១៥ កក្កដា ២០២៦

រដូវធម្មតា សប្ដាហ៍ទី១៥ ថ្ងៃពុធ

សន្តបូណាវិនទួរ ជាអភិបាល និងជាគ្រូបាធ្យាយព្រះសហគមន៍

(បុណ្យរំឭកចាំបាច់)

 (ពេលព្រឹក)

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ចូរ​យើង​ក្រាប​នៅ​ចំពោះ​ព្រះ‌ភក្ត្រ​ព្រះ‌អម្ចាស់ ដែល​បាន​បង្កើត​យើង​មក។

ទំនុកតម្កើងតាមការជ្រើសរើស

• ទំនុកតម្កើងលេខ ៩៥
• ទំនុកតម្កើងលេខ ១០០
• ទំនុកតម្កើងលេខ ៦៧
• ទំនុកតម្កើងលេខ ២៤

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៨៦

ពាក្យអធិដ្ឋានរបស់មនុស្សកំសត់ទុគ៌តនៅពេលមានទុក្ខព្រួយ

សូមលើកតម្កើងព្រះជាម្ចាស់ ព្រះអង្គជាព្រះបិតាប្រកបដោយព្រះហឫទ័យមេត្តាករុណា។
ព្រះអង្គសម្រាលទុក្ខយើង នៅពេលយើងមានទុក្ខគ្រប់បែបយ៉ាង (២ករ ១,៣-៤)។

បន្ទរទី១ ៖ ឱព្រះអម្ចាស់អើយ ! សូមប្រោសអ្នកបម្រើរបស់ព្រះអង្គឱ្យមានអំណរសប្បាយ ទូលបង្គំផ្ចង់ចិត្តគំនិតទៅរកព្រះអង្គ។

