៧ កក្កដា ២០២៦

Written on 27/02/2026

Mary Siya Khim

រដូវធម្មតា សប្ដាហ៍ទី១៤ ថ្ងៃអង្គារ

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៩,៥៧-៦៤

ទូល‌បង្គំឥតភ្លេចវិន័យរបស់ព្រះ‌អង្គទេ

បន្ទរទី១ ៖ ទូលបង្គំរិះគិតអំពីកិរិយាមាយាទរបស់ទូលបង្គំ ទូលបង្គំក៏បោះជំហានមករកដំបូន្មានរបស់ព្រះអង្គវិញ។

៥៧	បពិត្រព្រះអម្ចាស់! ទូលបង្គំសូមទូលព្រះអង្គថា ការប្រតិបត្តិតាមព្រះបន្ទូលព្រះអង្គ ជាចំណែកមត៌ករបស់ទូលបង្គំ។
៥៨	ទូលបង្គំខិតខំអស់ពីចិត្ត ឱ្យគាប់ព្រះហឫទ័យព្រះអង្គ សូមប្រណីសន្តោសទូលបង្គំ តាមព្រះបន្ទូលសន្យារបស់ព្រះអង្គផង !
៥៩	ទូលបង្គំរិះគិតអំពីកិរិយាមាយាទរបស់ទូលបង្គំ ទូលបង្គំក៏បោះជំហានមករកដំបូន្មានរបស់ព្រះអង្គវិញ។
៦០	ទូលបង្គំប្រញាប់ប្រញាល់ប្រតិបត្តិតាមវិន័យរបស់ព្រះអង្គ ឥតធ្វេសប្រហែសសោះឡើយ។
៦១	មនុស្សអាក្រក់បានធ្វើឱ្យទូលបង្គំជាប់អន្ទាក់របស់គេ តែទូលបង្គំឥតភ្លេចវិន័យរបស់ព្រះអង្គទេ។
៦២	នៅពាក់កណ្តាលអធ្រាត្រ ទូលបង្គំក្រោកឡើង ដើម្បីលើកតម្កើងព្រះអង្គ ព្រោះតែការសម្រេចដ៏ត្រឹមត្រូវរបស់ព្រះអង្គ។
៦៣	ទូលបង្គំរួមចិត្តគំនិតជាមួយអស់អ្នកដែលគោរពកោតខ្លាចព្រះអង្គ គឺអ្នកដែលប្រតិបត្តិតាមច្បាប់របស់ព្រះអង្គ។
៦៤	បពិត្រព្រះអម្ចាស់! ផែនដីពេញទៅដោយព្រះហឫទ័យមេត្តាករុណារបស់ព្រះអង្គ សូមបង្រៀនឱ្យទូល‌បង្គំស្គាល់វិន័យរបស់ព្រះ‌អង្គ !

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ទូលបង្គំរិះគិតអំពីកិរិយាមាយាទរបស់ទូលបង្គំ ទូលបង្គំក៏បោះជំហានមករកដំបូន្មានរបស់ព្រះអង្គវិញ។

ទំនុកតម្កើងលេខ ៥៥,២-១៥.១៧-២៤

ពាក្យអធិស្ឋានរបស់មនុស្សដែលត្រូវគេក្បត់ចិត្ត

ព្រះយេស៊ូចាប់ផ្តើមភ័យតក់ស្លុត ព្រមទាំងចុកចាប់អន្ទះសាពន់ប្រមាណ (មក ១៤,៣៣)។

បន្ទរទី២ ៖ សូមព្រះ‌អង្គទ្រង់ព្រះមេត្តាសណ្ដាប់ទូលបង្គំ ហើយឆ្លើយតបមកទូល‌បង្គំវិញផង ទូល‌បង្គំខ្វល់ខ្វាយ ទាំងតប់‌ប្រមល់ និងថប់បារម្ភជាខ្លាំង។

(ក)

(បទពាក្យ ៧)

