២ តុលា ២០២៦

Written on 11/03/2026

Mary Siya Khim

រដូវធម្មតា សប្តាហ៍ទី២៦ ថ្ងៃសុក្រ

ទេវទូតអ្នកការពារដ៏វិសុទ្ធ

(បុណ្យរំឭកចាំបាច់)

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,៧៣-៨០

សូមព្រះអង្គបំភ្លឺខ្ញុំ

បន្ទរទី១ ៖ សូមសម្រាលទុក្ខទូល‌បង្គំ ដោយ‌សារព្រះ‌ហឫទ័យស្មោះស្ម័គ្ររបស់ព្រះ‌អង្គ តាមព្រះ‌បន្ទូលដែលព្រះអង្គបានសន្យា។

៧៣	ព្រះអង្គបានបង្កើតទូលបង្គំមក ហើយប្រទានឱ្យទូលបង្គំបានរឹងប៉ឹងឡើង សូមប្រទានឱ្យទូលបង្គំមានប្រាជ្ញា ដើម្បីស្វែងយល់វិន័យរបស់ព្រះអង្គ។
៧៤	ពេលអស់អ្នកគោរពកោតខ្លាចព្រះអង្គឃើញទូលបង្គំ គេនឹងមានអំណរ ដ្បិតទូលបង្គំផ្ញើជីវិតលើព្រះបន្ទូលរបស់ព្រះអង្គ។
៧៥	បពិត្រព្រះអម្ចាស់! ទូលបង្គំដឹងថា ការអ្វីដែលព្រះអង្គបានសម្រេច សុទ្ធតែសុចរិតទាំងអស់ ព្រះអង្គដាក់ទោសទូលបង្គំក៏ត្រឹមត្រូវដែរ។
៧៦	សូមសម្រាលទុក្ខទូលបង្គំ ដោយសារព្រះហឫទ័យស្មោះស្ម័គ្ររបស់ព្រះអង្គ តាមព្រះបន្ទូលសន្យាជាមួយទូលបង្គំ ដែលជាអ្នកបម្រើរបស់ព្រះអង្គ។
៧៧	សូមសម្តែងព្រះហឫទ័យមេត្តាករុណាមកលើទូលបង្គំ ដើម្បីឱ្យទូលបង្គំរស់រានមានជីវិតផង ដ្បិតទូលបង្គំពេញចិត្តនឹងធម្មវិន័យរបស់ព្រះអង្គខ្លាំងណាស់។
៧៨	សូមឱ្យមនុស្សអួតបំប៉ោងត្រូវអាម៉ាស់ ដ្បិតពួកគេនិយាយមួលបង្កាច់ទូលបង្គំ រីឯទូលបង្គំវិញ ទូលបង្គំសញ្ជឹងគិតពីច្បាប់របស់ព្រះអង្គ។
៧៩	សូមឱ្យអស់អ្នកដែលគោរពកោតខ្លាចព្រះអង្គ នាំគ្នាមករកទូលបង្គំ ដើម្បីឱ្យបានស្គាល់ដំបូន្មានរបស់ព្រះអង្គ។
៨០	សូមជួយទូលបង្គំឱ្យប្រព្រឹត្តតាមក្រិត្យវិន័យរបស់ព្រះអង្គ ឱ្យបានឥតខ្ចោះ កុំឱ្យទូលបង្គំត្រូវអាម៉ាស់ឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ សូមសម្រាលទុក្ខទូល‌បង្គំ ដោយ‌សារព្រះ‌ហឫទ័យស្មោះស្ម័គ្ររបស់ព្រះ‌អង្គ តាមព្រះ‌បន្ទូលដែលព្រះអង្គបានសន្យា។

ទំនុកតម្កើងលេខ ៥៩,២-៥.១០-១១.១៧-១៨

សូមរំដោះទូល‌បង្គំឱ្យរួចពីកណ្ដាប់ដៃរបស់ខ្មាំងសត្រូវ !

