១៤ កុម្ភៈ ២០២៦

រដូវធម្មតា សប្ដាហ៍ទី៥ ថ្ងៃសៅរ៍

សន្តស៊ីរីល ជាបព្វជិត
និងសន្តម៉េតូដ ជាអភិបាលព្រះសហគមន៍

(បុណ្យរំឭកចាំបាច់)

 (ពេលព្រឹក)

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ចូរយើងនាំគ្នាមក ឱនកាយថ្វាយ‌បង្គំព្រះ‌ជាម្ចាស់ ដែលគ្រប់គ្រងលើអ្វីៗទាំងអស់ និងជាស្នាព្រះហស្តដ៏អស្ចារ្យដែលព្រះអង្គបានបង្កើតមក! 

ទំនុកតម្កើងតាមការជ្រើសរើស

• ទំនុកតម្កើងលេខ ៩៥
• ទំនុកតម្កើងលេខ ១០០
• ទំនុកតម្កើងលេខ ៦៧
• ទំនុកតម្កើងលេខ ២៤

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,១៤៥-១៥២

វិន័យ​របស់​ព្រះ‌អម្ចាស់

សេចក្តីស្រឡាញ់នាំឱ្យប្រតិបត្តិតាមវិន័យបានពេញលក្ខណៈ (រ៉ូម ១៣,១០)។

បន្ទរទី១ ៖ ទូល‌បង្គំសញ្ជឹង​គិត​អំពី​ព្រះ‌បន្ទូល​សន្យារបស់​ព្រះ‌អង្គ មួយយប់​ទល់​ភ្លឺ។

១៤៥	បពិត្រព្រះអម្ចាស់! ទូលបង្គំអង្វរព្រះអង្គយ៉ាងអស់ពីចិត្ត សូមឆ្លើយតបមកទូលបង្គំផង ដើម្បីឱ្យទូលបង្គំ ប្រតិបត្តិតាមក្រឹត្យវិន័យរបស់ព្រះអង្គ!
១៤៦	ទូលបង្គំស្រែកអង្វរព្រះអង្គ សូមសង្គ្រោះទូលបង្គំផង ដើម្បីឱ្យទូលបង្គំ ប្រព្រឹត្តតាមដំបូន្មានរបស់ព្រះអង្គ!
១៤៧	ទូលបង្គំស្រែកហៅព្រះអង្គ តាំងពីមុនថ្ងៃរះទៅទៀត ទូលបង្គំទន្ទឹងរង់ចាំព្រះអង្គមានព្រះបន្ទូល។
១៤៨	ទូលបង្គំសញ្ជឹង​គិត​អំពី​ព្រះ‌បន្ទូល​សន្យារបស់​ព្រះ‌អង្គ​មួយ​យប់​ទល់​ភ្លឺ។
១៤៩	សូមស្តាប់ពាក្យអង្វររបស់ទូលបង្គំ ដោយព្រះហឫទ័យមេត្តាករុណា ឱព្រះអម្ចាស់អើយ! សូមជួយទូលបង្គំឱ្យរស់ឡើងវិញ តាមសេចក្តីដែលព្រះអង្គបានសម្រេចផង។
១៥០	អស់អ្នកដែលតាមព្យាបាទទូលបង្គំ នាំគ្នាចូលមកជិតទូលបង្គំ អ្នកទាំងនោះ ឃ្លាតចេញឆ្ងាយពីធម្មវិន័យរបស់ព្រះអង្គ។
១៥១	បពិត្រព្រះអម្ចាស់! ព្រះអង្គគង់នៅជិតទូលបង្គំ វិន័យទាំងប៉ុន្មានរបស់ព្រះអង្គ សុទ្ធតែត្រឹមត្រូវទាំងអស់
១៥២	តាំងពីយូរយារណាស់មកហើយ ទូលបង្គំដឹងថា ព្រះអង្គប្រទានដំបូន្មានឱ្យនៅស្ថិតស្ថេរអស់កល្បជានិច្ច។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ទូល‌បង្គំសញ្ជឹង​គិត​អំពី​ព្រះ‌បន្ទូល​សន្យារបស់​ព្រះ‌អង្គ មួយយប់​ទល់​ភ្លឺ។

