៥ មិថុនា ២០២៦

Written on 19/02/2026

Mary Siya Khim

រដូវធម្មតា សប្តាហ៍ទី៩ ថ្ងៃសុក្រ

សន្តបូនីហ្វាស ជាអភិបាលព្រះសហគមន៍ និងជាមរណសាក្សី

(បុណ្យរំឭកចាំបាច់)

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៩,២៥-៣២

ខ្ញុំជំពាក់ចិត្តនឹងដំបូន្មានព្រះអង្គ

បន្ទរទី១ ៖ ទូល‌បង្គំសប្បាយចិត្តនឹងដើរតាមមាគ៌ារបស់ព្រះ‌អង្គ ដ្បិតព្រះអង្គធ្វើឱ្យចិត្តទូលបង្គំបានភ្លឺស្វាង។

២៥	ទូលបង្គំធ្លាក់ខ្លួនដុនដាបយ៉ាងខ្លាំង សូមប្រោសឱ្យទូលបង្គំបានរស់ ស្របតាមព្រះបន្ទូលរបស់ព្រះអង្គផង!។
២៦	ទូលបង្គំរៀបរាប់អំពីដំណើរជីវិតរបស់ទូលបង្គំ ព្រះអង្គក៏ឆ្លើយតបមកទូលបង្គំ សូមបង្រៀនក្រិត្យវិន័យរបស់ព្រះអង្គ ឱ្យទូលបង្គំស្គាល់ផង!។
២៧	សូមជួយទូលបង្គំ ឱ្យយល់អំពីអត្ថន័យនៃច្បាប់របស់ព្រះអង្គ ទូលបង្គំទើបនឹងសញ្ជឹងគិតអំពីការអស្ចារ្យដែលព្រះអង្គបានសម្តែង!។
២៨	ទូលបង្គំមានទុក្ខយំសោកសង្រេង សូមលើកទឹកចិត្តទូលបង្គំឡើងវិញ តាមព្រះបន្ទូលសន្យារបស់ព្រះអង្គផង។
២៩	សូមនាំទូលបង្គំឱ្យចេញឆ្ងាយពីមាគ៌ាភូតភរនៃព្រះក្លែងក្លាយ សូមប្រណីសន្តោសបង្រៀនធម្មវិន័យឱ្យទូលបង្គំស្គាល់ផង!
៣០	ទូលបង្គំប្តេជ្ញាចិត្តស្មោះត្រង់នឹងព្រះអង្គ ទូលបង្គំសុខចិត្តធ្វើតាមសេចក្តីដែលព្រះអង្គសម្រេចមក។
៣១	ទូលបង្គំជំពាក់ចិត្តនឹងដំបូន្មានរបស់ព្រះអង្គ ឱព្រះអម្ចាស់អើយ! សូមកុំឱ្យទូលបង្គំខកចិត្តឡើយ!
៣២	ទូលបង្គំយកចិត្តទុកដាក់នឹងដើរតាមមាគ៌ារបស់ព្រះអង្គ ដ្បិតព្រះអង្គប្រោសចិត្តគំនិតទូលបង្គំឱ្យបានភ្លឺស្វាង។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ទូល‌បង្គំសប្បាយចិត្តនឹងដើរតាមមាគ៌ារបស់ព្រះ‌អង្គ ដ្បិតព្រះអង្គធ្វើឱ្យចិត្តទូលបង្គំបានភ្លឺស្វាង។

ទំនុកតម្កើងលេខ ២៦

ពាក្យអធិស្ឋានរបស់ជនស្លូតត្រង់

ព្រះ‌អង្គបានជ្រើស‌រើសយើងក្នុងអង្គព្រះ‌គ្រីស្ត តាំងពីមុនកំណើតពិភព‌លោកមកម៉្លេះ
ដើម្បីឲ្យយើងវិសុទ្ធ និងឥតសៅ‌ហ្មងនៅចំពោះព្រះ‌ភក្ត្រព្រះ‌អង្គ (អភ ១,៤)។

បន្ទរទី២ ៖ ទូលបង្គំទុកចិត្តលើព្រះអម្ចាស់ ! ទូលបង្គំនឹងមិនរង្គោះរង្គើឡើយ !

