ថ្ងៃចន្ទ

ឱ! ព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន!
អាលេលូយ៉ា!

អរគុណព្រះម្ចាស់

បន្ទរ	អរគុណព្រះម្ចាស់	អរព្រះគុណទាំងអស់គ្នា	ព្រោះទ្រង់ការពារ
	យើងរាល់គ្នា	ឱ្យផុតទុក្ខ	ឱ្យរស់ស្រណុក
	នៅក្នុងសុខសន្តិភាព	ហើយផ្តល់កម្លាំង	ក្នុងជីវិតរស់នៅសព្វថ្ងៃ។
១	ព្រះអង្គជាម្ចាស់	មានតែមួយមែនពិត	ទ្រង់បានបង្កើត
	ផ្ទៃមេឃ និងដី	អស្ចារ្យពេកក្រៃ	អស្ចារ្យពេកក្រៃ
	ទុកឱ្យយើងខ្ញុំ	សង់លំនៅរស់នៅអើយ	។
២	ព្រះអង្គជាម្ចាស់	ខ្ពង់ខ្ពស់សោភាពិត	ទ្រង់បានបង្កើត
	សត្វគោក និងទឹក	អស្ចារ្យពេកក្រៃ	អស្ចារ្យពេកក្រៃ
	ទុកឱ្យយើងខ្ញុំ	បរិភោគរស់នៅអើយ	។
៣	ព្រះអង្គជាម្ចាស់	ធំលើសពីការស្មាន	ទ្រង់បានបង្កើត
	ឈើព្រៃ និងទឹក	អស្ចារ្យពេកក្រៃ	អស្ចារ្យពេកក្រៃ
	ទុកឱ្យយើងខ្ញុំ	យកប្រើប្រាស់រស់នៅអើយ	។

ទំនុកតម្កើងលេខ ៨៦ សូមប្រទានឱ្យខ្ញុំមានចិត្ដស្មោះត្រង់

សូមលើកតម្កើងព្រះអម្ចាស់ ជាព្រះបិតារបស់ព្រះយេស៊ូ ជាអម្ចាស់នៃយើងខ្ញុំ។ ព្រះអង្គជាព្រះបិតា ប្រកបដោយព្រះហឫទ័យមេត្ដាករុណា និងជាព្រះដែលជួយសម្រាលទុក្ខគ្រប់បែបយ៉ាងទាំងអស់។ (២ ករ ១,៣)

រដូវធម្មតា	បពិត្រព្រះអម្ចាស់ដែលមានព្រះហឫទ័យមេត្ដាករុណាដ៏លើសលប់! សូមផ្ទៀងព្រះការណ៌ស្ដាប់ពាក្យអង្វររបស់ទូលបង្គំ។
រដូវរង់ចាំ	ទូលបង្គំផ្ចង់ចិត្ដគំនិតទៅរកព្រះអង្គ សូមរក្សាការពារជីវិតទូលបង្គំផង។
រដូវបុណ្យណូអែល	បពិត្រព្រះអម្ចាស់! ប្រជាជាតិនានានឹងនាំគ្នាមកក្រាបថ្វាយបង្គំព្រះអង្គ។
រដូវសែសិបថ្ងៃ	សូមប្រទានឱ្យទូលបង្គំមានចិត្ដស្មោះត្រង់គោរពកោតខ្លាចព្រះនាមព្រះអង្គ។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!

 