២	ឱព្រះជាម្ចាស់អើយសូមមេត្តា	សូមផ្ទៀងព្រះកាណ៌ស្តាប់ពាក្យខ្ញុំ
	ដែលខំអង្វរទទូចសុំ	សូមទ្រង់សណ្តាប់កុំគេចចេញ	។
៣	ពេលទ្រង់ស្តាប់ពាក្យខ្ញុំរួចហើយ	សូមកុំកន្តើយតបមកវិញ
	ព្រោះខ្ញុំចុកចាប់ទុក្ខទោម្នេញ	ទុក្ខព្រួយពោរពេញក្នុងអាត្មា	។
៤	ពេលឮសម្រែកខ្មាំងសត្រូវ	មនុស្សពាលកំឡៅចិត្តឫស្យា
	ឱ្យរូបខ្ញុំរងទុក្ខវេទនា	ហើយតាមប្រហារដោយកំហឹង	។
៥	ទូលបង្គំតក់ស្លុតពន់ពេកក្រៃ	ញាប់ញ័រភិតភ័យអស់ព្រលឹង
	ស្រយង់ស្រយុតនៅមិននឹង	ដូចគ្មានព្រលឹងខ្លាចមរណា	។
៦	ទូលបង្គំរន្ធត់ពន់ពេកក្រៃ	ដូចជាមានអ្វីផ្តាច់សង្ខារ
	ព្រឺព្រួចក្នុងចិត្តឥតឧបមា	ដូចមនុស្សជរាឈឺដុនដាប	។
៧	ទូលបង្គំតែងនឹកគិតថា	បើខ្ញុំនេះណាប្រែមានស្លាប
	ខ្ញុំនឹងហោះហើររៀងដរាប	រកទីសម្រាប់ជ្រកលាក់ខ្លួន	។
៨	ខ្ញុំនឹងហោះហើរទៅឱ្យឆ្ងាយ	ទៅឯទីនាយសំងំពួន
	ដេកទាំងយប់ថ្ងៃឱ្យបាត់សូន្យ	ក្នុងរហោស្ថានស្មសានស្ងាត់	។
៩	ខ្ញុំនឹងភៀសខ្លួនទៅឱ្យឆ្ងាយ	មិននៅរៀងអាយទៅឱ្យបាត់
	បើទៅឱ្យឆាប់ល្អពេកក្តាត់	ជៀសឱ្យរួចផុតព្យុះសង្ឃរា	។
១០	ឱព្រះអម្ចាស់ថ្លៃខ្ញុំអើយ	សូមជួយកុំឱ្យពួកបច្ចា
	និយាយស្តាប់បានគ្រប់អាត្មា	ព្រោះតែពួកវាចិត្តអប្រីយ៍	។
១១	ទាំងយប់ទាំងថ្ងៃមានសុទ្ធតែ	ទាស់ទែងឥតល្ហែមិនដឹងអី
	អំពើពាលាកាប់ប្រល័យ	សាហាវពេកក្រៃទាំងក្រៅក្នុង	។
១២	ក្នុងក្រុងមានតែឧក្រិដ្ឋកម្ម	រាល់ថ្ងៃខែឆ្នាំមិនរំលង
	នៅតាមទីផ្សារតាមភូមិផង	ជិះជាន់ប៉ុនប៉ងបោកប្រាសគ្នា	។
១៣	ពួកអ្នកដែលតែងជេរតិះដៀល	មិនមែនពួកពាលចិត្តឫស្យា
	បើវាជាពួកធ្លាប់ផ្តន្ទា	នោះខ្ញុំពាំងវាជាមិនខាន	។
១៤	គឺឯងធ្លាប់នៅជាមួយខ្ញុំ	ធ្លាប់នៅជួបជុំសែនសុខសាន្ត
	ជាអ្នកជិតស្និទ្ធឥតរំខាន	ជាមិត្តកល្យាណធ្លាប់ស្ម័គ្រស្មោះ	។
១៥	យើងធ្លាប់ស្និទ្ធស្នាលជាមួយគ្នា	គ្រប់ពេលវេលាមិនទំនាស់
	ធ្លាប់ថ្វាយបង្គំព្រះជាម្ចាស់	វិសុទ្ធពេកណាស់ក្នុងដំណាក់	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ សូមព្រះ‌អង្គទ្រង់ព្រះមេត្តាសណ្ដាប់ទូលបង្គំ ហើយឆ្លើយតបមកទូល‌បង្គំវិញផង ទូល‌បង្គំខ្វល់ខ្វាយ ទាំងតប់‌ប្រមល់ និងថប់បារម្ភជាខ្លាំង។

បន្ទរទី៣ ៖ ខ្ញុំស្រែកអង្វរព្រះជាម្ចាស់ ព្រះអម្ចាស់មុខជានឹងសង្គ្រោះខ្ញុំមិនខាន។

(ខ)

