រដូវធម្មតា សប្ដាហ៍ទី១១ ថ្ងៃពុធ
(ពេលថ្ងៃ)
ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន! (អាលេលូយ៉ា!)
ចម្រៀងចូល
ទំនុកតម្កើងលេខ ១១៩,១០៥-១១២
ពន្លឺបំភ្លឺមាគ៌ា
បន្ទរទី១ ៖ អ្នកណាមកតាមខ្ញុំ អ្នកនោះនឹងមិនដើរក្នុងសេចក្ដីងងឹតឡើយ គឺគេមានពន្លឺនាំគេទៅកាន់ជីវិត។
| ១០៥ | ព្រះបន្ទូលរបស់ព្រះអង្គជាចង្កៀងដែលបំភ្លឺជំហានទូលបង្គំ និងជាពន្លឺដែលបំភ្លឺផ្លូវរបស់ទូលបង្គំ។ |
| ១០៦ | ទូលបង្គំសូមសន្យាដោយឥតងាករេថា ទូលបង្គំនឹងប្រតិបត្តិតាមសេចក្តីសម្រេចដ៏សុចរិតរបស់ព្រះអង្គ។ |
| ១០៧ | បពិត្រព្រះអម្ចាស់! ទូលបង្គំរងទុក្ខវេទនាខ្លាំងពន់ពេកណាស់ សូមប្រោសប្រទានឱ្យទូលបង្គំមានជីវិតឡើងវិញ ស្របតាមព្រះបន្ទូលរបស់ព្រះអង្គផង! |
| ១០៨ | ឱព្រះអម្ចាស់អើយ! សូមទទួលពាក្យអង្វររបស់ទូលបង្គំទុកជាតង្វាយ សូមបង្រៀនក្រិត្យវិន័យរបស់ព្រះអង្គឱ្យទូលបង្គំស្គាល់ផង! |
| ១០៩ | ជីវិតទូលបង្គំប្រឈមមុខទល់នឹងអន្តរាយជានិច្ច ប៉ុន្តែ ទូលបង្គំមិនភ្លេចធម្មវិន័យរបស់ព្រះអង្គទេ។ |
| ១១០ | មនុស្សអាក្រក់នាំគ្នាដាក់អន្ទាក់ចាំចាប់ទូលបង្គំ តែទូលបង្គំមិនវង្វេងចេញឆ្ងាយពីច្បាប់របស់ព្រះអង្គឡើយ។ |
| ១១១ | ដំបូន្មានរបស់ព្រះអង្គជាកេរមត៌ករបស់ទូលបង្គំ ដំបូន្មានទាំងនេះធ្វើឱ្យទូលបង្គំមានអំណរនៅក្នុងចិត្ត។ |
| ១១២ | ទូលបង្គំប្តេជ្ញាចិត្តធ្វើតាមក្រិត្យវិន័យរបស់ព្រះអង្គ គឺជារង្វាន់របស់ទូលបង្គំរហូតដល់ទីបំផុត។ |
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!
បន្ទរ ៖ អ្នកណាមកតាមខ្ញុំ អ្នកនោះនឹងមិនដើរក្នុងសេចក្ដីងងឹតឡើយ គឺគេមានពន្លឺនាំគេទៅកាន់ជីវិត។
ទំនុកតម្កើងលេខ ៧០
ឱព្រះអម្ចាស់អើយ! សូមយាងមកសង្គ្រោះទូលបង្គំជាប្រញាប់!
លោកម្ចាស់អើយ! សូមជួយផង យើងស្លាប់ឥឡូវហើយ» (មថ ៨,២៥)។
បន្ទរទី២ ៖ ទូលបង្គំជាមនុស្សកំសត់ទុគ៌ត ឱព្រះជាម្ចាស់អើយ សូមយាងមករំដោះទូលបង្គំផង!