១-	ឱព្រះអម្ចាស់អើយ! សូមផ្ទៀងព្រះកាណ៌ស្តាប់ទូលបង្គំផង! សូមឆ្លើយតបមកទូលបង្គំវិញ ដ្បិតទូលបង្គំជាមនុស្សកំសត់ទុគ៌ត!
២-	សូមរក្សាការពារជីវិតទូលបង្គំផង ដ្បិតទូលបង្គំមានចិត្តស្មោះត្រង់ចំពោះព្រះអង្គ ឱព្រះនៃទូលបង្គំអើយ! សូមសង្គ្រោះអ្នកបម្រើរបស់ព្រះអង្គ ដែលផ្ញើជីវិតលើព្រះអង្គនេះផង!
៣-	ឱព្រះអម្ចាស់អើយ! សូមអាណិតមេត្តាទូលបង្គំ ដ្បិតទូលបង្គំស្រែកហៅរកព្រះអង្គពេញមួយថ្ងៃ។
៤-	ឱព្រះអម្ចាស់អើយ! សូមប្រោសអ្នកបម្រើរបស់ព្រះអង្គឱ្យមានអំណរសប្បាយ ទូលបង្គំផ្ចង់ចិត្តគំនិតទៅរកព្រះអង្គ
៥-	បពិត្រព្រះអម្ចាស់! ព្រះអង្គប្រកបដោយព្រះហឫទ័យសប្បុរស និងតែងតែអត់អោនឱ្យយើងខ្ញុំ ព្រះអង្គមានព្រះហឫទ័យមេត្តាករុណាដ៏លើសលប់ ចំពោះអស់អ្នកដែលអង្វររកព្រះអង្គ។
៦-	ឱព្រះអម្ចាស់អើយ! សូមផ្ទៀងព្រះកាណ៌ស្តាប់ពាក្យអង្វររបស់ទូលបង្គំ សូមយកព្រះហឫទ័យទុកដាក់នឹងសូរសម្រែករបស់ទូលបង្គំផង។
៧-	នៅថ្ងៃមានអាសន្ន ទូលបង្គំអង្វររកព្រះអង្គ ព្រះអង្គក៏ឆ្លើយតបមកទូលបង្គំ។
៨-	បពិត្រព្រះអម្ចាស់! ក្នុងចំណោមព្រះទាំងឡាយ គ្មានព្រះណាដូចព្រះអង្គទេ គ្មានព្រះណាធ្វើការអស្ចារ្យដូចព្រះអង្គឡើយ។
៩-	បពិត្រព្រះអម្ចាស់! ប្រជាជាតិទាំងប៉ុន្មានដែលព្រះអង្គបានបង្កើតមក នឹងនាំគ្នាមកក្រាបថ្វាយបង្គំព្រះអង្គ ហើយលើកតម្កើងសិរីរុងរឿងនៃព្រះនាមព្រះអង្គ។
១០-	ដ្បិតព្រះអង្គជាព្រះដ៏ឧត្តុង្គឧត្តម ព្រះអង្គធ្វើការអស្ចារ្យ មានតែព្រះអង្គប៉ុណ្ណោះដែលជាព្រះជាម្ចាស់។
១១-	ឱព្រះអម្ចាស់អើយ! សូមបង្ហាញមាគ៌ារបស់ព្រះអង្គឱ្យទូលបង្គំស្គាល់ ទូលបង្គំនឹងប្រព្រឹត្តតាមសេចក្តីពិតរបស់ព្រះអង្គ សូមប្រទានឱ្យទូលបង្គំមានចិត្តស្មោះត្រង់ គោរពកោតខ្លាចព្រះនាមព្រះអង្គ។
១២-	បពិត្រព្រះអម្ចាស់ជាព្រះនៃទូលបង្គំ! ទូលបង្គំសូមលើកតម្កើងព្រះអង្គយ៉ាងស្មោះអស់ពីចិត្ត ទូលបង្គំនឹងលើកតម្កើងសិរីរុងរឿងព្រះនាមរបស់ព្រះអង្គរហូតតរៀងទៅ
១៣-	ដ្បិតព្រះអង្គមានព្រះហឫទ័យមេត្តាករុណាចំពោះទូលបង្គំខ្លាំងណាស់ ព្រះអង្គបានរំដោះជីវិតទូលបង្គំឱ្យរួចផុតពីមច្ចុរាជ។
១៤-	បពិត្រព្រះអម្ចាស់! មនុស្សព្រហើនលើកគ្នាប្រឆាំងនឹងទូលបង្គំ មនុស្សឃោរឃៅមួយពួក ចង់ដកជីវិតទូលបង្គំ អ្នកទាំងនោះមិនរវីរវល់នឹងព្រះអង្គទេ។
១៥-	បពិត្រព្រះអម្ចាស់! ព្រះអង្គប្រកបដោយព្រះហឫទ័យអាណិតអាសូរ ព្រះអង្គតែងតែប្រណីសន្តោស ព្រះអង្គអត់ធ្មត់ ហើយពោរពេញទៅដោយមេត្តាករុណាដ៏ស្មោះស្ម័គ្រ។
១៦-	សូមបែរព្រះភក្រ្តមកទតមើលទូលបង្គំ សូមអាណិតមេត្តាទូលបង្គំ សូមប្រទានកម្លាំងមកទូលបង្គំ ហើយសង្គ្រោះទូលបង្គំ ដែលជាខ្ញុំបម្រើរបស់ព្រះអង្គផង!។
១៧-	សូមសម្តែងទីសម្គាល់ដ៏អស្ចារ្យចំពោះទូលបង្គំ ដោយព្រះហឫទ័យសប្បុរស ដើម្បីឱ្យអស់អ្នកដែលស្អប់ទូលបង្គំឃើញ ត្រូវអាម៉ាស់។ បពិត្រព្រះអម្ចាស់! ព្រះអង្គតែងតែសង្គ្រោះ និងសម្រាលទុក្ខទូលបង្គំ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ឱព្រះអម្ចាស់អើយ ! សូមប្រោសអ្នកបម្រើរបស់ព្រះអង្គឱ្យមានអំណរសប្បាយ ទូលបង្គំផ្ចង់ចិត្តគំនិតទៅរកព្រះអង្គ។