១	ឱ! ព្រះអម្ចាស់អើយ! សូមផ្ទៀងព្រះកាណ៌ស្ដាប់ទូលបង្គំផង! សូមឆ្លើយតបមកទូលបង្គំវិញ ដ្បិតទូលបង្គំជាមនុស្សកំសត់ទុគ៌ត!
២	សូមរក្សារការពារជីវិតទូលបង្គំផង ដ្បិតទូលបង្គំមានចិត្ដស្មោះត្រង់ចំពោះព្រះអង្គ ឱ! ព្រះនៃទូលបង្គំអើយ! សូមសង្គ្រោះអ្នកបម្រើរបស់ព្រះអង្គ ដែលផ្ញើជីវិតលើព្រះអង្គនេះផង!
៣	ឱ! ព្រះអម្ចាស់អើយ! សូមអាណិតមេត្ដាទូលបង្គំ ដ្បិតទូលបង្គំស្រែកហៅរកព្រះអង្គពេញមួយថ្ងៃ។
៤	ឱ!ព្រះអម្ចាស់អើយ! សូមប្រោសអ្នកបម្រើរបស់ព្រះអង្គឱ្យមានអំណរសប្បាយ ទូលបង្គំផ្ចង់ចិត្តគំនិតទៅរកព្រះអង្គ
៥	បពិត្រព្រះអម្ចាស់! ព្រះអង្គប្រកបដោយព្រះហឫទ័យសប្បុរស និងតែងតែអត់ឱនឱ្យយើងខ្ញុំ ព្រះអង្គមានព្រះហឫទ័យមេត្តាករុណាដ៏លើសលប់ ចំពោះអស់អ្នកដែលអង្វររកព្រះអង្គ។
៦	ឱ!ព្រះអម្ចាស់អើយ! សូមផ្ទៀងព្រះកាណ៌ស្តាប់ពាក្យអង្វររបស់ទូលបង្គំ សូមយកព្រះហប្ញទ័យទុកដាក់នឹងសូរសម្រែករបស់ទូលបង្គំផង។
៧	នៅថ្ងៃមានអាសន្ន ទូលបង្គំអង្វររកព្រះអង្គ ព្រះអង្គក៏ឆ្លើយតបមកទូលបង្គំ។
៨	បពិត្រព្រះអម្ចាស់! ក្នុងចំណោមព្រះទាំងឡាយ គ្មានព្រះណាដូចព្រះអង្គទេ គ្មានព្រះណាធ្វើការអស្ចារ្យដូចព្រះអង្គឡើយ។
៩	បពិត្រព្រះអម្ចាស់! ប្រជាជាតិទាំងប៉ុន្មានដែលព្រះអង្គបានបង្កើតមក នឹងនាំគ្នាមកក្រាបថ្វាយបង្គំព្រះអង្គ ហើយលើកតម្កើងសិរីរុងរឿងនៃព្រះនាមព្រះអង្គ។
១០	ដ្បិតព្រះអង្គជាព្រះដ៏ឧត្ដុង្គឧត្តម ព្រះអង្គធ្វើការអស្ចារ្យ មានតែព្រះអង្គប៉ុណ្ណោះដែលជាព្រះជាម្ចាស់។
១១	ឱ!ព្រះអម្ចាស់អើយ! សូមបង្ហាញមាគ៌ារបស់ព្រះអង្គឱ្យទូលបង្គំស្គាល់ ទូលបង្គំនឹងប្រព្រឹត្តតាមសេចក្តីពិតរបស់ព្រះអង្គ សូមប្រទានឱ្យទូលបង្គំមានចិត្តស្មោះត្រង់ គោរពកោតខ្លាចព្រះនាមព្រះអង្គ។
១២	បពិត្រព្រះអម្ចាស់ជាព្រះនៃទូលបង្គំ! ទូលបង្គំសូមលើកតម្កើងព្រះអង្គយ៉ាងស្មោះអស់ពីចិត្ត ទូលបង្គំនឹងលើកតម្កើងសិរីរុងរឿងព្រះនាមរបស់ព្រះអង្គរហូតតរៀងទៅ
១៣	ដ្បិតព្រះអង្គមានព្រះហឫទ័យមេត្តាករុណាចំពោះទូលបង្គំខ្លាំងណាស់ ព្រះអង្គបានរំដោះជីវិតទូលបង្គំឱ្យរួចផុតពីមច្ចុរាជ។
១៤	បពិត្រព្រះអម្ចាស់! មនុស្សព្រហើនលើកគ្នាប្រឆាំងនឹងទូលបង្គំ មនុស្សឃោរឃៅមួយពួក ចង់ដកជីវិតទូលបង្គំ អ្នកទាំងនោះមិនរវីរវល់នឹងព្រះអង្គទេ។
១៥	បពិត្រព្រះអម្ចាស់! ព្រះអង្គប្រកបដោយព្រះហឫទ័យអាណិតអាសូរ ព្រះអង្គតែងតែប្រណីសន្តោស ព្រះអង្គអត់ធ្មត់ ហើយពោរពេញទៅដោយមេត្តាករុណាដ៏ស្មោះស្ម័គ្រ។
១៦	សូមបែរព្រះភក្ត្រមកទតមើលទូលបង្គំ សូមអាណិតមេត្តាទូលបង្គំ សូមប្រទានកម្លាំងមកទូលបង្គំ ហើយសង្គ្រោះទូលបង្គំដែលជាខ្ញុំបម្រើរបស់ព្រះអង្គផង!។
១៧	សូមសម្ដែងទីសម្គាល់ដ៏អស្ចារ្យចំពោះទូលបង្គំដោយព្រះហឫទ័យសប្បុរស ដើម្បីឱ្យអស់អ្នកដែលស្អប់ទូលបង្គំឃើញ ត្រូវអាម៉ាស់។ បពិត្រព្រះអម្ចាស់! ព្រះអង្គតែងតែសង្គ្រោះ និងសម្រាលទុក្ខទូលបង្គំ។
	សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងលេខ ៨៦(៨៥) បទព្រហ្មគីតិ