ព្រះបន្ទូលនៃការសង្រ្គោះទាំងនេះ បានបង្រៀនយើងពីការលះបង់ ដែលយើងគួរមានទៅព្រះបិតា (Eusebius of Caesarea)។

បន្ទរទី២៖ សូមការ‌ពារទូល‌បង្គំឱ្យរួចពីកណ្ដាប់ដៃរបស់អស់អ្នកដែលប៉ុនប៉ងធ្វើបាបទូល‌បង្គំ។

(បទកាកគតិ)

២-	ឱព្រះម្ចាស់អើយ	សូមកុំកន្តើយ	ជួយរំដោះខ្ញុំ
	ឱ្យរួចពីខ្មាំង	សត្រូវតូចធំ	វាមានគំនុំ
		ចង់ចាប់ធ្វើបាប	។
៣-	សូមជួយរំដោះ	ជីវិតឱ្យរស់	ជារៀងដរាប
	ផុតពីពួកពាល	ពីអ្នកសាងបាប	អាក្រក់ឆ្អេះឆ្អាប
		ពួកមនុស្សស្រេកឈាម	។
៤-	ឱព្រះអម្ចាស់	ទោះខ្ញុំពុំខុស	ក៏គេព្យាយាម
	ចាំស្ទាក់ប្រហារ	ជីវិតខ្ញុំភ្លាម	ពួកគេព្យាយាម
		ប្រឆាំងជានិច្ច	។
៥-	ទោះខ្ញុំមិនខុស	ក៏ពួកទាំងនោះ	នៅតែមានល្បិច
	ពួនចាំស្ទាក់ចាប់	រូបខ្ញុំមិនភ្លេច	សូមកុំកែគេច
		បែរភក្ត្រមើលផង	។
១០-	ទូលបង្គំខំប្រឹង	មើលទៅព្រះអង្គ	មិនឱ្យខានខក
	ទ្រង់ជាកម្លាំង	កំពែងជម្រក	មិនឱ្យខ្មាំងមក
		ពាធាបំភ័យ	។
១១-	ព្រះរបស់ខ្ញុំ	ហឫទ័យទូលំ	ទូលាយឥតបី
	មេត្តាករុណា	សន្តោសប្រណី	ឱ្យខ្ញុំសប្បាយ
		ដោយខ្មាំងចាញ់ដៃ	។
១៧-	រីឯខ្ញុំវិញ	ក្នុងចិត្តពោរពេញ	សរសើរមិនឈប់
	ច្រៀងលើកតម្កើង	ព្រះម្ចាស់ជាម្លប់	ថ្លែងមិនឈរឈប់
		ហឫទ័យមេត្តា	។
	ពេលព្រឹកព្រលឹម	ថ្លែងទាំងញញឹម	ពីក្តីករុណា
	របស់ព្រះអង្គ	ជាកំពែងការ	ជួយខ្ញុំនេះណា
		ពេលអាសន្នភ័យ	។
១៨-	បពិត្រព្រះម្ចាស់	ព្រះអង្គជាព្រះ	មានឫទ្ធិបារមី
	ទូលបង្គំនឹងស្មូត	បទតម្កើងថ្វាយ	ព្រះអង្គនេះហើយ
		ជាកំពែងមាំ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ៖ សូមការ‌ពារទូល‌បង្គំ ឱ្យរួចពីកណ្ដាប់ដៃរបស់អស់អ្នកដែលប៉ុនប៉ងធ្វើបាបទូល‌បង្គំ។

ទំនុកតម្កើងលេខ ៦០

ពាក្យអធិដ្ឋានក្រោយពេលមានមហន្តរាយ

“អ្នករាល់គ្នាជួបទុក្ខវេទនាក្នុងលោក ប៉ុន្តែ ចូរមានសង្ឃឹមឡើង ! ខ្ញុំបានឈ្នះលោកនេះហើយ” (យហ ១៦,៣៣)។

បន្ទរទី៣ ៖ អ្នកណារងទុក្ខលំបាក អ្នកនោះមានសុភមង្គលហើយ ដ្បិតព្រះជាម្ចាស់នឹងសង្គ្រោះអ្នកនោះ។

