១០ ឆ្នូ ២០២៦

ពាក្យអធិដ្ឋានពេលចូល

បពិត្រព្រះអម្ចាស់ប្រកបដោយតេជានុភាពសព្វប្រការ! ព្រះអង្គចាត់ព្រះបុត្រាឱ្យយាងមកសង្គ្រោះយើងខ្ញុំ។ សូមទ្រង់ព្រះមេត្តាបំប្រែចិត្តគំនិតរបស់យើងខ្ញុំ ឱ្យស្ម័គ្រចិត្តរៀបចំផ្លូវថ្វាយព្រះគ្រីស្ដដែលកំពុងយាងមក។ សូមឱ្យយើងខ្ញុំយកចិត្តទុកដាក់បម្រើព្រះអង្គ ដោយក្តីស្រឡាញ់ និងដោយជួយអ្នកកម្សត់ទុគ៌តផង។

អត្ថបទទី១៖ សូមថ្លែងព្រះគម្ពីរព្យាការីអេសាយ អស (៤១,១៣-២០)

យើងជាព្រះអម្ចាស់! ជាព្រះរបស់អ្នក! យើងកាន់ដៃស្តាំរបស់អ្នក។ យើងប្រាប់អ្នកថា កុំភ័យខ្លាចអ្វី យើងមកជួយអ្នកហើយ! កូនចៅលោកយ៉ាកុបអើយ! អ្នករាល់គ្នាទន់ខ្សោយ ប្រៀបបាននឹងដង្កូវមែន! តែកុំភ័យខ្លាចអ្វី! ប្រជាជនអ៊ីស្រាអែលអើយ! អ្នកដូចសាកសពមែន! តែយើងមកជួបអ្នក! យើងជាព្រះដ៏វិសុទ្ធរបស់ប្រជាជនអ៊ីស្រាអែលយើងមកលោះអ្នក។ នេះជាព្រះបន្ទូលរបស់ព្រះជាម្ចាស់! យើងធ្វើឱ្យអ្នកប្រែទៅជារនាស់ដែកថ្មី ដែលមានធ្មេញយ៉ាងមុត អ្នកនឹងរាស់កម្ទេចភ្នំតូច ភ្នំធំ ឱ្យទៅជាធូលី។ អ្នកកម្ចាត់កម្ចាយពួកគេឱ្យរសាត់តាមខ្យល់ ហើយខ្យល់កួចយកពួកគេទៅអស់គ្មានសល់។ រីឯអ្នកវិញ អ្នកនឹងរីករាយដោយសារព្រះអម្ចាស់។ អ្នកនឹងខ្ពស់មុខដោយសារព្រះដ៏វិសុទ្ធរបស់ជនជាតិអ៊ីស្រាអែល។ ជនក្រីក្រ និងអ្នកទុគ៌តស្វែងរកទឹកផឹក តែរកមិនបាន គេស្រេកខះក។ យើងជាព្រះអម្ចាស់នឹងតបឆ្លើយចំពោះពាក្យអង្វររបស់ពួកគេ យើងជាព្រះនៃជនជាតិអ៊ីស្រាអែល មិនបោះបង់គេចោលឡើយ។ យើងនឹងធ្វើឱ្យមានទន្លេហូរចេញពីភ្នំត្រងិល ហើយមានប្រភពទឹកផុសឡើងតាមជ្រលងភ្នំ។ យើងនឹងធ្វើឱ្យវាលរហោស្ថានប្រែទៅជាបឹងបួរ ឱ្យដីហួតហែងប្រែទៅជាប្រភពទឹកវិញ។ យើងធ្វើឱ្យមានដើមគគី បេង នាងនួន ពពាលខែដុះក្នុងវាលរហោស្ថាន និងដើមកកោះ ស្រល់ ស្រឡៅ ដុះជាមួយគ្នាតាមព្រៃ របោះ។ ដូច្នេះ មនុស្សទាំងអស់នឹងឃើញហើយស្គាល់ ព្រមទាំងពិចារណា និងយល់នៅពេលជាមួយគ្នាថា គឺព្រះអម្ចាស់ជាព្រះដ៏វិសុទ្ធនៃជនជាតិអ៊ីស្រាអែល បានប្រព្រឹត្តការអស្ចារ្យទាំងនេះ ព្រះអង្គបានបង្កើតការទាំងនោះដោយព្រះបារមីព្រះអង្គផ្ទាល់។

