៨ កញ្ញា ២០២៦

Written on 06/03/2026

Mary Siya Khim

រដូវធម្មតា សប្ដាហ៍ទី២៣ ថ្ងៃអង្គារ

ថ្ងៃកំណើតព្រះនាងព្រហ្មចារិនីម៉ារី

(បុណ្យគោរព)

(ពេលថ្ងៃ)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៩,៩៧-១០៤

ធម្មវិន័យមានឱជារស

ពេលព្រឹក (ម៉ោង៩)

បន្ទរ៖ នៅថ្ងៃនេះ យើងប្រារព្ធថ្ងៃកំណើតរបស់ព្រះនាងព្រហ្មចារិនីម៉ារី ជីវិតដ៏អស្ចារ្យរបស់ព្រះនាងបានបំភ្លឺព្រះសហគមន៍។

ពេលថ្ងៃត្រង់ (ម៉ោង១២)

បន្ទរ៖ ព្រះនាងម៉ារីប្រៀបបីដូចជាព្រះអាទិត្យរះនៅពេលថ្ងៃត្រង់ ហើយបានប្រសូតពីគ្រួសាររាជវង្ស។ យើងខ្ញុំទូលសូមជំនួយពីការអធិដ្ឋានរបស់ព្រះនាង ដោយអស់ពីចិត្ត និងគំនិត។

ពេលរសៀល (ម៉ោង៣)

បន្ទរ៖ ចូរយើងច្រៀងកោតសរសើរ និងលើកតម្កើងសិរីរុងរឿងរបស់ព្រះគ្រីស្ត នៅថ្ងៃបុណ្យដ៏វិសុទ្ធនេះ នៃព្រះនាងព្រហ្មចារិនីជាព្រះមាតារបស់ព្រះជាម្ចាស់។

៩៧-	ទូលបង្គំស្រឡាញ់ធម្មវិន័យរបស់ព្រះអង្គខ្លាំងណាស់ ទូលបង្គំសញ្ជឹងគិតអំពីធម្មវិន័យនេះជារៀងរាល់ថ្ងៃ។
៩៨-	វិន័យរបស់ព្រះអង្គធ្វើឱ្យទូលបង្គំមានប្រាជ្ញាវាងវៃជាងខ្មាំងសត្រូវ ដ្បិតទូលបង្គំរិះគិតពីវិន័យនេះជានិច្ច។
៩៩-	ទូលបង្គំចេះដឹងជាងគ្រូៗទាំងប៉ុន្មានរបស់ទូលបង្គំទៅទៀត ដ្បិតទូលបង្គំយកដំបូន្មានទាំងប៉ុន្មាននេះ មកសញ្ជឹងគិត។
១០០-	ទូលបង្គំចេះរិះគិតពិចារណា ជាងចាស់ៗព្រឹទ្ធាចារ្យទៅទៀត ដ្បិតទូលបង្គំបានប្រព្រឹត្តតាមច្បាប់របស់ព្រះអង្គ។
១០១-	ទូលបង្គំចៀសចេញឆ្ងាយពីផ្លូវអាក្រក់ទាំងប៉ុន្មាន ដើម្បីប្រតិបត្តិតាមព្រះបន្ទូលរបស់ព្រះអង្គ។
១០២-	ទូលបង្គំមិនងាកចេញពីសេចក្តីដែលព្រះអង្គបានសម្រេចឡើយ ដ្បិតព្រះអង្គប្រៀនប្រដៅទូលបង្គំដូច្នេះ។
១០៣-	ព្រះបន្ទូលសន្យារបស់ព្រះអង្គ ប្រៀបបាននឹងអាហារដ៏ឆ្ងាញ់ពិសេសសម្រាប់ទូលបង្គំ មានរសជាតិផ្អែមជាងទឹកឃ្មុំទៅទៀត។
១០៤-	ច្បាប់របស់ព្រះអង្គធ្វើឱ្យទូលបង្គំចេះរិះគិតពិចារណា ហេតុនេះហើយបានជាទូលបង្គំស្អប់ផ្លូវវៀចវេរ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ទំនុកតម្កើងលេខ ៧៤

សំណោកអំពីការបំផ្លិចបំផ្លាញព្រះវិហារ

កុំខ្លាចអស់អ្នកដែលសម្លាប់បានត្រឹមតែរូបកាយ (មថ ១០,២៨)។

(ក)

(បទព្រហ្មគីតិ)