(បទពាក្យ ៧)
| ២- | ឱព្រះជាម្ចាស់នៃខ្ញុំអើយ | សូមយាងមកហើយជួយរំដោះ | |
| សូមទ្រង់មេត្តាជួយសង្គ្រោះ | ប្រោសខ្ញុំឱ្យរស់បានឆាប់ៗ | ។ | |
| ៣- | ឱ្យអ្នកព្យាបាទជីវិតខ្ញុំ | ត្រូវជួបទុក្ខធំកិត្តិយសអាប់ | |
| ទាំងអ្នកដែលប៉ងចង់ធ្វើបាប | វិនាសឆុតឆាប់ត្រូវដកខ្លួន | ។ | |
| ៤- | សូមឱ្យអ្នកដែលសើចចំអក | លែបខាយឡឺយឡកវិនាសសូន្យ | |
| ត្រូវបរាជ័យមិនរួចខ្លួន | កិត្តិយសសាបសូន្យអន្តរាយ | ។ | |
| ៥- | រីអ្នកស្រឡាញ់ការសង្គ្រោះ | ឱ្យគេទាំងនោះជួបសប្បាយ | |
| ថ្លែងឥតឈប់ឈរទាំងយប់ថ្ងៃ | សូមលើកសិរីថ្កើងព្រះអង្គ | ។ | |
| ៦- | ឱព្រះអម្ចាស់ទូលបង្គំ | រស់រងទុក្ខធំវេទនាណាស់ | |
| សូមយាងមកជួយដោយរូតរះ | មេត្តាសង្គ្រោះកុំបង្អង់ | ។ | |
| សូមកោតសរសើរព្រះបិតា | ព្រះបុត្រានិងព្រះវិញ្ញាណ | ||
| ដែលគង់ស្ថិតស្ថេរឥតសៅហ្មង | យូរលង់កន្លងតរៀងទៅ | ។ |
បន្ទរ ៖ ទូលបង្គំជាមនុស្សកំសត់ទុគ៌ត ឱព្រះជាម្ចាស់អើយ សូមយាងមករំដោះទូលបង្គំផង!
ទំនុកតម្កើងលេខ ៧៥
ព្រះជាម្ចាស់ជាចៅក្រម
ព្រះអង្គបានទម្លាក់អ្នកកាន់អំណាចចុះពីតំណែង ហើយព្រះអង្គលើកតម្កើងមនុស្សទន់ទាបឡើង (លក ១,៥២)។
បន្ទរទី៣ ៖ ព្រះជាម្ចាស់ ជាព្រះនៃសេចក្តីសុចរិត និងយុត្តិធម៌ ព្រះអង្គមិនកាត់ក្តីតាមលក្ខណៈខាងក្រៅឡើយ។
| ២- | បពិត្រព្រះជាម្ចាស់! យើងខ្ញុំសូមសរសើរតម្កើងព្រះអង្គ! យើងខ្ញុំសូមសរសើរតម្កើងព្រះនាមព្រះអង្គ ដែលគង់នៅជិតយើងខ្ញុំ យើងខ្ញុំរៀបរាប់អំពីស្នាព្រះហស្ត ដ៏គួរឱ្យស្ញប់ស្ញែងរបស់ព្រះអង្គ! |
| ៣- | ព្រះអង្គមានព្រះបន្ទូលថា “ដល់គ្រាដែលយើងបានកំណត់ទុក យើងនឹងវិនិច្ឆ័យដោយយុត្តិធម៌! |
| ៤- | ផែនដី និងសត្វលោកទាំងអស់ ដែលរស់នៅលើផែនដីនឹងត្រូវរលាយ គឺយើងដែលបានធ្វើឱ្យផែនដីនៅតែរឹងមាំ!”។ |
| ៥- | យើងនិយាយប្រាប់មនុស្សអួតបំប៉ោងថា “កុំអួតបំប៉ោងទៀត!” ហើយប្រាប់មនុស្សពាលថា “កុំវាយឫកខ្ពស់!” |