(បទកាកគតិ)

១-	ឱព្រះអម្ចាស់	ព្រះអង្គជាព្រះ	ប្រពៃឧត្តម
	សូមរកយុត្តិធម៌	ឱ្យទូលបង្គំ	ដែលអស់យើងខ្ញុំ
		ទុកចិត្តព្រះអង្គ	។
២-	ឱព្រះអម្ចាស់	សូមស្ទង់ឱ្យច្បាស់	លចិត្តមើលផង
	ពិនិត្យរូបខ្ញុំ	ហើយពិសោធល្បង	ចិត្តខ្ញុំឥតហ្មង
		ស្មោះស្ម័គ្រជានិច្ច	។
៣-	ទូលបង្គំស្រមៃ	នឹកពីព្រះទ័យ	ព្រះអង្គឥតភ្លេច
	ហើយបានធ្វើតាម	ឥតមានកែគេច	តាមជាប់ជានិច្ច
		មិនគេចបែកបែរ	។
៤-	ទូលបង្គំមិនធ្លាប់	អង្គុយអែបជាប់	ពួកពាលប៉ោឡែ
	ឬពួកខិលខូច	ជនអាវ៉ាសែ	ពុតត្បុតហូរហែ
		ក៏មិនសេពគប់	។
៥-	ខ្ញុំមិនចូលចិត្ត	ពួកអ្នកប្រព្រឹត្ត	អាក្រក់ងល់ងប់
	មិនធ្វើល្ងីល្ងើ	អង្គុយរួមរួប	ទោះថ្ងៃឬយប់
		នឹងពួកពាលា	។
៦-	ឱព្រះអម្ចាស់	ខ្ញុំសូមប្រកាស	ស្មោះឥតរួញរា
	ទូលបង្គំលាងដៃ	គឺបញ្ជាក់ថា	រូបខ្ញុំគឺជា
		មនុស្សឥតសៅហ្មង	។
៧-	ព្រមទាំងបន្លឺ	សំឡេងរន្ទឺ	អរគុណព្រះអង្គ
	និងរៀបរាប់ពី	ការអស្ចារ្យផង	របស់ព្រះអង្គ
		មានទាំងប៉ុន្មាន	។
៨-	បពិត្រព្រះម្ចាស់	ខ្ញុំចូលចិត្តណាស់	ដំណាក់សុខសាន្ត
	របស់ព្រះអង្គ	គឺជាទីស្ថាន	សិរីថ្កើងថ្កាន
		ព្រះអង្គស្ថិតនៅ	។
៩-	សូមកុំទុកឱ្យ	ខ្ញុំស្លាប់ជាមួយ	មនុស្សបាបអាស្រូវ
	កុំដកជីវិត	ទូលបង្គំយកទៅ	នឹងពួកឃោរឃៅ
		ធ្លាប់បង្ហូរឈាម	។
១០-	ពួកនោះចូលចិត្ត	នាំគ្នាប្រព្រឹត្ត	ផ្ទុយពីបំរាម
	អំពើទុច្ចរិត	ដែលព្រះលោកហាម	ខំបង្ហូរឈាម
		ឬស៊ីសំណូក	។
១១-	ឯខ្ញុំចូលចិត្ត	ធ្វើតែសុចរិត	មិនព្រមច្របូក
	ច្របល់នឹងពួក	ធ្លាប់ស៊ីសំណូក	សូមរំដោះយក
		រូបខ្ញុំនេះផង	។
១២-	រូបខ្ញុំឈរនៅ	កន្លែងត្រឹមត្រូវ	សុចរិតទៀងត្រង់
	ទូលបង្គំនឹងលើក	តម្កើងព្រះអង្គ	ឱ្យខ្ពស់ឧត្តុង
		ក្នុងប្រជុំធំ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ ទូលបង្គំទុកចិត្តលើព្រះអម្ចាស់ ! ទូលបង្គំនឹងមិនរង្គោះរង្គើឡើយ !

ទំនុកតម្កើងលេខ ២៨,១-៣.៦-៩

ការទូលអង្វរ និងពាក្យអរព្រះគុណ

“បពិត្រព្រះបិតា ទូលបង្គំសូមអរព្រះគុណព្រះអង្គ ដែលទ្រង់ព្រះសណ្តាប់ទូលបង្គំ” (យហ ១១,៤១)។