១	ឱព្រះអម្ចាស់អើយ	កុំកន្តើយផ្ទៀងព្រះកាណ៌
	ស្តាប់ស័ព្ទខ្ញុំវាចា	ហើយមេត្តាតបវិញផង	។
	ដ្បិតខ្ញុំជាមនុស្ស	កម្សត់ខុសគេទាំងពួង
	ទុរគតពេកកន្លង	តោកយ៉ាកផងរាល់វេលា	។
២	សូមរក្សាជីវិត	ឱ្យខ្ញុំស្ថិតផុតគ្រាំគ្រា
	ដ្បិតខ្ញុំត្រង់ល្អជា	ស្ម័គ្រគ្រប់គ្រាគ្មានគេចកែ	?
	សូមមេត្តាសង្គ្រោះ	ដ្បិតខ្ញុំស្មោះឥតប្រួលប្រែ
	ជាបម្រើនៅក្បែរ	ពឹងផ្អែកតែលើម្ចាស់ថ្លៃ	។
៣	ឱ! ព្រះអម្ចាស់អើយ	អាណិតហើយសូមប្រណី
	ខ្ញុំស្រែកទូលរាល់ថ្ងៃ	រកព្រះអង្គមិនឈប់ឈរ	។
៤	ឱព្រះអម្ចាស់អើយ	សូមប្រោសឱ្យបម្រើល្អ
	មានសប្បាយអំណរ	តម្រង់រកព្រះអម្ចាស់	។
៥	បពិត្រព្រះម្ចាស់ខ្ញុំ	ព្រះឧត្តមសប្បុរសណាស់
	អត់ឱនមិនថ្កោលទោស	តែងសន្តោសខ្ញុំបរិបូណ៌	។
	ព្រះអង្គតែងអាណិត	អ្នកផ្តេកផ្តិតទ្រង់អាសូរ
	អ្នកដែលដង្ហោយថ្ងូរ	ហៅព្រះអង្គមកសង្គ្រោះ	។
៦	ឱព្រះអម្ចាស់អើយ	ទ្រង់ផ្ទៀងហើយសូមសន្តោស
	ពាក្យខ្ញុំស្រែករកនោះ	សូមទ្រង់ប្រោសរូបខ្ញុំផង	។
៧	នៅថ្ងៃមានអាសន្ន	ខ្ញុំបែរបន់មិនរំលង
	អង្វររកព្រះអង្គ	ទ្រង់ឆ្លើយត្រង់តបមកខ្ញុំ	។
៨	ឱព្រះជាអម្ចាស់	ទ្រង់ជាព្រះដ៏ឧត្តម
	ព្រះអង្គសែនសក្តិសម	គ្មានព្រះធំដូចទ្រង់ឡើយ	។
៩	បពិត្រព្រះអម្ចាស់	គ្រប់ជាតិសាសន៍ដែលកើតហើយ
	គេនឹងមិនកន្តើយ	តម្កើងកើយនាមព្រះអង្គ	។
១០	ព្រោះដ្បិតទ្រង់ជាព្រះ	ដ៏ខ្ពង់ខ្ពស់អស្ចារ្យផ្ចង់
	នោះគឺមានតែទ្រង់	ដែលជាអង្គលើលោកា	។
១១	ឱ! ព្រះអម្ចាស់ខ្ញុំ	មេត្តាសូមប្រាប់មាគ៌ា
	ឱ្យខ្ញុំស្គាល់គ្រប់គ្រា	នឹងយាត្រាចេញដើរតាម	។
	យើងខ្ញុំនឹងប្រព្រឹត្ត	តាមសុចរិតមាគ៌ាស្នាម
	ឱ្យខ្ញុំចេះប្រណម្យ	កោតឧត្តមបរមនាម	។
១២	បពិត្រព្រះម្ចាស់ខ្ញុំ	ទូលបង្គំមិនទីមទាម
	ថ្លែងអរព្រះគុណភ្លាម	ឥតលាក់លៀមពីដួងចិត្ត	។
	ខ្ញុំនឹងលើកតម្កើង	ព្រះនាមឡើងអស់កល្បពិត
	ថ្កើងថ្កានខ្ពស់ប្រណីត	រៀងស្ថេរស្ថិតជាប់រហូត	។
១៣	ដ្បិតទ្រង់មានព្រះទ័យ	ករុណាក្រៃមិនរលត់
	ជួយរំដោះជីវិត	ខ្ញុំឱ្យផុតពីក្សិណក្ស័យ	។
១៤	បពិត្រព្រះជាម្ចាស់	ពួកមនុស្សច្រើនពេកក្រៃ
	ព្រហើនមិនយល់អ្វី	គេពួតដៃប្រឆាំងខ្ញុំ	។
	មានអ្នកខ្លាំងពូកែ	បានប្របែប្រមូលផ្តុំ
	ចង់ដកជីវិតខ្ញុំ	មិនបារម្ភព្រះអង្គសោះ	។
១៥	បពិត្រព្រះម្ចាស់អើយ	ព្រះអង្គហើយព្រះទ័យស្មោះ
	ករុណាទ្រង់សន្តោស	សប្បុរសមានមេត្តា	។
១៦	សូមទ្រង់បែរព្រះភក្ត្រ	ទតឱ្យជាក់ខ្ញុំនេះណា
	សូមអាណិតមេត្តា	ខ្ញុំគ្រប់គ្រាកុំបីខាន	។
	សង្គ្រោះខ្ញុំជាអ្នក	បម្រើស្ម័គ្រសូមឱ្យមាន
	កម្លាំងខ្លាំងក្លាហាន	សូមផ្ញើប្រាណនឹងព្រះអង្គ	។
១៧	សូមមេត្តាសម្តែង	ការស្ញប់ស្ញែងគេឃើញផង
	អ្នកស្អប់ខ្ញុំកន្លង	ឃើញព្រះអង្គប្រោសសង្គ្រោះ	។
	សូមឱ្យខ្មាំងសត្រូវ	វាអស់ផ្លូវត្រូវអាម៉ាស់
	នៅពេលដែលទ្រង់ត្រាស់	ប្រោសសង្គ្រោះការពារខ្ញុំ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