| ៦- | កុំប្រកាន់ឫកខ្ពស់ពេក ឈប់និយាយព្រហើនកោងកាចទៅ! |
| ៧- | អ្នកដែលវិនិច្ឆ័យ មិនមែនមកពីខាងកើត ឬខាងលិច ហើយក៏មិនមែនមកពីខាងត្បូង ឬខាងជើងដែរ |
| ៨- | គឺព្រះជាម្ចាស់ទេតើដែលវិនិច្ឆ័យ ព្រះអង្គដាក់ទោសអ្នកនេះ ហើយលើកលែងទោសអ្នកនោះ។ |
| ៩- | ព្រះអម្ចាស់កាន់ពែងមួយនៅក្នុងព្រះហស្ត គឺពែងដែលពេញទៅដោយព្រះពិរោធ ពេលព្រះអង្គចាក់ពែងនោះទៅលើផែនដី មនុស្សអាក្រក់ទាំងប៉ុន្មាន ត្រូវតែទទួលទោសចៀសមិនផុតឡើយ។ |
| ១០- | រីឯខ្ញុំវិញ ខ្ញុំនឹងប្រកាសអំពីព្រះរបស់លោកយ៉ាកុបរហូតតរៀងទៅ ខ្ញុំនឹងច្រៀងតម្កើងព្រះអង្គ។ |
| ១១- | ព្រះអង្គនឹងបំបាក់អំនួតរបស់មនុស្សពាល តែព្រះអង្គនឹងលើកមុខមនុស្សសុចរិតឡើង។ |
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!
បន្ទរ ៖ ព្រះជាម្ចាស់ ជាព្រះនៃសេចក្តីសុចរិត និងយុត្តិធម៌ ព្រះអង្គមិនកាត់ក្តីតាមលក្ខណៈខាងក្រៅឡើយ។
ពេលព្រឹក (ម៉ោង៩)
ព្រះបន្ទូលរបស់ព្រះជាម្ចាស់ (១ករ ១៣,៤-៧)
អ្នកមានចិត្តស្រឡាញ់ តែងតែអត់ធ្មត់ ជួយធុរៈគេ ហើយមិនចេះឈ្នានីសគេទេ។ អ្នកមានចិត្តស្រឡាញ់ មិនវាយឫកខ្ពស់ មិនអួតបំប៉ោងឡើយ។ អ្នកមានចិត្តស្រឡាញ់ មិនប្រព្រឹត្តអំពើថោកទាប មិនស្វែងរកប្រយោជន៍ផ្ទាល់ខ្លួន មិនមួម៉ៅ មិនចងគំនុំ មិនអបអរនឹងអំពើទុច្ចរិតទេ តែរីករាយនឹងសេចក្ដីពិតវិញ។ អ្នកមានចិត្តស្រឡាញ់ អត់ឱនឱ្យទាំងអស់ ជឿទាំងអស់ សង្ឃឹមទាំងអស់ ហើយទ្រាំទ្រទាំងអស់។
—ពួកគេនឹងសរសើរតម្កើងព្រះនាមរបស់ព្រះអង្គ អស់កល្បជាអង្វែងតរៀងទៅ!។
ពាក្យអធិដ្ឋាន
បពិត្រព្រះជាម្ចាស់ជាព្រះបិតា! ព្រះអង្គជាសេចក្តីពិត ព្រះអង្គបានប្រទានព្រះវិញ្ញាណដ៏វិសុទ្ធតាមព្រះបន្ទូលសន្យា ដើម្បីនាំសេចក្តីស្រឡាញ់ទៅដល់អស់អ្នកបាបដែលបានឃ្លាតឆ្ងាយពីព្រះអង្គ ឱ្យមករួមគ្នាជាធ្លុងតែមួយវិញ។ សូមព្រះអង្គប្រទានកម្លាំងដល់យើងខ្ញុំ ដើម្បីរួមគ្នាកសាងសន្តិភាពក្នុងពិភពលោកផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!