បន្ទរទី៣ ៖ ខ្ញុំទុកចិត្តលើព្រះអម្ចាស់ ហើយព្រះអង្គបានសង្គ្រោះខ្ញុំ។

១	ឱព្រះអម្ចាស់អើយ! ទូលបង្គំស្រែកអង្វររកព្រះអង្គ។ ព្រះអង្គជាថ្មដាការពារនៃទូលបង្គំ! សូមព្រះសណ្តាប់សម្រែករបស់ទូលបង្គំផង! ប្រសិនបើព្រះអង្គនៅស្ងៀម មិនឆ្លើយតបនឹងទូលបង្គំទេនោះ ទូលបង្គំមុខជាធ្លាក់ទៅក្នុងរណ្តៅមិនខាន!
២	ពេលទូលបង្គំដង្ហោយហៅព្រះអង្គ ទូលបង្គំលើកដៃសំពះ ទៅកាន់ទីសក្ការៈរបស់ព្រះអង្គ សូមទ្រង់ព្រះសណ្តាប់ពាក្យអង្វររបស់ទូលបង្គំផង។
៣	សូមកុំដាក់ទោសទូលបង្គំ ដូចព្រះអង្គដាក់ទោសជនពាល និងមនុស្សប្រព្រឹត្តអំពើទុច្ចរិតឡើយ គេនិយាយរាក់ទាក់ជាមួយអ្នកដទៃ តែមានកលល្បិចនៅក្នុងចិត្តនោះ។
៦	សូមលើកតម្កើងព្រះអម្ចាស់! ដ្បិតព្រះអង្គទ្រង់ព្រះសណ្តាប់ពាក្យខ្ញុំស្រែកអង្វរ។
៧	ព្រះអម្ចាស់ជាបន្ទាយ និងជាខែលការពារខ្ញុំ ខ្ញុំទុកចិត្តលើព្រះអង្គ ហើយព្រះអង្គបានសង្គ្រោះខ្ញុំ ខ្ញុំមានចិត្តរីករាយយ៉ាងខ្លាំង ខ្ញុំនឹងសរសើរតម្កើងព្រះអង្គដោយបទចម្រៀង!។
៨	ព្រះអម្ចាស់ជាកម្លាំងការពារប្រជារាស្ត្ររបស់ព្រះអង្គ ព្រះអង្គជាកំពែងសម្រាប់សង្គ្រោះព្រះគ្រីស្ត ដែលព្រះអង្គបានចាក់ប្រេងអភិសេក។
៩	ឱព្រះអម្ចាស់អើយ! សូមសង្គ្រោះប្រជារាស្ត្ររបស់ព្រះអង្គផង! សូមព្រះអង្គធ្វើជាគង្វាលថែរក្សាពួកគេរហូតតរៀងទៅ!។

បន្ទរ ៖ ខ្ញុំទុកចិត្តលើព្រះអម្ចាស់ ហើយព្រះអង្គបានសង្គ្រោះខ្ញុំ។

ពេលព្រឹក (ម៉ោង៩)

ព្រះបន្ទូលរបស់ព្រះជាម្ចាស់ (ភីល ២,២ខ-៤)

សូមបងប្អូនមានចិត្តគំនិតតែមួយ មានសេចក្តីស្រឡាញ់តែមួយ មានចិត្តថ្លើមតែមួយ និងមានឆន្ទៈតែមួយ។ កុំធ្វើអ្វីដោយចង់ប្រកួតប្រជែងគ្នា ឬដោយអួតបំប៉ោងឡើយ ផ្ទុយទៅវិញ ត្រូវដាក់ខ្លួន ហើយចាត់ទុកអ្នកឯទៀតៗ ថាប្រសើរជាងខ្លួន។ ក្នុងចំណោមបងប្អូន ម្នាក់ៗកុំគិតតែពីប្រយោជន៍ផ្ទាល់ខ្លួនឡើយ គឺត្រូវគិតដល់ប្រយោជន៍អ្នកដទៃវិញ។

បន្ទរ៖ ព្រះ‌អម្ចាស់មានព្រះ‌ហឫទ័យមេត្តាករុណា និងស្មោះ‌ត្រង់ជានិច្ច។
—ចំពោះអស់អ្នកដែលគោរពសម្ពន្ធ‌មេត្រី និងគោរពព្រះបណ្ដាំរបស់ព្រះ‌អង្គ។

ពាក្យអធិដ្ឋាន

បពិត្រព្រះយេស៊ូគ្រីស្តជាអម្ចាស់! នៅវេលាម៉ោងនេះ ព្រះអង្គត្រូវគេនាំយកទៅឆ្កាងឱ្យសោយទិវង្គតលើឈើឆ្កាង ដើម្បីសង្គ្រោះពិភពលោក។ យើងខ្ញុំសូមព្រះអង្គលើកលែងទោសសម្រាប់អំពើបាបដែលយើងខ្ញុំបានប្រព្រឹត្ត កាលពីអតីតកាល ហើយសូមព្រះអង្គការពារយើងខ្ញុំពីសេចក្តីអាក្រក់ទាំងឡាយ នៅពេលអនាគតផង។ សូមនាំយើងខ្ញុំចូលក្នុងព្រះរាជ្យនៃសេចក្តីសុខសាន្ត និងអំណរសប្បាយ ជាកន្លែងដែលព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ពេលថ្ងៃត្រង់ (ម៉ោង១២)