ទំនុកតម្កើងលេខ ១៤៥,១.៩-១៣ បទកាកគតិ

ពិធីអបអរសាទរព្រះគម្ពីរដំណឹងល្អតាម អស (៤៥,៨)

អាលេលូយ៉ា! អាលេលូយ៉ា!
ផ្ទៃមេឃអើយ! ចូរសម្រក់អ្នកសុចរិត ដូចសម្រក់ទឹកសន្សើមមក! ផែនដីអើយ! ចូរបើកឡើង!
ដើម្បីឱ្យការសង្គ្រោះលេចចេញមកផង!។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ (១១,១១-១៥)

ព្រះយេស៊ូមានព្រះបន្ទូលទៅកាន់មហាជនថា៖«ខ្ញុំសុំប្រាប់ឱ្យអ្នករាល់គ្នាបានដឹងច្បាស់ថា ក្នុងបណ្តាមនុស្សដែលកើតមកនាលោកនេះ ពុំមាននរណាមានឋានៈធំជាងលោក យ៉ូហានបាទីស្តឡើយ។ ប៉ុន្តែ អ្នកណាតូចជាងគេនៅក្នុងព្រះរាជ្យនៃស្ថានបរមសុខ អ្នកនោះប្រសើរលើសលោកយ៉ូហានទៅទៀត។ តាំងពីសម័យលោកយ៉ូហានបាទីស្តមកទល់សព្វថ្ងៃ ព្រះរាជ្យនៃស្ថានបរមសុខបានរងនូវអំពើឃោរឃៅ ហើយពួកមនុស្សឃោរឃៅ នាំគ្នាប្រើកម្លាំងដណ្តើមយកព្រះរាជ្យនេះផង។ តាំងពីដើមរហូតមកដល់សម័យលោកយ៉ូហាន ព្យាការីទាំងអស់បានថ្លែងទុកអំពីព្រះរាជ្យនេះ ហើយក្នុងគម្ពីរធម្មវិន័យ ក៏មានចែងទុកអំពីព្រះរាជ្យដែរ។ សុំជឿខ្ញុំចុះ! លោកយ៉ូហានហ្នឹងហើយជាព្យាការីអេលីដែលត្រូវមក។ អ្នកណាឮពាក្យនេះ សុំយកទៅពិចារណាចុះ!»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គបានប្រៀនប្រដៅយើងខ្ញុំ ដោយសារព្យាការីទាំងឡាយ។ តែក្រៅពីព្រះយេស៊ូ គ្មាននរណាអាចគាប់ព្រះហឫទ័យព្រះអង្គបានឡើយ។ សូមទ្រង់ព្រះមេត្តាទទួលកាយ វាចា ចិត្ត ដែលយើងខ្ញុំសូមថ្វាយរួមជាមួយព្រះយេស៊ូដែលបានបូជាព្រះជន្ម។ សូមប្រោសយើងខ្ញុំឱ្យចូលរួមក្នុងសក្ការបូជាដ៏វិសេសរបស់ព្រះយេស៊ូ ដែលទ្រង់មានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រោសប្រទានព្រះបន្ទូល និងព្រះកាយព្រះគ្រីស្តក្នុងអភិបូជានេះ។ សូមទ្រង់ព្រះមេត្តាប្រោសយើងខ្ញុំឱ្យមានចិត្តចង់ជួយអ្នកកើតទុក្ខដែលរស់នៅក្បែរយើងខ្ញុំ សូមឱ្យយើងខ្ញុំបង្ហាញព្រះហឫទ័យស្រឡាញ់របស់ព្រះអង្គឱ្យគេស្គាល់ផង។