៣	ឱព្រះអម្ចាស់អើយ! ព្រះអង្គបោះបង់ចោលយើងខ្ញុំហើយ ព្រះអង្គធ្វើឱ្យយើងខ្ញុំបាក់ទ័ព ទោះបីជាព្រះអង្គព្រះពិរោធនឹងយើងខ្ញុំក៏ដោយ សូមស្រោចស្រង់យើងខ្ញុំឡើងវិញផង។
៤	ព្រះអង្គបានធ្វើឱ្យផែនដីរញ្ជួយ និងប្រេះចេញពីគ្នា ឥឡូវនេះ សូមព្រះអង្គភ្ជិតដីនេះ ឱ្យបានជិតគ្នាឡើងវិញផង ព្រោះផែនដីកំពុងរង្គើ។
៥	ព្រះអង្គធ្វើឱ្យប្រជារាស្ត្ររបស់ព្រះអង្គ ជួបនឹងទុក្ខវេទនាដ៏សែនពិបាក ព្រះអង្គដាក់ទោសយើងខ្ញុំស្ទើរតែវង្វេងស្មារតី។
៦	ព្រះអង្គប្រទានទង់ជ័យជាសញ្ញា ឱ្យអស់អ្នកដែលគោរពកោតខ្លាចព្រះអង្គ អាចគេចផុតពីបរាជ័យ។
៧	សូមយាងមកសង្គ្រោះយើងខ្ញុំ ដោយឫទ្ធិបារមីរបស់ព្រះអង្គ សូមឆ្លើយតបនឹងយើងខ្ញុំផង! ដើម្បីឱ្យប្រជារាស្ត្រជាទីស្រឡាញ់របស់ព្រះអង្គបានរួចជីវិត។
៨	ព្រះជាម្ចាស់មានព្រះបន្ទូលពីទីសក្ការៈរបស់ព្រះអង្គមកថា ៖ “យើងនឹងយកជ័យជម្នះ យើងនឹងបំបែកស្រុកស៊ីគែម យើងនឹងវាស់ជ្រលងភ្នំស៊ូកូត ចែកដល់ប្រជារាស្ត្ររបស់យើង។
៩	ស្រុកកាឡាតជាទឹកដីរបស់យើង ហើយស្រុកម៉ាណាសេក៏ជាទឹកដីរបស់យើងដែរ ស្រុកអេប្រាអ៊ីមប្រៀបដូចជាមួកដែករបស់យើង ហើយស្រុកយូដាជាដំបងរាជ្យរបស់យើង។
១០	ទឹកដីម៉ូអាប់ជាកន្លែងដែលយើងលាងជើង យើងបោះស្បែកជើងយើងនៅទឹកដីអេដុម យកស្រុកនេះធ្វើជាកម្មសិទ្ធិហើយ។ យើងនឹងស្រែកជយោ ក្រោយពីបានឈ្នះស្រុកភីលីស្ទីន!”។
១១	តើនរណានាំខ្ញុំចូលទៅក្នុងទីក្រុងដ៏មាំមួនបាន? តើនរណានាំខ្ញុំចូលទៅស្រុកអេដុម?
១២	ឱព្រះជាម្ចាស់អើយ! មានតែព្រះអង្គទេដែលអាចនាំយើងខ្ញុំបាន! ក៏ប៉ុន្តែ ព្រះអង្គបានបោះបង់ចោលយើងខ្ញុំ ព្រះអង្គឈប់យាងទៅជាមួយកងទ័ពយើងខ្ញុំទៀតហើយ។
១៣	សូមយាងមកជួយយើងខ្ញុំឱ្យប្រឆាំងតទល់នឹងពួកសត្រូវផង ដ្បិតការសង្គ្រោះមកពីមនុស្សលោកឥតបានការអ្វីសោះ។
១៤	បើព្រះជាម្ចាស់គង់នៅជាមួយយើងខ្ញុំ នោះយើងខ្ញុំនឹងមានជ័យជម្នះ ព្រះអង្គនឹងបង្ក្រាបបច្ចាមិត្តរបស់យើងខ្ញុំឱ្យរាប។

បន្ទរ ៖ អ្នកណារងទុក្ខលំបាក អ្នកនោះមានសុភមង្គលហើយ ដ្បិតព្រះជាម្ចាស់នឹងសង្គ្រោះអ្នកនោះ។

ពេលព្រឹក (ម៉ោង៩)

ព្រះបន្ទូលរបស់ព្រះជាម្ចាស់ (កក ៥,១៧-២០)

ពេលនោះ លោកមហា‌បូជា‌ចារ្យ និងអស់អ្នកដែលនៅជាមួយលោកទាំងប៉ុន្មាន គឺពួកខាងគណៈ‌សាឌូ‌ស៊ី មានចិត្តក្ដៅក្រហាយជាខ្លាំង។ គេលើកគ្នាមកចាប់ក្រុមគ្រីស្ដទូត យកទៅឃុំឃាំងនៅពន្ធនាគារសាធារណៈ។ លុះដល់យប់ មានទេវទូតរបស់ព្រះ‌អម្ចាស់មកបើកទ្វារពន្ធ‌នាគារឱ្យក្រុមគ្រីស្ដទូតចេញ ទាំងពោលថា៖ «សូមអញ្ជើញទៅឈរក្នុងព្រះ‌វិហារ ហើយប្រកាសព្រះ‌បន្ទូលទាំងអស់ដែលផ្ដល់ជីវិតនេះឱ្យប្រជាជនស្ដាប់ទៅ»។