១៧	រីឯខ្ញុំវិញ ខ្ញុំស្រែកអង្វរព្រះជាម្ចាស់ ព្រះអម្ចាស់មុខជានឹងសង្គ្រោះខ្ញុំមិនខាន។
១៨	ខ្ញុំតប់ប្រមល់ ស្រែកថ្ងូរ និងទទូចអង្វរព្រះអង្គ ទាំងព្រឹក ទាំងថ្ងៃត្រង់ ទាំងល្ងាច ព្រះអង្គទ្រង់ព្រះសណ្តាប់ពាក្យរបស់ខ្ញុំហើយ។
១៩	ទោះបីមានខ្មាំងសត្រូវលើកគ្នាសន្ធឹកសន្ធាប់មកវាយប្រហារខ្ញុំក្តី ក៏ព្រះអង្គរំដោះខ្ញុំឱ្យបានរួចជីវិតដែរ។
២០	ព្រះជាម្ចាស់គ្រងរាជ្យតាំងពីដើមរៀងមក សូមព្រះអង្គទ្រង់ព្រះសណ្តាប់ពាក្យរបស់ខ្ញុំ ហើយបំបាក់មុខពួកគេទៅ! អ្នកទាំងនោះមិនដូរគំនិតទេ ពួកគេក៏មិនគោរពកោតខ្លាចព្រះជាម្ចាស់ដែរ។
២១	អ្នកនោះតែងតែវាយប្រហារមិត្តសម្លាញ់ ហើយបំពានលើពាក្យសន្យារបស់ខ្លួនទៀតផង។
២២	ពាក្យសំដីរបស់គេផ្អែមជាងទឹកឃ្មុំទៅទៀត តែចិត្តរបស់គេឃោរឃៅ គិតតែពីធ្វើសឹកសង្គ្រាមប៉ុណ្ណោះ ពាក្យសំដីរបស់គេទន់ភ្លន់ដូចសំពត់សូត្រ តែមុតដូចមុខដាវ។
២៣	ចូរផ្ញើជីវិតលើព្រះអម្ចាស់ នោះព្រះអង្គនឹងជួយគាំទ្រអ្នកជាមិនខាន ព្រះអង្គមិនដែលទុកឱ្យមនុស្សសុចរិតត្រូវបរាជ័យឡើយ។
២៤	ឱព្រះជាម្ចាស់អើយ! សូមធ្វើឱ្យពួកគេធ្លាក់រណ្តៅទៅ! ពួកគេសុទ្ធតែជាឃាតករ និងជនបោកប្រាស់ សូមកុំឱ្យពួកគេអាចរស់បានពាក់កណ្តាលអាយុរបស់ខ្លួនឡើយ ចំណែកឯទូលបង្គំវិញ ទូលបង្គំទុកចិត្តលើព្រះអង្គហើយ។

បន្ទរ៖ ខ្ញុំស្រែកអង្វរព្រះជាម្ចាស់ ព្រះអម្ចាស់មុខជានឹងសង្គ្រោះខ្ញុំមិនខាន។

ពេលព្រឹក (ម៉ោង៩)

ព្រះបន្ទូលរបស់ព្រះជាម្ចាស់ (១ករ ១២,៤-៦)

មានព្រះ‌អំណោយទានផ្សេងៗពីគ្នា តែមានព្រះ‌វិញ្ញាណតែមួយព្រះ‌អង្គទេ ដែលប្រទានឱ្យ។ មានមុខ‌ងារផ្សេងៗពីគ្នា តែយើងបម្រើព្រះ‌អម្ចាស់តែមួយព្រះ‌អង្គដដែល។ មានសកម្ម‌ភាពផ្សេងៗពីគ្នា តែមានព្រះ‌ជាម្ចាស់តែមួយព្រះ‌អង្គទេ ដែលបំពេញសកម្ម‌ភាពទាំងនោះ នៅក្នុងមនុស្សទាំងអស់។

បន្ទរ៖ ព្រះ‌អង្គនឹងសង្គ្រោះអស់អ្នកដែលគោរពកោតខ្លាចព្រះ‌អង្គ។

-សិរីរុងរឿងរបស់ព្រះ‌អង្គនឹងមកសណ្ឋិតនៅលើទឹកដីរបស់យើង។

ពាក្យអធិដ្ឋាន

បពិត្រព្រះជាម្ចាស់ដ៏មានឫទ្ធានុភាពសព្វប្រការ និងមានព្រះជន្មគង់នៅអស់កល្បជានិច្ច ! ព្រះអង្គបានចាត់ព្រះវិញ្ញាណដ៏វិសុទ្ធឱ្យយាងមកសណ្ឋិតលើក្រុមគ្រីស្តទូត ហេតុនេះ សូមព្រះអង្គចាត់ព្រះវិញ្ញាណនៃសេចក្តីស្រឡាញ់នេះ ឱ្យយាងមកសណ្ឋិតលើយើងខ្ញុំ ដើម្បីឱ្យយើងខ្ញុំធ្វើជាសាក្សីអំពីព្រះអង្គនៅចំពោះមុខអ្នកដទៃផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ពេលថ្ងៃត្រង់ (ម៉ោង១២)