បទលើកតម្កើងតាមព្យាការីអេសាយ (អស ៣៣,១៣-១៦)

ការ​វិនិច្ឆ័យ​ត្រឹម​ត្រូវ​របស់​ព្រះជាម្ចាស់

ដ្បិតព្រះអង្គមានព្រះបន្ទូលសន្យានេះ ចំពោះបងប្អូនទាំងអស់គ្នា ចំពោះកូនចៅរបស់បងប្អូន
និងចំពោះអស់អ្នកដែលនៅឆ្ងាយៗទាំងប៉ុន្មានដែរ (កក ២,៣៩)។

បន្ទរទី២ ៖ អ្នកណាដើរតាមសេចក្តីសុចរិត ហើយ​និយាយ​តែសេចក្ដីពិត​ អ្នកនោះមានសុភមង្គលហើយ។

(បទកាកគតិ)

១៣-	ឱអ្នកដែលនៅ	ស្រុកឆ្ងាយៗត្រូវ	នាំគ្នាប្រុងស្តាប់
	អំពីកិច្ចការ	ដែលយើងធ្វើស្រាប់	ត្រូវខំត្រងត្រាប់
		ស្តាប់ទាំងអស់គ្នា	។
	ឯអ្នកដែលនៅ	ជិតៗនេះត្រូវ	កុំនៅរួញរា
	ត្រូវទទួលស្គាល់	បារមីឫទ្ធា	អានុភាពចេស្តា
		យើងខ្លាំងក្លាក្រៃ	។
១៤-	នៅក្រុងស៊ីយ៉ូន	មនុស្សបាបញ័រខ្លួន	រន្ធត់ភិតភ័យ
	ពួកទមិឡតក់ស្លុត	ញ័រអស់ជើងដៃ	គេពោលស្រដី
		ពាក្យដូច្នេះថា	។
	ពួកយើងទាំងអស់	នរណាអាចរស់	ជិតភ្លើងខ្លាំងក្លា
	ឬក្បែរគុកភ្លើង	ឆេះខ្លាំងអស្ចារ្យ	អស់កល្បយូរយារ
		តទៅជានិច្ច	។
១៥-	មានតែអ្នកបាន	ប្រព្រឹត្តតាមដាន	មាគ៌ាសុចរិត
	និងអ្នកនិយាយ	តែពាក្យដែលពិត	ទើបអាចស្ថេរស្ថិត
		កៀកកិតនៅជាប់	។
	គឺអ្នកមិនធ្វើ	ទៅតាមអំពើ	ហិង្សាមិនគាប់
	ចង់រកកម្រៃ	ប្រវ័ញ្ចគៃកិប	មិនទទួលយក
		សំណូកទៀតផង	។
១៦-	មនុស្សបែបនេះ	នឹងបាននៅរស់	កន្លែងខ្ពស់ខ្ពង់
	មានថ្មរឹងមាំ	ជ្រកកោនទៀតផង	អាហារគ្រប់គ្រាន់
		ទាំងទឹកមិនខ្វះ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ អ្នកណាដើរតាមសេចក្តីសុចរិត ហើយ​និយាយ​តែសេចក្ដីពិត​ អ្នកនោះមានសុភមង្គលហើយ។

ទំនុកតម្កើងលេខ ៩៨

ព្រះអម្ចាស់វិនិច្ឆ័យទោស ដោយព្រះហឫទ័យមេត្តាករុណា

នៅក្នុងទំនុកតម្កើងមួយនេះ មានរៀបរាប់អំពីការយាងមកលើកដំបូងរបស់ព្រះអម្ចាស់
ហើយមានមនុស្សគ្រប់ជាតិសាសន៍ នឹងទទួលជឿលើព្រះអង្គ (សន្តអាថាណាស)។