១-	បពិត្រព្រះម្ចាស់អើយ	ដូចម្តេចឡើយក៏ព្រះអង្គ
	ឈប់នឹកទ្រង់បោះបង់	ឱ្យរញ៉ង់នៅកំព្រា	។
	ម្តេចក៏ទ្រង់ពិរោធ	យើងរហូតឱ្យវេទនា
	ភ្លេចអស់រាស្ត្រប្រជា	ធ្លាប់គាំពារត្រាប្រណី	។
២-	កុំភ្លេចព្រះសហគមន៍	ដែលទ្រង់សុំមកថ្នមបី
	ជាកម្មសិទ្ធិប្រពៃ	សូមអាល័យភ្នកនឹកនា	។
	គឺពួកកុលសម្ពន្ធ	ដែលទ្រង់បានលោះមកជា
	មរតកថ្លៃមហិមា	រកពណ៌នាក៏ពុំបាន	។
	សូមនឹកដល់បងប្អូន	ភ្នំស៊ីយ៉ូនល្អថ្កើងថ្កាន
	ទ្រង់យកជាទីស្ថាន	គង់នៅបានក្តីសុខដុម	។
៣-	សូមយាងមកវិហារ	ដែលគ្រាំគ្រាយូរខែឆ្នាំ
	សក្ការៈត្រូវខ្ទេចខ្ទាំ	លែងរឹងមាំខ្មាំងបំផ្លាញ	។
៤-	បច្ចាមិត្រព្រះអង្គ	ស្រែករំពងគ្រប់ទីស្ថាន
	ដែលព្រះអង្គធ្លាប់បាន	ជួបនឹងយើងរៀងរាល់ថ្ងៃ	។
៥-	ពួកគេប្រៀបបានទៅ	ផ្លែពូថៅអ្នកកាប់ព្រៃ
	គេប្រឹងអត់សំចៃ	រៀងរាល់ថ្ងៃឥតឈប់ឈរ	។
៦-	គេយកផ្លែពូថៅ	វាយសំដៅក្បាច់ដ៏ល្អ
	រចនាស្រស់បវរ	មិនឈប់ឈរមិនស្រណោះ	។
៧-	គេដុតទីសក្ការ	ដ៏ថ្លៃថ្លាចោលទាំងអស់
	បន្ថោកដំណាក់ព្រះ	ជាអម្ចាស់ឥតមានក្រែង	។
៨-	គេនាំគ្នាគិតថា	នឹងផ្តន្ទាឱ្យជាក់ស្តែង
	ដុតបំផ្លាញកន្លែង	គ្មានរអែងនៅក្នុងស្រុក	។
៩-	យើងខ្ញុំលែងឃើញអ្វី	ដែលប្រពៃតទៅមុខ
	ជាទីសម្គាល់ទុក	ថាជាតិយើងគឺជាអ្វី	។
	យើងលែងមានទាំងអស់	បាត់ទាំងឈ្មោះព្យាការី
	គ្មាននរណាដឹងអី	ថាយើងនៅច្នេះដល់ណា	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

(ខ)

១០-	បពិត្រព្រះជាម្ចាស់! តើឱ្យបច្ចាមិត្តត្មះតិះដៀលព្រះអង្គដល់ពេលណា? តើឱ្យខ្មាំងសត្រូវប្រមាថព្រះនាមព្រះអង្គដល់ណាទៀត?
១១-	ហេតុអ្វីបានជាព្រះអង្គមិនព្រមយាងមកជួយយើងខ្ញុំ ហេតុអ្វីបានជាព្រះអង្គលាក់ព្រះបារមីទុកដូច្នេះ?
១២-	បពិត្រព្រះជាម្ចាស់! ព្រះអង្គជាព្រះមហាក្សត្ររបស់ទូលបង្គំ តាំងពីដើមរៀងមក ព្រះអង្គតែងតែសង្គ្រោះយើងខ្ញុំជាច្រើនលើកច្រើនសា នៅក្នុងស្រុកនេះ។
១៣-	ព្រះអង្គបានបង្ក្រាបសមុទ្រ ដោយសារឫទ្ធានុភាពរបស់ព្រះអង្គ ព្រះអង្គបានវាយកម្ទេចក្បាលនាគនៅក្នុងសមុទ្រ
១៤-	ព្រះអង្គបានវាយកម្ទេចក្បាលស្តេចក្រពើ បោះវាទៅឱ្យស្តេចនានានៅវាលរហោស្ថានស៊ី។
១៥-	ព្រះអង្គបានធ្វើឱ្យមានទឹកផុសចេញពីប្រភពទឹកនានា ហូរដូចទឹកជ្រោះ ព្រះអង្គបានធ្វើឱ្យទន្លេដែលមិនចេះរីង ប្រែជារីងស្ងួតទៅវិញ។
១៦-	ព្រះអង្គជាម្ចាស់លើថ្ងៃ ជាម្ចាស់លើយប់ ព្រះអង្គបានដាក់ព្រះចន្ទ និងព្រះអាទិត្យ ភ្ជាប់នឹងកន្លែងរបស់គេ។
១៧-	ព្រះអង្គបានកំណត់ព្រំដែននៃផែនដី ព្រះអង្គក៏បានបង្កើតរដូវប្រាំង និងរដូវវស្សាដែរ។
១៨-	ឱព្រះអម្ចាស់អើយ! សូមកុំភ្លេចថា បច្ចាមិត្តបានត្មះតិះដៀលព្រះអង្គ សាសន៍ល្ងីល្ងើនោះ ជេរប្រមាថព្រះនាមព្រះអង្គ!។
១៩-	សូមកុំប្រគល់ជីវិតប្រជារាស្ត្ររបស់ព្រះអង្គ ទៅក្នុងកណ្តាប់ដៃរបស់ខ្មាំងដ៏សាហាវ សូមកុំបំភ្លេចប្រជារាស្ត្រដ៏កំសត់ទុគ៌តរបស់ព្រះអង្គ ជារៀងរហូតឡើយ។
២០-	សូមនឹកដល់សម្ពន្ធមេត្រីដែលព្រះអង្គបានចងជាមួយយើងខ្ញុំ! ប្រជាជននាំគ្នាលាក់ខ្លួន ព្រោះមានមនុស្សឃោរឃៅពាសពេញស្រុក។
២១-	សូមកុំឱ្យអស់អ្នកដែលត្រូវគេជិះជាន់ អាម៉ាស់មុខទៀតឡើយ សូមឱ្យជនក្រីក្រ និងជនកំសត់ទុគ៌ត សរសើរតម្កើងព្រះនាមព្រះអង្គ។
២២-	ឱព្រះជាម្ចាស់អើយ ! សូមក្រោកឡើងការពារព្រះកិត្តិនាមរបស់ព្រះអង្គ សូមកុំបំភ្លេចពាក្យដែលជនល្ងីល្ងើទាំងនេះ ប្រមាថព្រះអង្គជារៀងរាល់ថ្ងៃ។
២៣-	សូមកុំបំភ្លេចសម្រែកនៃខ្មាំងសត្រូវរបស់ព្រះអង្គ គេស្រែកយ៉ាងអឺងកងទាស់នឹងព្រះអង្គ ឥតឈប់ឈរឡើយ។