ព្រះបន្ទូលរបស់ព្រះជាម្ចាស់ (១២ ថ្ងៃត្រង់) ២ករ ១៣,៤

ព្រះ‌អង្គត្រូវគេឆ្កាង ដោយព្រះ‌អង្គមានភាពទន់ខ្សោយ ប៉ុន្តែ ព្រះ‌អង្គមានព្រះ‌ជន្មរស់ ដោយឫទ្ធា‌នុភាពរបស់ព្រះ‌ជាម្ចាស់។ រីឯយើងវិញក៏ដូច្នោះដែរ យើងទន់ខ្សោយរួមជាមួយព្រះ‌អង្គមែន ប៉ុន្តែ ដោយយល់ដល់បង‌ប្អូន យើងមានជីវិតរស់រួមជាមួយព្រះ‌អង្គ ដោយឫទ្ធា‌នុភាពរបស់ព្រះ‌ជាម្ចាស់។

បន្ទរ៖ ទូល‌បង្គំបានធ្លាក់ខ្លួនដុន‌ដាបយ៉ាងខ្លាំង។
—សូមប្រោសឱ្យទូល‌បង្គំបានរស់ស្របតាមព្រះ‌បន្ទូលរបស់ព្រះ‌អង្គផង។

ពាក្យអធិដ្ឋាន

បពិត្រព្រះយេស៊ូគ្រីស្តជាអម្ចាស់ ! នៅពេលថ្ងៃត្រង់នេះ ភាពងងឹតបានគ្របដណ្តប់ពេញផែនដីទាំងមូល ព្រះអង្គបានជាប់លើឈើឆ្កាង ដូចជាជនរងគ្រោះដែលគ្មានកំហុស ដើម្បីរំដោះយើងខ្ញុំ។ សូមឱ្យពន្លឺរបស់ព្រះអង្គគង់នៅជាមួយនឹងយើងខ្ញុំ ដើម្បីណែនាំយើងខ្ញុំចូលទៅកាន់ជីវិតអស់កល្បជានិច្ច នៅក្នុងព្រះរាជ្យដែលព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ពេលរសៀល (ម៉ោង៣)

ព្រះបន្ទូលរបស់ព្រះជាម្ចាស់ (កូឡ ៣,១២-១៣)

ដោយព្រះជាម្ចាស់បានជ្រើសរើសបង‌ប្អូនធ្វើជាប្រជាជនដ៏‌វិសុទ្ធ និងជាទីស្រឡាញ់របស់ព្រះ‌អង្គ បង‌ប្អូនត្រូវតែកាន់ចិត្តអាណិត‌មេត្តា ចិត្តល្អ សប្បុរស ចេះបន្ទាបខ្លួន មានចិត្តស្លូត‌បូត និងចិត្តខន្តី អត់‌ធ្មត់។ ត្រូវចេះទ្រាំ‌ទ្រគ្នាទៅវិញទៅមក ហើយប្រសិនបើបង‌ប្អូនណាម្នាក់មានរឿងអ្វីមួយនឹងម្នាក់ទៀត ត្រូវតែអត់‌ទោសឱ្យគ្នាទៅវិញទៅមក។ ព្រះ‌អម្ចាស់បានអត់‌ទោសឱ្យបង‌ប្អូនយ៉ាងណា ចូរអត់‌ទោសឱ្យគ្នាទៅវិញទៅមកយ៉ាងនោះដែរ។

បន្ទរ៖ ព្រះ‌អម្ចាស់ប្រកបដោយព្រះ‌ហឫទ័យប្រណី‌សន្ដោស និងអាណិតអាសូរ។
—ព្រះ‌អង្គមានព្រះ‌ហឫទ័យអត់‌ធ្មត់ ហើយពោរ‌ពេញទៅដោយព្រះ‌ហឫទ័យមេត្តា‌ករុណា។

ពាក្យអធិដ្ឋាន

បពិត្រព្រះយេស៊ូគ្រីស្តជាអម្ចាស់ ! ព្រះអង្គបាននាំចោរដែលកែប្រែចិត្តគំនិតពីការរងទុក្ខនៅលើឈើឆ្កាង ទៅកាន់អំណរសប្បាយនៃព្រះរាជ្យរបស់ព្រះអង្គ។ បពិត្រព្រះអម្ចាស់! នៅពេលយើងខ្ញុំទទួលមរណភាព សូមឱ្យយើងខ្ញុំដែលសារភាពអំពើបាបរបស់ខ្លួនមកឯព្រះអង្គ តាមរយៈទ្វារនៃស្ថានបរមសុខ ដើម្បីឱ្យយើងខ្ញុំមានអំណរសប្បាយអស់កល្បជានិច្ច នៅក្នុងព្រះរាជ្យដែលព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!