បន្ទរទី៣ ៖ ចូរអបអរសាទរព្រះអម្ចាស់ ជាព្រះមហាក្សត្រ ! ។

១-	ចូរច្រៀងបទថ្មីថ្វាយព្រះអម្ចាស់! ដ្បិតព្រះអង្គបានប្រព្រឹត្តការអស្ចារ្យ ព្រះអង្គយកជ័យជម្នះដោយឫទ្ធិបារមី និងព្រះចេស្តាដ៏វិសុទ្ធរបស់ព្រះអង្គ។
២-	ព្រះអម្ចាស់បានបង្ហាញការសង្គ្រោះរបស់ព្រះអង្គ ព្រះអង្គបានសម្តែងឱ្យប្រជាជាតិនានា ឃើញសេចក្តីសុចរិតរបស់ព្រះអង្គ។
៣-	ព្រះអង្គនៅតែសម្តែងព្រះហឫទ័យមេត្តាករុណា និងព្រះហឫទ័យស្មោះស្ម័គ្រចំពោះកូនចៅអ៊ីស្រាអែលជានិច្ច។ មនុស្សម្នាដែលរស់នៅគ្រប់ទីដាច់ស្រយាលនៃផែនដី បានឃើញការសង្គ្រោះនៃព្រះរបស់យើង។
៤-	មនុស្សនៅលើផែនដីទាំងមូលអើយ! ចូរអបអរសាទរព្រះអម្ចាស់ដោយអំណរ! ចូរស្រែកហ៊ោរយ៉ាងសប្បាយ ព្រមទាំងដេញតូរ្យតន្ត្រីផង!
៥-	ចូរដេញពិណថ្វាយព្រះអម្ចាស់ ចូរដេញយ៉ាងពីរោះថ្វាយព្រះអង្គ
៦-	ចូរផ្លុំត្រែ និងផ្លុំស្នែង ចូរអបអរសាទរព្រះអម្ចាស់ ជាព្រះមហាក្សត្រ!។
៧-	សមុទ្រ និងអ្វីដែលមានជីវិតនៅក្នុងសមុទ្រ ផែនដី និងអ្វីៗដែលរស់នៅលើផែនដី ចូរនាំគ្នាបន្លឺសំឡេងយ៉ាងអឺងកង!
៨-	ទន្លេទាំងឡាយ ចូរអបអរសាទរ ភ្នំទាំងឡាយ ចូរស្រែកហ៊ោរព្រមៗគ្នាឡើង
៩-	នៅចំពោះព្រះភក្រ្តព្រះអម្ចាស់ ដ្បិតព្រះអង្គយាងមកគ្រប់គ្រងផែនដី ព្រះអង្គនឹងគ្រប់គ្រងផែនដីដោយយុត្តិធម៌ ព្រះអង្គនឹងគ្រប់គ្រងប្រជាជនទាំងឡាយដោយទៀងត្រង់។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ចូរអបអរសាទរព្រះអម្ចាស់ ជាព្រះមហាក្សត្រ ! ។

ព្រះបន្ទូលរបស់ព្រះជាម្ចាស់ (យ៉ូប ១,២១.២,១០ខ)

“ខ្ញុំបានចាកចេញពីផ្ទៃម្តាយមកខ្លួនទទេ ខ្ញុំក៏នឹងវិលត្រឡប់ទៅវិញខ្លួនទទេដែរ។ ព្រះអម្ចាស់ប្រទានអ្វីៗមកខ្ញុំ ហើយព្រះអង្គក៏ដកយកពីខ្ញុំវិញដែរ។ សូមលើកតម្កើងព្រះនាមព្រះអម្ចាស់។ យើងទទួលសុភមង្គលពីព្រះជាម្ចាស់យ៉ាងណា យើងក៏ត្រូវទទួលទុក្ខវេទនាពីព្រះអង្គយ៉ាងនោះដែរ! ។