បទលើកតម្កើងតាមគម្ពីរដំណើរឆ្ពោះទៅកាន់សេរីភាព (សរ ១៥,១-៤.៨-១៣.១៧-១៨)

ចម្រៀងនៃជ័យជម្នះ ក្រោយពីឆ្លងកាត់សមុទ្រក្រហម

អស់​អ្នក​ដែល​បាន​ឈ្នះ​សត្វ​តិរច្ឆាន….នាំគ្នាច្រៀងចម្រៀងរបស់លោកម៉ូសេ ជាអ្នក​បម្រើរបស់ព្រះជាម្ចាស់ (វវ ១៥,២-៣)។

បន្ទរទី២ ៖ ព្រះអម្ចាស់​ជា​កម្លាំង​របស់​ខ្ញុំ ខ្ញុំ​ច្រៀង​ថ្វាយ​ព្រះអង្គ ព្រះអង្គសង្គ្រោះ​ខ្ញុំ។

(បទព្រហ្មគីតិ)

១-	ខ្ញុំស្រែកច្រៀងថ្វាយព្រះ	ជាអម្ចាស់ដែលមានជ័យ
	លើទ័ពសេះល្បាញល្បី	លិចលង់ក្ស័យក្នុងសមុទ្រ	។
២-	ព្រះម្ចាស់ជាកម្លាំង	ខ្ញុំឈ្នះខ្មាំងមិនភ័យស្លុត
	ខ្ញុំសូមឱនក្រាបលុត	ទាំងច្រៀងបទថ្កើងព្រះអង្គ	។
	ព្រោះទ្រង់បានសង្គ្រោះ	ខ្ញុំឲ្យរស់ផុតសៅហ្មង
	ព្រះឪពុកខ្ញុំផង	ព្រះខ្ពស់ខ្ពង់លើសអ្វីៗ	។
៣-	ទ្រង់ជាវីរបុរស	ប្រសើរខ្ពស់លើផែនដី
	អង់អាចពូកែក្រៃ	ព្រះនាមថ្លៃ “ព្រះអម្ចាស់	។
៤-	ព្រះអង្គបានធ្វើឲ្យ	កងទ័ពថយវិនាសអស់
	ទាំងទ័ពទាំងរទេះ	ត្រូវវិនាសក្នុងសមុទ្រ	។
៨-	ពេលខ្យល់បក់បោកមក	ទឹករលកផ្តុំគ្នាឡើង
	ទំនប់ទឹករលើង	មកនៅគឿងសមុទ្រជាន់	។
៩-	ខ្មាំងសត្រូវពោលថា	ខ្ញុំដេញគេតាមឲ្យទាន់
	ខ្ញុំទទួលជយភណ្ឌ	ច្រើនគ្រប់គ្រាន់ទើបចាត់ការ	។
១០-	ព្រះអង្គទ្រង់ផ្លុំខ្យល់	ទឹកវិលវល់គ្រប់កាយា
	ពួកគេលិចមរណា	ក្នុងជលសាដូចសំណ	។
១១-	បពិត្រព្រះអម្ចាស់	ប្រសើរណាស់ពេញបវរ
	តើមានព្រះណាល្អ	យុត្តិធម៌ដូចព្រះអង្គ ?	។
	ទ្រង់វិសុទ្ធរឿងរុង	អស្ចារ្យខ្លាំងពេកកន្លង
	គួរស្ញែងខ្លាចព្រឺផង	ហើយមានទាំងឫទ្ធីខ្ពស់	។
១២-	ព្រះអង្គក្តៅព្រះទ័យ	គ្មានប្រណីគិតស្រណោះ
	ពេលទ្រង់លើកព្រះហស្ត	ផែនដីប្រេះស្រូបគេឈឹង	។
១៣-	ព្រះអង្គបានលោះលា	រាស្រ្តគ្រប់គ្នាមានរំពឹង
	ដឹកនាំគេតម្រង់	ដំណាក់ទ្រង់ដ៏ឧត្តម	។
១៧-	ព្រះអង្គនាំប្រជា	រាស្រ្តគ្រប់គ្នាទៅលើភ្នំ
	ជាចំណែកដ៏ធំ	កន្លែងសំណាក់ព្រះអង្គ	។
	ឱព្រះអម្ចាស់អើយ	ព្រះអង្គហើយដែលបានសង់
	ទីសក្ការៈត្រចង់	ដោយហស្តទ្រង់កសាងផ្ទាល់	។
១៨-	ព្រះម្ចាស់នឹងគ្រងរាជ្យ	ពេញអំណាចអស់កប្បកល្ប
	ជានិច្ចគ្មានពិភាល់	ជារៀងរាល់អង្វែងទៅ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ព្រះអម្ចាស់​ជា​កម្លាំង​របស់​ខ្ញុំ ខ្ញុំ​ច្រៀង​ថ្វាយ​ព្រះអង្គ ព្រះអង្គសង្គ្រោះ​ខ្ញុំ។

