភោគផល ប្រជាជាតិទាំងឡាយនាំគ្នាសប្បាយរីករាយ នាំគ្នាស្រែកជយឃោស អាលេលូយ៉ា!

ព្រះបន្ទូលរបស់ព្រះជាម្ចាស់ (កក ១៣,៣០-៣៣)

ព្រះ‌ជាម្ចាស់បានប្រោសព្រះ‌អង្គឱ្យរស់ឡើងវិញ។ ព្រះ‌យេស៊ូបានបង្ហាញខ្លួនឱ្យអស់អ្នកដែលបានរួមដំណើរជាមួយព្រះ‌អង្គ ពីស្រុកកាលី‌ឡេទៅក្រុងយេរូ‌សាឡឹម ឃើញអស់‌រយៈពេលជាច្រើនថ្ងៃ។ ឥឡូវនេះ អ្នកទាំងនោះធ្វើជាបន្ទាល់របស់ព្រះ‌អង្គ នៅចំពោះមុខប្រជាជនទៀតផង។ រីឯយើងខ្ញុំវិញ យើងខ្ញុំសូមជូនដំណឹង‌ល្អនេះប្រាប់បង‌ប្អូនថា ព្រះ‌បន្ទូលដែលព្រះ‌ជាម្ចាស់បានសន្យាជាមួយបុព្វបុរសរបស់យើង ព្រះ‌អង្គបានធ្វើតាម ដើម្បីជាប្រយោជន៍ដល់យើង ដែលជាពូជ‌ពង្សរបស់លោកទាំងនោះហើយ គឺព្រះ‌អង្គបានប្រោសព្រះ‌យេស៊ូឱ្យមានព្រះ‌ជន្មរស់ឡើងវិញ ដូចមានចែងទុកក្នុងទំនុកតម្កើងទីពីរថាៈ ព្រះ‌អង្គជាបុត្ររបស់យើងគឺយើងដែលបានបង្កើតព្រះ‌អង្គមកនៅថ្ងៃនេះ។

បន្ទរ៖ ព្រះអម្ចាស់មានព្រះជន្មរស់ឡើងវិញ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះអង្គត្រូវគេព្យួរនៅលើឈើឆ្កាងសម្រាប់យើងខ្ញុំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ ៖ ព្រះ‌អម្ចាស់មានព្រះ‌ជន្មរស់ឡើងវិញ ដូចព្រះ‌អង្គមានព្រះ‌បន្ទូលរួចមកហើយ។ ចូរឱ្យផែនដីត្រេកអរ និងរីករាយឡើង ដ្បិតព្រះអង្គនឹងយាងមកគ្រងរាជ្យអស់កល្បជានិច្ច អាលេលូយ៉ា!

ពាក្យអង្វរសកល

ព្រះគ្រីស្តជាអម្ចាស់មានព្រះបន្ទូលសន្យាថា នឹងចាត់ព្រះវិញ្ញាណដ៏វិសុទ្ធពីព្រះបិតាក្នុងព្រះនាមព្រះអង្គឱ្យមកយើងខ្ញុំ។ ចូរយើងលើកតម្កើងសិរីរុងរឿងព្រះគ្រីស្ត ហើយទូលព្រះអង្គថា ៖

បន្ទរ ៖ បពិត្រព្រះយេស៊ូជាអម្ចាស់ ! សូមប្រទានព្រះវិញ្ញាណរបស់ព្រះអង្គឱ្យយើងខ្ញុំ !

បពិត្រព្រះអម្ចាស់យេស៊ូ ! សូមឱ្យព្រះបន្ទូលរបស់ព្រះអង្គស្ថិតនៅក្នុងយើងខ្ញុំ ទុកដូចជាទ្រព្យសម្បត្តិទាំងអស់ដែលយើងខ្ញុំមាន
—ដូច្នេះ យើងខ្ញុំអាចអរព្រះគុណព្រះអង្គនៅក្នុងទំនុកតម្កើង ក្នុងបទចម្រៀង និងបទលើកតម្កើងតាមផ្លូវវិញ្ញាណ។ (បន្ទរ)

ដោយសារព្រះវិញ្ញាណ ព្រះអង្គបានធ្វើឱ្យយើងខ្ញុំទៅជាបុត្រធីតារបស់ព្រះជាម្ចាស់
—តាមរយៈព្រះវិញ្ញាណ សូមប្រោសឱ្យយើងខ្ញុំអាចចូលរួមជាមួយព្រះអង្គ ដែលតែងតែងហៅរកព្រះនាមព្រះជាម្ចាស់ជាព្រះបិតាជានិច្ចផង។ (បន្ទរ)

សូមព្រះអង្គប្រទានឱ្យយើងខ្ញុំមានព្រះប្រាជ្ញាញាណក្នុងជីវិតប្រចាំថ្ងៃ
—ដើម្បីឱ្យយើងខ្ញុំអាចធ្វើអ្វីគ្រប់យ៉ាង សម្រាប់សិរីរុងរឿងរបស់ព្រះជាម្ចាស់។ (បន្ទរ)

ព្រះអង្គអត់ធ្មត់ ហើយពោរពេញដោយព្រះហឫទ័យមេត្តាករុណា
—សូមឱ្យយើងខ្ញុំរស់នៅដោយសុខសាន្តជាមួយមនុស្សទាំងអស់។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាម្ចាស់នៃព្រះហឫទ័យមេត្តាករុណា និងមានឫទ្ធានុភាព! សូមព្រះអង្គចាត់ព្រះវិញ្ញាណដ៏វិសុទ្ធរបស់ព្រះអង្គ ឱ្យយាងមកគង់សណ្ឋិតក្នុងដួងចិត្តយើងខ្ញុំ និងធ្វើឱ្យយើងខ្ញុំទៅជាព្រះដំណាក់នៃសិរីរុងរឿងរបស់ព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង។
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។