២៦ ឧសភា ២០២៦

បុណ្យរម្លឹក
សន្តហ្វីលីព នេរី ជាបូជាចារ្យ
សូមចុចទីនេះ

លោកភីលីព នេរី (១៥១៥-១៥៩៥) ចូលចិត្តកំប្លែង និងតែងនិយាយថា៖ “នាំឱ្យគេសប្បាយរីករាយ​ ជាផ្លូវល្អជាងគេ ដើម្បីណែនាំឱ្យគេគោរពប្រណិប័តន៍ព្រះជាម្ចាស់”។ ដោយលោកមានចិត្តសប្បាយ ចេះតែធ្វើសកម្មភាបផ្សេងៗដែលគ្មាននណានឹកគិចជាមុន យុវជនស្រឡាញ់លោកយ៉ាងខ្លាំង។ លោកបង្កើតក្រុមគ្រួសារបព្វជិតមួយ ដែលយកចិត្តទុកដាក់បង្ហាញសេចក្តីស្រឡាញ់ចំពោះព្រះជាម្ចាស់ និងចំពោះអ្នកក្រីក្រ។

សូមថ្លែងលិខិតទី១ របស់គ្រីស្តទូតសិលា (១សល ១,១០-១៦)

បងប្អូនជាទីស្រឡាញ់!
ព្យាការីដែលថ្លែងព្រះបន្ទូលអំពីព្រះហឫទ័យប្រណីសន្តោសរបស់ព្រះជាម្ចាស់ចំពោះបងប្អូន នាំគ្នាស្រាវជ្រាវ និងរិះរកចង់ដឹងអំពីការសង្គ្រោះនេះ។ ព្រះវិញ្ញាណរបស់ព្រះគ្រីស្តដែលគង់នៅក្នុងព្យាការីទាំងនោះ បានបញ្ជាក់ប្រាប់ជាមុនអំពីទុក្ខលំបាករបស់ព្រះគ្រីស្ត និងអំពីសិរីរុងរឿងដែលព្រះអង្គនឹងទទួលតាមក្រោយ។ ពួកលោកក៏បានរិះគិតចង់ដឹងថា តើព្រឹត្តិការណ៍នេះនឹងកើតនៅជំនាន់ណា ក្នុងកាលៈ​ទេសៈណា។ ព្រះជាម្ចាស់បានសម្តែងឱ្យព្យាការីទាំងនោះដឹងថា សេចក្តីដែលពួក​លោកថ្លែង មិនមែនសម្រាប់ពួកលោកទេ គឺសម្រាប់បងប្អូនវិញ។ ឥឡូវនេះ ពួកអ្នក​ប្រកាសដំណឹងល្អ បាននាំដំណឹងមកប្រាប់បងប្អូនអំពីសេចក្តីទាំងនោះ ក្រោមការ​ណែនាំរបស់ព្រះវិញ្ញាណដ៏វិសុទ្ធដែលព្រះជាម្ចាស់បានចាត់ពីស្ថានបរមសុខមក។ សូម្បី​តែពួកទេវទូត ក៏ប្រាថ្នាចង់យល់ជម្រៅនៃសេចក្តីទាំងនោះដែរ។ ហេតុនេះ សូមបងប្អូនប្រុងប្រៀបចិត្តគំនិតឱ្យមែនទែន កុំភ្លេចខ្លួនឱ្យសោះ ត្រូវមានចិត្តសង្ឃឹមទាំងស្រុង​ថា នឹងទទួលព្រះអំណោយទានដែលព្រះជាម្ចាស់ប្រោសប្រទានឱ្យបងប្អូននៅថ្ងៃព្រះយេស៊ូគ្រីស្តនឹងសម្តែងព្រះអង្គឱ្យមនុស្សលោកឃើញ។ ចូរធ្វើដូចកូនដែលចេះស្តាប់បង្គាប់ គឺមិនត្រូវធ្វើតាមចិត្តប៉ងប្រាថ្នាដែលបងប្អូនធ្លាប់មាន កាលមិនទាន់ស្គាល់​ព្រះអង្គនោះឡើយ។ ផ្ទុយទៅវិញ ព្រះអង្គដែលបានត្រាស់ហៅបងប្អូន ទ្រង់វិសុទ្ធ​យ៉ាងណា បងប្អូនក៏ត្រូវតែវិសុទ្ធក្នុងគ្រប់កិច្ចការដែលបងប្អូនប្រព្រឹត្តយ៉ាងនោះដែរ ដ្បិតក្នុងគម្ពីរមានចែងទុកថា “អ្នករាល់គ្នាត្រូវតែវិសុទ្ធ ព្រោះយើងវិសុទ្ធ”។

ទំនុកតម្កើងលេខ ៩៨(៩៧),១-៤ បទកាកគតិ

ពិធីអបអរសាទរព្រះគម្ពីរដំណឹងល្អតាម (មថ ១១,២៥)

អាលេលូយ៉ា! អាលេលូយ៉ា!
បពិត្រព្រះបិតាជាអម្ចាស់នៃស្ថានបរមសុខ និងជាអម្ចាស់នៃផែនដី! យើងខ្ញុំសូមសរសើរតម្កើងព្រះអង្គ ព្រោះទ្រង់បានសម្តែងការណ៍អស្ចារ្យនៃព្រះរាជ្យឱ្យអ្នកតូចតាចស្គាល់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស (មក ១០,២៨-៣១)

លោកសិលាទូលព្រះយេស៊ូថា៖ «ព្រះអង្គទតឃើញស្រាប់ហើយថា យើងខ្ញុំបានលះបង់ចោលអ្វីៗទាំងអស់ ហើយយើងខ្ញុំមកតាមព្រះអង្គ»។ ព្រះយេស៊ូមានព្រះបន្ទូលតបថា៖ «ខ្ញុំសុំប្រាប់អ្នករាល់គ្នាដឹងច្បាស់ថា អ្នកណាលះបង់ផ្ទះសម្បែង បងប្អូនប្រុសស្រី ឪពុកម្តាយ កូន ឬស្រែចម្ការព្រោះតែខ្ញុំ និងព្រោះតែដំណឹងល្អ អ្នកនោះនឹង​ទទួលមួយជាមួយរយ ក្នុងពេលឥឡូវនេះ គឺទទួលផ្ទះសម្បែង បងប្អូនប្រុសស្រី ម្តាយ កូន និងស្រែចម្ការ ព្រមទាំងទទួលការបៀតបៀន ហើយក៏នឹងមានជីវិតអស់កល្បជានិច្ចនៅលោកខាងមុខថែមទៀតផង។ មនុស្សជាច្រើនដែលនៅខាងមុខនឹង​ត្រឡប់ទៅនៅខាងក្រោយ រីឯអ្នកដែលនៅខាងក្រោយនឹងត្រឡប់ទៅនៅខាងមុខ​វិញ»។