ទំនុកតម្កើងលេខ ១១៧

ចូរសរសើរតម្កើងព្រះអម្ចាស់! ដ្បិតព្រះអង្គមានព្រះហឫទ័យមេត្តាករុណា

រីឯសាសន៍ដទៃវិញ គេលើកតម្កើងសិរីរុងរឿងរបស់ព្រះជាម្ចាស់
ដោយព្រះអង្គ​សម្តែង​ព្រះហឫទ័យមេត្តាករុណាដល់គេ (រ៉ូម ១៥,៩)។

បន្ទរទី៣ ៖ ប្រជាជាតិទាំងឡាយអើយ ! ចូរសរសើរតម្កើងព្រះអម្ចាស់ !

១	ប្រជាជាតិទាំងឡាយអើយ! ចូរសរសើរតម្កើងព្រះអម្ចាស់! ប្រជារាស្ត្រទាំងប៉ុន្មានអើយ! ចូរលើកតម្កើងសិរីរុងរឿងរបស់ព្រះអង្គ!
២	ដ្បិតព្រះអង្គមានព្រះហឫទ័យមេត្តាករុណាចំពោះយើងពន់ពេកក្រៃ ព្រះអម្ចាស់មានព្រះហឫទ័យស្មោះស្ម័គ្រចំពោះយើងរហូតតរៀងទៅ។ សូមសរសើរតម្កើងព្រះអម្ចាស់។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ប្រជាជាតិទាំងឡាយអើយ ! ចូរសរសើរតម្កើងព្រះអម្ចាស់ !

ព្រះបន្ទូលរបស់ព្រះជាម្ចាស់ (២សល ១,១០-១១)​

បងប្អូនអើយ! ចូរខំប្រឹងយកចិត្តទុកដាក់ធ្វើឱ្យការត្រាស់ហៅ និងការជ្រើស​រើស​របស់ព្រះជាម្ចាស់ បានកាន់តែខ្ជាប់ខ្ជួនឡើងថែមទៀត។ ធ្វើយ៉ាងនេះ បងប្អូនមុខជា​មិនជំពប់ដួលឡើយ។ ដូច្នេះ បងប្អូននឹងទទួលសិទ្ធិដ៏ធំទូលំទូលាយ អាចចូលទៅ​ក្នុងព្រះរាជ្យ ដែលនៅស្ថិតស្ថេរអស់កល្បជានិច្ច គឺព្រះរាជ្យរបស់ព្រះយេស៊ូគ្រីស្ត ជា​ព្រះអម្ចាស់ និងជាព្រះសង្គ្រោះរបស់យើង។