ព្រះបន្ទូលរបស់ព្រះជាម្ចាស់ (១ធម ៥,៩ខ-១០)

ព្រះអង្គឱ្យយើងទទួលការសង្គ្រោះ ដោយសារព្រះយេស៊ូគ្រីស្ដជាអម្ចាស់នៃយើងបានសោយទិវង្គតសម្រាប់យើង ដើម្បីឱ្យយើងរស់រួមជាមួយព្រះអង្គ ទោះបីយើងនៅរស់ក្ដី ស្លាប់ក្ដី។

បន្ទរៈ ទូលបង្គំសូមប្រគល់វិញ្ញាណរបស់ទូលបង្គំទៅក្នុងព្រះហស្តព្រះអង្គវិញ។

• ព្រះអង្គបានដោះលែងទូលបង្គំ
• សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។

ទំនុកតម្កើងរបស់លោកតាស៊ីម៉ូន (លក ២,២៩-៣២)

• ជ្រើសរើសបែបសូត្រ
• ជ្រើសរើសបែបស្មូត

 

រដូវធម្មតា

បពិត្រព្រះបិតាជាអម្ចាស់! សូមសង្គ្រោះយើងខ្ញុំ នៅពេលយើងរង់ចាំព្រះអង្គ សូមរក្សាការពារយើងខ្ញុំនៅពេលកំពុងដេកលង់លក់ ដូច្នេះយើងខ្ញុំនឹងទន្ទឹងរង់ចាំព្រះអង្គជាមួយព្រះគ្រីស្ត ហើយយើងខ្ញុំនឹងសម្រាកយ៉ាងសុខសាន្ត។

ពាក្យអធិដ្ឋាន

បពិត្រព្រះអម្ចាស់ នៅពេលដែលយើងខ្ញុំសម្រាកយ៉ាងសុខសាន្ត សូមឱ្យគ្រាប់ពូជរបស់ព្រះរាជ្យនៃស្ថានបរមសុខ ដែលយើងខ្ញុំបានសាបព្រោះនៅថ្ងៃនេះ ដុះលូតលាស់ ចម្រើនឡើងរហូតដល់ពេលច្រូតកាត់ យើងខ្ញុំសូមទូលអង្វរព្រះអង្គ ដោយរួមជាមួយព្រះយេស៊ូជាព្រះគ្រីស្ត និងជាអម្ចាស់យើងខ្ញុំ។ អាម៉ែន។

បពិត្រព្រះអម្ចាស់! សូមឱ្យព្រះភក្ត្ររបស់ព្រះអង្គបញ្ចេញពន្លឺយ៉ាងត្រចះត្រចង់មកលើយើងខ្ញុំ ហើយសូមប្រទានឱ្យយើងខ្ញុំបានប្រកបដោយធម៌មេត្តាករុណារបស់ព្រះអង្គផង! អាម៉ែន។