ពេលថ្ងៃត្រង់ (ម៉ោង១២)
ព្រះបន្ទូលរបស់ព្រះជាម្ចាស់ (១ករ ១៣,៨-៩.១៣)
សេចក្ដីស្រឡាញ់មិនសាបសូន្យសោះឡើយ តែការថ្លែងព្រះបន្ទូលមុខជាត្រូវអស់ខ្លឹមសារ ការនិយាយភាសាចម្លែកអស្ចារ្យនឹងត្រូវចប់ រីឯចំណេះក៏នឹងអស់ខ្លឹមសារទៅដែរ។ សព្វថ្ងៃនេះ យើងចេះដឹងត្រឹមតែមួយផ្នែកប៉ុណ្ណោះ ហើយយើងក៏ថ្លែងព្រះបន្ទូល បានត្រឹមតែមួយផ្នែកប៉ុណ្ណោះដែរ។ ឥឡូវនេះ មានសេចក្ដីបីយ៉ាង គឺជំនឿ សេចក្ដីសង្ឃឹម សេចក្ដីស្រឡាញ់។ ប៉ុន្តែ សេចក្ដីស្រឡាញ់វិសេសជាងគេបំផុត។
—ដ្បិតយើងខ្ញុំផ្ញើជីវិតលើព្រះអង្គហើយ។
ពាក្យអធិដ្ឋាន
បពិត្រព្រះជាម្ចាស់ ដែលមានព្រះហឫទ័យមេត្តាករុណាយ៉ាងក្រៃលែង! នៅពេលថ្ងៃត្រង់នេះ ជាពេលវេលាដែលព្រះអង្គប្រទានឱ្យយើងខ្ញុំ បានឈប់សម្រាក។ សូមព្រះអង្គប្រទានពរដល់កិច្ចការដែលយើងខ្ញុំធ្វើ ឱ្យបង្កើតបានផលផ្លែល្អ ហើយឱ្យយើងខ្ញុំបញ្ចប់កិច្ចការទាំងនេះ ដោយគាប់ព្រះហឫទ័យព្រះអង្គផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!
ពេលរសៀល (ម៉ោង៣)
ព្រះបន្ទូលរបស់ព្រះជាម្ចាស់ (កូឡ ៣,១៤-១៥)
ត្រូវមានចិត្តស្រឡាញ់ ដ្បិតសេចក្តីស្រឡាញ់ធ្វើឱ្យបងប្អូនរួបរួមគ្នាពេញលក្ខណៈ។ សូមឱ្យសេចក្តីសុខសាន្តរបស់ព្រះគ្រីស្តសោយរាជ្យនៅក្នុងចិត្តបងប្អូន ព្រោះព្រះជាម្ចាស់បានត្រាស់ហៅបងប្អូនឱ្យមករួមគ្នា ក្នុងព្រះកាយតែមួយ ដើម្បីឱ្យបងប្អូនបានប្រកបដោយសេចក្តីសុខសាន្ត។ ត្រូវអរព្រះគុណព្រះអង្គជានិច្ច។
—ពួកគេនឹងរីករាយក្នុងសេចក្តីសុខសាន្តយ៉ាងពេញបរិបូណ៌។
ពាក្យអធិដ្ឋាន
បពិត្រព្រះយេស៊ូគ្រីស្តជាអម្ចាស់ ! ដើម្បីសង្រ្គោះមនុស្សទាំងអស់ ព្រះអង្គបានលាតត្រដាងព្រះហស្តនៅលើឈើឆ្កាង។ សូមឱ្យកិច្ចការដែលយើងខ្ញុំប្រព្រឹត្តបានគាប់ព្រះហឫទ័យព្រះអង្គ និងបានប្រកាសពីការសង្រ្គោះរបស់ព្រះអង្គទៅដល់ពិភពលោកផង។ ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។ អាម៉ែន!
-សូមកោតសរសើរព្រះអម្ចាស់
-សូមអរព្រះគុណព្រះជាម្ចាស់ !