បន្ទរ៖ ទូលបង្គំច្រៀងថ្វាយព្រះអង្គនៅចំពោះមុខពពួកទេវទូត។

—ទូលបង្គំក្រាបនៅក្នុងព្រះវិហារដ៏វិសុទ្ធរបស់ព្រះអង្គ ហើយទូលបង្គំលើកតម្កើងព្រះ‌នាមព្រះ‌អង្គ។

ពេលថ្ងៃត្រង់ (ម៉ោង១២)

ព្រះបន្ទូលរបស់ព្រះជាម្ចាស់ (កក ១២,៧)

ពេលនោះ ទេវទូតរបស់ព្រះ‌អម្ចាស់មកដល់ ហើយមានពន្លឺភ្លឺក្នុងទីឃុំ‌ឃាំង។ ទេវទូតដាស់លោកសិលាដោយកេះលោកពីចំហៀង ទាំងពោលថា៖ «សូមក្រោកឡើងជាប្រញាប់!»។ ច្រវាក់ក៏របូតធ្លាក់ពីដៃលោក។

បន្ទរ៖ ព្រះ‌អម្ចាស់បានចាត់ទេវទូតរបស់ព្រះ‌អង្គមកដោះលែងខ្ញុំ

—ឱ្យរួចពីកណ្ដាប់ដៃរបស់ស្ដេចហេរ៉ូដ។

ពេលរសៀល (ម៉ោង ៣)

ព្រះបន្ទូលរបស់ព្រះជាម្ចាស់ (កក ១០,៣-៥)

ថ្ងៃមួយ ប្រមាណជាម៉ោងបីរសៀល គាត់បាននិមិត្តឃើញទេវទូតមួយរូបរបស់ព្រះ‌ជាម្ចាស់យ៉ាងច្បាស់ ទេវទូតនោះចូលមកផ្ទះគាត់ ហៅគាត់ថា៖ «លោកគ័រនេល្យូសអើយ!»។ លោកគ័រនេល្យូសសម្លឹងមើលទៅទេវទូត ហើយមានប្រសាសន៍ទៅវិញ ទាំងភ័យខ្លាចថា៖ «លោកម្ចាស់អើយ! តើលោកមានការអ្វី?»។ ទេវទូតពោលមកគាត់ថា៖ «ព្រះ‌ជាម្ចាស់ព្រះ‌សណ្ដាប់ពាក្យទូល‌អង្វររបស់លោកហើយ ព្រះ‌អង្គក៏ជ្រាបអំពីទានរបស់លោកដែរ ព្រះ‌អង្គមិនភ្លេចទេ។ សុំលោកចាត់គេឱ្យទៅក្រុងយ៉ុប‌ប៉េ ឥឡូវនេះ អញ្ជើញបុរសម្នាក់ឈ្មោះស៊ីម៉ូន ហៅសិលាមក។

បន្ទរ៖ ពាក្យអធិស្ឋានរបស់ប្រជាជនដ៏‌វិសុទ្ធ កើនឡើងដូចជាផ្សែងគ្រឿងក្រអូប

—ដែលហុយចេញពីដៃទេវទូត នៅចំពោះព្រះភក្ត្ររបស់ព្រះជាម្ចាស់។

ពាក្យអធិដ្ឋាន

ឱព្រះជាម្ចាស់អើយ ! ព្រះអង្គដែលមានឧបការគុណហួសពីការស្មានសព្វព្រះហឫទ័យចាត់ទេវទូតដ៏វិសុទ្ធមកការពារយើងខ្ញុំ។ ពេលព្រះអង្គសណ្តាប់ឮសម្រែកទូលអង្វររបស់យើងខ្ញុំ សូមទ្រង់មេត្តាការពារយើងខ្ញុំគ្រប់ពេលវេលា តាមរយៈទេវទូតរបស់ព្រះអង្គ និងប្រោសឱ្យយើងខ្ញុំមានអំណរសប្បាយអស់កល្បជានិច្ច រួមជាមួយទេវទូតដ៏វិសុទ្ធទាំងឡាយ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!