ពេលព្រឹក (ម៉ោង៩)

ព្រះបន្ទូលរបស់ព្រះជាម្ចាស់ (បច ៦,១០)

តើស្ត្រីដែលមានសម្ផស្ស ដូចពេលអរុណរះ មានរូបឆោមល្អដូចព្រះច័ន្ទ មានពន្លឺរស្មីដូចព្រះ‌អាទិត្យ ហើយដូចហ្វូងតារាគួរឱ្យស្ញប់‌ស្ញែងនេះជានរណា?។

បន្ទរ៖ អ្នកណាស្ដាប់ព្រះ‌បន្ទូលរបស់ព្រះជាម្ចាស់
—ហើយអនុវត្តតាម គឺអ្នកនោះហើយដែលមានសុភមង្គលពិតមែន។

ពេលថ្ងៃត្រង់ (ម៉ោង១២)

ព្រះបន្ទូលរបស់ព្រះជាម្ចាស់ (យឌ ១៣,១៨ខ-១៩)

សូមលើកតម្កើងព្រះជាអម្ចាស់ដែលបានបង្កើតផ្ទៃមេឃ និងផែនដី គឺព្រះ‌អង្គបាននាំផ្លូវនាង ទៅវាយក្បាលរបស់មេដឹកនាំខ្មាំងសត្រូវយើង។ មនុស្សជំនាន់ក្រោយនឹងមិនភ្លេចសេចក្ដីសង្ឃឹមរបស់នាងឡើយ ហើយចងចាំស្នាព្រះហស្តរបស់ព្រះជាម្ចាស់ ប្រកបដោយតេជានុភាពអស់កល្បជានិច្ច។

បន្ទរ៖ ព្រះនាងព្រហ្មចារិនីម៉ារីមានសុភមង្គលហើយ
—ដ្បិតព្រះនាងបានបង្កើតព្រះបុត្រានៃព្រះបិតា ដែលគង់នៅអស់កល្បជានិច្ច។

ពេលរសៀល (ម៉ោង៣)

ព្រះបន្ទូលរបស់ព្រះជាម្ចាស់ (វវ ២១,៣)

ខ្ញុំឮសំឡេងបន្លឺយ៉ាងខ្លាំងៗចេញពីបល្ល័ង្កមកថា៖ «មើលហ្ន៎ ព្រះពន្លារបស់ព្រះជាម្ចាស់ស្ថិតនៅជាមួយមនុស្សលោកហើយ! ព្រះអង្គនឹងស្ថិតនៅក្នុងចំណោមពួកគេ ពួកគេនឹងទៅជាប្រជារាស្ដ្ររបស់ព្រះអង្គ ហើយព្រះជាម្ចាស់ផ្ទាល់នឹងគង់ជាមួយពួកគេ។

បន្ទរ៖ ព្រះអង្គបានប្រទានពរដល់នាងលើសស្រ្តីទាំងឡាយ
—ហើយទ្រង់ក៏ប្រទានពរដល់បុត្រព្រះនាងដែរ។

ពាក្យអធិដ្ឋាន

ឱព្រះជាអម្ចាស់អើយ ! ព្រះអង្គតែងតែប្រទានព្រះអំណោយទានពីស្ថានបរមសុខមកអ្នកបម្រើព្រះអង្គ សូមឱ្យអស់អ្នកដែលបានទទួលការសង្គ្រោះ តាមរយៈកំណើតបុត្រាព្រះនាងម៉ារី បានប្រកបដោយសេចក្តីសុខសាន្តនៅថ្ងៃបុណ្យកំណើតព្រះនាងផង។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

-សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!