ព្រះបន្ទូលរបស់ព្រះជាម្ចាស់ (១ករ ១២,១២-១៣)

ព្រះគ្រីស្តប្រៀបបានទៅនឹងរូបកាយមួយដែលចែកចេញជាច្រើនផ្នែក។ ទោះបីមានសរីរាង្គច្រើនយ៉ាងណាក៏ដោយ ក៏សរីរាង្គទាំងអស់ផ្សំគ្នាជារូបកាយតែមួយដែរ។ យើងទាំងអស់គ្នា ទោះបីជាសាសន៍យូដាក្តី សាសន៍ក្រិកក្តី អ្នកងារក្តី អ្នកជាក្តី ក៏យើងបានទទួលពិធីជ្រមុជក្នុងព្រះវិញ្ញាណតែមួយ ដើម្បីផ្សំគ្នាឡើងជាព្រះកាយតែមួយ ហើយយើងទាំងអស់គ្នាសុទ្ធតែបានទទួលព្រះវិញ្ញាណតែមួយដែរ។

បន្ទរ៖ ឱព្រះ‌បិតាដ៏‌វិសុទ្ធអើយ! សូមថែ‌រក្សាអ្នកទាំងនោះ ដោយព្រះ‌នាមព្រះ‌អង្គផង។

-ដើម្បីឱ្យគេរួមគ្នាជាអង្គតែមួយ ដូចយើងជាអង្គតែមួយដែរ។

ពាក្យអធិដ្ឋាន

បពិត្រព្រះអម្ចាស់ជាព្រះបិតា ! ព្រះអង្គបានបង្ហាញឱ្យលោកសិលាស្គាល់ពីព្រះហឫទ័យរបស់ព្រះអង្គ ដើម្បីនាំមនុស្សគ្រប់ជាតិសាសន៍ឱ្យទទួល ការសង្គ្រោះ។ សូមឱ្យរាល់កិច្ចការដែលយើងខ្ញុំធ្វើ បានលើកតម្កើងព្រះអង្គ និងនាំយកគម្រោងការនៃព្រះហឫទ័យប្រណីសន្តោសរបស់ព្រះអង្គ ដល់មនុស្សទាំងអស់ផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ពេលរសៀល (ម៉ោង៣)

ព្រះបន្ទូលរបស់ព្រះជាម្ចាស់ (១ករ ១២,២៤ខ.២៥-២៦)

ព្រះ‌ជាម្ចាស់បានរៀបចំរូបកាយរបស់យើង ដោយប្រទានសេចក្ដីថ្លៃ‌ថ្នូរ ដល់សរីរាង្គណាដែលខ្វះ‌ខាត ដើម្បីកុំឱ្យមានការបាក់បែកគ្នានៅក្នុងរូបកាយ គឺឱ្យសរីរាង្គយកចិត្តទុកដាក់ជួយគ្នាទៅវិញទៅមក។ ប្រសិនបើមានសរីរាង្គណាមួយឈឺចុកចាប់ សរីរាង្គទាំងអស់ក៏ឈឺចុកចាប់ជាមួយដែរ ប្រសិនបើមានសរីរាង្គណាមួយបានថ្លៃ‌ថ្នូរ សរីរាង្គទាំងអស់ក៏អរសប្បាយជាមួយដែរ។

បន្ទរ៖ ឱព្រះ‌អម្ចាស់ជាព្រះនៃយើងខ្ញុំអើយ! សូមប្រមែ‌ប្រមូលយើងខ្ញុំពី ចំណោមប្រជា‌ជាតិនានាមកវិញ។

-ដើម្បីឱ្យយើងខ្ញុំលើកតម្កើងព្រះ‌នាមដ៏‌វិសុទ្ធរបស់ព្រះ‌អង្គ។

ពាក្យអធិដ្ឋាន

បពិត្រព្រះបិតា! ព្រះអង្គបានចាត់ទេវទូតឱ្យទៅជួបលោកគ័រនេល្យូស ដើម្បីបង្ហាញផ្លូវទៅកាន់ការសង្រ្គោះ។ សូមព្រះអង្គជួយយើងខ្ញុំឱ្យប្រព្រឹត្តកិច្ចការមនុស្សធម៌ ដើម្បីសង្គ្រោះដល់ពិភពលោក ដូច្នេះ ព្រះសហគមន៍អាចនាំយើងខ្ញុំ និងមនុស្សទាំងអស់ចូលទៅចំពោះព្រះភក្រ្តព្រះអង្គ។

យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!