បន្ទរ៖ ឱព្រះជាម្ចាស់អើយ! សូមទាក់‌ទាញចិត្តទូល‌បង្គំ *ឱ្យធ្វើតាមដំបូន្មានរបស់ព្រះ‌អង្គ។ បន្ទរឡើងវិញ៖…
-ហើយឱ្យទូល‌បង្គំមានជីវិតរស់នៅតាមមាគ៌ារបស់ព្រះ‌អង្គ!។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ ៖ ខ្ញុំ​បាន​ស្វែង​រក​ព្រះ‌ប្រាជ្ញា​ញាណ ដោយ​ទូល​អង្វរ​សុំ​ព្រះ‌អម្ចាស់​ឥត​លាក់​លៀម​ឡើយ។ ពេល​ព្រះ‌ប្រាជ្ញា​ញាណ​ចម្រើន​ឡើង ព្រះ‌អង្គ​ប្រៀប​ដូច​ជា​ផ្លែ​ទំពាំង​បាយ​ជូរ​កំពុង​ទុំ ហើយ​ជា​សេចក្តីសប្បាយ​រីក​រាយ​នៅ​ក្នុង​ចិត្តខ្ញុំ។

• តាមបែបសូត្រ
• តាមបែបស្មូត

ពាក្យអង្វរសកល

ព្រះគ្រីស្តបានបូជាព្រះជន្ម នៅលើឈើឆ្កាងសម្រាប់មនុស្សលោក។ សព្វថ្ងៃនេះដែរ ព្រះសហគមន៍ជាព្រះកាយព្រះគ្រីស្ត ស្ម័គ្រចិត្តថ្វាយខ្លួនសម្រាប់អ្នកដទៃ។
យើងខ្ញុំសូមទូលអង្វរព្រះអង្គថា ៖

បន្ទរ ៖ ឱព្រះអម្ចាស់អើយ ! សូមព្រះអង្គនឹករលឹកដល់ព្រះសហគមន៍របស់ព្រះអង្គផង។

ព្រះអង្គជាគង្វាលដ៏សប្បុរស ព្រះអង្គបានប្រទានជីវិត និងពន្លឺរបស់ព្រះអង្គឱ្យយើងខ្ញុំនៅថ្ងៃនេះ
—សូមឱ្យយើងខ្ញុំចេះដឹងគុណចំពោះព្រះអំណោយទានទាំងនេះផង។ (បន្ទរ)

សូមព្រះអង្គទតមើលហ្វូងចៀមដែលព្រះអង្គបានប្រមូលមកក្នុងព្រះនាមព្រះអង្គ ដោយព្រះហឫទ័យអាណិតអាសូរ
—សូមកុំបណ្តោយឱ្យនរណាម្នាក់ដែលព្រះបិតាបានប្រទានមកព្រះអង្គ ត្រូវវិនាសបាត់ឡើយ។ (បន្ទរ)

សូមព្រះអង្គណែនាំព្រះសហគមន៍ ឱ្យចេះប្រណិបត័ន៍តាមមាគ៌ានៃវិន័យរបស់ព្រះអង្គ
—សូមព្រះវិញ្ញាណដ៏វិសុទ្ធជួយរក្សាជំនឿរបស់ព្រះសហគមន៍ផង។ (បន្ទរ)

សូមព្រះអង្គជួយទ្រទ្រង់ព្រះសហគមន៍របស់ព្រះអង្គ នៅក្នុងអគ្គសញ្ញានៃព្រះកាយ និងព្រះបន្ទូល
—សូមឱ្យអាហារនេះជួយពង្រឹងជំនឿរបស់ព្រះសហគមន៍ ឱ្យដើរតាមព្រះអង្គដោយអំណរសប្បាយផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាម្ចាស់ដ៏មានឫទ្ធានុភាពសព្វប្រការ ! នៅថ្ងៃនេះ យើងខ្ញុំសូមនឹករឭកដល់ថ្ងៃកំណើតនៅស្ថានបរមសុខរបស់សន្តបូណាវិនទួរ ជាអភិបាលព្រះសហគមន៍។ សូមឱ្យគុណប្រយោជន៍នៃទេវវិទ្យាដ៏ជ្រាលជ្រៅដែលលោកបានបង្រៀន បំភ្លឺយើងខ្ញុំឱ្យមានជំនឿមាំមួន និងជំរុញយើងខ្ញុំឱ្យស្រឡាញ់អ្នកដទៃយ៉ាងខ្លាំង។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។