បន្ទរ៖ ឱ​ព្រះ‌អម្ចាស់​អើយ ទូល‌បង្គំស្រែក​អង្វរ​ព្រះ‌អង្គ *ព្រះ‌អង្គ​ជា​ជម្រករបស់ទូល‌បង្គំ។ បន្ទរឡើងវិញ៖…
-នៅ​ក្នុង​ពិភពលោក​នេះ ទូល‌បង្គំគ្មានអ្វីផ្សេង​ទៀត​ក្រៅ​ពី​ព្រះ‌អង្គឡើយ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ ព្រម​ទាំង​ឱ្យ​យើង​រស់​នៅបាន​បរិសុទ្ធ និង​សុចរិត ជា​ទី​គាប់​ព្រះហឫទ័យ​ព្រះជាម្ចាស់ ជា​រៀង​រាល់​ថ្ងៃ​រហូត​អស់​មួយ​ជីវិត។

• តាមបែបសូត្រ
• តាមបែបស្មូត

ពាក្យអង្វរសកល

ព្រះគ្រីស្តបានក្លាយទៅជាមនុស្ស ដើម្បីឱ្យយើងទៅជាបុត្រធីតារបស់ព្រះបិតា។ ព្រះអង្គអធិដ្ឋានសម្រាប់យើង នៅចំពោះព្រះភក្ត្រព្រះបិតា។​ ចូរយើងអរ​ព្រះគុណព្រះអង្គចំពោះព្រះហឫទ័យមេត្តាករុណារបស់ព្រះអង្គ និងសូមទូលអង្វរព្រះអង្គថា ៖

បន្ទរ៖ បពិត្រព្រះជាអម្ចាស់ ! សូមព្រះអង្គចែករំលែកទ្រព្យសម្បត្តិនៃសេចក្តីស្រឡាញ់ឱ្យយើងខ្ញុំផង !

នៅក្នុងអគ្គសញ្ញាជ្រមុជទឹក ព្រះអង្គបានប្រទានពន្លឺដល់យើងខ្ញុំ
—ហើយយើង​ខ្ញុំ​សូមឧទ្ទិសថ្ងៃនេះទៅព្រះអង្គផង។ (បន្ទរ)

យើងខ្ញុំសូមលើកតម្កើងសិរីរុងរឿងរបស់ព្រះអង្គគ្រប់ពេលវេលា
—សូមឱ្យរាល់កិច្ចការដែលយើង​ខ្ញុំប្រព្រឹត្ត​បានលើកតម្កើងព្រះអង្គផង។ (បន្ទរ)

ព្រះនាងម៉ារីជាព្រះមាតារបស់យើងខ្ញុំ បានស្តាប់បង្គាប់ព្រះបន្ទូលរបស់ព្រះអង្គ
—សូមព្រះបន្ទូលរបស់ព្រះអង្គផ្តល់ផ្លែផ្កាក្នុងជីវិតរបស់យើងខ្ញុំផង។ (បន្ទរ)

សូមព្រះអង្គប្រទានសេចក្តីក្លាហានដល់យើងខ្ញុំ នៅពេលយើងខ្ញុំជួបប្រទះនូវ​ទុក្ខលំបាក
—ហើយសូមព្រះអង្គពង្រឹងជំនឿ សេចក្តីសង្ឃឹមលើព្រះបន្ទូលសន្យារបស់ព្រះអង្គ និងសេចក្តីស្រឡាញ់ចំពោះព្រះហឫទ័យរបស់ព្រះអង្គផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាជាអម្ចាស់ ! ព្រះអង្គបំភ្លឺជនជាតិស្លាវច្រើននាក់ឱ្យស្គាល់ព្រះអង្គតាមរយៈសន្តស៊ីរីល និងសន្តម៉េតូដ ជាបងប្អូន។ សូមព្រះអង្គមេត្តាប្រោសយើងខ្ញុំឱ្យយល់ពីអត្ថន័យនៃព្រះបន្ទូល និងមានជំនឿពិតប្រាកដ ព្រមទាំងរួបរួមគ្នាជាធ្លុងតែមួយ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។